Ribhu Gita - Siva Rahasya Purana Amsha 6

ঋভুগীতা ২২ ॥ নাম-রূপ নিষেধ প্রকরণম্ ॥

ঋভুঃ -

বক্ষ্যে ব্রহ্মমযং সর্বং নাস্তি সর্বং জগন্মৃষা ।
অহং ব্রহ্ম ন মে চিন্তা অহং ব্রহ্ম ন মে জডম্ ॥ ১॥
অহং ব্রহ্ম ন মে দোষঃ অহং ব্রহ্ম ন মে ফলম্ ।
অহং ব্রহ্ম ন মে বার্তা অহং ব্রহ্ম ন মে দ্বযম্ ॥ ২॥
অহং ব্রহ্ম ন মে নিত্যমহং ব্রহ্ম ন মে গতিঃ ।
অহং ব্রহ্ম ন মে মাতা অহং ব্রহ্ম ন মে পিতা ॥ ৩॥
অহং ব্রহ্ম ন মে সোঽযমহং বৈশ্বানরো ন হি ।
অহং ব্রহ্ম চিদাকাশমহং ব্রহ্ম ন সংশযঃ ॥ ৪॥
সর্বান্তরোঽহং পূর্ণাত্মা সর্বান্তরমনোঽন্তরঃ ।
অহমেব শরীরান্তরহমেব স্থিরঃ সদা ॥ ৫॥
এবং বিজ্ঞানবান্ মুক্ত এবং জ্ঞানং সুদুর্লভম্ ।
অনেকশতসাহস্ত্রেষ্বেক এব বিবেকবান্ ॥ ৬॥
তস্য দর্শনমাত্রেণ পিতরস্তৃপ্তিমাগতাঃ ।
জ্ঞানিনো দর্শনং পুণ্যং সর্বতীর্থাবগাহনম্ ॥ ৭॥
জ্ঞানিনঃ চার্চনেনৈব জীবন্মুক্তো ভবেন্নরঃ ।
জ্ঞানিনো ভোজনে দানে সদ্যো মুক্তো ভবেন্নরঃ ॥ ৮॥
অহং ব্রহ্ম ন সন্দেহঃ অহমেব গুরুঃ পরঃ ।
অহং শান্তোঽস্মি শুদ্ধোঽস্মি অহমেব গুণান্তরঃ ॥ ৯॥
গুণাতীতো জনাতীতঃ পরাতীতো মনঃ পরঃ ।
পরতঃ পরতোঽতীতো বুদ্ধ্যাতীতো রসাত্ পরঃ ॥ ১০॥
ভাবাতীতো মনাতীতো বেদাতীতো বিদঃ পরঃ ।
শরীরাদেশ্চ পরতো জাগ্রত্স্বপ্নসুষুপ্তিতঃ ॥ ১১॥
অব্যক্তাত্ পরতোঽতীত ইত্যেবং জ্ঞাননিশ্চযঃ ।
ক্বচিদেতত্পরিত্যজ্য সর্বং সংত্যজ্য মূকবত্ ॥ ১২॥
তূষ্ণীং ব্রহ্ম পরং ব্রহ্ম শাশ্বতব্রহ্মবান্ স্বযম্ ।
জ্ঞানিনো মহিমা কিঞ্চিদণুমাত্রমপি স্ফুটম্ ॥ ১৩॥
হরিণাপি হরেণাপি ব্রহ্মণাপি সুরৈরপি ।
ন শক্যতে বর্ণযিতুং কল্পকোটিশতৈরপি ॥ ১৪॥
অহং ব্রহ্মেতি বিজ্ঞানং ত্রিষু লোকেষু দুর্লভম্ ।
বিবেকিনং মহাত্মানং ব্রহ্মমাত্রেণাবস্থিতম্ ॥ ১৫॥
দ্রষ্টুং চ ভাষিতুং বাপি দুর্লভং পাদসেবনম্ ।
কদাচিত্ পাদতীর্থেন স্নাতশ্চেত্ ব্রহ্ম এব সঃ ॥ ১৬॥
সর্বং মিথ্যা ন সন্দেহঃ সর্বং ব্রহ্মৈব কেবলম্ ।
এতত্ প্রকরণং প্রোক্তং সর্বসিদ্ধান্তসংগ্রহঃ ॥ ১৭॥
দুর্লভং যঃ পঠেদ্ভক্ত্যা ব্রহ্ম সংপদ্যতে নরঃ ।
বক্ষ্যে ব্রহ্মমযং সর্বং নান্যত্ সর্বং জগন্মৃষা ॥ ১৮॥
ব্রহ্মৈব জগদাকারং ব্রহ্মৈব পরমং পদম্ ।
অহমেব পরং ব্রহ্ম অহমিত্যপি বর্জিতঃ ॥ ১৯॥
সর্ববর্জিতচিন্মাত্রং সর্ববর্জিতচেতনঃ ।
