ঋভুগীতা ৫০ ॥ সুদর্শনস্য মুক্তিলাভ বর্ণনং চ ॥

স্কন্দঃ -

• বিষ্ণুস্তবান্তে বিপ্রোঽসৌ সুদর্শনসমাহ্বযঃ ।
• স্নাত্বাঽথ মণিকর্ণ্যাং স ভস্মরুদ্রাক্ষভূষণঃ ॥ ১॥
• সঞ্জপন্ শতরুদ্রীযং পঞ্চাক্ষরপরাযণঃ ।
• সংপাদ্য বিল্বপত্রাণি কমলান্যমলান্যপি ॥ ২॥
• গন্ধাক্ষতৈর্ধূপদীপৈর্নৈবেদ্যৈর্বিবিধৈরপি ।
• বিষ্ণূপদিষ্টমার্গেণ নিত্যমন্তর্গৃহস্য হি ॥ ৩॥
• প্রদক্ষিণং চকারাসৌ লিঙ্গান্যভ্যর্চযংস্তথা ।
• বিশ্বেশ্বরাবিমুক্তেশৌ বীরেশং চ ত্রিলোচনম্ ॥ ৪॥
• কৃত্তিবাসং বৃদ্ধকালে কেদারং শূলটঙ্ককম্ ।
• রত্নেশং ভারভূতেশং চন্দ্রেশং সিদ্ধকেশ্বরম্ ॥ ৫॥
• ঘণ্টাকর্ণেশ্বরং চৈব নারদেশং যমেশ্বরম্ ।
• পুলস্তিপুলহেশং চ বিকর্ণেশং ফলেশ্বরম্ ॥ ৬॥
• কদ্রুদ্রেশমখণ্ডেশং কেতুমালিং গভস্তিকম্ ।
• যমুনেশং বর্ণকেশং ভদ্রেশং জ্যেষ্ঠশঙ্করম্ ॥ ৭॥
• নন্দিকেশং চ রামেশং করমর্দেশ্বরং তথা ।
• আবর্দেশং মতঙ্গেশং বাসুকীশং দ্রুতীশ্বরম্ ॥ ৮॥
• সূর্যেশমর্যমেশং চ তূণীশং গালবেশ্বরম্ ।
• কণ্বকাত্যাযনেশং চ চন্দ্রচূডেশ্বরং তথা ॥ ৯॥
• উদাবর্তেশ্বরং চৈব তৃণজ্যোতীশ্বরং সদা ।
• কঙ্কণেশং তঙ্কণেশং স্কন্দেশং তারকেশ্বরম্ ॥ ১০॥
• জম্বুকেশং চ জ্ঞানেশং নন্দীশং গণপেশ্বরম্ ।
• এতান্যন্তর্গৃহে বিপ্রঃ পূজযন্ পরযা মুদা ॥ ১১॥
• ঢুণ্ঢ্যাদিগণপাংশ্চৈব ভৈরবং চাপি নিত্যশঃ ।
• অন্নপূর্ণামন্নদাত্রীং সাক্ষাল্লোকৈকমাতরম্ ॥ ১২॥
• দণ্ডপাণিং ক্ষেত্রপালং সম্যগভ্যর্চ্য তস্থিবান্ ।
• তীর্থান্যন্যান্যপি মুনির্মণিকর্ণ্যাদি সত্তম ॥ ১৩॥
• জ্ঞানোদং সিদ্ধকূপং চ বৃদ্ধকূপং পিশাচকম্ ।
• ঋণমোচনতীর্থং চ গর্গতীর্থং মহত্তরম্ ॥ ১৪॥
• স্নাত্বা সনিযমং বিপ্রো নিত্যং পঞ্চনদে হৃদে ।
• কিরণাং ধূতপাপাং চ পঞ্চগঙ্গামপি দ্বিজঃ ॥ ১৫॥
• গঙ্গাং মনোরমাং তুঙ্গাং সর্বপাপপ্রণাশিনীম্ ।
• মুক্তিমণ্টপমাস্থায স জপন্ শতরুদ্রিযম্ ॥ ১৬॥
• অষ্টোত্তরসহস্রং বৈ জপন্ পঞ্চাক্ষরং দ্বিজঃ ।
• পক্ষে পক্ষে তথা কুর্বন্ পঞ্চক্রোশপ্রদক্ষিণম্ ॥ ১৭॥
• অন্তর্গৃহাদ্বহির্দেশে চকারাবসথং তদা ।
• এবং সংবসতস্তস্য কালো ভূযানবর্তত ॥ ১৮॥
• তত্র দৃষ্ট্বা তপোনিষ্ঠং সুদর্শনসমাহ্বযম্ ।
• বিষ্ণুস্তদা বৈ তং বিপ্রং সমাহূয শিবার্চকম্ ॥ ১৯॥
• পুনঃ প্রাহ প্রসন্নেন চেতসা মুনিসত্তমম্ ।

