Ribhu Gita - Siva Rahasya Purana Amsha 6

ঋভুগীতা ৩১ ॥ মহাবাক্যার্থ নিরূপণ প্রকরণম্ ॥

ঋভুঃ -

বক্ষ্যে রহস্যমত্যন্তং সাক্ষাদ্ব্রহ্মপ্রকাশকম্ ।
সর্বোপনিষদামর্থং সর্বলোকেষু দুর্লভম্ ॥ ১॥
প্রজ্ঞানং ব্রহ্ম নিশ্চিত্য পদদ্বযসমন্বিতম্ ।
মহাবাক্যং চতুর্বাক্যং ঋগ্যজুঃসামসংভবম্ ॥ ২॥
মম প্রজ্ঞৈব ব্রহ্মাহং জ্ঞানমাত্রমিদং জগত্ ।
জ্ঞানমেব জগত্ সর্বং জ্ঞানাদন্যন্ন বিদ্যতে ॥ ৩॥
জ্ঞানস্যানন্তরং সর্বং দৃশ্যতে জ্ঞানরূপতঃ ।
জ্ঞানস্য ব্রহ্মণশ্চাপি মমেব পৃথঙ্ ন হি ॥ ৪॥
জীবঃ প্রজ্ঞানশব্দস্য ব্রহ্মশব্দস্য চেশ্বরঃ ।
ঐক্যমস্মীত্যখণ্ডার্থমখণ্ডৈকরসং ততম্ ॥ ৫॥
অখণ্ডাকারবৃত্তিস্তু জীবন্মুক্তিরিতীরিতম্ ।
অখণ্ডৈকরসং বস্তু বিদেহো মুক্তিরুচ্যতে ॥ ৬॥
ব্রহ্মৈবাহং ন সংসারী সচ্চিদানন্দমস্ম্যহম্ ।
নির্গুণোঽহং নিরংশোঽহং পরমানন্দবানহম্ ॥ ৭॥
নিত্যোঽহং নির্বিকল্পোঽহং চিদহং চিদহং সদা ।
অখণ্ডাকারবৃত্ত্যাখ্যং চিত্তং ব্রহ্মাত্মনা স্থিতম্ ॥ ৮॥
লবণং তোযমাত্রেণ যথৈকত্বমখণ্ডিতম্ ।
অখণ্ডৈকরসং বক্ষ্যে বিদেহো মুক্তিলক্ষণম্ ॥ ৯॥
প্রজ্ঞাপদং পরিত্যজ্য ব্রহ্মৈব পদমেব হি ।
অহমস্মি মহানস্মি সিদ্ধোঽস্মীতি পরিত্যজন্ ॥ ১০॥
স্মরণং চ পরিত্যজ্য ভাবনং চিত্তকর্তৃকম্ ।
সর্বমন্তঃ পরিত্যজ্য সর্বশূন্যং পরিস্থিতিঃ ॥ ১১॥
তূষ্ণীং স্থিতিং চ সন্ত্যজ্য ততো মৌনবিকল্পনম্ ।
যত্তচ্চিত্তং বিকল্পাংশং মনসা কল্পিতং জগত্ ॥ ১২॥
দেহোঽহমিত্যহঙ্কারং দ্বৈতবৃত্তিরিতীরিতম্ ।
সর্বং সাক্ষিরহং ব্রহ্ম ইত্যেবং দৃঢনিশ্চযম্ ॥ ১৩॥
সর্বদাঽসংশযং ব্রহ্ম সাক্ষিবৃত্তিরিতীরিতম্ ।
দ্বৈতবৃত্তিঃ সাক্ষবৃত্তিরখণ্ডাকারবৃত্তিকম্ ॥ ১৪॥
অখণ্ডৈকরসং চেতি লোকে বৃত্তিত্রযং ভবেত্ ।
প্রথমে নিশ্চিতে দ্বৈতে দ্বিতীযে সাক্ষিসংশযঃ ॥ ১৫॥
তৃতীযে পদভাগে হি দৃঢনিশ্চযমীরিতম্ ।
এতত্ত্রযার্থং সংশোধ্য তং পরিত্যজ্য নিশ্চিনু ॥ ১৬॥
অখণ্ডৈকরসাকারো নিত্যং তন্মযতাং ব্রজ ।
অভ্যাসবাক্যমেতত্তু সদাঽভ্যাসস্য কারণম্ ॥ ১৭॥
মননস্য পরং বাক্যং যোঽযং চন্দনবৃক্ষবত্ ।
যুক্তিভিশ্চিন্তনং বৃত্তং পদত্রযমুদাহৃতম্ ॥ ১৮॥
অহং পদস্য জীবোঽর্থ ঈশো ব্রহ্মপদস্য হি ।
অস্মীতি পদভাগস্য অখণ্ডাকারবৃত্তিকম্ ॥ ১৯॥
পদত্রযং পরিত্যজ্য বিচার্য মনসা সহ ।
অখণ্ডৈকরসং প্রাপ্য বিদেহো মুক্তিলক্ষণম্ ॥ ২০॥
