Ribhu Gita - Siva Rahasya Purana Amsha 6

ঋভুগীতা ২১ ॥ সর্ব-প্রপঞ্চ-হেযত্ব প্রকরণ নিরূপণম্ ॥

ঋভুঃ -

মহারহস্যং বক্ষ্যামি বেদান্তেষু চ গোপিতম্ ।
যস্য শ্রবণমাত্রেণ ব্রহ্মৈব ভবতি স্বযম্ ॥ ১॥
সচ্চিদানন্দমাত্রোঽহং সর্বং সচ্চিন্মযং ততম্ ।
তদেব ব্রহ্ম সংপশ্যত্ ব্রহ্মৈব ভবতি স্বযম্ ॥ ২॥
অহং ব্রহ্ম ইদং ব্রহ্ম নানা ব্রহ্ম ন সংশযঃ ।
সত্যং ব্রহ্ম সদা ব্রহ্মাপ্যহং ব্রহ্মৈব কেবলম্ ॥ ৩॥
গুরুর্ব্রহ্ম গুণো ব্রহ্ম সর্বং ব্রহ্মপরোঽস্ম্যহম্ ।
নান্তং ব্রহ্ম অহং ব্রহ্ম সর্বং ব্রহ্মাপরোঽস্ম্যহম্ ॥ ৪॥
বেদবেদ্যং পরং ব্রহ্ম বিদ্যা ব্রহ্ম বিশেষতঃ ।
আত্মা ব্রহ্ম অহং ব্রহ্ম আদ্যন্তং ব্রহ্ম সোঽস্ম্যহম্ ॥ ৫॥
সত্যং ব্রহ্ম সদা ব্রহ্ম অন্যন্নাস্তি সদা পরম্ ।
অহং ব্রহ্ম ত্বহং নাস্তি অহংকারপরং নহি ॥ ৬॥
অহং ব্রহ্ম ইদং নাস্তি অযমাত্মা মহান্ সদা ।
বেদান্তবেদ্যো ব্রহ্মাত্মা অপরং শশশৃঙ্গবত্ ॥ ৭॥
ভূতং নাস্তি ভবিষ্যং ন ব্রহ্মৈব স্থিরতাং গতঃ ।
চিন্মযোঽহং জডং তুচ্ছং চিন্মাত্রং দেহনাশনম্ ॥ ৮॥
চিত্তং কিঞ্চিত্ ক্বচিচ্চাপি চিত্তং দূরোঽহমাত্মকঃ ।var was হরোঽহমাত্মকঃ
সত্যং জ্ঞানমনন্তং যন্নানৃতং জডদুঃখকম্ ॥ ৯॥
আত্মা সত্যমনন্তাত্মা দেহমেব ন সংশযঃ ।
বার্তাপ্যসচ্ছ্রুতং তন্ন অহমেব মহোমহঃ ॥ ১০॥
একসংখ্যাপ্যসদ্ব্রহ্ম সত্যমেব সদাঽপ্যহম্ ।
সর্বমেবমসত্যং চ উত্পন্নত্বাত্ পরাত্ সদা ॥ ১১॥
সর্বাবযবহীনোঽপি নিত্যত্বাত্ পরমো হ্যহম্ ।
সর্বং দৃশ্যং ন মে কিঞ্চিত্ চিন্মযত্বাদ্বদাম্যহম্ ॥ ১২॥
আগ্রহং চ ন মে কিঞ্চিত্ চিন্মযত্বাদ্বদাম্যহম্ ।
ইদমিত্যপি নির্দেশো ন ক্বচিন্ন ক্বচিত্ সদা ॥ ১৩॥
নির্গুণব্রহ্ম এবাহং সুগুরোরুপদেশতঃ ।
বিজ্ঞানং সগুণো ব্রহ্ম অহং বিজ্ঞানবিগ্রহঃ ॥ ১৪॥
নির্গুণোঽস্মি নিরংশোঽস্মি ভবোঽস্মি ভরণোঽস্ম্যহম্ ।
দেবোঽস্মি দ্রব্যপূর্ণোঽস্মি শুদ্ধোঽস্মি রহিতোঽস্ম্যহম্ ॥ ১৫॥
রসোঽস্মি রসহীনোঽস্মি তুর্যোঽস্মি শুভভাবনঃ ।
কামোঽস্মি কার্যহীনোঽস্মি নিত্যনির্মলবিগ্রহঃ ॥ ১৬॥
আচারফলহীনোঽস্মি অহং ব্রহ্মাস্মি কেবলম্ ।
ইদং সর্বং পরং ব্রহ্ম অযমাত্মা ন বিস্মযঃ ॥ ১৭॥
পূর্ণাপূর্ণস্বরূপাত্মা নিত্যং সর্বাত্মবিগ্রহঃ ।
পরমানন্দতত্ত্বাত্মা পরিচ্ছিন্নং ন হি ক্বচিত্ ॥ ১৮॥
