Ribhu Gita - Siva Rahasya Purana Amsha 6

ঋভুগীতা ২৩ ॥ রহস্যোপদেশ প্রকরণম্ ॥

ঋভুঃ -

নিদাঘ শৃণু বক্ষ্যামি সর্বলোকেষু দুর্লভম্ ।
ইদং ব্রহ্ম পরং ব্রহ্ম সচ্চিদানন্দ এব হি ॥ ১॥
নানাবিধজনং লোকং নানা কারণকার্যকম্ ।
ব্রহ্মৈবান্যদসত্ সর্বং সচ্চিদানন্দ এব হি ॥ ২॥
অহং ব্রহ্ম সদা ব্রহ্ম অস্মি ব্রহ্মাহমেব হি ।
কালো ব্রহ্ম ক্ষণো ব্রহ্ম অহং ব্রহ্ম ন সংশযঃ ॥ ৩॥
বেদো ব্রহ্ম পরং ব্রহ্ম সত্যং ব্রহ্ম পরাত্ পরঃ ।
হংসো ব্রহ্ম হরির্ব্রহ্ম শিবো ব্রহ্ম চিদব্যযঃ ॥ ৪॥
সর্বোপনিষদো ব্রহ্ম সাম্যং ব্রহ্ম সমোঽস্ম্যহম্ ।
অজো ব্রহ্ম রসো ব্রহ্ম বিযদ্ব্রহ্ম পরাত্পরঃ ॥ ৫॥
ত্রুটির্ব্রহ্ম মনো ব্রহ্ম ব্যষ্টির্ব্রহ্ম সদামুদঃ ।
ইদং ব্রহ্ম পরং ব্রহ্ম তত্ত্বং ব্রহ্ম সদা জপঃ ॥ ৬॥
অকারো ব্রহ্ম এবাহমুকারোঽহং ন সংশযঃ ।
মকারব্রহ্মমাত্রোঽহং মন্ত্রব্রহ্মমনুঃ পরম্ ॥ ৭॥
শিকারব্রহ্মমাত্রোঽহং বাকারং ব্রহ্ম কেবলম্ ।
যকারং ব্রহ্ম নিত্যং চ পঞ্চাক্ষরমহং পরম্ ॥ ৮॥
রেচকং ব্রহ্ম সদ্ব্রহ্ম পূরকং ব্রহ্ম সর্বতঃ ।
কুংভকং ব্রহ্ম সর্বোঽহং ধারণং ব্রহ্ম সর্বতঃ ॥ ৯॥
ব্রহ্মৈব নান্যত্ তত্সর্বং সচ্চিদানন্দ এব হি ।
এবং চ নিশ্চিতো মুক্তঃ সদ্য এব ন সংশযঃ ॥ ১০॥
কেচিদেব মহামূঢাঃ দ্বৈতমেবং বদন্তি হি ।
ন সংভাষ্যাঃ সদানর্হা নমস্কারে ন যোগ্যতা ॥ ১১॥
মূঢা মূঢতরাস্তুচ্ছাস্তথা মূঢতমাঃ পরে ।
এতে ন সন্তি মে নিত্যং অহংবিজ্ঞানমাত্রতঃ ॥ ১২॥
সর্বং চিন্মাত্ররূপত্বাদানন্দত্বান্ন মে ভযম্ ।
অহমিত্যপি নাস্ত্যেব পরমিত্যপি ন ক্বচিত্ ॥ ১৩॥
ব্রহ্মৈব নান্যত্ তত্সর্বং সচ্চিদানন্দ এব হি ।
কালাতীতং সুখাতীতং সর্বাতীতমতীতকম্ ॥ ১৪॥
নিত্যাতীতমনিত্যানামমিতং ব্রহ্ম কেবলম্ ।
ব্রহ্মৈব নান্যদ্যত্সর্বং সচ্চিদানন্দমাত্রকম্ ॥ ১৫॥
দ্বৈতসত্যত্ববুদ্ধিশ্চ দ্বৈতবুদ্ধ্যা ন তত্ স্মর ।
সর্বং ব্রহ্মৈব নান্যোঽস্তি সর্বং ব্রহ্মৈব কেবলম্ ॥ ১৬॥
বুদ্ধ্যাতীতং মনোঽতীতং বেদাতীতমতঃ পরম্ ।
আত্মাতীতং জনাতীতং জীবাতীতং চ নির্গুণম্ ॥ ১৭॥
কাষ্ঠাতীতং কলাতীতং নাট্যাতীতং পরং সুখম্ ।
ব্রহ্মমাত্রেণ সংপশ্যন্ ব্রহ্মমাত্রপরো ভব ॥ ১৮॥
ব্রহ্মমাত্রপরো নিত্যং চিন্মাত্রোঽহং ন সংশযঃ ।
