Ribhu Gita - Siva Rahasya Purana Amsha 6

ঋভুগীতা ৪১ ॥ গ্রন্থ-প্রশস্তি নিরূপণম্ ॥

ঋভুঃ -

অহং ব্রহ্ম ন সন্দেহঃ অহং ব্রহ্ম ন সংশযঃ ।
অহং ব্রহ্মৈব নিত্যাত্মা অহমেব পরাত্পরঃ ॥ ১॥
চিন্মাত্রোঽহং ন সন্দেহ ইতি নিশ্চিত্য তং ত্যজ ।
সত্যং সত্যং পুনঃ সত্যমাত্মনোঽন্যন্ন কিঞ্চন ॥ ২॥
শিবপাদদ্বযং স্পৃষ্ট্বা বদামীদং ন কিঞ্চন ।
গুরুপাদদ্বযং স্পৃষ্ট্বা বদামীদং ন কিঞ্চন ॥ ৩॥
জিহ্বযা পরশুং তপ্তং ধারযামি ন সংশযঃ ।
বেদশাস্ত্রাদিকং স্পৃষ্ট্বা বদামীদং বিনিশ্চিতম্ ॥ ৪॥
নিশ্চযাত্মন্ নিশ্চযস্ত্বং নিশ্চযেন সুখী ভব ।
চিন্মযস্ত্বং চিন্মযত্বং চিন্মযানন্দ এব হি ॥ ৫॥
ব্রহ্মৈব ব্রহ্মভূতাত্মা ব্রহ্মৈব ত্বং ন সংশযঃ ।
সর্বমুক্তং ভগবতা যোগিনামপি দুর্লভম্ ॥ ৬॥
দেবানাং চ ঋষীণাং চ অত্যন্তং দুর্লভং সদা ।
ঐশ্বরং পরমং জ্ঞানমুপদিষ্টং শিবেন হি ॥ ৭॥
এতত্ জ্ঞানং সমানীতং কৈলাসাচ্ছঙ্করান্তিকাত্ ।
দেবানাং দক্ষিণামূর্তির্দশসাহস্রবত্সরান্ ॥ ৮॥
বিঘ্নেশো বহুসাহস্রং বত্সরং চোপদিষ্টবান্ ।
সাক্ষাচ্ছিবোঽপি পার্বত্যৈ বত্সরং চোপদিষ্টবান্ ॥ ৯॥
ক্ষীরাব্ধৌ চ মহাবিষ্ণুর্ব্রহ্মণে চোপদিষ্টবান্ ।
কদাচিত্ব্রহ্মলোকে তু মত্পিতুশ্চোক্তবানহম্ ॥ ১০॥
নারদাদি ঋষীণাং চ উপদিষ্টং মহদ্বহু ।
অযাতযামং বিস্তারং গৃহীত্বাঽহমিহাগতঃ ॥ ১১॥
ন সমং পাদমেকং চ তীর্থকোটিফলং লভেত্ ।
ন সমং গ্রন্থমেতস্য ভূমিদানফলং লভেত্ ॥ ১২॥
একানুভবমাত্রস্য ন সর্বং সর্বদানকম্ ।
শ্লোকার্ধশ্রবণস্যাপি ন সমং কিঞ্চিদেব হি ॥ ১৩॥
তাত্পর্যশ্রবণাভাবে পঠংস্তূষ্ণীং স মুচ্যতে ।
সর্বং সন্ত্যজ্য সততমেতদ্গ্রন্থং সমভ্যসেত্ ॥ ১৪॥
সর্বমন্ত্রং চ সন্ত্যজ্য এতদ্গ্রন্থং সমভ্যসেত্ ।
সর্বদেবাংশ্চ সন্ত্যজ্য এতদ্গ্রন্থং সমভ্যসেত্ ॥ ১৫॥
সর্বস্নানং চ সন্ত্যজ্য এতদ্গ্রন্থং সমভ্যসেত্ ।
সর্বভাবং চ সন্ত্যজ্য এতদ্গ্রন্থং সমভ্যসেত্ ॥ ১৬॥
সর্বহোমং চ সন্ত্যজ্য এতদ্গ্রন্থং সমভ্যসেত্ ।
সর্বদানং চ সন্ত্যজ্য এতদ্গ্রন্থং সমভ্যসেত্ ॥ ১৭॥
সর্বপূজাং চ সন্ত্যজ্য এতদ্গ্রন্থং সমভ্যসেত্ ।
সর্বগুহ্যং চ সন্ত্যজ্য এতদ্গ্রন্থং সমভ্যসেত্ ॥ ১৮॥
