Ribhu Gita - Siva Rahasya Purana Amsha 6

ঋভুগীতা ৩৮ ॥ প্রপঞ্চ শূন্যত্ব প্রকরণম্ ॥

ঋভুঃ -

বক্ষ্যে অত্যদ্ভুতং ব্যক্তং সচ্চিদানন্দমাত্রকম্ ।
সর্বপ্রপঞ্চশূন্যত্বং সর্বমাত্মেতি নিশ্চিতম্ ॥ ১॥
আত্মরূপপ্রপঞ্চং বা আত্মরূপপ্রপঞ্চকম্ ।
সর্বপ্রপঞ্চং নাস্ত্যেব সর্বং ব্রহ্মেতি নিশ্চিতম্ ॥ ২॥
নিত্যানুভবমানন্দং নিত্যং ব্রহ্মেতি ভাবনম্ ।
চিত্তরূপপ্রপঞ্চং বা চিত্তসংসারমেব বা ॥ ৩॥
ইদমস্তীতি সত্তাত্বমহমস্তীতি বা জগত্ ।
স্বান্তঃকরণদোষং বা স্বান্তঃকরণকার্যকম্ ॥ ৪॥
স্বস্য জীবভ্রমঃ কশ্চিত্ স্বস্য নাশং স্বজন্মনা ।
ঈশ্বরঃ কশ্চিদস্তীতি জীবোঽহমিতি বৈ জগত্ ॥ ৫॥
মাযা সত্তা মহা সত্তা চিত্তসত্তা জগন্মযম্ ।
যদ্যচ্চ দৃশ্যতে শাস্ত্রৈর্যদ্যদ্বেদে চ ভাষণম্ ॥ ৬॥
একমিত্যেব নির্দেশং দ্বৈতমিত্যেব ভাষণম্ ।
শিবোঽস্মীতি ভ্রমঃ কশ্চিত্ ব্রহ্মাস্মীতি বিভ্রমঃ ॥ ৭॥
বিষ্ণুরস্মীতি বিভ্রান্তির্জগদস্তীতি বিভ্রমঃ ।var was জগদস্মীতি
ঈষদস্তীতি বা ভেদং ঈষদস্তীতি বা দ্বযম্ ॥ ৮॥
সর্বমস্তীতি নাস্তীতি সর্বং ব্রহ্মেতি নিশ্চযম্ ।
আত্মধ্যানপ্রপঞ্চং বা স্মরণাদিপ্রপঞ্চকম্ ॥ ৯॥
দুঃখরূপপ্রপঞ্চং বা সুখরূপপ্রপঞ্চকম্ ।
দ্বৈতাদ্বৈতপ্রপঞ্চং বা সত্যাসত্যপ্রপঞ্চকম্ ॥ ১০॥
জাগ্রত্প্রপঞ্চমেবাপি তথা স্বপ্নপ্রপঞ্চকম্ ।
সুপ্তিজ্ঞানপ্রপঞ্চং বা তুর্যজ্ঞানপ্রপঞ্চকম্ ॥ ১১॥
বেদজ্ঞানপ্রপঞ্চং বা শাস্ত্রজ্ঞানপ্রপঞ্চকম্ ।
পাপবুদ্ধিপ্রপঞ্চং বা পুণ্যভেদপ্রপঞ্চকম্ ॥ ১২॥
জ্ঞানরূপপ্রপঞ্চং বা নির্গুণজ্ঞানপ্রপঞ্চকম্ ।
গুণাগুণপ্রপঞ্চং বা দোষাদোষবিনির্ণযম্ ॥ ১৩॥
সত্যাসত্যবিচারং বা চরাচরবিচারণম্ ।
এক আত্মেতি সদ্ভাবং মুখ্য আত্মেতি ভাবনম্ ॥ ১৪॥
সর্বপ্রপঞ্চং নাস্ত্যেব সর্বং ব্রহ্মেতি নিশ্চযম্ ।
দ্বৈতাদ্বৈতসমুদ্ভেদং নাস্তি নাস্তীতি ভাষণম্ ॥ ১৫॥
অসত্যং জগদেবেতি সত্যং ব্রহ্মেতি নিশ্চযম্ ।
কার্যরূপং কারণং চ নানাভেদবিজৃম্ভণম্ ॥ ১৬॥
সর্বমন্ত্রপ্রদাতারং দূরে দূরং তথা তথা ।
সর্বং সন্ত্যজ্য সততং স্বাত্মন্যেব স্থিরো ভব ॥ ১৭॥
মৌনভাবং মৌনকার্যং মৌনযোগং মনঃপ্রিযম্ ।
