Ribhu Gita - Siva Rahasya Purana Amsha 6

ঋভুগীতা ৪৮ ॥ স্কন্দ-কৃত শিবব্রতোপদেশ বর্ণনম্ ॥

স্কন্দঃ -

জ্ঞানাঙ্গসাধনং বক্ষ্যে শৃণু বক্ষ্যামি তে হিতম্ ।
যত্ কৃত্বা জ্ঞানমাপ্নোতি তত্ প্রাদাত্ পরমেষ্ঠিনঃ ॥ ১॥
জৈগীষব্য শৃণুষ্বৈতত্ সাবধানেন চেতসা ।
প্রথমং বেদসংপ্রোক্তং কর্মাচরণমিষ্যতে ॥ ২॥
উপনীতো দ্বিজো বাপি বৈশ্যঃ ক্ষত্রিয এব বা ।
অগ্নিরিত্যাদিভির্মন্ত্রৈর্ভস্মধৃক্ পূযতে ত্বঘৈঃ ॥ ৩॥
ত্রিযাযুষৈস্ত্র্যম্বকৈশ্চ ত্রিপুণ্ড্রং ভস্মনাঽঽচরেত্ ।
লিঙ্গার্চনপরো নিত্যং রুদ্রাক্ষান্ ধারযন্ ক্রমৈঃ ॥ ৪॥
কণ্ঠে বাহ্বোর্বক্ষসী চ মালাভিঃ শিরসা তথা ।
ত্রিপুণ্ড্রবদ্ধারযেত রুদ্রাক্ষান্ ক্রমশো মুনে ॥ ৫॥
একাননং দ্বিবক্ত্রং বা ত্রিবক্ত্রং চতুরাস্যকম্ ।
পঞ্চবক্ত্রং চ ষট্ সপ্ত তথাষ্টদশকং নব ॥ ৬॥
একাদশং দ্বাদশং বা তথোর্ধ্বং ধারযেত্ ক্রমাত্ ।
ভস্মধারণমাত্রেণ প্রসীদতি মহেশ্বরঃ ॥ ৭॥
রুদ্রাক্ষধারণাদেব নরো রুদ্রত্বমাপ্নুযাত্ ।
ভস্মরুদ্রাক্ষধৃঙ্মর্ত্যো জ্ঞানাঙ্গী ভবতি প্রিযঃ ॥ ৮॥
রুদ্রাধ্যাযী ভস্মনিষ্ঠঃ পঞ্চাক্ষরজপাধরঃ ।
ভস্মোদ্ধূলিতদেহোঽযং শ্রীরুদ্রং প্রজপন্ দ্বিজঃ ॥ ৯॥
সর্বপাপৈর্বিমুক্তশ্চ জ্ঞাননিষ্ঠো ভবেন্মুনে ।
ভস্মসংছন্নসর্বাঙ্গো ভস্মফালত্রিপুণ্ড্রকঃ ॥ ১০॥
বেদমৌলিজবাক্যেষু বিচারাধিকৃতো ভবেত্ ।
নান্যপুণ্ড্রধরো বিপ্রো যতির্বা বিপ্রসত্তম ॥ ১১॥
শমাদিনিযমোপেতঃ ক্ষমাযুক্তোঽপ্যসংস্কৃতঃ ।
শিরোব্রতমিদং প্রোক্তং ভস্মধারণমেব হি ॥ ১২॥
শিরোব্রতং চ বিধিবদ্যৈশ্চীর্ণং মুনিসত্তম ।
তেষামেব ব্রহ্মবিদ্যাং বদেত গুরুরাস্তিকঃ ॥ ১৩॥
শাংভবা এব বেদেষু নিষ্ঠা নষ্টাশুভাঃ পরম্ ।
শিবপ্রসাদসংপন্নো ভস্মরুদ্রাক্ষধারকঃ ॥ ১৪॥
রুদ্রাধ্যাযজপাসক্তঃ পঞ্চাক্ষরপরাযণঃ ।
স এব বেদবেদান্তশ্রবণেঽধিকৃতো ভবেত্ ॥ ১৫॥
নান্যপুণ্ড্রধরো বিপ্রঃ কৃত্বাপি শ্রবণং বহু ।
নৈব লভ্যেত তদ্জ্ঞানং প্রসাদেন বিনেশিতুঃ ॥ ১৬॥
প্রসাদজনকং শম্ভোর্ভস্মধারণমেব হি ।