জ্যোতিরানন্দমাত্রোঽহং নিজানন্দাত্মমাত্রকঃ ॥ ১৯॥
শূন্যানন্দাত্মমাত্রোঽহং চিন্মাত্রোঽহমিতি স্মর ।
সত্তামাত্রোঽহমেবাত্র সদা কালগুণান্তরঃ ॥ ২০॥
নিত্যসন্মাত্ররূপোঽহং শুদ্ধানন্দাত্মমাত্রকম্ ।
প্রপঞ্চহীনরূপোঽহং সচ্চিদানন্দমাত্রকঃ ॥ ২১॥
নিশ্চযানন্দমাত্রোঽহং কেবলানন্দমাত্রকঃ ।
পরমানন্দমাত্রোঽহং পূর্ণানন্দোঽহমেব হি ॥ ২২॥
দ্বৈতস্যমাত্রসিদ্ধোঽহং সাম্রাজ্যপদলক্ষণম্ ।
ইত্যেবং নিশ্চযং কুর্বন্ সদা ত্রিষু যথাসুখম্ ॥ ২৩॥
দৃঢনিশ্চযরূপাত্মা দৃঢনিশ্চযসন্মযঃ ।
দৃঢনিশ্চযশান্তাত্মা দৃঢনিশ্চযমানসঃ ॥ ২৪॥
দৃঢনিশ্চযপূর্ণাত্মা দৃঢনিশ্চযনির্মলঃ ।
দৃঢনিশ্চযজীবাত্মা দৃঢনিশ্চযমঙ্গলঃ ॥ ২৫॥
দৃঢনিশ্চযজীবাত্মা সংশযং নাশমেষ্যতি ।
দৃঢনিশ্চযমেবাত্র ব্রহ্মজ্ঞানস্য লক্ষণম্ ॥ ২৬॥
দৃঢনিশ্চযমেবাত্র বাক্যজ্ঞানস্য লক্ষণম্ ।
দৃঢনিশ্চযমেবাত্র কারণং মোক্ষসংপদঃ ॥ ২৭॥
এবমেব সদা কার্যং ব্রহ্মৈবাহমিতি স্থিরম্ ।
ব্রহ্মৈবাহং ন সন্দেহঃ সচ্চিদানন্দ এব হি ॥ ২৮॥
আত্মানন্দস্বরূপোঽহং নান্যদস্তীতি ভাবয ।
ততস্তদপি সন্ত্যজ্য এক এব স্থিরো ভব ॥ ২৯॥
ততস্তদপি সন্ত্যজ্য নির্গুণো ভব সর্বদা ।
নির্গুণত্বং চ সন্ত্যজ্য বাচাতীতো ভবেত্ ততঃ ॥ ৩০॥
বাচাতীতং চ সন্ত্যজ্য চিন্মাত্রত্বপরো ভব ।
আত্মাতীতং চ সন্ত্যজ্য ব্রহ্মমাত্রপরো ভব ॥ ৩১॥
চিন্মাত্রত্বং চ সন্ত্যজ্য সর্বতূষ্ণীংপরো ভব ।
সর্বতূষ্ণীং চ সন্ত্যজ্য মহাতূষ্ণীংপরো ভব ॥ ৩২॥
মহাতূষ্ণীং চ সন্ত্যজ্য চিত্ততূষ্ণীং সমাশ্রয ।
চিত্ততূষ্ণীং চ সন্ত্যজ্য জীবতূষ্ণীং সমাহর ॥ ৩৩॥
জীবতূষ্ণীং পরিত্যজ্য জীবশূন্যপরো ভব ।
শূন্যত্যাগং পরিত্যজ্য যথা তিষ্ঠ তথাসি ভো ॥ ৩৪॥
তিষ্ঠত্বমপি সন্ত্যজ্য অবাঙ্মানসগোচরঃ ।
ততঃ পরং ন বক্তব্যং ততঃ পশ্যেন্ন কিঞ্চন ॥ ৩৫॥
নো চেত্ সর্বপরিত্যাগো ব্রহ্মৈবাহমিতীরয ।
সদা স্মরন্ সদা চিন্ত্যং সদা ভাবয নির্গুণম্ ॥ ৩৬॥
সদা তিষ্ঠস্ব তত্ত্বজ্ঞ সদা জ্ঞানী সদা পরঃ ।
সদানন্দঃ সদাতীতঃ সদাদোষবিবর্জিতঃ ॥ ৩৭॥
সদা শান্তঃ সদা তৃপ্তঃ সদা জ্যোতিঃ সদা রসঃ ।
সদা নিত্যঃ সদা শুদ্ধঃ সদা বুদ্ধঃ সদা লযঃ ॥ ৩৮॥
সদা ব্রহ্ম সদা মোদঃ সদানন্দঃ সদা পরঃ ।
সদা স্বযং সদা শূন্যঃ সদা মৌনী সদা শিবঃ ॥ ৩৯॥