সর্বসেবাং চ সন্ত্যজ্য এতদ্গ্রন্থং সমভ্যসেত্ ।
সর্বাস্তিত্বং চ সন্ত্যজ্য এতদ্গ্রন্থং সমভ্যসেত্ ॥ ১৯॥
সর্বপাঠং চ সন্ত্যজ্য এতদ্গ্রন্থং সমভ্যসেত্ ।
সর্বাভ্যাসং চ সন্ত্যজ্য এতদ্গ্রন্থং সমভ্যসেত্ ॥ ২০॥
দেশিকং চ পরিত্যজ্য এতদ্গ্রন্থং সমভ্যসেত্ ।
গুরুং বাপি পরিত্যজ্য এতদ্গ্রন্থং সমভ্যসেত্ ॥ ২১॥
সর্বলোকং চ সন্ত্যজ্য এতদ্গ্রন্থং সমভ্যসেত্ ।
সর্বৈশ্বর্যং চ সন্ত্যজ্য এতদ্গ্রন্থং সমভ্যসেত্ ॥ ২২॥
সর্বসঙ্কল্পকং ত্যজ্য এতদ্গ্রন্থং সমভ্যসেত্ ।
সর্বপুণ্যং চ সন্ত্যজ্য এতদ্গ্রন্থং সমভ্যসেত্ ॥ ২৩॥
এতদ্গ্রন্থং পরং ব্রহ্ম এতদ্গ্রন্থং সমভ্যসেত্ ।
অত্রৈব সর্ববিজ্ঞানং অত্রৈব পরমং পদম্ ॥ ২৪॥
অত্রৈব পরমো মোক্ষ অত্রৈব পরমং সুখম্ ।
অত্রৈব চিত্তবিশ্রান্তিরত্রৈব গ্রন্থিভেদনম্ ॥ ২৫॥
অত্রৈব জীবন্মুক্তিশ্চ অত্রৈব সকলো জপঃ ।
এতদ্গ্রন্থং পঠংস্তূষ্ণীং সদ্যো মুক্তিমবাপ্নুযাত্ ॥ ২৬॥
সর্বশাস্ত্রং চ সন্ত্যজ্য এতন্মাত্রং সদাভ্যসেত্ ।
দিনে দিনে চৈকবারং পঠেচ্চেন্মুক্ত এব সঃ ॥ ২৭॥
জন্মমধ্যে সকৃদ্বাপি শ্রুতং চেত্ সোঽপি মুচ্যতে ।
সর্বশাস্ত্রস্য সিদ্ধান্তং সর্ববেদস্য সংগ্রহম্ ॥ ২৮॥
সারাত্ সারতরং সারং সারাত্ সারতরং মহত্ ।
এতদ্গ্রন্থস্য ন সমং ত্রৈলোক্যেঽপি ভবিষ্যতি ॥ ২৯ ॥
ন প্রসিদ্ধিং গতে লোকে ন স্বর্গেঽপি চ দুর্লভম্ ।
ব্রহ্মলোকেষু সর্বেষু শাস্ত্রেষ্বপি চ দুর্লভম্ ॥ ৩০॥
এতদ্গ্রন্থং কদাচিত্তু চৌর্যং কৃত্বা পিতামহঃ ।
ক্ষীরাব্ধৌ চ পরিত্যজ্য সর্বে মুঞ্চন্তু নো ইতি ॥ ৩১॥
জ্ঞাত্বা ক্ষীরসমুদ্রস্য তীরে প্রাপ্তং গৃহীতবান্ ।
গৃহীতং চাপ্যসৌ দৃষ্ট্বা শপথং চ প্রদত্তবান্ ॥ ৩২॥
তত্ আরভ্য তল্লোকং ত্যক্ত্বাহমিমমাগতঃ ।
অত্যদ্ভুতমিদং জ্ঞানং গ্রন্থং চৈব মহাদ্ভুতম্ ॥ ৩৩॥
তদ্ জ্ঞো বক্তা চ নাস্ত্যেব গ্রন্থশ্রোতা চ দুর্লভঃ ।
আত্মনিষ্ঠৈকলভ্যোঽসৌ সদ্গুরুর্নৈষ লভ্যতে ॥ ৩৪॥
গ্রন্থবন্তো ন লভ্যন্তে তেন ন খ্যাতিরাগতা ।
ভবতে দর্শিতং হ্যেতদ্গমিষ্যামি যথাগতম্ ॥ ৩৫॥
এতাবদুক্তমাত্রেণ নিদাঘ ঋষিসত্তমঃ ।
পতিত্বা পাদযোস্তস্য আনন্দাশ্রুপরিপ্লুতঃ ॥ ৩৬॥
উবাচ বাক্যং সানন্দং সাষ্টাঙ্গং প্রণিপত্য চ ।