অহং ব্রহ্মাস্মি চিন্মাত্রং সচ্চিদানন্দবিগ্রহঃ ।
অহং ব্রহ্মাস্মি বাক্যস্য শ্রবণানন্তরং সদা ॥ ২১॥
অহং ব্রহ্মাস্মি নিত্যোঽস্মি শান্তোঽস্মি পরমোঽস্ম্যহম্ ।
নির্গুণোঽহং নিরীহোঽহং নিরংশোঽস্মি সদা স্মৃতঃ ॥ ২২॥var was নির্যশোঽস্মি
আত্মৈবাস্মি ন সন্দেহঃ অখণ্ডৈকরসোঽস্ম্যহম্ ।
এবং নিরন্তরং তজ্জ্ঞো ভাবযেত্ পরমাত্মনি ॥ ২৩॥
যথা চানুভবং বাক্যং তস্মাদনুভবেত্ সদা ।
আরংভাচ্চ দ্বিতীযাত্তু স্মৃতমভ্যাসবাক্যতঃ ॥ ২৪॥
তৃতীযান্তত্ত্বমস্যেতি বাক্যসামান্যনির্ণযম্ ।
তত্পদং ত্বংপদং ত্বস্য পদত্রযমুদাহৃতম্ ॥ ২৫॥
তত্পদস্যেশ্বরো হ্যর্থো জীবোঽর্থস্ত্বংপদস্য হি ।
ঐক্যস্যাপি পদস্যার্থমখণ্ডৈকরসং পদম্ ॥ ২৬॥
দ্বৈতবৃত্তিঃ সাক্ষবৃত্তিরখণ্ডাকারবৃত্তিকঃ ।
অখণ্ডং সচ্চিদানন্দং তত্ত্বমেবাসি নিশ্চযঃ ॥ ২৭॥
ত্বং ব্রহ্মাসি ন সন্দেহস্ত্বমেবাসি চিদব্যযঃ ।
ত্বমেব সচ্চিদানন্দস্ত্বমেবাখণ্ডনিশ্চযঃ ॥ ২৮॥
ইত্যেবমুক্তো গুরুণা স এব পরমো গুরুঃ ।
অহং ব্রহ্মেতি নিশ্চিত্য সচ্ছিষ্যঃ পরমাত্মবান্ ॥ ২৯॥
নান্যো গুরুর্নান্যশিষ্যস্ত্বং ব্রহ্মাসি গুরুঃ পরঃ ।
সর্বমন্ত্রোপদেষ্টারো গুরবঃ স গুরুঃ পরঃ ॥ ৩০॥
ত্বং ব্রহ্মাসীতি বক্তারং গুরুরেবেতি নিশ্চিনু ।
তথা তত্ত্বমসি ব্রহ্ম ত্বমেবাসি চ সদ্গুরুঃ ॥ ৩১॥
সদ্গুরোর্বচনে যস্তু নিশ্চযং তত্ত্বনিশ্চযম্ ।
করোতি সততং মুক্তের্নাত্র কার্যা বিচারণা ॥ ৩২॥
মহাবাক্যং গুরোর্বাক্যং তত্ত্বমস্যাদিবাক্যকম্ ।
শৃণোতু শ্রবণং চিত্তং নান্যত্ শ্রবণমুচ্যতে ॥ ৩৩॥
সর্ববেদান্তবাক্যানামদ্বৈতে ব্রহ্মণি স্থিতিঃ ।
ইত্যেবং চ গুরোর্বক্ত্রাত্ শ্রুতং ব্রহ্মেতি তচ্ছ্রবঃ ॥ ৩৪॥
গুরোর্নান্যো মন্ত্রবাদী এক এব হি সদ্গুরুঃ ।
ত্বং ব্রহ্মাসীতি যেনোক্তং এষ এব হি সদ্গুরুঃ ॥ ৩৫॥
বেদান্তশ্রবণং চৈতন্নান্যচ্ছ্রবণমীরিতম্ ।
যুক্তিভিশ্চিন্তনং চৈব মননং পরিকথ্যতে ॥ ৩৬॥
এবং চন্দনবৃক্ষোঽপি শ্রুতোঽপি পরিশোধ্যতে ।
ত্বং ব্রহ্মাসীতি চোক্তোঽপি সংশযং পরিপশ্যতি ॥ ৩৭॥
সংশোধ্য নিশ্চিনোত্যেবমাত্মানং পরিশোধ্যতে ।
যুক্তির্নাম বদাম্যত্র দেহোনাহং বিনাশতঃ ॥ ৩৮॥
স্থূলদেহং সূক্ষ্মদেহং স্থূলসূক্ষ্মং চ কারণম্ ।
ত্রযং চথুর্থে নাস্তীতি সর্বং চিন্মাত্রমেব হি ॥ ৩৯॥
এতত্সর্বং জডত্বাচ্চ দৃশ্যত্বাদ্ঘটবন্নহি ।
অহং চৈতন্যমেবাত্র দৃগ্রূপত্বাল্লযং ন হি ॥ ৪০॥
