Ribhu Gita - Siva Rahasya Purana Amsha 6

ঋভুগীতা ৪৫ ॥ নিদাধ-কৃত-গুরু-স্তুতি বর্ণনম্ ॥

নিদাঘঃ -

পুণ্যে শিবরহস্যেঽস্মিন্নিতিহাসে শিবোদিতে ।
দেব্যৈ শিবেন কথিতে দেব্যা স্কন্দায মোদতঃ ॥ ১॥
তদেতস্মিন্ হি ষষ্ঠাংশে ষডাস্যকমলোদিতে ।
পারমেশ্বরবিজ্ঞানং শ্রুতমেতন্মহাঘভিত্ ॥ ২॥
মহামাযাতমস্তোমবিনিবারণভাস্করম্ ।
অস্যাধ্যাযৈককথনাদ্ বিজ্ঞানং মহদশ্নুতে ॥ ৩॥
শ্লোকস্য শ্রবণেনাপি জীবন্মুক্তো ন সংশযঃ ।
এতদ্গ্রন্থপ্রবক্তা হি ষণ্মুখঃ শিব এব হি ॥ ৪॥
জৈগীষব্যো মহাযোগী স এব শ্রবণেঽর্হতি ।
ভস্মরুদ্রাক্ষধৃঙ্ নিত্যং সদা হ্যত্যাশ্রমী মুনিঃ ॥ ৫॥
এতদ্গ্রন্থপ্রবক্তা হি স গুরুর্নাত্র সংশযঃ ।
এতদ্গ্রন্থপ্রবক্তা হি পরং ব্রহ্ম ন সংশযঃ ॥ ৬॥
এতদ্গ্রন্থপ্রবক্তা হি শিব এব ন চাপরঃ ।
এতদ্গ্রন্থপ্রবক্তা হি সাক্ষাদ্দেবী ন সংশযঃ ॥ ৭॥
এতদ্গ্রন্থপ্রবক্তা হি গণেশো নাত্র সংশযঃ ।
এতদ্গ্রন্থপ্রবক্তা হি স্কন্দঃ স্কন্দিততারকঃ ॥ ৮॥
এতদ্গ্রন্থপ্রবক্তা হি নন্দিকেশো ন সংশযঃ ।
এতদ্গ্রন্থপ্রবক্তা হি দত্তাত্রেযো মুনিঃ স্বযম্ ॥ ৯॥
এতদ্গ্রন্থপ্রবক্তা হি দক্ষিণামূর্তিরেব হি ।
এতদ্গ্রন্থার্থকথনে ভাবনে মুনযঃ সুরাঃ ॥ ১০॥
ন শক্তা মুনিশার্দূল ত্বদৃতেঽহং শিবং শপে ।
এতদ্গ্রন্থার্থবক্তারং গুরুং সর্বাত্মনা যজেত্ ॥ ১১॥
এতদ্গ্রন্থপ্রবক্তা তু শিবো বিঘ্নেশ্বরঃ স্বযম্ ।
পিতা হি জন্মদো দাতা গুরুর্জন্মবিনাশকঃ ॥ ১২॥
এতদ্গ্রন্থং সমভ্যস্য গুরোর্বাক্যাদ্বিশেষতঃ ।
ন দুহ্যেত গুরুং শিষ্যো মনসা কিঞ্চ কাযতঃ ॥ ১৩॥
গুরুরেব শিবঃ সাক্ষাত্ গুরুরেব শিবঃ স্বযম্ ।
শিবে রুষ্টে গুরুস্ত্রাতা গুরৌ রুষ্টে ন কশ্চন ॥ ১৪॥
এতদ্গ্রন্থপদাভ্যাসে শ্রদ্ধা বৈ কারণং পরম্ ।
অশ্রদ্ধধানঃ পুরুষো নৈতল্লেশমিহার্হতি ॥ ১৫॥
শ্রদ্ধৈব পরমং শ্রেযো জীবব্রহ্মৈক্যকারণম্ ।
অস্তি ব্রহ্মেতি চ শ্রুত্বা ভাবযন্ সন্ত এব হি ॥ ১৬॥
শিবপ্রসাদহীনো যো নৈতদ্গ্রন্থার্থবিদ্ভবেত্ ।
ভাবগ্রাহ্যোঽযমাত্মাযং পর একঃ শিবো ধ্রুবঃ ॥ ১৭॥
সর্বমন্যত্ পরিত্যজ্য ধ্যাযীতেশানমব্যযম্ ।
শিবজ্ঞানমিদং শুদ্ধং দ্বৈতাদ্বৈতবিনাশনম্ ॥ ১৮॥
অন্যেষু চ পুরাণেষু ইতিহাসেষু ন ক্বচিত্ ।
এতাদৃশং শিবজ্ঞানং শ্রুতিসারমহোদযম্ ॥ ১৯॥
উক্তং সাক্ষাচ্ছিবেনৈতদ্ যোগসাংখ্যবিবর্জিতম্ ।
ভাবনামাত্রসুলভং ভক্তিগম্যমনামযম্ ॥ ২০॥
মহানন্দপ্রদং সাক্ষাত্ প্রসাদেনৈব লভ্যতে ।
তস্যৈতে কথিতা হ্যর্থাঃ প্রকাশন্তে মহাত্মনঃ ॥ ২১॥
এতদ্গ্রন্থং গুরোঃ শ্রুত্বা ন পূজাং কুরুতে যদি ।
শ্বানযোনিশতং প্রাপ্য চণ্ডালঃ কোটিজন্মসু ॥ ২২॥
এতদ্গ্রন্থস্য মাহাত্ম্যং ন যজন্তীশ্বরং হৃদা ।
স সূকরো ভবত্যেব সহস্রপরিবত্সরান্ ॥ ২৩॥
এতদ্গ্রন্থার্থবক্তারমভ্যসূযেত যো দ্বিজঃ ।
অনেকব্রহ্মকল্পং চ বিষ্ঠাযাং জাযতে ক্রিমিঃ ॥ ২৪॥
এতদ্গ্রন্থার্থবিদ্ব্রহ্মা স ব্রহ্ম ভবতি স্বযম্ ।
কিং পুনর্বহুনোক্তেন জ্ঞানমেতদ্বিমুক্তিদম্ ॥ ২৫॥
যস্ত্বেতচ্ছৃণুযাচ্ছিবোদিমহাবেদান্তাংবুধি (?)
বীচিজাতপুণ্যং নাপেক্ষত্যনিশং ন চাব্দকল্পৈঃ ।
শব্দানাং নিখিলো রসো হি স শিবঃ কিং বা তুষাদ্রি
পরিখংডনতো ভবেত্ স্যাত্ তণ্ডুলোঽপি স মৃষা ভবমোহজালম্ ॥ ২৬॥
তদ্বত্ সর্বমশাস্ত্রমিত্যেব হি সত্যং
দ্বৈতোত্থং পরিহায বাক্যজালম্ ।
এবং ত্বং ত্বনিশং ভজস্ব নিত্যং
শান্তোদ্যখিলবাক্ সমূহভাবনা ॥ ২৭॥
সত্যত্বাভাবভাবিতোঽনুরূপশীলঃ ।
সংপশ্যন্ জগদিদমাসমঞ্জসং সদা হি ॥ ২৮॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে নিদাঘকৃতগুরুস্তুতিবর্ণনং নাম পঞ্চচত্বারিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com