একাত্মা নির্মলাকার অহমেবেতি ভাবয ।
অহংভাবনযা যুক্ত অহংভাবেন সংযুতঃ ॥ ১৯॥
শান্তং ভাবয সর্বাত্মা শাম্যতত্ত্বং মনোমলঃ ।
দেহোঽহমিতি সন্ত্যজ্য ব্রহ্মাহমিতি নিশ্চিনু ॥ ২০॥
ব্রহ্মৈবাহং ব্রহ্মমাত্রং ব্রহ্মণোঽন্যন্ন কিঞ্চন ।
ইদং নাহমিদং নাহমিদং নাহং সদা স্মর ॥ ২১॥
অহং সোঽহমহং সোঽহমহং ব্রহ্মেতি ভাবয ।
চিদহং চিদহং ব্রহ্ম চিদহং চিদহং বদ ॥ ২২॥
নেদং নেদং সদা নেদং ন ত্বং নাহং চ ভাবয ।
সর্বং ব্রহ্ম ন সন্দেহঃ সর্বং বেদং ন কিঞ্চন ॥ ২৩॥
সর্বং শব্দার্থভবনং সর্বলোকভযং ন চ ।
সর্বতীর্থং ন সত্যং হি সর্বদেবালযং ন হি ॥ ২৪॥
সর্বচৈতন্যমাত্রত্বাত্ সর্বং নাম সদা ন হি ।
সর্বরূপং পরিত্যজ্য সর্বং ব্রহ্মেতি নিশ্চিনু ॥ ২৫॥
ব্রহ্মৈব সর্বং তত্সত্যং প্রপঞ্চং প্রকৃতির্নহি ।
প্রাকৃতং স্মরণং ত্যজ্য ব্রহ্মস্মরণমাহর ॥ ২৬॥
ততস্তদপি সন্ত্যজ্য নিজরূপে স্থিরো ভব ।
স্থিররূপং পরিত্যজ্য আত্মমাত্রং ভবত্যসৌ ॥ ২৭॥
ত্যাগত্বমপি সন্ত্যজ্য ভেদমাত্রং সদা ত্যজ ।
স্বযং নিজং সমাবৃত্য স্বযমেব স্বযং ভজ ॥ ২৮॥
ইদমিত্যঙ্গুলীদৃষ্টমিদমস্তমচেতনম্ ।
ইদং বাক্যং চ বাক্যেন বাচাঽপি পরিবেদনম্ ॥ ২৯॥
সর্বভাবং ন সন্দেহঃ সর্বং নাস্তি ন সংশযঃ ।
সর্বং তুচ্ছং ন সন্দেহঃ সর্বং মাযা ন সংশযঃ ॥ ৩০॥
ত্বং ব্রহ্মাহং ন সন্দেহো ব্রহ্মৈবেদং ন সংশযঃ ।
সর্বং চিত্তং ন সন্দেহঃ সর্বং ব্রহ্ম ন সংশযঃ ॥ ৩১॥
ব্রহ্মান্যদ্ভাতি চেন্মিথ্যা সর্বং মিথ্যা পরাবরা ।
ন দেহং পঞ্চভূতং বা ন চিত্তং ভ্রান্তিমাত্রকম্ ॥ ৩২॥
ন চ বুদ্ধীন্দ্রিযাভাবো ন মুক্তির্ব্রহ্মমাত্রকম্ ।
নিমিষং চ ন শঙ্কাপি ন সঙ্কল্পং তদস্তি চেত্ ॥ ৩৩॥
অহঙ্কারমসদ্বিদ্ধি অভিমানং তদস্তি চেত্ ।
ন চিত্তস্মরণং তচ্চেন্ন সন্দেহো জরা যদি ॥ ৩৪॥
প্রাণো...দীযতে শাস্তি ঘ্রাণো যদিহ গন্ধকম্ ।
চক্ষুর্যদিহ ভূতস্য শ্রোত্রং শ্রবণভাবনম্ ॥ ৩৫॥
ত্বগস্তি চেত্ স্পর্শসত্তা জিহ্বা চেদ্রসসঙ্গ্রহঃ ।
জীবোঽস্তি চেজ্জীবনং চ পাদশ্চেত্ পাদচারণম্ ॥ ৩৬॥
হস্তৌ যদি ক্রিযাসত্তা স্রষ্টা চেত্ সৃষ্টিসংভবঃ ।
রক্ষ্যং চেদ্রক্ষকো বিষ্ণুর্ভক্ষ্যং চেদ্ভক্ষকঃ শিবঃ ॥ ৩৭॥
সর্বং ব্রহ্ম ন সন্দেহঃ সর্বং ব্রহ্মৈব কেবলম্ ।
পূজ্যং চেত্ পূজনং চাস্তি ভাস্যং চেদ্ভাসকঃ শিবঃ ॥ ৩৮॥
