Ribhu Gita - Siva Rahasya Purana Amsha 6

ঋভুগীতা ৩৩ ॥ সচ্চিদানন্দ রূপতা প্রকরণম্ ॥

ঋভুঃ -

বক্ষ্যে পরং ব্রহ্মমাত্রমনুত্পন্নমিদং জগত্ ।
সত্পদানন্দমাত্রোঽহমনুত্পন্নমিদং জগত্ ॥ ১॥
আত্মৈবাহং পরং ব্রহ্ম নান্যত্ সংসারদৃষ্টযঃ ।
সত্পদানন্দমাত্রোঽহমনুত্পন্নমিদং জগত্ ॥ ২॥
সত্পদানন্দমাত্রোঽহং চিত্পদানন্দবিগ্রহম্ ।
অহমেবাহমেবৈকমহমেব পরাত্ পরঃ ॥ ৩॥
সচ্চিদানদমেবৈকমহং ব্রহ্মৈব কেবলম্ ।
অহমস্মি সদা ভামি এবং রূপং কুতোঽপ্যসত্ ॥ ৪॥
ত্বমিত্যেবং পরং ব্রহ্ম চিন্মযানন্দরূপবান্ ।
চিদাকারং চিদাকাশং চিদেব পরমং সুখম্ ॥ ৫॥
আত্মৈবাহমসন্নাহং কূটস্থোঽহং গুরুঃ পরঃ ।
কালং নাস্তি জগন্নাস্তি কল্মষত্বানুভাবনম্ ॥ ৬॥
অহমেব পরং ব্রহ্ম অহমেব সদা শিবঃ ।
শুদ্ধচৈতন্য এবাহং শুদ্ধসত্বানুভাবনঃ ॥ ৭॥
অদ্বযানন্দমাত্রোঽহমব্যযোঽহং মহানহম্ ।
সর্বং ব্রহ্মৈব সততং সর্বং ব্রহ্মৈব নির্মলঃ ॥ ৮॥
সর্বং ব্রহ্মৈব নান্যোঽস্তি সর্বং ব্রহ্মৈব চেতনঃ ।
সর্বপ্রকাশরূপোঽহং সর্বপ্রিযমনো হ্যহম্ ॥ ৯॥
একান্তৈকপ্রকাশোঽহং সিদ্ধাসিদ্ধবিবর্জিতঃ ।
সর্বান্তর্যামিরূপোঽহং সর্বসাক্ষিত্বলক্ষণম্ ॥ ১০॥
শমো বিচারসন্তোষরূপোঽহমিতি নিশ্চযঃ ।
পরমাত্মা পরং জ্যোতিঃ পরং পরবিবর্জিতঃ ॥ ১১॥
পরিপূর্ণস্বরূপোঽহং পরমাত্মাঽহমচ্যুতঃ ।
সর্ববেদস্বরূপোঽহং সর্বশাস্ত্রস্য নির্ণযঃ ॥ ১২॥
লোকানন্দস্বরূপোঽহং মুখ্যানন্দস্য নির্ণযঃ ।
সর্বং ব্রহ্মৈব ভূর্নাস্তি সর্বং ব্রহ্মৈব কারণম্ ॥ ১৩॥
সর্বং ব্রহ্মৈব নাকার্যং সর্বং ব্রহ্ম স্বযং বরঃ ।
নিত্যাক্ষরোঽহং নিত্যোঽহং সর্বকল্যাণকারকম্ ॥ ১৪॥
সত্যজ্ঞানপ্রকাশোঽহং মুখ্যবিজ্ঞানবিগ্রহঃ ।
তুর্যাতুর্যপ্রকাশোঽহং সিদ্ধাসিদ্ধাদিবর্জিতঃ ॥ ১৫॥
সর্বং ব্রহ্মৈব সততং সর্বং ব্রহ্ম নিরন্তরম্ ।
সর্বং ব্রহ্ম চিদাকাশং নিত্যব্রহ্ম নিরঞ্জনম্ ॥ ১৬॥
সর্বং ব্রহ্ম গুণাতীতং সর্বং ব্রহ্মৈব কেবলম্ ।
সর্বং ব্রহ্মৈব ইত্যেবং নিশ্চযং কুরু সর্বদা ॥ ১৭॥