বিষ্ণুঃ -

• ভোঃ সুদর্শনবিপ্রেন্দ্র শিবার্চনপরাযণ ।
• জ্ঞানপাত্রং ভবানেব বিশ্বেশকৃপযাঽধুনা ॥ ২০॥
• ত্বযা তপাংসি তপ্তানি ইষ্টা যজ্ঞাস্ত্বযৈব হি ।
• অধীতাশ্চ ত্বযা বেদাঃ কাশ্যাং বাসো যতস্তব ॥ ২১॥
• বহুভির্জন্মভির্যেন কৃতং ক্ষেত্রে মহত্তপঃ ।
• তস্যৈব সিদ্ধ্যত্যমলা কাশীযং মুক্তিকাশিকা ॥ ২২॥
• তব ভাগ্যস্য নান্তোঽস্তি মুনে ত্বং ভাগ্যবানসি ।
• কিঞ্চৈকং তব বক্ষ্যামি হিতমাত্যন্তিকং শৃণু ॥ ২৩॥
• বিশ্বেশকৃপযা তেঽদ্য মুক্তিরন্তে ভবিষ্যতি ।
• রুদ্রাক্ষনামপুণ্যং যত্ নাম্নাং সাহস্রমুত্তমম্ ॥ ২৪॥
• উপদেক্ষ্যামি তে বিপ্র নামসাহস্রমীশিতুঃ ।
• তেনার্চযেশং বিশ্বেশং বিল্বপত্রৈর্মনোহরৈঃ ॥ ২৫॥
• বর্ষমেকং নিরাহারো বিশ্বেশং পূজযন্ সদা ।
• সংবত্সরান্তে মুক্তস্ত্বং ভবিষ্যতি ন সংশযঃ ॥ ২৬॥
• ত্বদ্দেহাপগমে মন্ত্রং পঞ্চাক্ষরমনুত্তমম্ ।
• দদাতি দেবো বিশ্বেশস্তেন মুক্তো ভবিষ্যতি ॥ ২৭॥
• শৈবেভ্যঃ সন্নজীবেভ্যো দদাতীমং মহামনুম্ ।

স্কন্দঃ -

• ইতি বিষ্ণুবচঃ শ্রুত্বা প্রণম্যাহ হরিং তদা ।
• সুদর্শনো যযাচেত্থং নাম্নাং সাহস্রমুত্তমম্ ॥ ২৮॥
• ভগবন্ দৈত্যবৃন্দঘ্ন বিষ্ণো জিষ্ণো নমোঽস্তু তে ।
• সহস্রনাম্নাং যদ্দিব্যং বিশ্বেশস্যাশু তদ্বদ ॥ ২৯॥
• যেন জপ্তেন দেবেশঃ পূজিতো বিল্বপত্রকৈঃ ।
• দদাতি মোক্ষসাম্রাজ্যং দেহান্তে তদ্বদাশু মে ॥ ৩০॥
• তদা বিপ্রবচঃ শ্রুত্বা তস্মৈ চোপাদিশত্ স্বযম্ ।
• সহস্রনাম্নাং দেবস্য হিরণ্যস্যেত্যাদি সত্তম ॥ ৩১॥
• তেন সংপূজ্য বিশ্বেশং বর্ষমেকমতন্দ্রিতঃ ।
• কোমলারক্তবিল্বৈশ্চ স্তোত্রেণানেন তুষ্টুবে ॥ ৩২॥