সদা সর্বং সদা মিত্রঃ সদা স্নানং সদা জপঃ ।
সদা সর্বং চ বিস্মৃত্য সদা মৌনং পরিত্যজ ॥ ৪০॥
দেহাভিমানং সন্ত্যজ্য চিত্তসত্তাং পরিত্যজ ।
আত্মৈবাহং স্বযং চাহং ইত্যেবং সর্বদা ভব ॥ ৪১॥
এবং স্থিতে ত্বং মুক্তোঽসি ন তু কার্যা বিচারণা ।
ব্রহ্মৈব সর্বং যত্কিঞ্চিত্ সচ্চিদানন্দ এব হি ॥ ৪২॥
অহং ব্রহ্ম ইদং ব্রহ্ম ত্বং ব্রহ্মাসি নিরন্তরঃ ।
প্রজ্ঞানং ব্রহ্ম এবাসি ত্বং ব্রহ্মাসি ন সংশযঃ ॥ ৪৩॥
দৃঢনিশ্চযমেব ত্বং কুরু কল্যাণমাত্মনঃ ।
মনসো ভূষণং ব্রহ্ম মনসো ভূষণং পরঃ ॥ ৪৪॥
মনসো ভূষণং কর্তা ব্রহ্মৈবাহমবেক্ষতঃ ।
ব্রহ্মৈব সচ্চিদানদঃ সচ্চিদানন্দবিগ্রহঃ ॥ ৪৫॥
সচ্চিদানন্দমখিলং সচ্চিদানন্দ এব হি ।
সচ্চিদানন্দজীবাত্মা সচ্চিদানন্দবিগ্রহঃ ॥ ৪৬॥
সচ্চিদানন্দমদ্বৈতং সচ্চিদানন্দশঙ্করঃ ।
সচ্চিদানন্দবিজ্ঞানং সচ্চিদানন্দভোজনঃ ॥ ৪৭॥
সচ্চিদানন্দপূর্ণাত্মা সচ্চিদানন্দকারণঃ ।
সচ্চিদানন্দলীলাত্মা সচ্চিদানন্দশেবধিঃ ॥ ৪৮॥
সচ্চিদানন্দসর্বাঙ্গঃ সচ্চিদানন্দচন্দনঃ ।
সচ্চিদানন্দসিদ্ধান্তঃ সচ্চিদানন্দবেদকঃ ॥ ৪৯॥
সচ্চিদানন্দশাস্ত্রার্থঃ সচ্চিদানন্দবাচকঃ ।
সচ্চিদানন্দহোমশ্চ সচ্চিদানন্দরাজ্যকঃ ॥ ৫০॥
সচ্চিদানন্দপূর্ণাত্মা সচ্চিদানন্দপূর্ণকঃ ।
সচ্চিদানন্দসন্মাত্রং মূঢেষু পঠিতং চ যত্ ॥ ৫১॥
শুদ্ধং মূঢেষু যদ্দত্তং সুবদ্ধং মার্গচারিণা ।
বিষযাসক্তচিত্তেষু ন সংভাষ্যং বিবেকিনা ॥ ৫২॥
সকৃচ্ছ্রবণমাত্রেণ ব্রহ্মৈব ভবতি স্বযম্ ।
ইচ্ছা চেদ্যদি নারীণাং মুখং ব্রাহ্মণ এব হি ॥ ৫৩॥
সর্বং চৈতন্যমাত্রত্বাত্ স্ত্রীভেদং চ ন বিদ্যতে ।
বেদশাস্ত্রেণ যুক্তোঽপি জ্ঞানাভাবাদ্ দ্বিজোঽদ্বিজঃ ॥ ৫৪॥
ব্রহ্মৈব তন্তুনা তেন বদ্ধাস্তে মুক্তিচিন্তকাঃ ।
সর্বমুক্তং ভগবতা রহস্যং শঙ্করেণ হি ॥ ৫৫॥
সোমাপীডপদাংবুজার্চনফলৈর্ভুক্ত্যৈ ভবান্ মানসং
নান্যদ্যোগপথা শ্রুতিশ্রবণতঃ কিং কর্মভির্ভূযতে ।
যুক্ত্যা শিক্ষিতমানসানুভবতোঽপ্যশ্মাপ্যসঙ্গো বচাং
কিং গ্রাহ্যং ভবতীন্দ্রিযার্থরহিতানন্দৈকসান্দ্রঃ শিবঃ ॥ ৫৬॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে রহস্যোপদেশপ্রকরণং নাম ত্রযোবিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com