ব্রহ্মৈব সর্বমিত্যেবং সর্বদা দৃঢনিশ্চযঃ ।
সর্বং ব্রহ্মৈব ইত্যেবং নিশ্চযিত্বা সুখী ভব ॥ ১৮॥
সর্বং ব্রহ্মৈব সততং ভাবাভাবৌ চিদেব হি ।
দ্বৈতাদ্বৈতবিবাদোঽযং নাস্তি নাস্তি ন সংশযঃ ॥ ১৯॥
সর্ববিজ্ঞানমাত্রোঽহং সর্বং ব্রহ্মেতি নিশ্চযঃ ।
গুহ্যাদ্গুহ্যতরং সোঽহং গুণাতীতোঽহমদ্বযঃ ॥ ২০॥
অন্বযব্যতিরেকং চ কার্যাকার্যং বিশোধয ।
সচ্চিদানন্দরূপোঽহমনুত্পন্নমিদং জগত্ ॥ ২১॥
ব্রহ্মৈব সর্বমেবেদং চিদাকাশমিদং জগত্ ।
ব্রহ্মৈব পরমানন্দং আকাশসদৃশং বিভু ॥ ২২॥
ব্রহ্মৈব সচ্চিদানন্দং সদা বাচামগোচরম্ ।
ব্রহ্মৈব সর্বমেবেদমস্তি নাস্তীতি কেচন ॥ ২৩॥
আনন্দভাবনা কিঞ্চিত্ সদসন্মাত্র এব হি ।
ব্রহ্মৈব সর্বমেবেদং সদা সন্মাত্রমেব হি ॥ ২৪॥
ব্রহ্মৈব সর্বমেবদং চিদ্ঘনানন্দবিগ্রহম্ ।
ব্রহ্মৈব সচ্চ সত্যং চ সনাতনমহং মহত্ ॥ ২৫॥
ব্রহ্মৈব সচ্চিদানন্দং ওতপ্রোতেব তিষ্ঠতি ।
ব্রহ্মৈব সচ্চিদানন্দং সর্বাকারং সনাতনম্ ॥ ২৬॥
ব্রহ্মৈব সচ্চিদানন্দং পরমানদমব্যযম্ ।
ব্রহ্মৈব সচ্চিদানন্দং মাযাতীতং নিরঞ্জনম্ ॥ ২৭॥
ব্রহ্মৈব সচ্চিদানন্দং সত্তামাত্রং সুখাত্ সুখম্ ।
ব্রহ্মৈব সচ্চিদানন্দং চিন্মাত্রৈকস্বরূপকম্ ॥ ২৮॥
ব্রহ্মৈব সচ্চিদানন্দং সর্বভেদবিবর্জিতম্ ।
সচ্চিদানন্দং ব্রহ্মৈব নানাকারমিব স্থিতম্ ॥ ২৯॥
ব্রহ্মৈব সচ্চিদানন্দং কর্তা চাবসরোঽস্তি হি ।
সচ্চিদানদং ব্রহ্মৈব পরং জ্যোতিঃ স্বরূপকম্ ॥ ৩০॥
ব্রহ্মৈব সচ্চিদানন্দং নিত্যনিশ্চলমব্যযম্ ।
ব্রহ্মৈব সচ্চিদানন্দং বাচাবধিরসাবযম্ ॥ ৩১॥
ব্রহ্মৈব সচ্চিদানন্দং স্বযমেব স্বযং সদা ।
ব্রহ্মৈব সচ্চিদানন্দং ন করোতি ন তিষ্ঠতি ॥ ৩২॥
ব্রহ্মৈব সচ্চিদানন্দং ন গচ্ছতি ন তিষ্ঠতি ।
ব্রহ্মৈব সচ্চিদানন্দং ব্রহ্মণোঽন্যন্ন কিঞ্চন ॥ ৩৩॥
ব্রহ্মৈব সচ্চিদানন্দং ন শুক্লং ন চ কৃষ্ণকম্ ।
ব্রহ্মৈব সচ্চিদানন্দং সর্বাধিষ্ঠানমব্যযম্ ॥ ৩৪॥
ব্রহ্মৈব সচ্চিদানন্দং ন তূষ্ণীং ন বিভাষণম্ ।
ব্রহ্মৈব সচ্চিদানন্দং সত্ত্বং নাহং ন কিঞ্চন ॥ ৩৫॥