সর্বং মিথ্যা ন সন্দেহঃ সর্বং চিন্মাত্রমেব হি ।
অস্তি চেত্ কারণং সত্যং কার্যং চৈব ভবিষ্যতি ॥ ৩৯॥
নাস্তি চেন্নাস্তি হীনোঽহং ব্রহ্মৈবাহং পরাযণম্ ।
অত্যন্তদুঃখমেতদ্ধি অত্যন্তসুখমব্যযম্ ॥ ৪০॥
অত্যন্তং জন্মমাত্রং চ অত্যন্তং রণসংভবম্ ।
অত্যন্তং মলিনং সর্বমত্যন্তং নির্মলং পরম্ ॥ ৪১॥
অত্যন্তং কল্পনং দুষ্টং অত্যন্তং নির্মলং ত্বহম্ ।
অত্যন্তং সর্বদা দোষমত্যন্তং সর্বদা গুণম্ ॥ ৪২॥
অত্যন্তং সর্বদা শুভ্রমত্যন্তং সর্বদা মলম্ ।
অত্যন্তং সর্বদা চাহমত্যন্তং সর্বদা ইদম্ ॥ ৪৩॥
অত্যন্তং সর্বদা ব্রহ্ম অত্যন্তং সর্বদা জগত্ ।
এতাবদুক্তমভযমহং ভেদং ন কিঞ্চন ॥ ৪৪॥
সদসদ্বাপি নাস্ত্যেব সদসদ্বাপি বাক্যকম্ ।
নাস্তি নাস্তি ন সন্দেহো ব্রহ্মৈবাহং ন সংশযঃ ॥ ৪৫॥
কারণং কার্যরূপং বা সর্বং নাস্তি ন সংশযঃ ।
কর্তা ভোক্তা ক্রিযা বাপি ন ভোজ্যং ভোগতৃপ্ততা ॥ ৪৬॥
সর্বং ব্রহ্ম ন সন্দেহঃ সর্ব শব্দো ন বাস্তবম্ ।
ভূতং ভবিষ্যং বার্তং তু কার্যং বা নাস্তি সর্বদা ॥ ৪৭॥
সদসদ্ভেদ্যভেদং বা ন গুণা গুণভাগিনঃ ।
নির্মলং বা মলং বাপি নাস্তি নাস্তি ন কিঞ্চন ॥ ৪৮॥
ভাষ্যং বা ভাষণং বাঽপি নাস্তি নাস্তি ন কিঞ্চন ।
প্রবলং দুর্বলং বাপি অহং চ ত্বং চ বা ক্বচিত্ ॥ ৪৯॥
গ্রাহ্যং চ গ্রাহকং বাপি উপেক্ষ্যং নাত্মনঃ ক্বচিত্ ।
তীর্থং বা স্নানরূপং বা দেবো বা দেব পূজনম্ ॥ ৫০॥
জন্ম বা মরণং হেতুর্নাস্তি নাস্তি ন কিঞ্চন ।
সত্যং বা সত্যরূপং বা নাস্তি নাস্তি ন কিঞ্চন ॥ ৫১॥
মাতরঃ পিতরো বাপি দেহো বা নাস্তি কিঞ্চন ।
দৃগ্রূপং দৃশ্যরূপং বা নাস্তি নাস্তীহ কিঞ্চন ॥ ৫২॥
মাযাকার্যং চ মাযা বা নাস্তি নাস্তীহ কিঞ্চন ।
জ্ঞানং বা জ্ঞানভেদো বা নাস্তি নাস্তীহ কিঞ্চন ॥ ৫৩॥
সর্বপ্রপঞ্চহেযত্বং প্রোক্তং প্রকরণং চ তে ।
যঃ শৃণোতি সকৃদ্বাপি আত্মাকারং প্রপদ্যতে ॥ ৫৪॥

স্কন্দঃ -

মাযা সা ত্রিগুণা গণাধিপগুরোরেণাঙ্কচূডামণেঃ
পাদাম্ভোজসমর্চনেন বিলযং যাত্যেব নাস্ত্যন্যথা ।
বিদ্যা হৃদ্যতমা সুবিদ্যুদিব সা ভাত্যেব হৃত্পঙ্কজে
যস্যানল্পতপোভিরুগ্রকরণাদৃক্ তস্য মুক্তিঃ স্থিরা ॥ ৫৫॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে সর্বপ্রপঞ্চহেযত্বপ্রকরণবর্ণনং নাম একবিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com