নিদাঘঃ -

অহো ব্রহ্মন্ কৃতার্থোঽস্মি কৃতার্থোঽস্মি ন সংশযঃ ।
ভবতাং দর্শনেনৈব মজ্জন্ম সফলং কৃতম্ ॥ ৩৭॥
একবাক্যস্য মননে মুক্তোঽহং নাত্র সংশযঃ ।
নমস্করোমি তে পাদৌ সোপচারং ন বাস্তবৌ ॥ ৩৮॥
তস্যাপি নাবকাশোঽস্তি অহমেব ন বাস্তবম্ ।
ত্বমেব নাস্তি মে নাস্তি ব্রহ্মেতি বচনং ন চ ॥ ৩৯॥
ব্রহ্মেতি বচনং নাস্তি ব্রহ্মভাবং ন কিঞ্চন ।
এতদ্গ্রন্থং ন মে নাস্তি সর্বং ব্রহ্মেতি বিদ্যতে ॥ ৪০॥
সর্বং ব্রহ্মেতি বাক্যং ন সর্বং ব্রহ্মেতি তং ন হি ।
তদিতি দ্বৈতভিন্নং তু ত্বমিতি দ্বৈতমপ্যলম্ ॥ ৪১॥
এবং কিঞ্চিত্ ক্বচিন্নাস্তি সর্বং শান্তং নিরামযম্ ।
একমেব দ্বযং নাস্তি একত্বমপি নাস্তি হি ॥ ৪২॥
ভিন্নদ্বন্দ্বং জগদ্দোষং সংসারদ্বৈতবৃত্তিকম্ ।
সাক্ষিবৃত্তিপ্রপঞ্চং বা অখণ্ডাকারবৃত্তিকম্ ॥ ৪৩॥
অখণ্ডৈকরসো নাস্তি গুরুর্বা শিষ্য এব বা ।
ভবদ্দর্শনমাত্রেণ সর্বমেবং ন সংশযঃ ॥ ৪৪॥
ব্রহ্মজ্যোতিরহং প্রাপ্তো জ্যোতিষাং জ্যোতিরস্ম্যহম্ ।
নমস্তে সুগুরো ব্রহ্মন্ নমস্তে গুরুনন্দন ।
এবং কৃত্য নমস্কারং তূষ্ণীমাস্তে সুখী স্বযম্ ॥ ৪৫॥
কিং চণ্ডভানুকরমণ্ডলদণ্ডিতানি
কাষ্ঠামুখেষু গলিতানি নমস্ততীতি ।
যাদৃক্চ তাদৃগথ শঙ্করলিঙ্গসঙ্গ-
ভঙ্গীনি পাপকলশৈলকুলানি সদ্যঃ ।
শ্রীমৃত্যুঞ্জয রঞ্জয ত্রিভুবনাধ্যক্ষ প্রভো পাহি নঃ ॥ ৪৬॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে গ্রন্থপ্রশস্তিনিরূপণং নাম একচত্বারিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com