সর্ববর্জিতশান্তাত্মা সর্বমঙ্গলবিগ্রহঃ ॥ ২০॥
অহং ব্রহ্ম পরং ব্রহ্ম অসন্নেদং ন মে ন মে ।
ন মে ভূতং ভবিষ্যচ্চ ন মে বর্ণং ন সংশযঃ ॥ ২১॥
ব্রহ্মৈবাহং ন মে তুচ্ছং অহং ব্রহ্ম পরং তপঃ ।
ব্রহ্মরূপমিদং সর্বং ব্রহ্মরূপমনামযম্ ॥ ২২॥
ব্রহ্মৈব ভাতি ভেদেন ব্রহ্মৈব ন পরঃ পরঃ ।
আত্মৈব দ্বৈতবদ্ভাতি আত্মৈব পরমং পদম্ ॥ ২৩॥
ব্রহ্মৈবং ভেদরহিতং ভেদমেব মহদ্ভযম্ ।
আত্মৈবাহং নির্মলোঽহমাত্মৈব ভুবনত্রযম্ ॥ ২৪॥
আত্মৈব নান্যত্ সর্বত্র সর্বং ব্রহ্মৈব নান্যকঃ ।
অহমেব সদা ভামি ব্রহ্মৈবাস্মি পরোঽস্ম্যহম্ ॥ ২৫॥
নির্মলোঽস্মি পরং ব্রহ্ম কার্যাকার্যবিবর্জিতঃ ।
সদা শুদ্ধৈকরূপোঽস্মি সদা চৈতন্যমাত্রকঃ ॥ ২৬॥
নিশ্চযোঽস্মি পরং ব্রহ্ম সত্যোঽস্মি সকলোঽস্ম্যহম্ ।
অক্ষরোঽস্মি পরং ব্রহ্ম শিবোঽস্মি শিখরোঽস্ম্যহম্ ॥ ২৭॥
সমরূপোঽস্মি শান্তোঽস্মি তত্পরোঽস্মি চিদব্যযঃ ।
সদা ব্রহ্ম হি নিত্যোঽস্মি সদা চিন্মাত্রলক্ষণঃ ॥ ২৮॥
সদাঽখণ্ডৈকরূপোঽস্মি সদামানবিবর্জিতঃ ।
সদা শুদ্ধৈকরূপোঽস্মি সদা চৈতন্যমাত্রকঃ ॥ ২৯॥
সদা সন্মানরূপোঽস্মি সদা সত্তাপ্রকাশকঃ ।
সদা সিদ্ধান্তরূপোঽস্মি সদা পাবনমঙ্গলঃ ॥ ৩০॥
এবং নিশ্চিতবান্ মুক্তঃ এবং নিত্যপরো বরঃ ।
এবং ভাবনযা যুক্তঃ পরং ব্রহ্মৈব সর্বদা ॥ ৩১॥
এবং ব্রহ্মাত্মবান্ জ্ঞানী ব্রহ্মাহমিতি নিশ্চযঃ ।
স এব পুরুষো লোকে ব্রহ্মাহমিতি নিশ্চিতঃ ॥ ৩২॥
স এব পুরুষো জ্ঞানী জীবন্মুক্তঃ স আত্মবান্ ।
ব্রহ্মৈবাহং মহানাত্মা সচ্চিদানন্দবিগ্রহঃ ॥ ৩৩॥
নাহং জীবো ন মে ভেদো নাহং চিন্তা ন মে মনঃ ।
নাহং মাংসং ন মেঽস্থীনি নাহংকারকলেবরঃ ॥ ৩৪॥
ন প্রমাতা ন মেযং বা নাহং সর্বং পরোঽস্ম্যহম্ ।
সর্ববিজ্ঞানরূপোঽস্মি নাহং সর্বং কদাচন ॥ ৩৫॥
নাহং মৃতো জন্মনান্যো ন চিন্মাত্রোঽস্মি নাস্ম্যহম্ ।
ন বাচ্যোঽহং ন মুক্তোঽহং ন বুদ্ধোঽহং কদাচন ॥ ৩৬॥
ন শূন্যোঽহং ন মূঢোঽহং ন সর্বোঽহং পরোঽস্ম্যহম্ ।
সর্বদা ব্রহ্মমাত্রোঽহং ন রসোঽহং সদাশিবঃ ॥ ৩৭॥
ন ঘ্রাণোঽহং ন গন্ধোঽহং ন চিহ্নোঽযং ন মে প্রিযঃ ।
নাহং জীবো রসো নাহং বরুণো ন চ গোলকঃ ॥ ৩৮॥
ব্রহ্মৈবাহং ন সন্দেহো নামরূপং ন কিঞ্চন ।
ন শ্রোত্রোঽহং ন শব্দোঽহং ন দিশোঽহং ন সাক্ষিকঃ ॥ ৩৯॥
নাহং ন ত্বং ন চ স্বর্গো নাহং বাযুর্ন সাক্ষিকঃ ।
পাযুর্নাহং বিসর্গো ন ন মৃত্যুর্ন চ সাক্ষিকঃ ॥ ৪০॥