শিবপ্রসাদহীনানাং জ্ঞানং নৈবোপজাযতে ॥ ১৭॥
প্রসাদে সতি দেবস্য বিজ্ঞানস্ফুরণং ভবেত্ ।
রুদ্রাধ্যাযজাপিনাং তু ভস্মধারণপূর্বকম্ ॥ ১৮॥
প্রসাদো জাযতে শম্ভোঃ পুনরাবৃত্তিবর্জিতঃ ।
প্রসাদে সতি দেবস্য বেদান্তস্ফুরণং ভবেত্ ॥ ১৯॥
তস্যৈবাকথিতা হ্যর্থাঃ প্রকাশন্তে মহাত্মনঃ ।
পঞ্চাক্ষরজপাদেব পঞ্চাস্যধ্যানপূর্বকম্ ॥ ২০॥
তস্যৈব ভবতি জ্ঞানং শিবপ্রোক্তমিদং ধ্রুবম্ ।
সর্বং শিবাত্মকং ভাতি জগদেতত্ চরাচরম্ ॥ ২১॥
স প্রসাদো মহেশস্য বিজ্ঞেযঃ শাংভবোত্তমৈঃ ।
শিবলিঙ্গার্চনাদেব প্রসাদঃ শাংভবোত্তমে ॥ ২২॥
নিযমাদ্বিল্বপত্রৈশ্চ ভস্মধারণপূর্বকম্ ।
প্রসাদো জাযতে শম্ভোঃ সাক্ষাদ্জ্ঞানপ্রকাশকঃ ॥ ২৩॥
শিবক্ষেত্রনিবাসেন জ্ঞানং সম্যক্ দৃঢং ভবেত্ ।
শিবক্ষেত্রনিবাসে তু ভস্মধার্যধিকারবান্ ॥ ২৪॥
নক্তাশনার্চনাদেব প্রীযেত ভগবান্ ভবঃ ।
প্রদোষপূজনং শংভোঃ প্রসাদজনকং পরম্ ॥ ২৫॥
সোমবারে নিশীথেষু পূজনং প্রিযমীশিতুঃ ।
ভূতাযাং ভূতনাথস্য পূজনং পরমং প্রিযম্ ॥ ২৬॥
শিবশব্দোচ্চারণং চ প্রসাদজনকং মহত্ ।
জ্ঞানাঙ্গসাধনেষ্বেবং শিবভক্তার্চনং মহত্ ॥ ২৭॥
ভক্তানামর্চনাদেব শিবঃ প্রীতো ভবিষ্যতি ।
ইত্যেতত্তং সমাসেন জ্ঞানাঙ্গং কথিতং মযা ।
অকৈতবেন ভাবেন শ্রবণীযো মহেশ্বরঃ ॥ ২৮॥

সূতঃ -

যঃ কোঽপি প্রসভং প্রদোষসমযে বিল্বীদলালঙ্কৃতং
লিঙ্গং তুঙ্গমপারপুণ্যবিভবৈঃ পশ্যেদথার্চেত বা ।
প্রাপ্তং রাজ্যমবাপ্য কামহৃদযস্তুষ্যেদকামো যদি
মুক্তিদ্বারমপাবৃতং স তু লভেত্ শম্ভোঃ কটাক্ষাঙ্কুরৈঃ ॥ ২৯॥
অচলাতুলরাজকন্যকাকুচলীলামলবাহুজালমীশম্ ।
ভজতামনলাক্ষিপাদপদ্মং ভবলীলং ন ভবেত চিত্তবালম্ ॥ ৩০॥
ভস্মত্রিপুণ্ড্ররচিতাঙ্গকবাহুফাল-
রুদ্রাক্ষজালকবচাঃ শ্রুতিসূক্তিমালাঃ ।
বেদোরুরত্নপদকাঙ্কিতশম্ভুনাম-
লোলা হি শাংভববরাঃ পরিশীলযন্তি ॥ ৩১॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে স্কন্দকৃতশিবব্রতোপদেশবর্ণনং নাম অষ্টচত্বারিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com