Ribhu Gita - Siva Rahasya Purana Amsha 6

ঋভুগীতা ৪৩ ॥ নিদাধানুভব বর্ণন প্রকরণম্ ॥

নিদাঘঃ -

ন পশ্যামি শরীরং বা লিঙ্গং করণমেব বা ।
ন পশ্যামি মনো বাপি ন পশ্যামি জডং ততঃ ॥ ১॥
ন পশ্যামি চিদাকাশং ন পশ্যামি জগত্ ক্বচিত্ ।
ন পশ্যামি হরিং বাপি ন পশ্যামি শিবং চ বা ॥ ২॥
আনন্দস্যান্তরে লগ্নং তন্মযত্বান্ন চোত্থিতঃ ।
ন পশ্যামি সদা ভেদং ন জডং ন জগত্ ক্বচিত্ ॥ ৩॥
ন দ্বৈতং ন সুখং দুঃখং ন গুরুর্ন পরাপরম্ ।
ন গুণং বা ন তুর্যং বা ন বুদ্ধির্ন চ সংশযঃ ॥ ৪॥
ন চ কালং ন চ ভযং ন চ শোকং শুভাশুভম্ ।
ন পশ্যামি সন্দীনং ন বন্ধং ন চ সংভবম্ ॥ ৫॥
ন দেহেন্দ্রিযসদ্ভাবো ন চ সদ্বস্তু সন্মনঃ ।
ন পশ্যামি সদা স্থূলং ন কৃশং ন চ কুব্জকম্ ॥ ৬॥
ন ভূমির্ন জলং নাগ্নির্ন মোহো ন চ মন্ত্রকম্ ।
ন গুরুর্ন চ বাক্যং বা ন দৃঢং ন চ সর্বকম্ ॥ ৭॥
ন জগচ্ছ্রবণং চৈব নিদিধ্যাসং ন চাপরঃ ।
আনন্দসাগরে মগ্নস্তন্মযত্বান্ন চোত্থিতঃ ॥ ৮॥
আনন্দোঽহমশেষোঽহমজোঽহমমৃতোস্ম্যহম্ ।
নিত্যোঽহমিতি নিশ্চিত্য সদা পূর্ণোঽস্মি নিত্যধীঃ ॥ ৯॥
পূর্ণোঽহং পূর্ণচিত্তোঽহং পুণ্যোঽহং জ্ঞানবানহম্ ।
শুদ্ধোঽহং সর্বমুক্তোঽহং সর্বাকারোঽহমব্যযঃ ॥ ১০॥
চিন্মাত্রোঽহং স্বযং সোঽহং তত্ত্বরূপোঽহমীশ্বরঃ ।
পরাপরোঽহং তুর্যোঽহং প্রসন্নোঽহং রসোঽস্ম্যহম্ ॥ ১১॥
ব্রহ্মাঽহং সর্বলক্ষ্যোঽহং সদা পূর্ণোঽহমক্ষরঃ ।
মমানুভবরূপং যত্ সর্বমুক্তং চ সদ্গুরো ॥ ১২॥
নমস্করোমি তে নাহং সর্বং চ গুরুদক্ষিণা ।
মদ্দেহং ত্বত্পদে দত্তং ত্বযা ভস্মীকৃতং ক্ষণাত্ ॥ ১৩॥
মমাত্মা চ মযা দত্তঃ স্বযমাত্মনি পূরিতঃ ।
ত্বমেবাহমহং চ ত্বমহমেব ত্বমেব হি ॥ ১৪॥
ঐক্যার্ণবনিমগ্নোঽস্মি ঐক্যজ্ঞানং ত্বমেব হি ।
একং চৈতন্যমেবাহং ত্বযা গন্তুং ন শক্যতে ॥ ১৫॥
গন্তব্যদেশো নাস্ত্যেব একাকারং ন চান্যতঃ ।
ত্বযা গন্তব্যদেশো ন মযা গন্তব্যমস্তি ন ॥ ১৬॥
একং কারণমেকং চ একমেব দ্বযং ন হি ।
ত্বযা বক্তব্যকং নাস্তি মযা শ্রোতব্যমপ্যলম্ ॥ ১৭॥
ত্বমেব সদ্গুরুর্নাসি অহং নাস্মি সশিষ্যকঃ ।
ব্রহ্মমাত্রমিদং সর্বমস্মিন্মানোঽস্মি তন্মযঃ ॥ ১৮॥
ভেদাভেদং ন পশ্যামি কার্যাকার্যং ন কিঞ্চন ।
মমৈব চেন্নমস্কারো নিষ্প্রযোজন এব হি ॥ ১৯॥
তবৈব চেন্নমস্কারো ভিন্নত্বান্ন ফলং ভবেত্ ।
তব চেন্মম চেদ্ভেদঃ ফলাভাবো ন সংশযঃ ॥ ২০॥
নমস্কৃতোঽহং যুষ্মাকং ভবানজ্ঞীতি বক্ষ্যতি ।
মমৈবাপকরিষ্যামি পরিচ্ছিন্নো ভবাম্যহম্ ॥ ২১॥
মমৈব চেন্নমস্কারঃ ফলং নাস্তি স্বতঃ স্থিতে ।
কস্যাপি চ নমস্কারঃ কদাচিদপি নাস্তি হি ॥ ২২॥
সদা চৈতন্যমাত্রত্বাত্ নাহং ন ত্বং ন হি দ্বযম্ ।
ন বন্ধং ন পরো নান্যে নাহং নেদং ন কিঞ্চন ॥ ২৩॥
ন দ্বযং নৈকমদ্বৈতং নিশ্চিতং ন মনো ন তত্ ।