সুদর্শনঃ -

• আশীবিষাঙ্গপরিমণ্ডলকণ্ঠভাগ-
• রাজত্সুসাগরভবোগ্রবিষোরুশোভ ।
• ফালস্ফুরজ্জ্বলনদীপ্তিবিদীপিতাশা-
• শোকাবকাশ তপনাক্ষ মৃগাঙ্কমৌলে ॥ ৩৩॥
• ক্রুদ্ধোডুজাযাপতিধৃতার্ধশরীরশোভ
• পাহ্যাশু শাসিতমখান্ধকদক্ষশত্রো ।
• সুত্রামবজ্রকরদণ্ডবিখণ্ডিতোরু-
• পক্ষাদ্যঘক্ষিতিধরোর্ধ্বশযাব শংভো ॥ ৩৪॥
• উত্ফুল্লহল্লকলসত্করবীরমালা-
• ভ্রাজত্সুকন্ধরশরীর পিনাকপাণে ।
• চঞ্চত্সুচন্দ্রকলিকোত্তমচারুমৌলিং
• লিঙ্গে কুলুঞ্চপতিমম্বিকযা সমেতম্ ॥ ৩৫॥
• ছাযাধবানুজলসচ্ছদনৈঃ পরিপূজ্য ভক্ত্যা
• মুক্তেন স্বস্য চ বিরাজিতবংশকোট্যা ।
• সাযং সঙ্গবপুঙ্গবোরুবহনং শ্রীতুঙ্গলিঙ্গার্চকঃ
• শাঙ্গঃ পাতকসঙ্গভঙ্গচতুরশ্চাসঙ্গনিত্যান্তরঃ ॥ ৩৬॥
• ফালাক্ষস্ফুরদক্ষিজস্ফুরদুরুস্ফূলিঙ্গদগ্ধাঙ্গকা-
• নঙ্গোত্তুঙ্গমতঙ্গকৃত্তিবসনং লিঙ্গং ভজে শাঙ্করম্ ।
• অচ্ছাচ্ছাগবহাং সুরতামীক্ষাশিনান্তে বিভো
• বৃষ্যং শাঙ্করবাহনামনিরতাঃ সোমং তথা বাজিনম্ ॥ ৩৭॥
• ত্যক্ত্বা জন্মবিনাশনং ত্বিতি মুহুস্তে জিহ্বযা সত্তমাঃ
• যে শংভোঃ সকৃদেব নামনিরতাঃ শাঙ্গাঃ স্বতঃ পাবনাঃ ॥ ৩৮॥
• মৃগাঙ্ক মৌলিমীশ্বরং মৃগেন্দ্রশত্রুজত্বচম্ ।
• বসানমিন্দুসপ্রভং মৃগাদ্যবালসত্করম্ ।
• ভজে মৃগেন্দ্রসপ্রভং ..??... ॥ ৩৯॥

স্কন্দঃ -

• এবং স্তুবন্তং বিশ্বেশং সুদর্শনমতন্দ্রিতম্ ।
• প্রাহেত্থং শৌরিমাভাষ্য শংভোর্ভক্তিবিবর্ধনম্ ॥ ৪০॥

