Ribhu Gita - Siva Rahasya Purana Amsha 6

ঋভুগীতা ২৯ ॥ তন্ময-ভাবোপদেশ প্রকরণম্ ॥

ঋভুঃ -

অত্যন্তং তন্মযং বক্ষ্যে দুর্লভং যোগিনামপি ।
বেদশাস্ত্রেষু দেবেষু রহস্যমতিদুর্লভম্ ॥ ১॥
যঃ পরং ব্রহ্ম সর্বাত্মা সচ্চিদানন্দবিগ্রহঃ ।
সর্বাত্মা পরমাত্মা হি তন্মযো ভব সর্বদা ॥ ২॥
আত্মরূপমিদং সর্বমাদ্যন্তরহিতোঽজযঃ ।
কার্যাকার্যমিদং নাস্তি তন্মযো ভব সর্বদা ॥ ৩॥
যত্র দ্বৈতভযং নাস্তি যত্রাদ্বৈতপ্রবোধনম্ ।
শান্তাশান্তদ্বযং নাস্তি তন্মযো ভব সর্বদা ॥ ৪॥
যত্র সঙ্কল্পকং নাস্তি যত্র ভ্রান্তির্ন বিদ্যতে ।
তদেব হি মতির্নাস্তি তন্মযো ভব সর্বদা ॥ ৫॥
যত্র ব্রহ্মণি নাস্ত্যেব যত্র ভাবি বিকল্পনম্ ।
যত্র সর্বং জগন্নাস্তি তন্মযো ভব সর্বদা ॥ ৬॥
যত্র ভাবমভাবং বা মনোভ্রান্তি বিকল্পনম্ ।
যত্র ভ্রান্তের্ন বার্তা বা তন্মযো ভব সর্বদা ॥ ৭॥
যত্র নাস্তি সুখং নাস্তি দেহোঽহমিতি রূপকম্ ।
সর্বসঙ্কল্পনির্মুক্তং তন্মযো ভব সর্বদা ॥ ৮॥
যত্র ব্রহ্ম বিনা ভাবো যত্র দোষো ন বিদ্যতে ।
যত্র দ্বন্দ্বভযং নাস্তি তন্মযো ভব সর্বদা ॥ ৯॥
যত্র বাক্কাযকার্যং বা যত্র কল্পো লযং গতঃ ।
যত্র প্রপঞ্চং নোত্পন্নং তন্মযো ভব সর্বদা ॥ ১০॥
যত্র মাযা প্রকাশো ন মাযা কার্যং ন কিঞ্চন ।
যত্র দৃশ্যমদৃশ্যং বা তন্মযো ভব সর্বদা ॥ ১১॥
বিদ্বান্ বিদ্যাপি নাস্ত্যেব যত্র পক্ষবিপক্ষকৌ ।
ন যত্র দোষাদোষৌ বা তন্মযো ভব সর্বদা ॥ ১২॥
যত্র বিষ্ণুত্বভেদো ন যত্র ব্রহ্মা ন বিদ্যতে ।
যত্র শঙ্করভেদো ন তন্মযো ভব সর্বদা ॥ ১৩॥
ন যত্র সদসদ্ভেদো ন যত্র কলনাপদম্ ।
ন যত্র জীবকলনা তন্মযো ভব সর্বদা ॥ ১৪॥
ন যত্র শঙ্করধ্যানং ন যত্র পরমং পদম্ ।
ন যত্র কলনাকারং তন্মযো ভব সর্বদা ॥ ১৫॥
ন যত্রাণুর্মহত্ত্বং চ যত্র সন্তোষকল্পনম্ ।
যত্র প্রপঞ্চমাভাসং তন্মযো ভব সর্বদা ॥ ১৬॥
ন যত্র দেহকলনং ন যত্র হি কুতূহলম্ ।
ন যত্র চিত্তকলনং তন্মযো ভব সর্বদা ॥ ১৭॥
