Ribhu Gita - Siva Rahasya Purana Amsha 6

ঋভুগীতা ২৬ ॥ জ্ঞানামৃত-মনোময-প্রকরণ বর্ণনম্ ॥

ঋভুঃ -

বক্ষ্যে সচ্চিত্পরানন্দং স্বভাবং সর্বদা সুখম্ ।
সর্ববেদপুরাণানাং সারাত্ সারতরং স্বযম্ ॥ ১॥
ন ভেদং চ দ্বযং দ্বন্দ্বং ন ভেদং ভেদবর্জিতম্ ।
ইদমেব পরং ব্রহ্ম জ্ঞানাশ্রযমনামযম্ ॥ ২॥
ন ক্বচিন্নাত এবাহং নাক্ষরং ন পরাত্পরম্ ।
ইদমেব পরং ব্রহ্ম জ্ঞানাশ্রযমনামযম্ ॥ ৩॥
ন বহির্নান্তরং নাহং ন সঙ্কল্পো ন বিগ্রহঃ ।
ইদমেব পরং ব্রহ্ম জ্ঞানাশ্রযমনামযম্ ॥ ৪॥
ন সত্যং চ পরিত্যজ্য ন বার্তা নার্থদূষণম্ ।
ইদমেব পরং ব্রহ্ম জ্ঞানাশ্রযমনামযম্ ॥ ৫॥
ন গুণো গুণিবাক্যং বা ন মনোবৃত্তিনিশ্চযঃ ।
ন জপং ন পরিচ্ছিন্নং ন ব্যাপকমসত্ ফলম্ ॥ ৬॥
ন গুরুর্ন চ শিষ্যো বা ন স্থিরং ন শুভাশুভম্ ।
নৈকরূপং নান্যরূপং ন মোক্ষো ন চ বন্ধকম্ ॥ ৭॥
অহং পদার্থস্তত্পদং বা নেন্দ্রিযং বিষযাদিকম্ ।
ন সংশযং ন তুচ্ছং বা ন নিশ্চযং ন বা কৃতম্ ॥ ৮॥
ন শান্তিরূপমদ্বৈতং ন চোর্ধ্বং ন চ নীচকম্ ।
ন লক্ষণং ন দুঃখাঙ্গং ন সুখং ন চ চঞ্চলম্ ॥ ৯॥
ন শরীরং ন লিঙ্গং বা ন কারণমকারণম্ ।
ন দুঃখং নান্তিকং নাহং ন গূঢং ন পরং পদম্ ॥ ১০॥
ন সঞ্চিতং চ নাগামি ন সত্যং চ ত্বমাহকম্ ।
নাজ্ঞানং ন চ বিজ্ঞানং ন মূঢো ন চ বিজ্ঞবান্ ॥ ১১॥
ন নীচং নরকং নান্তং ন মুক্তির্ন চ পাবনম্ ।
ন তৃষ্ণা ন চ বিদ্যাত্বং নাহং তত্ত্বং ন দেবতা ॥ ১২॥
ন শুভাশুভসঙ্কেতো ন মৃত্যুর্ন চ জীবনম্ ।
ন তৃপ্তির্ন চ ভোজ্যং বা ন খণ্ডৈকরসোঽদ্বযম্ ॥ ১৩॥
ন সঙ্কল্পং ন প্রপঞ্চং ন জাগরণরাজকম্ ।
ন কিঞ্চিত্সমতাদোষো ন তুর্যগণনা ভ্রমঃ ॥ ১৪॥
ন সর্বং সমলং নেষ্টং ন নীতির্ন চ পূজনম্ ।
ন প্রপঞ্চং ন বহুনা নান্যভাষণসঙ্গমঃ ॥ ১৫॥
ন সত্সঙ্গমসত্সঙ্গঃ ন ব্রহ্ম ন বিচারণম্ ।
নাভ্যাসং ন চ বক্তা চ ন স্নানং ন চ তীর্থকম্ ॥ ১৬॥
ন পুণ্যং ন চ বা পাপং ন ক্রিযা দোষকারণম্ ।
ন চাধ্যাত্মং নাধিভূতং ন দৈবতমসম্ভবম্ ॥ ১৭॥
ন জন্মমরণে ক্বাপি জাগ্রত্স্বপ্নসুষুপ্তিকম্ ।
ন ভূলোকং ন পাতালং ন জযাপজযাজযৌ ॥ ১৮॥