ব্রহ্মৈব সচ্চিদানন্দং পরাত্পরমনুদ্ভবম্ ।
ব্রহ্মৈব সচ্চিদানন্দং তত্ত্বাতীতং মহোত্সবম্ ॥ ৩৬॥
ব্রহ্মৈব সচ্চিদানন্দং পরমাকাশমাততম্ ।
ব্রহ্মৈব সচ্চিদানন্দং সর্বদা গুরুরূপকম্ ॥ ৩৭॥
ব্রহ্মৈব সচ্চিদানন্দং সদা নির্মলবিগ্রহম্ ।
ব্রহ্মৈব সচ্চিদানন্দং শুদ্ধচৈতন্যমাততম্ ॥ ৩৮॥
ব্রহ্মৈব সচ্চিদানন্দং স্বপ্রকাশাত্মরূপকম্ ।
ব্রহ্মৈব সচ্চিদানন্দং নিশ্চযং চাত্মকারণম্ ॥ ৩৯॥
ব্রহ্মৈব সচ্চিদানন্দং স্বযমেব প্রকাশতে ।
ব্রহ্মৈব সচ্চিদানন্দং নানাকার ইতি স্থিতম্ ॥ ৪০॥
ব্রহ্মৈব সচ্চিদাকারং ভ্রান্তাধিষ্ঠানরূপকম্ ।
ব্রহ্মৈব সচ্চিদানন্দং সর্বং নাস্তি ন মে স্থিতম্ ॥ ৪১॥
বাচামগোচরং ব্রহ্ম সচ্চিদানদবিগ্রহম্ ।
সচ্চিদানন্দরূপোঽহমনুত্পন্নমিদম্ জগত্ ॥ ৪২॥
ব্রহ্মৈবেদং সদা সত্যং নিত্যমুক্তং নিরঞ্জনম্ ।
সচ্চিদানন্দং ব্রহ্মৈব একমেব সদা সুখম্ ॥ ৪৩॥
সচ্চিদানন্দং ব্রহ্মৈব পূর্ণাত্ পূর্ণতরং মহত্ ।
সচ্চিদানন্দং ব্রহ্মৈব সর্বব্যাপকমীশ্বরম্ ॥ ৪৪॥
সচ্চিদানন্দং ব্রহ্মৈব নামরূপপ্রভাস্বরম্ ।
সচ্চিদানন্দং ব্রহ্মৈব অনন্তানন্দনির্মলম্ ॥ ৪৫॥
সচ্চিদানন্দং ব্রহ্মৈব পরমানন্দদাযকম্ ।
সচ্চিদানন্দং ব্রহ্মৈব সন্মাত্রং সদসত্পরম্ ॥ ৪৬॥
সচ্চিদানন্দং ব্রহ্মৈব সর্বেষাং পরমব্যযম্ ।
সচ্চিদানন্দং ব্রহ্মৈব মোক্ষরূপং শুভাশুভম্ ॥ ৪৭॥
সচ্চিদানন্দং ব্রহ্মৈব পরিচ্ছিন্নং ন হি ক্বচিত্ ।
ব্রহ্মৈব সর্বমেবেদং শুদ্ধবুদ্ধমলেপকম্ ॥ ৪৮॥
সচ্চিদানন্দরূপোঽহমনুত্পন্নমিদং জগত্ ।
এতত্ প্রকরণং সত্যং সদ্যোমুক্তিপ্রদাযকম্ ॥ ৪৯॥
সর্বদুঃখক্ষযকরং সর্ববিজ্ঞানদাযকম্ ।
নিত্যানন্দকরং সত্যং শান্তিদান্তিপ্রদাযকম্ ॥ ৫০॥
যস্ত্বন্তকান্তকমহেশ্বরপাদপদ্ম-
লোলম্বসপ্রভহৃদা পরিশীলকশ্চ ।
বৃন্দারবৃন্দবিনতামলদিব্যপাদো
ভাবো ভবোদ্ভবকৃপাবশতো ভবেচ্চ ॥ ৫১॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে সচ্চিদানন্দরূপতাপ্রকরণং নাম ত্রযস্ত্রিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com