RRibhugItA 11 || jIvanamukta-prakaraNam ||

RRibhuH -

• brahmaj~nAnaM pravakShyAmi jIvanmuktasya lakShaNam |
• AtmamAtreNa yastiShThet sa jIvanmukta uchyate || 1||
• ahaM brahmavadevedamahamAtmA na saMshayaH |
• chaitanyAtmeti yastiShThet sa jIvanmukta uchyate || 2||
• chidAtmAhaM parAtmAhaM nirguNo.ahaM parAtparaH |
• ityevaM nishchayo yasya sa jIvanmukta uchyate || 3||
• dehatrayAtirikto.ahaM brahma chaitanyamasmyaham |
• brahmAhamiti yasyAntaH sa jIvanmukta uchyate || 4||
• AnandaghanarUpo.asmi parAnandaparo.asmyaham |
• yashchidevaM parAnandaM sa jIvanmukta uchyate || 5||
• yasya dehAdikaM nAsti yasya brahmeti nishchayaH |
• paramAnandapUrNo yaH sa jIvanmukta uchyate || 6||
• yasya ki~nchidahaM nAsti chinmAtreNAvatiShThate |
• parAnando mudAnandaH sa jIvanmukta uchyate || 7||
• chaitanyamAtraM yasyAntashchinmAtraikasvarUpavAn |
• na smaratyanyakalanaM sa jIvanmukta uchyate || 8||var was kalalaM
• sarvatra paripUrNAtmA sarvatra kalanAtmakaH |
• sarvatra nityapUrNAtmA sa jIvanmukta uchyate || 9||
• paramAtmaparA nityaM paramAtmeti nishchitaH |
• AnandAkRRitiravyaktaH sa jIvanmukta uchyate || 10||
• shuddhakaivalyajIvAtmA sarvasa~NgavivarjitaH |
• nityAnandaprasannAtmA sa jIvanmukta uchyate || 11||
• ekarUpaH prashAntAtmA anyachintAvivarjitaH |
• ki~nchidastitvahIno yaH sa jIvanmukta uchyate || 12||
• na me chittaM na me buddhirnAha~NkAro na chendriyaH |
• kevalaM brahmamAtratvAt sa jIvanmukta uchyate || 13||
• na me doSho na me deho ne me prANo na me kvachit |
• dRRiDhanishchayavAn yo.antaH sa jIvanmukta uchyate || 14||
• na me mAyA na me kAmo na me krodho.aparo.asmyaham |
• na me ki~nchididaM vA.api sa jIvanmukta uchyate || 15||
• na me doSho na me li~NgaM na me bandhaH kvachijjagat |
• yastu nityaM sadAnandaH sa jIvanmukta uchyate || 16||
• na me shrotraM na me nAsA na me chakShurna me manaH |
• na me jihveti yasyAntaH sa jIvanmukta uchyate || 17||
• na me deho na me li~NgaM na me kAraNameva cha |
• na me turyamiti svasthaH sa jIvanmukta uchyate || 18||
• idaM sarvaM na me ki~nchidayaM sarvaM na me kvachit |
• brahmamAtreNa yastiShThet sa jIvanmukta uchyate || 19||
• na me ki~nchinna me kashchinna me kashchit kvachijjagat |
• ahameveti yastiShThet sa jIvanmukta uchyate || 20||
• na me kAlo na me desho na me vastu na me sthitiH |
• na me snAnaM na me prAsaH sa jIvanmukta uchyate || 21||
• na me tIrthaM na me sevA na me devo na me sthalam |
• na kvachidbhedahIno.ayaM sa jIvanmukta uchyate || 22||
• na me bandhaM na me janma na me j~nAnaM na me padam |
• na me vAkyamiti svasthaH sa jIvanmukta uchyate || 23||
• na me puNyaM na me pApaM na me kAyaM na me shubham |
• na me dRRishyamiti j~nAnI sa jIvanmukta uchyate || 24||
• na me shabdo na me sparsho na me rUpaM na me rasaH |
• na me jIva iti j~nAtvA sa jIvanmukta uchyate || 25||
• na me sarvaM na me ki~nchit na me jIvaM na me kvachit |
• na me bhAvaM na me vastu sa jIvanmukta uchyate || 26||
• na me mokShye na me dvaitaM na me vedo na me vidhiH |
• na me dUramiti svasthaH sa jIvanmukta uchyate || 27||
• na me gururna me shiShyo na me bodho na me paraH |
• na me shreShThaM kvachidvastu sa jIvanmukta uchyate || 28||
• na me brahmA na me viShNurna me rudro na me raviH |
• na me karma kvachidvastu sa jIvanmukta uchyate || 29||
• na me pRRithvI na me toyaM na me tejo na me viyat |
• na me kAryamiti svasthaH sa jIvanmukta uchyate || 30||
• na me vArtA na me vAkyaM na me gotraM na me kulam |
• na me vidyeti yaH svasthaH sa jIvanmukta uchyate || 31||
• na me nAdo na me shabdo na me lakShyaM na me bhavaH |
• na me dhyAnamiti svasthaH sa jIvanmukta uchyate || 32||
• na me shItaM na me choShNaM na me moho na me japaH |
• na me sandhyeti yaH svasthaH sa jIvanmukta uchyate || 33||
• na me japo na me mantro na me homo na me nishA |
• na me sarvamiti svasthaH sa jIvanmukta uchyate || 34||
• na me bhayaM na me chAnnaM na me tRRiShNA na me kShudhA |