ন যত্র বুদ্ধিবিজ্ঞানং ন যত্রাত্মা মনোমযঃ ।
ন যত্র কামকলনং তন্মযো ভব সর্বদা ॥ ১৮॥
ন যত্র মোক্ষবিশ্রান্তির্যত্র বন্ধত্ববিগ্রহঃ ।
ন যত্র শাশ্বতং জ্ঞানং তন্মযো ভব সর্বদা ॥ ১৯॥
ন যত্র কালকলনং যত্র দুঃখত্বভাবনম্ ।
ন যত্র দেহকলনং তন্মযো ভব সর্বদা ॥ ২০॥
ন যত্র জীববৈরাগ্যং যত্র শাস্ত্রবিকল্পনম্ ।
যত্রাহমহমাত্মত্বং তন্মযো ভব সর্বদা ॥ ২১॥
ন যত্র জীবন্মুক্তির্বা যত্র দেহবিমোচনম্ ।
যত্র সঙ্কল্পিতং কার্যং তন্মযো ভব সর্বদা ॥ ২২॥
ন যত্র ভূতকলনং যত্রান্যত্বপ্রভাবনম্ ।
ন যত্র জীবভেদো বা তন্মযো ভব সর্বদা ॥ ২৩॥
যত্রানন্দপদং ব্রহ্ম যত্রানন্দপদং সুখম্ ।
যত্রানন্দগুণং নিত্যং তন্মযো ভব সর্বদা ॥ ২৪॥
ন যত্র বস্তুপ্রভবং ন যত্রাপজযোজযঃ ।
ন যত্র বাক্যকথনং তন্মযো ভব সর্বদা ॥ ২৫॥
ন যত্রাত্মবিচারাঙ্গং ন যত্র শ্রবণাকুলম্ ।
ন যত্র চ মহানন্দং তন্মযো ভব সর্বদা ॥ ২৬॥
ন যত্র হি সজাতীযং বিজাতীযং ন যত্র হি ।
ন যত্র স্বগতং ভেদং তন্মযো ভব সর্বদা ॥ ২৭॥
ন যত্র নরকো ঘোরো ন যত্র স্বর্গসংপদঃ ।
ন যত্র ব্রহ্মলোকো বা তন্মযো ভব সর্বদা ॥ ২৮॥
ন যত্র বিষ্ণুসাযুজ্যং যত্র কৈলাসপর্বতঃ ।
ব্রহ্মাণ্ডমণ্ডলং যত্র তন্মযো ভব সর্বদা ॥ ২৯॥
ন যত্র ভূষণং যত্র দূষণং বা ন বিদ্যতে ।
ন যত্র সমতা দোষং তন্মযো ভব সর্বদা ॥ ৩০॥
ন যত্র মনসা ভাবো ন যত্র সবিকল্পনম্ ।
ন যত্রানুভবং দুঃখং তন্মযো ভব সর্বদা ॥ ৩১॥
যত্র পাপভযং নাস্তি পঞ্চপাপাদপি ক্বচিত্ ।
ন যত্র সঙ্গদোষং বা তন্মযো ভব সর্বদা ॥ ৩২॥
যত্র তাপত্রযং নাস্তি যত্র জীবত্রযং ক্বচিত্ ।
যত্র বিশ্ববিকল্পাখ্যং তন্মযো ভব সর্বদা ॥ ৩৩॥
ন যত্র বোধমুত্পন্নং ন যত্র জগতাং ভ্রমঃ ।
ন যত্র করণাকারং তন্মযো ভব সর্বদা ॥ ৩৪॥
ন যত্র হি মনো রাজ্যং যত্রৈব পরমং সুখম্ ।
যত্র বৈ শাশ্বতং স্থানং তন্মযো ভব সর্বদা ॥ ৩৫॥
যত্র বৈ কারণং শান্তং যত্রৈব সকলং সুখম্ ।
যদ্গত্বা ন নিবর্তন্তে তন্মযো ভব সর্বদা ॥ ৩৬॥