বিষ্ণুঃ -

• অত্রৈবামরণং বিপ্র বস ত্বং নিযতাশনঃ ।
• নাম্নাং সহস্রং প্রজপন্ শতরুদ্রীযমেব চ ॥ ৪১॥
• অন্তর্গৃহাত্ বহিঃ স্থিত্বা পূজযাশু মহেশ্বরম্ ।
• তবান্তে ভূরিকরুণো মোক্ষং দাস্যত্যসংশযম্ ॥ ৪২॥
• স প্রণম্যাহ বিশ্বেশং দৃষ্ট্বা প্রাহ সুদর্শনম্ ।
• ধন্যস্ত্বং লিঙ্গেঽপ্যনুদিনগলিতস্বান্তরঙ্গাঘসঙ্ঘঃ
• পুংসাং বর্যাদ্যভক্ত্যা যমনিযমবরৈর্বিশ্ববন্দ্যং প্রভাতে ।
• দত্বা বিল্ববরং সদংবুজদলং কিঞ্চিজ্জলং বা মুহুঃ
• প্রাপ্নোতীশ্বরপাদপঙ্কজমুমানাথাদ্য মুক্তিপ্রদম্ ॥ ৪৩॥
• কো বা ত্বত্সদৃশো ভবেদগপতিপ্রেমৈকলিঙ্গার্চকো
• মুক্তানাং প্রবরোর্ধ্বকেশবিলসচ্ছ্রীভক্তিবীজাঙ্কুরৈঃ ।
• দেবা বাপ্যসুরাঃ সুরা মুনিবরা ভারা ভুবঃ কেবলং
• বীরা বা করবীরপুষ্পবিলসন্মালাপ্রদে নো সমঃ ॥ ৪৪॥
• বনে বা রাজ্যে বাপ্যগপতিসুতানাযকমহো
• স্ফুরল্লিঙ্গার্চাযাং নিযমমতভাবেন মনসা ।
• হরং ভক্ত্যা সাধ্য ত্রিভুবনতৃণাডম্বরবর-
• প্ররূঢৈর্ভাগ্যৈর্বা ন হি খলু স সজ্জেত ভুবনে ॥ ৪৫॥
• ন দানৈর্যোগৈর্বা বিধিবিহিতবর্ণাশ্রমভরৈঃ
• অপারৈর্বেদান্তপ্রতিবচনবাক্যানুসরণৈঃ ।
• ন মন্যেঽহং স্বান্তে ভবভজনভাবেন মনসা
• মুহুর্লিঙ্গং শাঙ্গং ভজতি পরমানন্দকুহরঃ ॥ ৪৬॥
• শর্বং পরবতনন্দিনীপতিমহানন্দাম্বুধেঃ পারগা
• রাগত্যাগহৃদা বিরাগপরমা ভস্মাঙ্গরাগাদরাঃ ।
• মারাপারশরাভিঘাতরহিতা ধীরোরুধারারসৈঃ
• পারাবারমহাঘসংসৃতিভরং তীর্ণাঃ শিবাভ্যর্চনাত্ ॥ ৪৭॥
• মার্কণ্ডেযসুতং পুরাঽন্তকভযাদ্যোঽরক্ষদীশো হরঃ
• তত্পাদাম্বুজরাগরঞ্জিতমনা নাপ্নোতি কিং বা ফলম্ ।
• তং মৃত্যুঞ্জযমঞ্জসা প্রণমতামোজোজিমধ্যে জযং
• জেতারোতপরাজযো জনিজরারোগৈর্বিমুক্তিং লভেত্ ॥ ৪৮॥
• ভূতাযাং ভূতনাথং ত্বঘমতিতিলকাকারভিল্লোত্থশল্যৈঃ
• ধাবন্ ভল্লূকপৃষ্ঠে নিশি কিল সুমহদ্ব্যাঘ্রভীত্যাঽরুরোহ ।
• বিল্বং নল্বপ্রভং তচ্ছদঘনমসকৃত্ পাতযামাস মূলে
• নিদ্রাতন্দ্রোজ্ঝিতোঽসৌ মৃগগণকলনে মূললিঙ্গেঽথ শাঙ্গে ॥ ৪৯॥
• তেনাভূদ্ভগবান্ গণোত্তমবরো মুক্তাঘসঙ্ঘস্তদা
• চণ্ডাংশোস্তনযেন পূজিতপদঃ সারূপ্যমাপেশিতুঃ ।
• গঙ্গাচন্দ্রকলাকপর্দবিলসত্ফালস্ফুলিঙ্গোজ্জ্বলদ্
• বালন্যঙ্কুকরাগ্রসংগতমহাশূলাহি টংকোদ্যতঃ ॥ ৫০॥
• চৈত্রে চিত্রৈঃ পাতকৈর্বিপ্রমুক্তো বৈশাখে বৈ দুঃখশাখাবিমুক্তঃ ।
• জ্যেষ্ঠে শ্রেষ্ঠো ভবতেষাঢমাসি পুত্রপ্রাপ্তিঃ শ্রাবণে শ্রান্তিনাশঃ ॥ ৫১॥
• ভাদ্রে ভদ্রো ভবতে চাশ্বিনে বৈ অশ্বপ্রাপ্তিঃ কার্তিকে কীর্তিলাভঃ ।
• মার্গে মুক্তের্মার্গমেতল্লভেত পুষ্যে পুণ্যং মাঘকে চাঘনাশঃ ॥ ৫২॥