গুহ্যং নাহং ন চানন্দো ন প্রজাপতিদেবতা ।
সর্বং ব্রহ্ম ন সন্দেহঃ সর্বং ব্রহ্মৈব কেবলম্ ॥ ৪১॥
নাহং মনো ন সঙ্কল্পো ন চন্দ্রো ন চ সাক্ষিকঃ ।
নাহং বুদ্ধীন্দ্রিযো ব্রহ্মা নাহং নিশ্চযরূপবান্ ॥ ৪২॥
নাহংকারমহং রুদ্রো নাভিমানো ন সাক্ষিকঃ ।
চিত্তং নাহং বাসুদেবো ধারণা নাযমীশ্বরঃ ॥ ৪৩॥
নাহং বিশ্বো ন জাগ্রদ্বা স্থূলদেহো ন মে ক্বচিত্ ।
ন প্রাতিভাসিকো জীবো ন চাহং ব্যাবহারিকঃ ॥ ৪৪॥
ন পারমার্থিকো দেবো নাহমন্নমযো জডঃ ।
ন প্রাণমযকোশোঽহং ন মনোমযকোশবান্ ॥ ৪৫॥
ন বিজ্ঞানমযঃ কোশো নানন্দমযকোশবান্ ।
ব্রহ্মৈবাহং ন সন্দেহো নামরূপে ন কিঞ্চন ॥ ৪৬॥
এতাবদুক্ত্বা সকলং নামরূপদ্বযাত্মকম্ ।
সর্বং ক্ষণেন বিস্মৃত্য কাষ্ঠলোষ্টাদিবত্ ত্যজেত্ ॥ ৪৭॥
এতত্সর্বমসন্নিত্যং সদা বন্ধ্যাকুমারবত্ ।
শশশৃঙ্গবদেবেদং নরশৃঙ্গবদেব তত্ ॥ ৪৮॥
আকাশপুষ্পসদৃশং যথা মরুমরীচিকা ।
গন্ধর্বনগরং যদ্বদিন্দ্রজালবদেব হি ॥ ৪৯॥
অসত্যমেব সততং পঞ্চরূপকমিষ্যতে ।
শিষ্যোপদেশকালো হি দ্বৈতং ন পরমার্থতঃ ॥ ৫০॥
মাতা মৃতে রোদনায দ্রব্যং দত্বাঽঽহ্বযেজ্জনান্ ।
তেষাং রোদনমাত্রং যত্ কেবলং দ্রব্যপঞ্চকম্ ॥ ৫১॥
তদদ্বৈতং মযা প্রোক্তং সর্বং বিস্মৃত্য কুড্যবত্ ।
অহং ব্রহ্মেতি নিশ্চিত্য অহমেবেতি ভাবয ॥ ৫২॥
অহমেব সুখং চেতি অহমেব ন চাপরঃ ।
অহং চিন্মাত্রমেবেতি ব্রহ্মৈবেতি বিনিশ্চিনু ॥ ৫৩॥
অহং নির্মলশুদ্ধেতি অহং জীববিলক্ষণঃ ।
অহং ব্রহ্মৈব সর্বাত্মা অহমিত্যবভাসকঃ ॥ ৫৪॥
অহমেব হি চিন্মাত্রমহমেব হি নির্গুণঃ ।
সর্বান্তর্যাম্যহং ব্রহ্ম চিন্মাত্রোঽহং সদাশিবঃ ॥ ৫৫॥
নিত্যমঙ্গলরূপাত্মা নিত্যমোক্ষমযঃ পুমান্ ।
এবং নিশ্চিত্য সততং স্বাত্মানং স্বযমাস্থিতঃ ॥ ৫৬॥
ব্রহ্মৈবাহং ন সন্দেহো নামরূপে ন কিঞ্চন ।
এতদ্রূপপ্রকরণং সর্ববেদেষু দুর্লভম্ ।
যঃ শৃণোতি সকৃদ্বাপি ব্রহ্মৈব ভবতি স্বযম্ ॥ ৫৭॥
তং বেদাদিবচোভিরীডিতমহাযাগৈশ্চ ভোগৈর্ব্রতৈ-
র্দানৈশ্চানশনৈর্যমাদিনিযমৈস্তং বিদ্বিষন্তে দ্বিজাঃ ।
তস্যানঙ্গরিপোরতীব সুমহাহৃদ্যং হি লিঙ্গার্চনং
তেনৈবাশু বিনাশ্য মোহমখিলং জ্ঞানং দদাতীশ্বরঃ ॥ ৫৮॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে নামরূপনিষেধপ্রকরণং নাম দ্বাবিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com