Ribhu Gita - Siva Rahasya Purana Amsha 6

ঋভুগীতা ১২ ॥ বিদেহমুক্তি প্রকরণ বর্ণনম্ ॥

ঋভুঃ -

দেহমুক্তিপ্রকরণং নিদাঘ শৃণু দুর্লভম্ ।
ত্যক্তাত্যক্তং ন স্মরতি বিদেহান্মুক্ত এব সঃ ॥ ১॥
ব্রহ্মরূপঃ প্রশান্তাত্মা নান্যরূপঃ সদা সুখী ।
স্বস্থরূপো মহামৌনী বিদেহান্মুক্ত এব সঃ ॥ ২॥
সর্বাত্মা সর্বভূতাত্মা শান্তাত্মা মুক্তিবর্জিতঃ ।
একাত্মবর্জিতঃ সাক্ষী বিদেহান্মুক্ত এব সঃ ॥ ৩॥
লক্ষ্যাত্মা লালিতাত্মাহং লীলাত্মা স্বাত্মমাত্রকঃ ।
তূষ্ণীমাত্মা স্বভাবাত্মা বিদেহান্মুক্ত এব সঃ ॥ ৪॥
শুভ্রাত্মা স্বযমাত্মাহং সর্বাত্মা স্বাত্মমাত্রকঃ ।
অজাত্মা চামৃতাত্মা হি বিদেহান্মুক্ত এব সঃ ॥ ৫॥
আনন্দাত্মা প্রিযঃ স্বাত্মা মোক্ষাত্মা কোঽপি নির্ণযঃ ।
ইত্যেবমিতি নিধ্যাযী বিদেহান্মুক্ত এব সঃ ॥ ৬॥
ব্রহ্মৈবাহং চিদেবাহং একং বাপি ন চিন্ত্যতে ।
চিন্মাত্রেণৈব যস্তিষ্ঠেদ্বিদেহান্মুক্ত এব সঃ ॥ ৭॥
নিশ্চযং চ পরিত্যজ্য অহং ব্রহ্মেতি নিশ্চযঃ ।
আনন্দভূরিদেহস্তু বিদেহান্মুক্ত এব সঃ ॥ ৮॥
সর্বমস্তীতি নাস্তীতি নিশ্চযং ত্যজ্য তিষ্ঠতি ।
অহং ব্রহ্মাস্মি নান্যোঽস্মি বিদেহান্মুক্ত এব সঃ ॥ ৯॥
কিঞ্চিত্ ক্বচিত্ কদাচিচ্চ আত্মানং ন স্মরত্যসৌ ।
স্বস্বভাবেন যস্তিষ্ঠেত্ বিদেহান্মুক্ত এব সঃ ॥ ১০॥
অহমাত্মা পরো হ্যাত্মা চিদাত্মাহং ন চিন্ত্যতে ।
স্থাস্যামীত্যপি যো যুক্তো বিদেহান্মুক্ত এব সঃ ॥ ১১॥
তূষ্ণীমেব স্থিতস্তূষ্ণীং সর্বং তূষ্ণীং ন কিঞ্চন ।
অহমর্থপরিত্যক্তো বিদেহান্মুক্ত এব সঃ ॥ ১২॥
পরমাত্মা গুণাতীতঃ সর্বাত্মাপি ন সংমতঃ ।
সর্বভাবান্মহাত্মা যো বিদেহান্মুক্ত এব সঃ ॥ ১৩॥
কালভেদং দেশভেদং বস্তুভেদং স্বভেদকম্ ।
কিঞ্চিদ্ভেদং ন যস্যাস্তি বিদেহান্মুক্ত এব সঃ ॥ ১৪॥
অহং ত্বং তদিদং সোঽযং কিঞ্চিদ্বাপি ন বিদ্যতে ।
অত্যন্তসুখমাত্রোঽহং বিদেহান্মুক্ত এব সঃ ॥ ১৫॥