• ফল্গু ত্বংহো ফাল্গুনে মাসি
• নশ্যেদীশার্চাতো বিল্বপত্রৈশ্চলিঙ্গে ।
• এবং তত্তন্মাসি পূজ্যেশলিঙ্গং
• চিত্রৈঃ পাপৈর্বিপ্রমুক্তো দ্বিজেন্দ্রঃ ॥ ৫৩॥
• দূর্বাঙ্কুরৈরভিনবৈঃ শশিধামচূড-
• লিঙ্গার্চনেন পরিশেষযদঙ্কুরাণি ।
• সংসারঘোরতররূপকরাণি সদ্যঃ
• মুক্ত্যঙ্কুরাণি পরিবর্ধযতীহ ধন্যঃ ॥ ৫৪॥
• গোক্ষীরেক্ষুক্ষৌদ্রখণ্ডাজ্যদধ্না
• সন্নারেলৈঃ পানসাম্রাদিসারৈঃ ।
• বিশ্বেশানং সত্সিতারত্নতোযৈঃ
• গন্ধোদৈর্বা সিঞ্চ্য দোষৈর্বিমুক্তঃ ॥ ৫৫॥
• লিঙ্গং চন্দনলেপসঙ্গতমুমাকান্তস্য পশ্যন্তি যে
• তে সংসারভুজঙ্গভঙ্গপতনানঙ্গাঙ্গসঙ্গোজ্ঝিতাঃ ।
• ব্যঙ্গং সর্বসমর্চনং ভগবতঃ সাঙ্গং ভবেচ্ছাঙ্করং
• শঙ্গাপাঙ্গকৃপাকটাক্ষলহরী তস্মিংশ্চিরং তিষ্ঠতি ॥ ৫৬॥
• মুরলিসরলিরাগৈর্মর্দলৈস্তালশঙ্খৈঃ
• পটুপটহনিনাদধ্বান্তসন্ধানঘোষৈঃ ।
• দুন্দুভ্যাঘাতবাদৈর্বরযুবতিমহানৃত্তসংরংভরঙ্গৈঃ
• দর্শেষ্বাদর্শদর্শো ভগবতি গিরিজানাযকে মুক্তিহেতুঃ ॥ ৫৭॥
• স্বচ্ছচ্ছত্রছবীনাং বিবিধজিতমহাচ্ছাযযা ছন্নমৈশং
• শীর্ষং বিচ্ছিন্নপাপো ভবতি ভবহরঃ পূজকঃ শম্ভুভক্ত্যা ।
• চঞ্চচ্চন্দ্রাভকাণ্ডপ্রবিলসদমলস্বর্ণরত্নাগ্রভাভি-
• র্দীপ্যচ্চামরকোটিভিঃ স্ফুটপটঘটিতৈশ্চাকচক্যৈঃ পতাকৈঃ ॥ ৫৮॥
• সংপশ্যারুণভূরুহোত্তমশিখাসংলেঢিতারাগণং
• তারানাথকলাধরোরুসুমহালিঙ্গৌঘসংসেবিতম্ ।
• বিল্বানাং কুলমেতদত্র সুমহাপাপৌঘসংহারকৃত্
• বারাণাং নিখিলপ্রমোদজনকং শম্ভোঃ প্রিযং কেবলম্ ॥ ৫৯॥
• অন্নং পোত্রিমলাযতে ধনরসং কৌলেযমূত্রাযতে
• সংবেশো নিগলাযতে মম সদানন্দো কন্দাযতে ।
• শম্ভো তে স্মরণান্তরাযভরিত প্রাণঃ কৃপাণাযতে ॥ ৬০॥
• কঃ কল্পদ্রুমুপেক্ষ্য চিত্তফলদং তূলাদিদানক্ষযং
• বব্বূলং পরিসেবতে ক্ষুদধিকো বাতূলদানক্ষমম্ ।
• তদ্বচ্ছঙ্করকিঙ্করো বিধিহরিব্রহ্মেন্দ্রচন্দ্রানলান্
• সেবেদ্যো বিধিবঞ্চিতঃ কলিবলপ্রাচুর্যতো মূঢধীঃ ॥ ৬১॥
• সুবর্ণাণ্ডোদ্ভূতস্তুতিগতিসমর্চ্যাণ্ডজবর-
• প্রপাদং ত্বাং কশ্চিদ্ ভজতি ভুবনে ভক্তিপরমঃ ।
• মহাচণ্ডোদ্দণ্ডপ্রকটিতভুবং তাণ্ডবপরং
• বিভুং সন্তং নিত্যং ভজ ভগণনাথামলজটম্ ॥ ৬২॥
• অজগবকর বিষ্ণুবাণ শম্ভো
• দুরিতহরান্তকনাশ পাহি মামনাথম্ ।
• ভবদভযপদাব্জবর্যমেত
• মম চিত্তসরস্তটান্নযাতু চাদ্য ॥ ৬৩॥
• ইত্থং বিষ্ণুশ্চ কাশ্যাং প্রমথপতিমগাত্ পূজ্য বিশ্বেশ্বরং তং
• ক্ষিতিসুরবরবর্যং চানুশাস্যেত্থমিষ্টম্ ।
• স চ মুনিগণমধ্যে প্রাপ্য মুক্তিং তথান্তে
• প্রমথপতিপদাব্{}জে লীনহীনাঙ্গসঙ্গঃ ॥ ৬৪॥