পঞ্চাক্ষরোপদেষ্টারং তথা চাষ্টাক্ষরপ্রদম্ ॥ ১৮॥
যদ্যদ্যদ্যদ্বেদশাস্ত্রং যদ্যদ্ভেদো গুরোঽপি বা ।
সর্বদা সর্বলোকেষু সর্বসঙ্কল্পকল্পনম্ ॥ ১৯॥
সর্ববাক্যপ্রপঞ্চং হি সর্বচিত্তপ্রপঞ্চকম্ ।
সর্বাকারবিকল্পং চ সর্বকারণকল্পনম্ ॥ ২০॥
সর্বদোষপ্রপঞ্চং চ সুখদুঃখপ্রপঞ্চকম্ ।
সহাদেযমুপাদেযং গ্রাহ্যং ত্যাজ্যং চ ভাষণম্ ॥ ২১॥
বিচার্য জন্মমরণং বাসনাচিত্তরূপকম্ ।
কামক্রোধং লোভমোহং সর্বডম্ভং চ হুংকৃতিম্ ॥ ২২॥
ত্রৈলোক্যসংভবং দ্বৈতং ব্রহ্মেন্দ্রবরুণাদিকম্ ।
জ্ঞানেন্দ্রিযং চ শব্দাদি দিগ্বায্বর্কাদিদৈবতম্ ॥ ২৩॥
কর্মেন্দ্রিযাদিসদ্ভাবং বিষযং দেবতাগণম্ ।
অন্তঃকরণবৃত্তিং চ বিষযং চাধিদৈবতম্ ॥ ২৪॥
চিত্তবৃত্তিং বিভেদং চ বুদ্ধিবৃত্তিনিরূপণম্ ।
মাযামাত্রমিদং দ্বৈতং সদসত্তাদিনির্ণযম্ ॥ ২৫॥
কিঞ্চিদ্ দ্বৈতং বহুদ্বৈতং জীবদ্বৈতং সদা হ্যসত্ ।
জগদুত্পত্তিমোহং চ গুরুশিষ্যত্বনির্ণযম্ ॥ ২৬॥
গোপনং তত্পদার্থস্য ত্বংপদার্থস্য মেলনম্ ।
তথা চাসিপদার্থস্য ঐক্যবুদ্ধ্যানুভাবনম্ ॥ ২৭॥
ভেদেষু ভেদাভেদং চ নান্যত্ কিঞ্চিচ্চ বিদ্যতে ।
এতত্ প্রপঞ্চং নাস্ত্যেব সর্বং ব্রহ্মেতি নিশ্চযঃ ॥ ২৮॥
সর্বং চৈতন্যমাত্রত্বাত্ কেবলং ব্রহ্ম এব সঃ ।
আত্মাকারমিদং সর্বমাত্মনোঽন্যন্ন কিঞ্চন ॥ ২৯॥
তুর্যাতীতং ব্রহ্মণোঽন্যত্ সত্যাসত্যং ন বিদ্যতে ।
সর্বং ত্যক্ত্বা তু সততং স্বাত্মন্যেব স্থিরো ভব ॥ ৩০॥
চিত্তং কালং বস্তুভেদং সঙ্কল্পং ভাবনং স্বযম্ ।
সর্বং সংত্যজ্য সততং সর্বং ব্রহ্মৈব ভাবয ॥ ৩১॥
যদ্যদ্ভেদপরং শাস্ত্রং যদ্যদ্ ভেদপরং মনঃ ।
সর্বং সংত্যজ্য সততং স্বাত্মন্যেব স্থিরো ভব ॥ ৩২॥
মনঃ কল্পিতকল্পং বা আত্মাকল্পনবিভ্রমম্ ।
অহংকারপরিচ্ছেদং দেহোঽহং দেহভাবনা ॥ ৩৩॥
সর্বং সংত্যজ্য সততমাত্মন্যেব স্থিরো ভব ।
প্রপঞ্চস্য চ সদ্ভাবং প্রপঞ্চোদ্ভবমন্যকম্ ॥ ৩৪॥
বন্ধসদ্ভাবকলনং মোক্ষসদ্ভাবভাষণম্ ।
দেবতাভাবসদ্ভাবং দেবপূজাবিনির্ণযম্ ॥ ৩৫॥
পঞ্চাক্ষরেতি যদ্দ্বৈতমষ্টাক্ষরস্য দৈবতম্ ।
প্রাণাদিপঞ্চকাস্তিত্বমুপপ্রাণাদিপঞ্চকম্ ॥ ৩৬॥
পৃথিবীভূতভেদং চ গুণা যত্ কুণ্ঠনাদিকম্ ।