নির্গুণাত্মা নিরাত্মা হি নিত্যাত্মা নিত্যনির্ণযঃ ।
শূন্যাত্মা সূক্ষ্মরূপো যো বিদেহান্মুক্ত এব সঃ ॥ ১৬॥
বিশ্বাত্মা বিশ্বহীনাত্মা কালাত্মা কালহেতুকঃ ।
দেবাত্মা দেবহীনো যো বিদেহান্মুক্ত এব সঃ ॥ ১৭॥
মাত্রাত্মা মেযহীনাত্মা মূঢাত্মাঽনাত্মবর্জিতঃ ।
কেবলাত্মা পরাত্মা চ বিদেহান্মুক্ত এব সঃ ॥ ১৮॥
সর্বত্র জডহীনাত্মা সর্বেষামন্তরাত্মকঃ ।
সর্বেষামিতি যস্তূক্তো বিদেহান্মুক্ত এব সঃ ॥ ১৯॥
সর্বসঙ্কল্পহীনেতি সচ্চিদানন্দমাত্রকঃ ।
স্থাস্যামীতি ন যস্যান্তো বিদেহান্মুক্ত এব সঃ ॥ ২০॥
সর্বং নাস্তি তদস্তীতি চিন্মাত্রোঽস্তীতি সর্বদা ।
প্রবুদ্ধো নাস্তি যস্যান্তো বিদেহান্মুক্ত এব সঃ ॥ ২১॥
কেবলং পরমাত্মা যঃ কেবলং জ্ঞানবিগ্রহঃ ।
সত্তামাত্রস্বরূপো যো বিদেহান্মুক্ত এব সঃ ॥ ২২॥
জীবেশ্বরেতি চৈত্যেতি বেদশাস্ত্রে ত্বহং ত্বিতি ।
ব্রহ্মৈবেতি ন যস্যান্তো বিদেহান্মুক্ত এব সঃ ॥ ২৩॥
ব্রহ্মৈব সর্বমেবাহং নান্যত্ কিঞ্চিজ্জগদ্ভবেত্ ।
ইত্যেবং নিশ্চযো ভাবঃ বিদেহান্মুক্ত এব সঃ ॥ ২৪॥
ইদং চৈতন্যমেবেতি অহং চৈতন্যমেব হি ।
ইতি নিশ্চযশূন্যো যো বিদেহান্মুক্ত এব সঃ ॥ ২৫॥
চৈতন্যমাত্রঃ সংসিদ্ধঃ স্বাত্মারামঃ সুখাসনঃ ।
সুখমাত্রান্তরঙ্গো যো বিদেহান্মুক্ত এব সঃ ॥ ২৬॥
অপরিচ্ছিন্নরূপাত্মা অণোরণুবিনির্মলঃ ।
তুর্যাতীতঃ পরানন্দো বিদেহান্মুক্ত এব সঃ ॥ ২৭॥
নামাপি নাস্তি সর্বাত্মা ন রূপো ন চ নাস্তিকঃ ।
পরব্রহ্মস্বরূপাত্মা বিদেহান্মুক্ত এব সঃ ॥ ২৮॥
তুর্যাতীতঃ স্বতোঽতীতঃ অতোঽতীতঃ স সন্মযঃ ।
অশুভাশুভশান্তাত্মা বিদেহান্মুক্ত এব সঃ ॥ ২৯॥
বন্ধমুক্তিপ্রশান্তাত্মা সর্বাত্মা চান্তরাত্মকঃ ।
প্রপঞ্চাত্মা পরো হ্যাত্মা বিদেহান্মুক্ত এব সঃ ॥ ৩০॥
সর্বত্র পরিপূর্ণাত্মা সর্বদা চ পরাত্পরঃ ।
অন্তরাত্মা হ্যনন্তাত্মা বিদেহান্মুক্ত এব সঃ ॥ ৩১॥
অবোধবোধহীনাত্মা অজডো জডবর্জিতঃ ।