সূতঃ -

• ইত্থং শ্রুত্বা মুনীন্দ্রোঽসৌ জৈগীষব্যোঽবদদ্বিভুম্ ।
• প্রণিপত্য প্রহৃষ্টাত্মা ষষ্ঠাংশং বৈ ষডাস্যতঃ ॥ ৬৫॥

জৈগীষব্যঃ -

• মারমারকজানন্দবসতের্মহিমা কথম্ ।
• নাম্নাং সহস্রমেতচ্চ বদ মে করুণানিধে ॥ ৬৬॥
• ক্ষেত্রাণাং চাপ্যথান্যানাং মহিমাং বদ সদ্গুরো ।
• শূরতারকসংহর্তস্ত্বত্তো নান্যো গুরুর্মম ॥ ৬৭॥
• তচ্ছ্রুত্বা তু মুনের্বাক্যং স্কন্দঃ প্রাহাথ তং মুনিম্ ।

স্কন্দঃ -

• আগামিন্যংশকেঽস্মিংস্তব হৃদযমহানন্দসিন্ধৌ বিধূত্থ-
• প্রাচুর্যপ্রকটৈঃ করোপমমহাসপ্তমাংশে বিশেষে ।
• নাম্নাং চাপি সহস্রকং ভগবতঃ শম্ভোঃ প্রিযং কেবলং
• অস্যানন্দবনস্য চৈব মহিমা ত্বং বৈ শৃণুষ্বাদরাত্ ॥ ৬৮॥
• উগ্রোংঽশঃ শশিশেখরেণ কথিতো বেদান্তসারাত্মকঃ
• ষষ্ঠঃ ষণ্মুখসত্তমায স দদৌ তদ্ব্রহ্মণে সোঽপ্যদাত্ ।
• পুত্রাযাত্মভবায তদ্ভবহরং শ্রুত্বা ভবেদ্ জ্ঞানবিত্
• চোক্ত্বা জন্মশতাযুতার্জিতমহাপাপৈর্বিমুক্তো ভবেত্ ॥ ৬৯॥
• শ্রুত্বাংশমেতদ্ ভবতাপপাপহং শিবাস্পদজ্ঞানদমুত্তমং মহত্ ।
• ধ্যানেন বিজ্ঞানদমাত্মদর্শনং দদাতি শম্ভোঃ পদভক্তিভাবতঃ ॥ ৭০॥

সূতঃ -

• অধ্যাযপাদাধ্যযনেঽপি বিদ্যা বুদ্ধ্যা হৃদি ধ্যাযতি বন্ধমুক্ত্যৈ ।
• স্বাধ্যাযতান্তায শমান্বিতায দদ্যাদ্যদদ্যান্ন বিভেদ্যমেতত্ ॥ ৭১॥
• ইত্থং সূতবচোদ্যতমহানন্দৈকমোদপ্রভা
• ভাস্বদ্ভাস্করসপ্রভা মুনিবরাঃ সংতুষ্টুবুস্তং তদা ।
• বেদোদ্যদ্বচনাশিষা প্রহৃষিতাঃ সূতং জযেত্যুচ্চরন্
• প্যাহো জগ্মুরতীব হর্ষিতহৃদা বিশ্বেশ্বরং বীক্ষিতুম্ ॥ ৭২॥
• ॥ শঙ্করাখ্যঃ ষষ্ঠাংশঃ সমাপ্তঃ॥
• ॥ সর্বং শ্রীরমণার্পণমস্তু ॥

• ॥ ইতি শ্রীশিবরহস্যে শঙ্করাখ্যে ষষ্ঠাংশে সুদর্শনস্য মুক্তিলাভবর্ণনং অংশশ্রবণফলনিরূপণং চ নাম পঞ্চাশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com