ঋভুগীতা ৩৪ ॥ দৃষ্টান্তৈর্-ব্রহ্ম-সাধন প্রকরণম্ ॥
ঋভুঃ -
- শৃণুষ্ব ব্রহ্ম বিজ্ঞানমদ্ভুতং ত্বতিদুর্লভম্ ।
- একৈকশ্রবণেনৈব কৈবল্যং পরমশ্নুতে ॥ ১॥
- সত্যং সত্যং জগন্নাস্তি সংকল্পকলনাদিকম্ ।
- নিত্যানন্দমযং ব্রহ্মবিজ্ঞানং সর্বদা স্বযম্ ॥ ২॥
- আনন্দমব্যযং শান্তমেকরূপমনামযম্ ।
- চিত্তপ্রপঞ্চং নৈবাস্তি নাস্তি কার্যং চ তত্ত্বতঃ ॥ ৩॥
- প্রপঞ্চভাবনা নাস্তি দৃশ্যরূপং ন কিঞ্চন ।
- অসত্যরূপং সঙ্কল্পং তত্কার্যং চ জগন্ন হি ॥ ৪॥
- সর্বমিত্যেব নাস্ত্যেব কালমিত্যেবমীশ্বরঃ ।
- বন্ধ্যাকুমারে ভীতিশ্চ তদধীনমিদং জগত্ ॥ ৫॥
- গন্ধর্বনগরে শৃঙ্গে মদগ্রে দৃশ্যতে জগত্ ।
- মৃগতৃষ্ণাজলং পীত্বা তৃপ্তিশ্চেদস্ত্বিদং জগত্ ॥ ৬॥
- নগে শৃঙ্গে ন বাণেন নষ্টং পুরুষমস্ত্বিদম্ ।
- গন্ধর্বনগরে সত্যে জগদ্ভবতু সর্বদা ॥ ৭॥
- গগনে নীলমাসিন্ধৌ জগত্ সত্যং ভবিষ্যতি ।
- শুক্তিকারজতং সত্যং ভূষণং চিজ্জগদ্ভবেত্ ॥ ৮॥
- রজ্জুসর্পেণ নষ্টশ্চেত্ নরো ভবতি সংসৃতিঃ ।
- জাতিরূপেণ বাণেন জ্বালাগ্নৌ নাশিতে সতি ॥ ৯॥
- রংভাস্তম্ভেন কাষ্ঠেন পাকসিদ্ধির্জগদ্ভবেত্ ।
- নিত্যানন্দমযং ব্রহ্ম কেবলং সর্বদা স্বযম্ ॥ ১০॥
- সদ্যঃ কুমারিকারূপৈঃ পাকে সিদ্ধে জগদ্ভবেত্ ।
- নিত্যানন্দমযং ব্রহ্ম কেবলং সর্বদা স্বযম্ ॥ ১১॥
- মিত্যাটব্যাং বাযসান্নং অস্তি চেজ্জগদুদ্ভবম্ ।
- মূলারোপণমন্ত্রস্য প্রীতিশ্চেদ্ভাষণং জগত্ ॥ ১২॥
- মাসাত্ পূর্বং মৃতো মর্ত্য আগতশ্চেজ্জগদ্ ভবেত্ ।
- তক্রং ক্ষীরস্বরূপং চেত্ কিঞ্চিত্ কিঞ্চিজ্জগদ্ভবেত্ ॥ ১৩॥
- গোস্তনাদুদ্ভবং ক্ষীরং পুনরারোহণং জগত্ ।
- ভূরজস্যাঅব্দমুত্পন্নং জগদ্ভবতু সর্বদা ॥ ১৪॥
- কূর্মরোম্ণা গজে বদ্ধে জগদস্তু মদোত্কটে ।
- মৃণালতন্তুনা মেরুশ্চলিতশ্চেজ্জগদ্ ভবেত্ ॥ ১৫॥
- তরঙ্গমালযা সিন্ধুঃ বদ্ধশ্চেদস্ত্বিদং জগত্ ।
- জ্বালাগ্নিমণ্ডলে পদ্মং বৃদ্ধং চেত্ তজ্জগদ্ভবেত্ ॥ ১৬॥
- মহচ্ছৈলেন্দ্রনিলযং সংভবশ্চেদিদং ভবেত্ ।
- নিত্যানন্দমযং ব্রহ্ম কেবলং সর্বদা স্বযম্ ॥ ১৭॥
- মীন আগত্য পদ্মাক্ষে স্থিতশ্চেদস্ত্বিদং জগত্ ।
