Ribhu Gita - Siva Rahasya Purana Amsha 6

ঋভুগীতা ৩৯ ॥ সর্ব-লয প্রকরণম্ ॥

ঋভুঃ -

পরং ব্রহ্ম প্রবক্ষ্যামি নির্বিকল্পং নিরামযম্ ।
তদেবাহং ন সন্দেহঃ সর্বং ব্রহ্মৈব কেবলম্ ॥ ১॥
চিন্মাত্রমমলং শান্তং সচ্চিদানন্দবিগ্রহম্ ।
আনন্দং পরমানন্দং নির্বিকল্পং নিরঞ্জনম্ ॥ ২॥
গুণাতীতং জনাতীতমবস্থাতীতমব্যযম্ ।
এবং ভাবয চৈতন্যমহং ব্রহ্মাস্মি সোঽস্ম্যহম্ ॥ ৩॥
সর্বাতীতস্বরূপোঽস্মি সর্বশব্দার্থবর্জিতঃ ।
সত্যোঽহং সর্বহন্তাহং শুদ্ধোঽহং পরমোঽস্ম্যহম্ ॥ ৪॥
অজোঽহং শান্তরূপোঽহং অশরীরোঽহমান্তরঃ ।
সর্বহীনোঽহমেবাহং স্বযমেব স্বযং মহঃ ॥ ৫॥
আত্মৈবাহং পরাত্মাহং ব্রহ্মৈবাহং শিবোঽস্ম্যহম্ ।
চিত্তহীনস্বরূপোঽহং বুদ্ধিহীনোঽহমস্ম্যহম্ ॥ ৬॥
ব্যাপকোঽহমহং সাক্ষী ব্রহ্মাহমিতি নিশ্চযঃ ।
নিষ্প্রপঞ্চগজারূঢো নিষ্প্রপঞ্চাশ্ববাহনঃ ॥ ৭॥
নিষ্প্রপঞ্চমহারাজ্যো নিষ্প্রপঞ্চাযুধাদিমান্ ।
নিষ্প্রপঞ্চমহাবেদো নিষ্প্রপঞ্চাত্মভাবনঃ ॥ ৮॥
নিষ্প্রপঞ্চমহানিদ্রো নিষ্প্রপঞ্চস্বভাবকঃ ।
নিষ্প্রপঞ্চস্তু জীবাত্মা নিষ্প্রপঞ্চকলেবরঃ ॥ ৯॥
নিষ্প্রপঞ্চপরীবারো নিষ্প্রপঞ্চোত্সবো ভবঃ ।
নিষ্প্রপঞ্চস্তু কল্যাণো নিষ্প্রপঞ্চস্তু দর্পণঃ ॥ ১০॥
নিষ্প্রপঞ্চরথারূঢো নিষ্প্রপঞ্চবিচারণম্ ।
নিষ্প্রপঞ্চগুহান্তস্থো নিষ্প্রপঞ্চপ্রদীপকম্ ॥ ১১॥
নিষ্প্রপঞ্চপ্রপূর্ণাত্মা নিষ্প্রপঞ্চোঽরিমর্দনঃ ।
চিত্তমেব প্রপঞ্চো হি চিত্তমেব জগত্ত্রযম্ ॥ ১২॥
চিত্তমেব মহামোহশ্চিত্তমেব হি সংসৃতিঃ ।
চিত্তমেব মহাপাপং চিত্তমেব হি পুণ্যকম্ ॥ ১৩॥
চিত্তমেব মহাবন্ধশ্চিত্তমেব বিমোক্ষদম্ ।
ব্রহ্মভাবনযা চিত্তং নাশমেতি ন সংশযঃ ॥ ১৪॥
ব্রহ্মভাবনযা দুঃখং নাশমেতি ন সংশযঃ ।
ব্রহ্মভাবনযা দ্বৈতং নাশমেতি ন সংশযঃ ॥ ১৫॥
ব্রহ্মভাবনযা কামঃ নাশমেতি ন সংশযঃ ।
ব্রহ্মভাবনযা ক্রোধঃ নাশমেতি ন সংশযঃ ॥ ১৬॥
ব্রহ্মভাবনযা লোভঃ নাশমেতি ন সংশযঃ ।
ব্রহ্মভাবনযা গ্রন্থিঃ নাশমেতি ন সংশযঃ ॥ ১৭॥
ব্রহ্মভাবনযা সর্বং ব্রহ্মভাবনযা মদঃ ।
ব্রহ্মভাবনযা পূজা নাশমেতি ন সংশযঃ ॥ ১৮॥
ব্রহ্মভাবনযা ধ্যানং নাশমেতি ন সংশযঃ ।
ব্রহ্মভাবনযা স্নানং নাশমেতি ন সংশযঃ ॥ ১৯॥
ব্রহ্মভাবনযা মন্ত্রো নাশমেতি ন সংশযঃ ।
ব্রহ্মভাবনযা পাপং নাশমেতি ন সংশযঃ ॥ ২০॥
ব্রহ্মভাবনযা পুণ্যং নাশমেতি ন সংশযঃ ।
ব্রহ্মভাবনযা দোষো নাশমেতি ন সংশযঃ ॥ ২১॥
ব্রহ্মভাবনযা ভ্রান্তিঃ নাশমেতি ন সংশযঃ ।
ব্রহ্মভাবনযা দৃশ্যং নাশমেতি ন সংশযঃ ॥ ২২॥
ব্রহ্মভাবনযা সঙ্গো নাশমেতি ন সংশযঃ ।