যদ্ জ্ঞাত্বা মুচ্যতে সর্বং যদ্ জ্ঞাত্বাঽন্যন্ন বিদ্যতে ।
যদ্ জ্ঞাত্বা নান্যবিজ্ঞানং তন্মযো ভব সর্বদা ॥ ৩৭॥
যত্রৈব দোষং নোত্পন্নং যত্রৈব স্থাননিশ্চলঃ ।
যত্রৈব জীবসঙ্ঘাতঃ তন্মযো ভব সর্বদা ॥ ৩৮॥
যত্রৈব নিত্যতৃপ্তাত্মা যত্রৈবানন্দনিশ্চলম্ ।
যত্রৈব নিশ্চলং শান্তং তন্মযো ভব সর্বদা ॥ ৩৯॥
যত্রৈব সর্বসৌখ্যং বা যত্রৈব সন্নিরূপণম্ ।
যত্রৈব নিশ্চযাকারং তন্মযো ভব সর্বদা ॥ ৪০॥
ন যত্রাহং ন যত্র ত্বং ন যত্র ত্বং স্বযং স্বযম্ ।
যত্রৈব নিশ্চযং শান্তং তন্মযো ভব সর্বদা ॥ ৪১॥
যত্রৈব মোদতে নিত্যং যত্রৈব সুখমেধতে ।
যত্র দুঃখভযং নাস্তি তন্মযো ভব সর্বদা ॥ ৪২॥
যত্রৈব চিন্মযাকারং যত্রৈবানন্দসাগরঃ ।
যত্রৈব পরমং সাক্ষাত্ তন্মযো ভব সর্বদা ॥ ৪৩॥
যত্রৈব স্বযমেবাত্র স্বযমেব তদেব হি ।
স্বস্বাত্মনোক্তভেদোঽস্তি তন্মযো ভব সর্বদা ॥ ৪৪॥
যত্রৈব পরমানন্দং স্বযমেব সুখং পরম্ ।
যত্রৈবাভেদকলনং তন্মযো ভব সর্বদা ॥ ৪৫॥
ন যত্র চাণুমাত্রং বা ন যত্র মনসো মলম্ ।
ন যত্র চ দদাম্যেব তন্মযো ভব সর্বদা ॥ ৪৬॥
যত্র চিত্তং মৃতং দেহং মনো মরণমাত্মনঃ ।
যত্র স্মৃতির্লযং যাতি তন্মযো ভব সর্বদা ॥ ৪৭॥
যত্রৈবাহং মৃতো নূনং যত্র কামো লযং গতঃ ।
যত্রৈব পরমানন্দং তন্মযো ভব সর্বদা ॥ ৪৮॥
যত্র দেবাস্ত্রযো লীনং যত্র দেহাদযো মৃতাঃ ।
ন যত্র ব্যবহারোঽস্তি তন্মযো ভব সর্বদা ॥ ৪৯॥
যত্র মগ্নো নিরাযাসো যত্র মগ্নো ন পশ্যতি ।
যত্র মগ্নো ন জন্মাদিস্তন্মযো ভব সর্বদা ॥ ৫০॥
যত্র মগ্নো ন চাভাতি যত্র জাগ্রন্ন বিদ্যতে ।
যত্রৈব মোহমরণং তন্মযো ভব সর্বদা ॥ ৫১॥
যত্রৈব কালমরণং যত্র যোগো লযং গতঃ ।
যত্র সত্সঙ্গতির্নষ্টা তন্মযো ভব সর্বদা ॥ ৫২॥
যত্রৈব ব্রহ্মণো রূপং যত্রৈবানন্দমাত্রকম্ ।
যত্রৈব পরমানন্দং তন্মযো ভব সর্বদা ॥ ৫৩॥
যত্র বিশ্বং ক্বচিন্নাস্তি যত্র নাস্তি ততো জগত্ ।
যত্রান্তঃকরণং নাস্তি তন্মযো ভব সর্বদা ॥ ৫৪॥
যত্রৈব সুখমাত্রং চ যত্রৈবানন্দমাত্রকম্ ।