• na me chAtmeti yaH svasthaH sa jIvanmukta uchyate || 35||
• na me pUrvaM na me pashchAt na me chordhvaM na me dishaH |
• na chittamiti svasthaH sa jIvanmukta uchyate || 36||
• na me vaktavyamalpaM vA na me shrotavyamaNvapi |
• na me mantavyamIShadvA sa jIvanmukta uchyate || 37||
• na me bhoktavyamIShadvA na me dhyAtavyamaNvapi |
• na me smartavyamevAyaM sa jIvanmukta uchyate || 38||
• na me bhogo na me rogo na me yogo na me layaH |
• na me sarvamiti svasthaH sa jIvanmukta uchyate || 39||
• na me.astitvaM na me jAtaM na me vRRiddhaM na me kShayaH |
• adhyAropo na me svasthaH sa jIvanmukta uchyate || 40||
• adhyAropyaM na me ki~nchidapavAdo na me kvachit |
• na me ki~nchidahaM yattu sa jIvanmukta uchyate || 41||
• na me shuddhirna me shubhro na me chaikaM na me bahu |
• na me bhUtaM na me kAryaM sa jIvanmukta uchyate || 42||
• na me ko.ahaM na me chedaM na me nAnyaM na me svayam |
• na me kashchinna me svasthaH sa jIvanmukta uchyate || 43||
• na me mAMsaM na me raktaM na me medo na me shakRRit |
• na me kRRipA na me.astIti sa jIvanmukta uchyate || 44||
• na me sarvaM na me shuklaM na me nIlaM na me pRRithak |
• na me svasthaH svayaM yo vA sa jIvanmukta uchyate || 45||
• na me tApaM na me lobho na me gauNa na me yashaH |
• ne me tattvamiti svasthaH sa jIvanmukta uchyate || 46||
• na me bhrAntirna me j~nAnaM na me guhyaM na me kulam |
• na me ki~nchiditi dhyAyan sa jIvanmukta uchyate || 47||
• na me tyAjyaM na me grAhyaM na me hAsyaM na me layaH |
• na me daivamiti svasthaH sa jIvanmukta uchyate || 48||
• na me vrataM na me glAniH na me shochyaM na me sukham |
• na me nyUnaM kvachidvastu sa jIvanmukta uchyate || 49||
• na me j~nAtA na me j~nAnaM na me j~neyaM na me svayam |
• na me sarvamiti j~nAnI sa jIvanmukta uchyate || 50||
• na me tubhyaM na me mahyaM na me tvatto na me tvaham |
• na me gururna me yastu sa jIvanmukta uchyate || 51||
• na me jaDaM na me chaityaM na me glAnaM na me shubham |
• na me na meti yastiShThet sa jIvanmukta uchyate || 52||
• na me gotraM na me sUtraM na me pAtraM na me kRRipA |
• na me ki~nchiditi dhyAyI sa jIvanmukta uchyate || 53||
• na me chAtmA na me nAtmA na me svargaM na me phalam |
• na me dUShyaM kvachidvastu sa jIvanmukta uchyate || 54||
• na me.abhyAso na me vidyA na me shAntirna me damaH |
• na me puramiti j~nAnI sa jIvanmukta uchyate || 55||
• na me shalyaM na me sha~NkA na me suptirna me manaH |
• na me vikalpa ityAptaH sa jIvanmukta uchyate || 56||
• na me jarA na me bAlyaM na me yauvanamaNvapi |
• na me mRRitirna me dhvAntaM sa jIvanmukta uchyate || 57||
• na me lokaM na me bhogaM na me sarvamiti smRRitaH |
• na me maunamiti prAptaM sa jIvanmukta uchyate || 58||
• ahaM brahma hyahaM brahma hyahaM brahmeti nishchayaH |
• chidahaM chidahaM cheti sa jIvanmukta uchyate || 59||
• brahmaivAhaM chidevAhaM paraivAhaM na saMshayaH |
• svayameva svayaM jyotiH sa jIvanmukta uchyate || 60||
• svayameva svayaM pashyet svayameva svayaM sthitaH |
• svAtmanyeva svayaM bhUtaH sa jIvanmukta uchyate || 61||
• svAtmAnandaM svayaM bhuMkShve svAtmarAjye svayaM vase |
• svAtmarAjye svayaM pashye sa jIvanmukta uchyate || 62||
• svayamevAhamekAgraH svayameva svayaM prabhuH |
• svasvarUpaH svayaM pashye sa jIvanmukta uchyate || 63||
• jIvanmuktiprakaraNaM sarvavedeShu durlabham |
• yaH shRRiNoti sakRRidvApi brahmaiva bhavati svayam || 64||
• ye vedavAdavidhikalpitabhedabuddhyA
• puNyAbhisandhitadhiyA parikarshayantaH |
• dehaM svakIyamatiduHkhaparaM parAbhi-
• steShAM sukhAya na tu jAtu tavesha pAdAt || 65||
• kaH santareta bhavasAgarametadutya-
• ttara~NgasadRRishaM janimRRityurUpam |
• IshArchanAvidhisubodhitabhedahIna-
• j~nAnoDupena prataredbhavabhAvayuktaH || 66||

• || iti shrIshivarahasye sha~NkarAkhye ShaShThAMshe RRibhunidAghasaMvAde jIvanmuktaprakaraNaM nAma ekAdasho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com