অতত্ত্বাতত্ত্বসর্বাত্মা বিদেহান্মুক্ত এব সঃ ॥ ৩২॥
অসমাধিসমাধ্যন্তঃ অলক্ষ্যালক্ষ্যবর্জিতঃ ।
অভূতো ভূত এবাত্মা বিদেহান্মুক্ত এব সঃ ॥ ৩৩॥
চিন্মযাত্মা চিদাকাশশ্চিদানন্দশ্চিদংবরঃ ।
চিন্মাত্ররূপ এবাত্মা বিদেহান্মুক্ত এব সঃ ॥ ৩৪॥
সচ্চিদানন্দরূপাত্মা সচ্চিদানন্দবিগ্রহঃ ।
সচ্চিদানন্দপূর্ণাত্মা বিদেহান্মুক্ত এব সঃ ॥ ৩৫॥
সদা ব্রহ্মমযো নিত্যং সদা স্বাত্মনি নিষ্ঠিতঃ ।
সদাঽখণ্ডৈকরূপাত্মা বিদেহান্মুক্ত এব সঃ ॥ ৩৬॥
প্রজ্ঞানঘন এবাত্মা প্রজ্ঞানঘনবিগ্রহঃ ।
নিত্যজ্ঞানপরানন্দো বিদেহান্মুক্ত এব সঃ ॥ ৩৭॥
যস্য দেহঃ ক্বচিন্নাস্তি যস্য কিঞ্চিত্ স্মৃতিশ্চ ন ।
সদাত্মা হ্যাত্মনি স্বস্থো বিদেহান্মুক্ত এব সঃ ॥ ৩৮॥
যস্য নির্বাসনং চিত্তং যস্য ব্রহ্মাত্মনা স্থিতিঃ ।
যোগাত্মা যোগযুক্তাত্মা বিদেহান্মুক্ত এব সঃ ॥ ৩৯॥
চৈতন্যমাত্র এবেতি ত্যক্তং সর্বমতির্ন হি ।
গুণাগুণবিকারান্তো বিদেহান্মুক্ত এব সঃ ॥ ৪০॥
কালদেশাদি নাস্ত্যন্তো ন গ্রাহ্যো নাস্মৃতিঃ পরঃ ।
নিশ্চযং চ পরিত্যক্তো বিদেহান্মুক্ত এব সঃ ॥ ৪১॥
ভূমানন্দাপরানন্দো ভোগানন্দবিবর্জিতঃ ।
সাক্ষী চ সাক্ষিহীনশ্চ বিদেহান্মুক্ত এব সঃ ॥ ৪২॥
সোঽপি কোঽপি ন সো কোঽপি কিঞ্চিত্ কিঞ্চিন্ন কিঞ্চন ।
আত্মানাত্মা চিদাত্মা চ চিদচিচ্চাহমেব চ ॥ ৪৩॥
যস্য প্রপঞ্চশ্চানাত্মা ব্রহ্মাকারমপীহ ন ।
স্বস্বরূপঃ স্বযংজ্যোতির্বিদেহান্মুক্ত এব সঃ ॥ ৪৪॥
বাচামগোচরানন্দঃ সর্বেন্দ্রিযবিবর্জিতঃ ।
অতীতাতীতভাবো যো বিদেহান্মুক্ত এব সঃ ॥ ৪৫॥
চিত্তবৃত্তেরতীতো যশ্চিত্তবৃত্তির্ন ভাসকঃ ।
সর্ববৃত্তিবিহীনো যো বিদেহান্মুক্ত এব সঃ ॥ ৪৬॥
তস্মিন্ কালে বিদেহো যো দেহস্মরণবর্জিতঃ ।
ন স্থূলো ন কৃশো বাপি বিদেহান্মুক্ত এব সঃ ॥ ৪৭॥
ঈষণ্মাত্রস্থিতো যো বৈ সদা সর্ববিবর্জিতঃ ।
ব্রহ্মমাত্রেণ যস্তিষ্ঠেত্ বিদেহান্মুক্ত এব সঃ ॥ ৪৮॥