ন হীনং ন চ বা ভীতির্ন রতির্ন মৃতিস্ত্বরা ।
অচিন্ত্যং নাপরাধ্যাত্মা নিগমাগমবিভ্রমঃ ॥ ১৯॥
ন সাত্ত্বিকং রাজসং চ ন তামসগুণাধিকম্ ।
ন শৈবং ন চ বেদান্তং ন স্বাদ্যং তন্ন মানসম্ ॥ ২০॥
ন বন্ধো ন চ মোক্ষো বা ন বাক্যং ঐক্যলক্ষণম্ ।
ন স্ত্রীরূপং ন পুংভাবঃ ন ষণ্ডো ন স্থিরঃ পদম্ ॥ ২১॥
ন ভূষণং ন দূষণং ন স্তোত্রং ন স্তুতির্ন হি ।
ন লৌকিকং বৈদিকং ন শাস্ত্রং ন চ শাসনম্ ॥ ২২॥
ন পানং ন কৃশং নেদং ন মোদং ন মদামদম্ ।
ন ভাবনমভাবো বা ন কুলং নামরূপকম্ ॥ ২৩॥
নোত্কৃষ্টং চ নিকৃষ্টং চ ন শ্রেযোঽশ্রেয এব হি ।
নির্মলত্বং মলোত্সর্গো ন জীবো ন মনোদমঃ ॥ ২৪॥
ন শান্তিকলনা নাগং ন শান্তির্ন শমো দমঃ ।
ন ক্রীডা ন চ ভাবাঙ্গং ন বিকারং ন দোষকম্ ॥ ২৫॥
ন যত্কিঞ্চিন্ন যত্রাহং ন মাযাখ্যা ন মাযিকা ।
যত্কিঞ্চিন্ন চ ধর্মাদি ন ধর্মপরিপীডনম্ ॥ ২৬॥
ন যৌবনং ন বাল্যং বা ন জরামরণাদিকম্ ।
ন বন্ধুর্ন চ বাঽবন্ধুর্ন মিত্রং ন চ সোদরঃ ॥ ২৭॥
নাপি সর্বং ন চাকিঞ্চিন্ন বিরিঞ্চো ন কেশবঃ ।
ন শিবো নাষ্টদিক্পালো ন বিশ্বো ন চ তৈজসঃ ॥ ২৮॥
ন প্রাজ্ঞো হি ন তুর্যো বা ন ব্রহ্মক্ষত্রবিড্বরঃ ।
ইদমেব পরং ব্রহ্ম জ্ঞানামৃতমনামযম্ ॥ ২৯॥
ন পুনর্ভাবি পশ্চাদ্বা ন পুনর্ভবসংভবঃ ।
ন কালকলনা নাহং ন সংভাষণকারণম্ ॥ ৩০॥
ন চোর্ধ্বমন্তঃকরণং ন চ চিন্মাত্রভাষণম্ ।
ন ব্রহ্মাহমিতি দ্বৈতং ন চিন্মাত্রমিতি দ্বযম্ ॥ ৩১॥
নান্নকোশং ন চ প্রাণমনোমযমকোশকম্ ।
ন বিজ্ঞানমযঃ কোশঃ ন চানন্দমযঃ পৃথক্ ॥ ৩২॥
ন বোধরূপং বোধ্যং বা বোধকং নাত্র যদ্ভ্রমঃ ।
ন বাধ্যং বাধকং মিথ্যা ত্রিপুটীজ্ঞাননির্ণযঃ ॥ ৩৩॥
ন প্রমাতা প্রমাণং বা ন প্রমেযং ফলোদযম্ ।
ইদমেব পরং ব্রহ্ম জ্ঞানামৃতমনোমযম্ ॥ ৩৪॥
ন গুহ্যং ন প্রকাশং বা ন মহত্বং ন চাণুতা ।
ন প্রপঞ্চো বিদ্যমানং ন প্রপঞ্চঃ কদাচন ॥ ৩৫॥
নান্তঃকরণসংসারো ন মনো জগতাং ভ্রমঃ ।
ন চিত্তরূপসংসারো বুদ্ধিপূর্বং প্রপঞ্চকম্ ॥ ৩৬॥
ন জীবরূপসংসারো বাসনারূপসংসৃতিঃ ।
