Ribhu Gita - Siva Rahasya Purana Amsha 6

ঋভুগীতা ৪২ ॥ নিদাধানুভব বর্ণন প্রকরণম্ ॥

ঋভুঃ -

শ্রুতং কিঞ্চিন্মযা প্রোক্তং ব্রহ্মজ্ঞানং সুদুর্লভম্ ।
মনসা ধারিতং ব্রহ্ম চিত্তং কীদৃক্ স্থিতং বদ ॥ ১॥

নিদাঘঃ -

শৃণু ত্বং সুগুরো ব্রহ্মংস্ত্বত্প্রসাদাদ্বদাম্যহম্ ।
মমাজ্ঞানং মহাদোষং মহাজ্ঞাননিরোধকম্ ॥ ২॥
সদা কর্মণি বিশ্বাসং প্রপঞ্চে সত্যভাবনম্ ।
নষ্টং সর্বং ক্ষণাদেব ত্বত্প্রসাদান্মহদ্ভযম্ ॥ ৩॥
এতাবন্তমিমং কালমজ্ঞানরিপুণা হৃতম্ ।
মহদ্ভযং চ নষ্টং মে কর্মতত্ত্বং চ নাশিতম্ ॥ ৪॥
অজ্ঞানং মনসা পূর্বমিদানীং ব্রহ্মতাং গতম্ ।
পুরাহং চিত্তবদ্ভূতঃ ইদানীং সন্মযোঽভবম্ ॥ ৫॥
পূর্বমজ্ঞানবদ্ভাবং ইদানীং সন্মযং গতম্ ।
অজ্ঞানবত্ স্থিতোঽহং বৈ ব্রহ্মৈবাহং পরং গতঃ ॥ ৬॥
পুরাঽহং চিত্তবদ্ভ্রান্তো ব্রহ্মৈবাহং পরং গতঃ ।
সর্বো বিগলিতো দোষঃ সর্বো ভেদো লযং গতঃ ॥ ৭॥
সর্বঃ প্রপঞ্চো গলিতশ্চিত্তমেব হি সর্বগম্ ।
সর্বান্তঃকরণং লীনং ব্রহ্মসদ্ভাবভাবনাত্ ॥ ৮॥
অহমেব চিদাকাশ অহমেব হি চিন্মযঃ ।
অহমেব হি পূর্ণাত্মা অহমেব হি নির্মলঃ ॥ ৯॥
অহমেবাহমেবেতি ভাবনাপি বিনির্গতা ।
অহমেব চিদাকাশো ব্রাহ্মণত্বং ন কিঞ্চন ॥ ১০॥
শূদ্রোঽহং শ্বপচোঽহং বৈ বর্ণী চাপি গৃহস্থকঃ ।
বানপ্রস্থো যতিরহমিত্যযং চিত্তবিভ্রমঃ ॥ ১১॥
তত্তদাশ্রমকর্মাণি চিত্তেন পরিকল্পিতম্ ।
অহমেব হি লক্ষ্যাত্মা অহমেব হি পূর্ণকঃ ॥ ১২॥
অহমেবান্তরাত্মা হি অহমেব পরাযণম্ ।
অহমেব সদাধার অহমেব সুখাত্মকঃ ॥ ১৩॥
ত্বত্প্রসাদাদহং ব্রহ্মা ত্বত্প্রসাদাজ্জনার্দনঃ ।
ত্বত্প্রসাদাচ্চিদাকাশঃ শিবোঽহং নাত্র সংশযঃ ॥ ১৪॥
ত্বত্প্রসাদাদহং চিদ্বৈ ত্বত্প্রসাদান্ন মে জগত্ ।
ত্বত্প্রসাদাদ্বিমুক্তোঽস্মি ত্বত্প্রসাদাত্ পরং গতঃ ॥ ১৫॥
ত্বত্প্রসাদাদ্ব্যাপকোঽহং ত্বত্প্রসাদান্নিরঙ্কুশঃ ।
ত্বত্প্রসাদেন তীর্ণোঽহং ত্বত্প্রসাদান্মহত্সুখম্ ॥ ১৬॥
ত্বত্প্রসাদাদহং ব্রহ্ম ত্বত্প্রসাদাত্ ত্বমেব ন ।
ত্বত্প্রসাদাদিদং নাস্তি ত্বত্প্রসাদান্ন কিঞ্চন ॥ ১৭॥
ত্বত্প্রসাদান্ন মে কিঞ্চিত্ ত্বত্প্রসাদান্ন মে বিপত্ ।
ত্বত্প্রসাদান্ন মে ভেদস্ত্বত্প্রসাদান্ন মে ভযম্ ॥ ১৮॥
ত্বত্প্রসাদান্নমে রোগস্ত্বত্প্রসাদান্ন মে ক্ষতিঃ ।
যত্পাদাম্বুজপূজযা হরিরভূদর্চ্যো যদংঘ্র্যর্চনা-
দর্চ্যাঽভূত্ কমলা বিধিপ্রভৃতযো হ্যর্চ্যা যদাজ্ঞাবশাত্ ।
তং কালান্তকমন্তকান্তকমুমাকান্তং মুহুঃ সন্ততং
সন্তঃ স্বান্তসরোজরাজচরণাম্ভোজং ভজন্ত্যাদরাত্ ॥ ১৯॥
কিং বা ধর্মশতাযুতার্জিতমহাসৌখ্যৈকসীমাযুতং
নাকং পাতমহোগ্রদুঃখনিকরং দেবেষু তুষ্টিপ্রদম্ ।
তস্মাচ্ছঙ্করলিঙ্গপূজনমুমাকান্তপ্রিযং মুক্তিদং
ভূমানন্দঘনৈকমুক্তিপরমানন্দৈকমোদং মহঃ ॥ ২০॥
যে শাংভবাঃ শিবরতাঃ শিবনামমাত্র-
শব্দাক্ষরজ্ঞহৃদযা ভসিতত্রিপুণ্ড্রাঃ ।
যাং প্রাপ্নুবন্তি গতিমীশপদাংবুজোদ্যদ্-
ধ্যানানুরক্তহৃদযা ন হি যোগসাংখ্যৈঃ ॥ ২১॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে নিদাঘানুভববর্ণনপ্রকরণং নাম দ্বিচত্বারিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

Complete text of the Ribhugita with options to [Change script] (right top) is available here in Gita collection https://sanskritdocuments.org/doc_giitaa/RGall.html