ব্রহ্মভাবনযা তেজো নাশমেতি ন সংশযঃ ॥ ২৩॥
ব্রহ্মভাবনযা প্রজ্ঞা নাশমেতি ন সংশযঃ ।
ব্রহ্মভাবনযা সত্তা নাশমেতি ন সংশযঃ ॥ ২৪॥
ব্রহ্মভাবনযা ভীতিঃ নাশমেতি ন সংশযঃ ।
ব্রহ্মভাবনযা বেদঃ নাশমেতি ন সংশযঃ ॥ ২৫॥
ব্রহ্মভাবনযা শাস্ত্রং নাশমেতি ন সংশযঃ ।
ব্রহ্মভাবনযা নিদ্রা নাশমেতি ন সংশযঃ ॥ ২৬॥
ব্রহ্মভাবনযা কর্ম নাশমেতি ন সংশযঃ ।
ব্রহ্মভাবনযা তুর্যং নাশমেতি ন সংশযঃ ॥ ২৭॥
ব্রহ্মভাবনযা দ্বন্দ্বং নাশমেতি ন সংশযঃ ।
ব্রহ্মভাবনযা পৃচ্ছেদহং ব্রহ্মেতি নিশ্চযম্ ॥ ২৮॥
নিশ্চযং চাপি সন্ত্যজ্য স্বস্বরূপান্তরাসনম্ ।
অহং ব্রহ্ম পরং ব্রহ্ম চিদ্ব্রহ্ম ব্রহ্মমাত্রকম্ ॥ ২৯॥
জ্ঞানমেব পরং ব্রহ্ম জ্ঞানমেব পরং পদম্ ।
দিবি ব্রহ্ম দিশো ব্রহ্ম মনো ব্রহ্ম অহং স্বযম্ ॥ ৩০॥
কিঞ্চিদ্ব্রহ্ম ব্রহ্ম তত্ত্বং তত্ত্বং ব্রহ্ম তদেব হি ।
অজো ব্রহ্ম শুভং ব্রহ্ম আদিব্রহ্ম ব্রবীমি তম্ ॥ ৩১॥
অহং ব্রহ্ম হবির্ব্রহ্ম কার্যব্রহ্ম ত্বহং সদা ।
নাদো ব্রহ্ম নদং ব্রহ্ম তত্ত্বং ব্রহ্ম চ নিত্যশঃ ॥ ৩২॥
এতদ্ব্রহ্ম শিখা ব্রহ্ম তদ্ব্রহ্ম ব্রহ্ম শাশ্বতম্ ।
নিজং ব্রহ্ম স্বতো ব্রহ্ম নিত্যং ব্রহ্ম ত্বমেব হি ॥ ৩৩॥
সুখং ব্রহ্ম প্রিযং ব্রহ্ম মিত্রং ব্রহ্ম সদামৃতম্ ।
গুহ্যং ব্রহ্ম গুরুর্ব্রহ্ম ঋতং ব্রহ্ম প্রকাশকম্ ॥ ৩৪॥
সত্যং ব্রহ্ম সমং ব্রহ্ম সারং ব্রহ্ম নিরঞ্জনম্ ।
একং ব্রহ্ম হরির্ব্রহ্ম শিবো ব্রহ্ম ন সংশযঃ ॥ ৩৫॥
ইদং ব্রহ্ম স্বযং ব্রহ্ম লোকং ব্রহ্ম সদা পরঃ ।
আত্মব্রহ্ম পরং ব্রহ্ম আত্মব্রহ্ম নিরন্তরঃ ॥ ৩৬॥
একং ব্রহ্ম চিরং ব্রহ্ম সর্বং ব্রহ্মাত্মকং জগত্ ।
ব্রহ্মৈব ব্রহ্ম সদ্ব্রহ্ম তত্পরং ব্রহ্ম এব হি ॥ ৩৭॥
চিদ্ব্রহ্ম শাশ্বতং ব্রহ্ম জ্ঞেযং ব্রহ্ম ন চাপরঃ ।
অহমেব হি সদ্ব্রহ্ম অহমেব হি নির্গুণম্ ॥ ৩৮॥
অহমেব হি নিত্যাত্মা এবং ভাবয সুব্রত ।
অহমেব হি শাস্ত্রার্থ ইতি নিশ্চিত্য সর্বদা ॥ ৩৯॥
আত্মৈব নান্যদ্ভেদোঽস্তি সর্বং মিথ্যেতি নিশ্চিনু ।
আত্মৈবাহমহং চাত্মা অনাত্মা নাস্তি নাস্তি হি ॥ ৪০॥
বিশ্বং বস্তুতযা বিভাতি হৃদযে মূঢাত্মনাং বোধতো-
ঽপ্যজ্ঞানং ন নিবর্ততে শ্রুতিশিরোবার্তানুবৃত্ত্যাঽপি চ ।
বিশ্বেশস্য সমর্চনেন সুমহালিঙ্গার্চনাদ্ভস্মধৃক্
রুদ্রাক্ষামলধারণেন ভগবদ্ধ্যানেন ভাত্যাত্মবত্ ॥ ৪১॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে সর্বলযপ্রকরণং নাম একোনচত্বারিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com