যত্রৈব পরমানন্দং তন্মযো ভব সর্বদা ॥ ৫৫॥
যত্র সন্মাত্রচৈতন্যং যত্র চিন্মাত্রমাত্রকম্ ।
যত্রানন্দমযং ভাতি তন্মযো ভব সর্বদা ॥ ৫৬॥
যত্র সাক্ষাত্ পরং ব্রহ্ম যত্র সাক্ষাত্ স্বযং পরম্ ।
যত্র শান্তং পরং লক্ষ্যং তন্মযো ভব সর্বদা ॥ ৫৭॥
যত্র সাক্ষাদখণ্ডার্থং যত্র সাক্ষাত্ পরাযণম্ ।
যত্র নাশাদিকং নাস্তি তন্মযো ভব সর্বদা ॥ ৫৮॥
যত্র সাক্ষাত্ স্বযং মাত্রং যত্র সাক্ষাত্স্বযং জযম্ ।
যত্র সাক্ষান্মহানাত্মা তন্মযো ভব সর্বদা ॥ ৫৯॥
যত্র সাক্ষাত্ পরং তত্ত্বং যত্র সাক্ষাত্ স্বযং মহত্ ।
যত্র সাক্ষাত্তু বিজ্ঞানং তন্মযো ভব সর্বদা ॥ ৬০॥
যত্র সাক্ষাদ্গুণাতীতং যত্র সাক্ষাদ্ধি নির্মলম্ ।
যত্র সাক্ষাত্ সদাশুদ্ধং তন্মযো ভব সর্বদা ॥ ৬১॥
যত্র সাক্ষান্মহানাত্মা যত্র সাক্ষাত্ সুখাত্ সুখম্ ।
যত্রৈব জ্ঞানবিজ্ঞানং তন্মযো ভব সর্বদা ॥ ৬২॥
যত্রৈব হি স্বযং জ্যোতির্যত্রৈব স্বযমদ্বযম্ ।
যত্রৈব পরমানন্দং তন্মযো ভব সর্বদা ॥ ৬৩॥
এবং তন্মযভাবোক্তং এবং নিত্যশনিত্যশঃ ।
ব্রহ্মাহং সচ্চিদানন্দং অখণ্ডোঽহং সদা সুখম্ ॥ ৬৪॥
বিজ্ঞানং ব্রহ্মমাত্রোঽহং স শান্তং পরমোঽস্ম্যহম্ ।
চিদহং চিত্তহীনোঽহং নাহং সোঽহং ভবাম্যহম্ ॥ ৬৫॥
তদহং চিদহং সোঽহং নির্মলোঽহমহং পরম্ ।
পরোঽহং পরমোঽহং বৈ সর্বং ত্যজ্য সুখীভব ॥ ৬৬॥
ইদং সর্বং চিত্তশেষং শুদ্ধত্বকমলীকৃতম্ ।
এবং সর্বং পরিত্যজ্য বিস্মৃত্বা শুদ্ধকাষ্ঠবত্ ॥ ৬৭॥
প্রেতবদ্দেহং সংত্যজ্য কাষ্ঠবল্লোষ্ঠবত্ সদা ।
স্মরণং চ পরিত্যজ্য ব্রহ্মমাত্রপরো ভব ॥ ৬৮॥
এতত্ প্রকরণং যস্তু শৃণোতি সকৃদস্তি বা ।
মহাপাতকযুক্তোঽপি সর্বং ত্যক্ত্বা পরং গতঃ ॥ ৬৯॥
অঙ্গাববদ্ধাভিরুপাসনাভি-
র্বদন্তি বেদাঃ কিল ত্বামসঙ্গম্ ।
সমস্তহৃত্কোশবিশেষসঙ্গং
ভূমানমাত্মানমখণ্ডরূপম্ ॥ ৭০॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে তন্মযভাবোপদেশপ্রকরণং নাম একোনত্রিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com