ঋভুগীতা ৪৭ ॥ ঋভু-কৃত সংগ্রহোপদেশ বর্ণনম্ ॥

ঋভুঃ -

• নিদাঘ শৃণু বক্ষ্যামি দৃঢীকরণমস্তু তে ।
• শিবপ্রসাদপর্যন্তমেবং ভাবয নিত্যশঃ ॥ ১॥
• অহমেব পরং ব্রহ্ম অহমেব সদাশিবঃ ।
• অহমেব হি চিন্মাত্রমহমেব হি নির্গুণঃ ॥ ২॥
• অহমেব হি চৈতন্যমহমেব হি নিষ্কলঃ ।
• অহমেব হি শূন্যাত্মা অহমেব হি শাশ্বতঃ ॥ ৩॥
• অহমেব হি সর্বাত্মা অহমেব হি চিন্মযঃ ।
• অহমেব পরং ব্রহ্ম অহমেব মহেশ্বরঃ ॥ ৪॥
• অহমেব জগত্সাক্ষী অহমেব হি সদ্গুরুঃ ।
• অহমেব হি মুক্তাত্মা অহমেব হি নির্মলঃ ॥ ৫॥
• অহমেবাহমেবোক্তঃ অহমেব হি শঙ্করঃ ।
• অহমেব হি মহাবিষ্ণুরহমেব চতুর্মুখঃ ॥ ৬॥
• অহমেব হি শুদ্ধাত্মা হ্যহমেব হ্যহং সদা ।
• অহমেব হি নিত্যাত্মা অহমেব হি মত্পরঃ ॥ ৭॥
• অহমেব মনোরূপং অহমেব হি শীতলঃ ।
• অহমেবান্তর্যামী চ অহমেব পরেশ্বরঃ ॥ ৮॥
• এবমুক্তপ্রকারেণ ভাবযিত্বা সদা স্বযম্ ।
• দ্রব্যোঽস্তি চেন্ন কুর্যাত্তু বংচকেন গুরুং পরম্ ॥ ৯॥
• কুম্ভীপাকে সুঘোরে তু তিষ্ঠত্যেব হি কল্পকান্ ।
• শ্রুত্বা নিদাঘশ্চোথায পুত্রদারান্ প্রদত্তবান্ ॥ ১০॥
• স্বশরীরং চ পুত্রত্বে দত্বা সাদরপূর্বকম্ ।
• ধনধান্যং চ বস্ত্রাদীন্ দত্বাঽতিষ্ঠত্ সমীপতঃ ॥ ১১॥
• গুরোস্তু দক্ষিণাং দত্বা নিদাঘস্তুষ্টবানৃভুম্ ।
• সন্তুষ্টোঽস্মি মহাভাগ তব শুশ্রূষযা সদা ॥ ১২॥
• ব্রহ্মবিজ্ঞানমাপ্তোঽসি সুকৃতার্থো ন সংশযঃ ।
• ব্রহ্মরূপমিদং চেতি নিশ্চযং কুরু সর্বদা ॥ ১৩॥
• নিশ্চযাদপরো মোক্ষো নাস্তি নাস্তীতি নিশ্চিনু ।
• নিশ্চযং কারণং মোক্ষো নান্যত্ কারণমস্তি বৈ ॥ ১৪॥
• সকলভুবনসারং সর্ববেদান্তসারং
• সমরসগুরুসারং সর্ববেদার্থসারম্ ।
• সকলভুবনসারং সচ্চিদানন্দসারং
• সমরসজযসারং সর্বদা মোক্ষসারম্ ॥ ১৫॥
• সকলজননমোক্ষং সর্বদা তুর্যমোক্ষং
• সকলসুলভমোক্ষং সর্বসাম্রাজ্যমোক্ষম্ ।
• বিষযরহিতমোক্ষং বিত্তসংশোষমোক্ষং
• শ্রবণমননমাত্রাদেতদত্যন্তমোক্ষম্ ॥ ১৬॥
• তচ্ছুশ্রূষা চ ভবতঃ তচ্ছ্রুত্বা চ প্রপেদিরে ।
• এবং সর্ববচঃ শ্রুত্বা নিদাঘঋষিদর্শিতম্ ।
• শুকাদযো মহান্তস্তে পরং ব্রহ্মমবাপ্নুবন্ ॥ ১৭॥
• শ্রুত্বা শিবজ্ঞানমিদং ঋভুস্তদা
• নিদাঘমাহেত্থং মুনীন্দ্রমধ্যে ।
• মুদা হি তেঽপি শ্রুতিশব্দসারং
• শ্রুত্বা প্রণম্যাহুরতীব হর্ষাত্ ॥ ১৮॥

মুনযঃ -

• পিতা মাতা ভ্রাতা গুরুরসি বযস্যোঽথ হিতকৃত্
• অবিদ্যাব্ধেঃ পারং গমযসি ভবানেব শরণম্ ।
• বলেনাস্মান্ নীত্বা মম বচনবলেনৈব সুগমং
• পথং প্রাপ্ত্যৈবার্থৈঃ শিববচনতোঽস্মান্ সুখযসি ॥ ১৯॥

• ॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে ঋভুকৃতসংগ্রহোপদেশবর্ণনং নাম সপ্তচত্বারিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com