ন লিঙ্গভেদসংসারো নাজ্ঞানমযসংস্মৃতিঃ ॥ ৩৭॥var was সংসৃতিঃ
ন বেদরূপসংসারো ন শাস্ত্রাগমসংসৃতিঃ ।
নান্যদস্তীতি সংসারমন্যদস্তীতি ভেদকম্ ॥ ৩৮॥
ন ভেদাভেদকলনং ন দোষাদোষকল্পনম্ ।
ন শান্তাশান্তসংসারং ন গুণাগুণসংসৃতিঃ ॥ ৩৯॥
ন স্ত্রীলিঙ্গং ন পুংলিঙ্গং ন নপুংসকসংসৃতিঃ ।
ন স্থাবরং ন জঙ্গমং চ ন দুঃখং ন সুখং ক্বচিত্ ॥ ৪০॥
ন শিষ্টাশিষ্টরূপং বা ন যোগ্যাযোগ্যনিশ্চযঃ ।
ন দ্বৈতবৃত্তিরূপং বা সাক্ষিবৃত্তিত্বলক্ষণম্ ॥ ৪১॥
অখণ্ডাকারবৃত্তিত্বমখণ্ডৈকরসং সুখম্ ।
দেহোঽহমিতি যা বৃত্তির্ব্রহ্মাহমিতি শব্দকম্ ॥ ৪২॥
অখণ্ডনিশ্চযা বৃত্তির্নাখণ্ডৈকরসং মহত্ ।
ন সর্ববৃত্তিভবনং সর্ববৃত্তিবিনাশকম্ ॥ ৪৩॥
সর্ববৃত্ত্যনুসন্ধানং সর্ববৃত্তিবিমোচনম্ ।
সর্ববৃত্তিবিনাশান্তং সর্ববৃত্তিবিশূন্যকম্ ॥ ৪৪॥
ন সর্ববৃত্তিসাহস্রং ক্ষণক্ষণবিনাশনম্ ।
ন সর্ববৃত্তিসাক্ষিত্বং ন চ ব্রহ্মাত্মভাবনম্ ॥ ৪৫॥
ন জগন্ন মনো নান্তো ন কার্যকলনং ক্বচিত্ ।
ন দূষণং ভূষণং বা ন নিরঙ্কুশলক্ষণম্ ॥ ৪৬॥
ন চ ধর্মাত্মনো লিঙ্গং গুণশালিত্বলক্ষণম্ ।
ন সমাধিকলিঙ্গং বা ন প্রারব্ধং প্রবন্ধকম্ ॥ ৪৭॥
ব্রহ্মবিত্তং আত্মসত্যো ন পরঃ স্বপ্নলক্ষণম্ ।
ন চ বর্যপরো রোধো বরিষ্ঠো নার্থতত্পরঃ ॥ ৪৮॥
আত্মজ্ঞানবিহীনো যো মহাপাতকিরেব সঃ ।
এতাবদ্ জ্ঞানহীনো যো মহারোগী স এব হি ॥ ৪৯॥
অহং ব্রহ্ম ন সন্দেহ অখণ্ডৈকরসাত্মকঃ ।
ব্রহ্মৈব সর্বমেবেতি নিশ্চযানুভবাত্মকঃ ॥ ৫০॥
সদ্যো মুক্তো ন সন্দেহঃ সদ্যঃ প্রজ্ঞানবিগ্রহঃ ।
স এব জ্ঞানবান্ লোকে স এব পরমেশ্বরঃ ॥ ৫১॥
ইদমেব পরং ব্রহ্ম জ্ঞানামৃতমনোমযম্ ।
এতত্প্রকরণং যস্তু শৃণুতে ব্রহ্ম এব সঃ ॥ ৫২॥
একত্বং ন বহুত্বমপ্যণুমহত্ কার্যং ন বৈ কারণং
বিশ্বং বিশ্বপতিত্বমপ্যরসকং নো গন্ধরূপং সদা ।
বদ্ধং মুক্তমনুত্তমোত্তমমহানন্দৈকমোদং সদা
ভূমানন্দসদাশিবং জনিজরারোগাদ্যসঙ্গং মহঃ ॥ ৫৩॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে জ্ঞানামৃতমনোমযপ্রকরণবর্ণনং নাম ষড্বিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com