Ribhu Gita - Siva Rahasya Purana Amsha 6

ঋভুগীতা ২৭ ॥ আনন্দ-রূপত্ব নিরূপণ প্রকরণম্ ॥

ঋভুঃ -

বক্ষ্যে প্রকরণং সত্যং ব্রহ্মানন্দমনোমযম্ ।
কার্যকারণনির্মুক্তং নিত্যানন্দমযং ত্বিদম্ ॥ ১॥
অক্ষযানন্দ এবাহমাত্মানন্দপ্রকাশকম্ ।
জ্ঞানানন্দস্বরূপোঽহং লক্ষ্যানন্দমযং সদা ॥ ২॥
বিষযানন্দশূন্যোঽহং মিথ্যানন্দপ্রকাশকঃ ।
বৃত্তিশূন্যসুখাত্মাহং বৃত্তিশূন্যসুখাত্পরম্ ॥ ৩॥
জডানন্দপ্রকাশাত্মা আত্মানন্দরসোঽস্ম্যহম্ ।
আত্মানন্দবিহীনোঽহং নাস্ত্যানন্দাত্মবিগ্রহঃ ॥ ৪॥
কার্যানন্দবিহীনোঽহং কার্যানন্দকলাত্মকঃ ।
গুণানন্দবিহীনোঽহং গুহ্যানন্দস্বরূপবান্ ॥ ৫॥
গুপ্তানন্দস্বরূপোঽহং কৃত্যানন্দমহানহম্ ।
জ্ঞেযানন্দবিহীনোঽহং গোপ্যানন্দবিবর্জিতঃ ॥ ৬॥
সদানন্দস্বরূপোঽহং মুদানন্দনিজাত্মকঃ ।
লোকানন্দো মহানন্দো লোকাতীতমহানযম্ ॥ ৭॥
ভেদানন্দশ্চিদানন্দঃ সুখানন্দোঽহমদ্বযঃ ।
ক্রিযানন্দোঽক্ষযানন্দো বৃত্ত্যানন্দবিবর্জিতঃ ॥ ৮॥
সর্বানন্দোঽক্ষযানন্দশ্চিদানন্দোঽহমব্যযঃ ।
সত্যানন্দঃ পরানন্দঃ সদ্যোনন্দঃ পরাত্পরঃ ॥ ৯॥
বাক্যানন্দমহানন্দঃ শিবানন্দোঽহমদ্বযঃ ।
শিবানন্দোত্তরানন্দ আদ্যানন্দবিবর্জিতঃ ॥ ১০॥
অমলাত্মা পরানন্দশ্চিদানন্দোঽহমদ্বযঃ ।
বৃত্ত্যানন্দপরানন্দো বিদ্যাতীতো হি নির্মলঃ ॥ ১১॥
কারণাতীত আনন্দশ্চিদানন্দোঽহমদ্বযঃ ।
সর্বানন্দঃ পরানন্দো ব্রহ্মানন্দাত্মভাবনঃ ॥ ১২॥
জীবানন্দো লযানন্দশ্চিদানন্দস্বরূপবান্ ।
শুদ্ধানন্দস্বরূপাত্মা বুদ্ধ্যানন্দো মনোমযঃ ॥ ১৩॥
শব্দানন্দো মহানন্দশ্চিদানন্দোঽহমদ্বযঃ ।
আনন্দানন্দশূন্যাত্মা ভেদানন্দবিশূন্যকঃ ॥ ১৪॥
দ্বৈতানন্দপ্রভাবাত্মা চিদানন্দোঽহমদ্বযঃ ।
এবমাদিমহানন্দ অহমেবেতি ভাবয ॥ ১৫॥
শান্তানন্দোঽহমেবেতি চিদানন্দপ্রভাস্বরঃ ।
একানন্দপরানন্দ এক এব চিদব্যযঃ ॥ ১৬॥
এক এব মহানাত্মা একসংখ্যাবিবর্জিতঃ ।
একতত্ত্বমহানন্দস্তত্ত্বভেদবিবর্জিতঃ ॥ ১৭॥
বিজিতানন্দহীনোঽহং নির্জিতানন্দহীনকঃ ।
হীনানন্দপ্রশান্তোঽহং শান্তোঽহমিতি শান্তকঃ ॥ ১৮॥
মমতানন্দশান্তোঽহমহমাদিপ্রকাশকম্ ।
সর্বদা দেহশান্তোঽহং শান্তোঽহমিতি বর্জিতঃ ॥ ১৯॥
ব্রহ্মৈবাহং ন সংসারী ইত্যেবমিতি শান্তকঃ ।
অন্তরাদন্তরোঽহং বৈ অন্তরাদন্তরান্তরঃ ॥ ২০॥
এক এব মহানন্দ এক এবাহমক্ষরঃ ।
এক এবাক্ষরং ব্রহ্ম এক এবাক্ষরোঽক্ষরঃ ॥ ২১॥
এক এব মহানাত্মা এক এব মনোহরঃ ।
এক এবাদ্বযোঽহং বৈ এক এব ন চাপরঃ ॥ ২২॥
এক এব ন ভূরাদি এক এব ন বুদ্ধযঃ ।
এক এব প্রশান্তোঽহং এক এব সুখাত্মকঃ ॥ ২৩॥
এক এব ন কামাত্মা এক এব ন কোপকম্ ।
এক এব ন লোভাত্মা এক এব ন মোহকঃ ॥ ২৪॥
এক এব মদো নাহং এক এব ন মে রসঃ ।
এক এব ন চিত্তাত্মা এক এব ন চান্যকঃ ॥ ২৫॥
এক এব ন সত্তাত্মা এক এব জরামরঃ ।
এক এব হি পূর্ণাত্মা এক এব হি নিশ্চলঃ ॥ ২৬॥
এক এব মহানন্দ এক এবাহমেকবান্ ।
দেহোঽহমিতি হীনোঽহং শান্তোঽহমিতি শাশ্বতঃ ॥ ২৭॥
শিবোঽহমিতি শান্তোঽহং আত্মৈবাহমিতি ক্রমঃ ।
জীবোঽহমিতি শান্তোঽহং নিত্যশুদ্ধহৃদন্তরঃ ॥ ২৮॥
এবং ভাবয নিঃশঙ্কং সদ্যো মুক্তস্ত্বমদ্বযে ।
এবমাদি সুশব্দং বা নিত্যং পঠতু নিশ্চলঃ ॥ ২৯॥
কালস্বভাবো নিযতৈশ্চ ভূতৈঃ
জগদ্বিজাযেত ইতি শ্রুতীরিতম্ ।
তদ্বৈ মৃষা স্যাজ্জগতো জডত্বতঃ
ইচ্ছাভবং চৈতদথেস্বরস্য ॥ ৩০॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে আনন্দরূপত্বনিরূপণপ্রকরণং নাম সপ্তবিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com