পরং ব্রহ্ম পরানন্দঃ পরমাত্মা পরাত্পরঃ ।
পরৈরদৃষ্টবাহ্যান্তো বিদেহান্মুক্ত এব সঃ ॥ ৪৯॥
শুদ্ধবেদান্তসারোঽযং শুদ্ধসত্ত্বাত্মনি স্থিতঃ ।
তদ্ভেদমপি যস্ত্যক্তো বিদেহান্মুক্ত এব সঃ ॥ ৫০॥
ব্রহ্মামৃতরসাস্বাদো ব্রহ্মামৃতরসাযনম্ ।
ব্রহ্মামৃতরসে মগ্নো বিদেহান্মুক্ত এব সঃ ॥ ৫১॥
ব্রহ্মামৃতরসাধারো ব্রহ্মামৃতরসঃ স্বযম্ ।
ব্রহ্মামৃতরসে তৃপ্তো বিদেহান্মুক্ত এব সঃ ॥ ৫২॥
ব্রহ্মানন্দপরানন্দো ব্রহ্মানন্দরসপ্রভঃ ।
ব্রহ্মানন্দপরংজ্যোতির্বিদেহান্মুক্ত এব সঃ ॥ ৫৩॥
ব্রহ্মানন্দরসানন্দো ব্রহ্মামৃতনিরন্তরম্ ।
ব্রহ্মানন্দঃ সদানন্দো বিদেহান্মুক্ত এব সঃ ॥ ৫৪॥
ব্রহ্মানন্দানুভাবো যো ব্রহ্মামৃতশিবার্চনম্ ।
ব্রহ্মানন্দরসপ্রীতো বিদেহান্মুক্ত এব সঃ ॥ ৫৫॥
ব্রহ্মানন্দরসোদ্বাহো ব্রহ্মামৃতকুটুম্বকঃ ।
ব্রহ্মানন্দজনৈর্যুক্তো বিদেহান্মুক্ত এব সঃ ॥ ৫৬॥
ব্রহ্মামৃতবরে বাসো ব্রহ্মানন্দালযে স্থিতঃ ।
ব্রহ্মামৃতজপো যস্য বিদেহান্মুক্ত এব সঃ ॥ ৫৭॥
ব্রহ্মানন্দশরীরান্তো ব্রহ্মানন্দেন্দ্রিযঃ ক্বচিত্ ।
ব্রহ্মামৃতমযী বিদ্যা বিদেহান্মুক্ত এব সঃ ॥ ৫৮॥
ব্রহ্মানদমদোন্মত্তো ব্রহ্মামৃতরসংভরঃ ।
ব্রহ্মাত্মনি সদা স্বস্থো বিদেহান্মুক্ত এব সঃ ॥ ৫৯॥
দেহমুক্তিপ্রকরণং সর্ববেদেষু দুর্লভম্ ।
মযোক্তং তে মহাযোগিন্ বিদেহঃ শ্রবণাদ্ভবেত্ ॥ ৬০॥

স্কন্দঃ -

অনাথ নাথ তে পদং ভজাম্যুমাসনাথ স-
ন্নিশীথনাথমৌলিসংস্ফুটল্ললাটসঙ্গজ-
স্ফুলিঙ্গদগ্ধমন্মথং প্রমাথনাথ পাহি মাম্ ॥ ৬১॥
বিভূতিভূষগাত্র তে ত্রিনেত্রমিত্রতামিযাত্
মনঃসরোরুহং ক্ষণং তথেক্ষণেন মে সদা ।
প্রবন্ধসংসৃতিভ্রমদ্ভ্রমজ্জনৌঘসন্ততৌ
ন বেদ বেদমৌলিরপ্যপাস্তদুঃখসন্ততিম্ ॥ ৬২॥

॥ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে দেহমুক্তিপ্রকরণবর্ণনং নাম দ্বাদশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com