বেদান্তশাস্ত্রসিদ্ধান্তং শৈবাগমনমেব চ ॥ ৩৭॥
লৌকিকং বাস্তবং দোষং প্রবৃত্তিং চ নিবৃত্তিকম্ ।
সর্বং সংত্যজ্য সততমাত্মন্যেব স্থিরো ভব ॥ ৩৮॥
আত্মজ্ঞানসুখং ব্রহ্ম অনাত্মজ্ঞানদূষণম্ ।
রেচকং পূরকং কুম্ভং ষডাধারবিশোধনম্ ॥ ৩৯॥
দ্বৈতবৃত্তিশ্চ দেহোঽহং সাক্ষিবৃত্তিশ্চিদংশকম্ ।
অখণ্ডাকারবৃত্তিশ্চ অখণ্ডাকারসংমতম্ ॥ ৪০॥
অনন্তানুভবং চাপি অহং ব্রহ্মেতি নিশ্চযম্ ।
উত্তমং মধ্যমং চাপি তথা চৈবাধমাধমম্ ॥ ৪১॥
দূষণং ভূষণং চৈব সর্ববস্তুবিনিন্দনম্ ।
অহং ব্রহ্ম ইদং ব্রহ্ম সর্বং ব্রহ্মৈব তত্ত্বতঃ ॥ ৪২॥
অহং ব্রহ্মাস্মি মুগ্ধোঽস্মি বৃদ্ধোঽস্মি সদসত্পরঃ ।
বৈশ্বানরো বিরাট্ স্থূলপ্রপঞ্চমিতি ভাবনম্ ॥ ৪৩॥
আনন্দস্ফারণেনাহং পরাপরবিবর্জিতঃ ।
নিত্যানন্দমযং ব্রহ্ম সচ্চিদানন্দবিগ্রহঃ ॥ ৪৪॥
দৃগ্রূপং দৃশ্যরূপং চ মহাসত্তাস্বরূপকম্ ।
কৈবল্যং সর্বনিধনং সর্বভূতান্তরং গতম্ ॥ ৪৫॥
ভূতভব্যং ভবিষ্যচ্চ বর্তমানমসত্ সদা ।
কালভাবং দেহভাবং সত্যাসত্যবিনির্ণযম্ ॥ ৪৬॥
প্রজ্ঞানঘন এবাহং শান্তাশান্তং নিরঞ্জনম্ ।
প্রপঞ্চবার্তাস্মরণং দ্বৈতাদ্বৈতবিভাবনম্ ॥ ৪৭॥
শিবাগমসমাচারং বেদান্তশ্রবণং পদম্ ।
অহং ব্রহ্মাস্মি শুদ্ধোঽস্মি চিন্মাত্রোঽস্মি সদাশিবঃ ॥ ৪৮॥
সর্বং ব্রহ্মেতি সন্ত্যজ্য স্বাত্মন্যেব স্থিরো ভব ।
অহং ব্রহ্ম ন সন্দেহ ইদং ব্রহ্ম ন সংশযঃ ॥ ৪৯॥
স্থূলদেহং সূক্ষ্মদেহং কারণং দেহমেব চ ।
এবং জ্ঞাতুং চ সততং ব্রহ্মৈবেদং ক্ষণে ক্ষণে ॥ ৫০॥
শিবো হ্যাত্মা শিবো জীবঃ শিবো ব্রহ্ম ন সংশযঃ ।
এতত্ প্রকরণং যস্তু সকৃদ্বা সর্বদাপি বা ॥ ৫১॥
পঠেদ্বা শৃণুযাদ্বাপি স চ মুক্তো ন সংশযঃ ।
নিমিষং নিমিষার্ধং বা শ্রুত্বৈতব্রহ্মভাগ্ভবেত্ ॥ ৫২॥
লোকালোকজগত্স্থিতিপ্রবিলযপ্রোদ্ভাবসত্তাত্মিকা
ভীতিঃ শঙ্করনামরূপমস্কৃদ্ব্যাকুর্বতে কেবলম্ ।
সত্যাসত্যনিরঙ্কুশশ্রুতিবচোবীচীভিরামৃশ্যতে
যস্ত্বেতত্ সদিতীব তত্ত্ববচনৈর্মীমাংস্যতেঽযং শিবঃ ॥ ৫৩॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে প্রপঞ্চশূন্যত্বপ্রকরণং নাম অষ্টত্রিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com