- নিগীর্ণশ্চেদ্ভঙ্গসূনুঃ মেরুপুচ্ছবদস্ত্বিদম্ ॥ ১৮॥
- মশকেনাশিতে সিংহে হতে ভবতু কল্পনম্ ।
- অণুকোটরবিস্তীর্ণে ত্রৈলোক্যে চেজ্জগদ্ভবেত্ ॥ ১৯॥
- স্বপ্নে তিষ্ঠতি যদ্বস্তু জাগরে চেজ্জগদ্ভবেত্ ।
- নদীবেগো নিশ্চলশ্চেত্ জগদ্ভবতু সর্বদা ॥ ২০॥
- জাত্যন্ধৈ রত্নবিষযঃ সুজ্ঞাতশ্চেজ্জগদ্ভবেত্ ।
- চন্দ্রসূর্যাদিকং ত্যক্ত্বা রাহুশ্চেত্ দৃশ্যতে জগত্ ॥ ২১॥
- ভ্রষ্টবীজেন উত্পন্নে বৃদ্ধিশ্চেচ্চিত্তসংভবঃ ।
- মহাদরিদ্রৈরাঢ্যানাং সুখে জ্ঞাতে জগদ্ভবেত্ ॥ ২২॥
- দুগ্ধং দুগ্ধগতক্ষীরং পুনরারোহণং পুনঃ ।
- কেবলং দর্পণে নাস্তি প্রতিবিম্বং তদা জগত্ ॥ ২৩॥
- যথা শূন্যগতং ব্যোম প্রতিবিম্বেন বৈ জগত্ ।
- অজকুক্ষৌ গজো নাস্তি আত্মকুক্ষৌ জগন্ন হি ॥ ২৪॥
- যথা তান্ত্রে সমুত্পন্নে তথা ব্রহ্মমযং জগত্ ।
- কার্পাসকেঽগ্নিদগ্ধেন ভস্ম নাস্তি তথা জগত্ ॥ ২৫॥
- পরং ব্রহ্ম পরং জ্যোতিঃ পরস্তাত্ পরতঃ পরঃ ।
- সর্বদা ভেদকলনং দ্বৈতাদ্বৈতং ন বিদ্যতে ॥ ২৬॥
- চিত্তবৃত্তির্জগদ্দুঃখং অস্তি চেত্ কিল নাশনম্ ।
- মনঃসংকল্পকং বন্ধ অস্তি চেদ্ব্রহ্মভাবনা ॥ ২৭॥
- অবিদ্যা কার্যদেহাদি অস্তি চেদ্দ্বৈতভাবনম্ ।
- চিত্তমেব মহারোগো ব্যাপ্তশ্চেদ্ব্রহ্মভেষজম্ ॥ ২৮॥
- অহং শত্রুর্যদি ভবেদহং ব্রহ্মৈব ভাবনম্ ।
- দেহোঽহমিতি দুখং চেদ্ব্রহ্মাহমিতি নিশ্চিনু ॥ ২৯॥
- সংশযশ্চ পিশাচশ্চেদ্ব্রহ্মমাত্রেণ নাশয ।
- দ্বৈতভূতাবিষ্টরেণ অদ্বৈতং ভস্ম আশ্রয ॥ ৩০॥
- অনাত্মত্বপিশাচশ্চেদাত্মমন্ত্রেণ বন্ধয ।
- নিত্যানন্দমযং ব্রহ্ম কেবলং সর্বদা স্বযম্ ॥ ৩১॥
- চতুঃষষ্টিকদৃষ্টান্তৈরেবং ব্রহ্মৈব সাধিতম্ ।
- যঃ শৃণোতি নরো নিত্যং স মুক্তো নাত্র সংশযঃ ॥ ৩২॥
- কৃতার্থ এব সততং নাত্র কার্যা বিচারণা ॥ ৩৩॥
- মনোবচোবিদূরগং ত্বরূপগন্ধবর্জিতং
- হৃদর্ভকোকসন্ততং বিজানতাং মুদে সদা ।
- সদাপ্রকাশদুজ্বলপ্রভাবিকাসসদ্যুতি
- প্রকাশদং মহেশ্বর ত্বদীযপাদপঙ্কজম্ ॥ ৩৪॥
- ॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে দৃষ্টান্তৈর্ব্রহ্মসাধনপ্রকরণং নাম চতুস্ত্রিংশোঽধ্যাযঃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com