সত্যং জ্ঞানমনন্তং যদাত্মনঃ সহজা গুণাঃ ।
অন্ততং জডদুঃখাদি জগতঃ প্রথিতো গুণঃ ॥ ৪১॥
তস্মাদহং ব্রহ্ম এব ইদং সর্বমসত্যকম্ ।
এবং চ মননং নিত্যং করোতি ব্রহ্মবিত্তমঃ ॥ ৪২॥
বক্ষ্যে নিদিধ্যাসনং চ উভযত্যাগলক্ষণম্ ।
ত্বং ব্রহ্মাসীতি শ্রবণং মননং চাহমেব হি ॥ ৪৩॥
এতত্ত্যাগং নিদিধ্যাসং সজাতীযত্বভাবনম্ ।
বিজাতীযপরিত্যাগং স্বগতত্ববিভাবনম্ ॥ ৪৪॥
সর্বত্যাগং পরিত্যজ্য তুরীযত্বং চ বর্জনম্ ।
ব্রহ্মচিন্মাত্রসারত্বং সাক্ষাত্কারং প্রচক্ষতে ॥ ৪৫॥
উপদেশে মহাবাক্যমস্তিত্বমিতি নির্ণযঃ ।
তথৈবানুভবং বাক্যমহং ব্রহ্মাস্মি নির্ণযঃ ॥ ৪৬॥
প্রজ্ঞানং ব্রহ্মবাক্যোত্থমভ্যাসার্থমিতীরিতম্ ।
অযমাত্মেতি বাক্যোত্থদর্শনং বাক্যমীরিতম্ ॥ ৪৭॥
অযমেকপদং চৈক আত্মেতি ব্রহ্ম চ ত্রযম্ ।
অযংপদস্য জীবোঽর্থ আত্মনো ঈশ্বরঃ পরঃ ॥ ৪৮॥
তথা ব্রহ্মপদস্যার্থ অখণ্ডাকারবৃত্তিকম্ ।
অখণ্ডৈকরসং সর্বং পদত্রযলযং গতম্ ॥ ৪৯॥
অখণ্ডৈকরসো হ্যাত্মা নিত্যশুদ্ধবিমুক্তকঃ ।
তদেব সর্বমুদ্ভূতং ভবিষ্যতি ন সংশযঃ ॥ ৫০॥
অখণ্ডৈকরসো দেব অযমেকমুদীরিতম্ ।
আত্মেতি পদমেকস্য ব্রহ্মেতি পদমেককম্ ॥ ৫১॥
অযং পদস্য জীবোঽর্থ আত্মেতীশ্বর ঈরিতঃ ।
অস্যার্থোঽস্মীত্যখণ্ডার্থমখণ্ডৈকরসং পদম্ ॥ ৫২॥
দ্বৈতবৃত্তিঃ সাক্ষিবৃত্তিরখণ্ডাকারবৃত্তিকম্ ।
অখণ্ডৈকরসং পশ্চাত্ সোঽহমস্মীতি ভাবয ॥ ৫৩॥
ইত্যেবং চ চতুর্বাক্যতাত্পর্যার্থং সমীরিতম্ ।
উপাধিসহিতং বাক্যং কেবলং লক্ষ্যমীরিতম্ ॥ ৫৪॥
কিঞ্চিজ্জ্ঞত্বাদি জীবস্য সর্ব জ্ঞত্বাদি চেশ্বরঃ ।
জীবোঽপরো সচৈতন্যমীশ্বরোঽহং পরোক্ষকঃ ॥ ৫৫॥
সর্বশূন্যমিতি ত্যাজ্যং ব্রহ্মাস্মীতি বিনিশ্চযঃ ।
অহং ব্রহ্ম ন সন্দেহঃ সচ্চিদানন্দবিগ্রহঃ ॥ ৫৬॥
অহমৈক্যং পরং গত্বা স্বস্বভাবো ভবোত্তম ।
এতত্সর্বং মহামিথ্যা নাস্তি নাস্তি ন সংশযঃ ॥ ৫৭॥
সর্বং নাস্তি ন সন্দেহঃ সর্বং ব্রহ্ম ন সংশযঃ ।
একাকারমখণ্ডার্থং তদেবাহং ন সংশযঃ ।
ব্রহ্মেদং বিততাকারং তদ্ব্রহ্মাহং ন সংশযঃ ॥ ৫৮॥

সূতঃ -

ভবোদ্ভবমুখোদ্ভবং ভবহরাদ্যহৃদ্যং ভুবি
প্রকৃষ্টরসভাবতঃ প্রথিতবোধবুদ্ধং ভব ।
ভজন্তি ভসিতাঙ্গকা ভরিতমোদভারাদরা
ভুজঙ্গবরভূষণং ভুবনমধ্যবৃন্দাবনম্ ॥ ৫৯॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে মহাবাক্যার্থনিরূপণপ্রকরণং নাম একত্রিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com