ন বীজং ন সুখং দুঃখং নাশং নিষ্ঠা ন সত্সদা ॥ ২৪॥
নাস্তি নাস্তি ন সন্দেহঃ কেবলাত্ পরমাত্মনি ।
ন জীবো নেশ্বরো নৈকো ন চন্দ্রো নাগ্নিলক্ষণঃ ॥ ২৫॥
ন বার্তা নেন্দ্রিযো নাহং ন মহত্ত্বং গুণান্তরম্ ।
ন কালো ন জগন্নান্যো ন বা কারণমদ্বযম্ ॥ ২৬॥
নোন্নতোঽত্যন্তহীনোঽহং ন মুক্তস্ত্বত্প্রসাদতঃ ।
সর্বং নাস্ত্যেব নাস্ত্যেব সর্বং ব্রহ্মৈব কেবলম্ ॥ ২৭॥
অহং ব্রহ্ম ইদং ব্রহ্ম আত্ম ব্রহ্মাহমেব হি ।
সর্বং ব্রহ্ম ন সন্দেহস্ত্বত্প্রসাদান্মহেশ্বরঃ ॥ ২৮॥
ত্বমেব সদ্গুরুর্ব্রহ্ম ন হি সদ্গুরুরন্যতঃ ।
আত্মৈব সদ্গুরুর্ব্রহ্ম শিষ্যো হ্যাত্মৈব সদ্গুরুঃ ॥ ২৯॥
গুরুঃ প্রকল্পতে শিষ্যো গুরুহীনো ন শিষ্যকঃ ।
শিষ্যে সতি গুরুঃ কল্প্যঃ শিষ্যাভাবে গুরুর্ন হি ॥ ৩০॥
গুরুশিষ্যবিহীনাত্মা সর্বত্র স্বযমেব হি ।
চিন্মাত্রাত্মনি কল্প্যোঽহং চিন্মাত্রাত্মা ন চাপরঃ ॥ ৩১॥
চিন্মাত্রাত্মাহমেবৈকো নান্যত্ কিঞ্চিন্ন বিদ্যতে ।
সর্বস্থিতোঽহং সততং নান্যং পশ্যামি সদ্গুরোঃ ॥ ৩২॥
নান্যত্ পশ্যামি চিত্তেন নান্যত্ পশ্যামি কিঞ্চন ।
সর্বাভাবান্ন পশ্যামি সর্বং চেদ্ দৃশ্যতাং পৃথক্ ॥ ৩৩॥
এবং ব্রহ্ম প্রপশ্যামি নান্যদস্তীতি সর্বদা ।
অহো ভেদং প্রকুপিতং অহো মাযা ন বিদ্যতে ॥ ৩৪॥
অহো সদ্গুরুমাহাত্ম্যমহো ব্রহ্মসুখং মহত্ ।
অহো বিজ্ঞানমাহাত্ম্যমহো সজ্জনবৈভবঃ ॥ ৩৫॥
অহো মোহবিনাশশ্চ অহো পশ্যামি সত্সুখম্ ।
অহো চিত্তং ন পশ্যামি অহো সর্বং ন কিঞ্চন ॥ ৩৬॥
অহমেব হি নান্যত্র অহমানন্দ এব হি ।
মমান্তঃকরণে যদ্যন্নিশ্চিতং ভবদীরিতম্ ॥ ৩৭॥
সর্বং ব্রহ্ম পরং ব্রহ্ম ন কিঞ্চিদন্যদৈবতম্ ।
এবং পশ্যামি সততং নান্যত্ পশ্যামি সদ্গুরো ॥ ৩৮॥
এবং নিশ্চিত্য তিষ্ঠামি স্বস্বরূপে মমাত্মনি ॥ ৩৯॥
অগাধবেদবাক্যতো ন চাধিভেষজং ভবে-
দুমাধবাঙ্ঘ্রিপঙ্কজস্মৃতিঃ প্রবোধমোক্ষদা ।
প্রবুদ্ধভেদবাসনানিরুদ্ধহৃত্তমোভিদে
মহারুজাঘবৈদ্যমীশ্বরং হৃদম্বুজে ভজে ॥ ৪০॥
দ্যতত্প্রদগ্ধকামদেহ দুগ্ধসন্নিভং প্রমুগ্ধসামি ।
সোমধারিণং শ্রুতীড্যগদ্যসংস্তুতং ত্বভেদ্যমেকশঙ্করম্ ॥ ৪১॥
বরঃ কঙ্কঃ কাকো ভবদুভযজাতেষু নিযতং
মহাশঙ্কাতঙ্কৈর্বিধিবিহিতশান্তেন মনসা ।
যদি স্বৈরং ধ্যাযন্নগপতিসুতানাযকপদং
স এবাযং ধুর্যো ভবতি মুনিজাতেষু নিযতম্ ॥ ৪২॥
কঃ কালান্তকপাদপদ্মভজনাদন্যদ্ধৃদা কষ্টদাং
ধর্মাভাসপরংপরাং প্রথযতে মূর্খো খরীং তৌরগীম্ ।
কর্তুং যত্নশতৈরশক্যকরণৈর্বিন্দেত দুঃখাদিকংvar was দুঃখাধিকম্
তদ্বত্ সাংবপদাংবুজার্চনরতিং ত্যক্ত্বা বৃথা দুঃখভাক্ ॥ ৪৩॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে নিদাঘানুভববর্ণনপ্রকরণং নাম ত্রিচত্বারিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com