RRibhugItA 5 || shivena kumAropadesha varNanam ||

nidAghaH -

• evaM sthite RRibho ko vai brahmabhAvAya kalpate |
• tanme vada visheSheNa j~nAnaM sha~NkaravAkyajam || 1||

RRibhuH -

• tvameva brahma evAsi tvameva paramo guruH |
• tvamevAkAsharUpo.asi tvaM brahmAsi na saMshayaH || 2||
• tvameva sarvabhAvo.asi tvamevArthastvamavyayaH |
• tvaM sarvahInastvaM sAkShI sAkShihIno.asi sarvadA || 3||
• kAlastvaM sarvahInastvaM sAkShihIno.asi sarvadA |
• kAlahIno.asi kAlo.asi sadA brahmAsi chidghanaH |
• sarvatattvasvarUpo.asi tvaM brahmAsi na saMshayaH || 4||
• satyo.asi siddho.asi sanAtano.asi
• mukto.asi mokSho.asi sadA.amRRito.asi |
• devo.asi shAnto.asi nirAmayo.asi
• brahmAsi pUrNo.asi parAvaro.asi || 5||
• samo.asi sachchAsi sanAtano.asi
• satyAdivAkyaiH pratipAdito.asi |
• sarvA~NgahIno.asi sadAsthito.asi
• brahmAsi pUrNo.asi parAvaro.asi || 6||var was parAparo.asi
• sarvaprapa~nchabhramavarjito.asi sarveShu bhUteShu sadodito.asi |
• sarvatra saMkalpavivarjito.asi brahmAsi pUrNo.asi parAvaro.asi || 7||
• sarvatra santoShasukhAsano.asi sarvatra vidveShavivarjito.asi |
• sarvatra kAryAdivivarjito.asi brahmAsi pUrNo.asi parAvaro.asi || 8||
• chidAkArasvarUpo.asi chinmAtro.asi nira~NkushaH |
• AtmanyevAvasthito.asi tvaM brahmAsi na saMshayaH || 9||
• Anando.asi paro.asi tvaM sarvashUnyo.asi nirguNaH |
• eka evAdvitIyo.asi tvaM brahmAsi na saMshayaH || 10||
• chidghanAnandarUpo.asi chidAnando.asi sarvadA |
• paripUrNasvarUpo.asi tvaM brahmAsi na saMshayaH || 11||
• tadasi tvamasi j~no.asi so.asi jAnAsi vIkShyasi |
• chidasi brahmabhUto.asi tvaM brahmAsi na saMshayaH || 12||
• amRRito.asi vibhushchAsi devo.asi tvaM mahAnasi |
• cha~nchaloShThakala~Nko.asi tvaM brahmAsi na saMshayaH || 13||
• sarvo.asi sarvahIno.asi shAnto.asi paramo hyasi |
• kAraNaM tvaM prashAnto.asi tvaM brahmAsi na saMshayaH || 14||
• sattAmAtrasvarUpo.asi sattAsAmAnyako hyasi |
• nityashuddhasvarUpo.asi tvaM brahmAsi na saMshayaH || 15||
• IShaNmAtravihIno.asi aNumAtravivarjitaH |
• astitvavarjito.asi tvaM nAstitvAdivivarjitaH || 16||
• yo.asi so.asi mahAnto.asi tvaM brahmAsi na saMshayaH || 17||
• lakShyalakShaNahIno.asi chinmAtro.asi nirAmayaH |
• akhaNDaikaraso nityaM tvaM brahmAsi na saMshayaH || 18||
• sarvAdhArasvarUpo.asi sarvatejaH svarUpakaH |
• sarvArthabhedahIno.asi tvaM brahmAsi na saMshayaH || 19||
• brahmaiva bhedashUnyo.asi viplutyAdivivarjitaH |
• shivo.asi bhedahIno.asi tvaM brahmAsi na saMshayaH || 20||
• praj~nAnavAkyahIno.asi svasvarUpaM prapashyasi |
• svasvarUpasthito.asi tvaM tvaM brahmAsi na saMshayaH || 21||
• svasvarUpAvasheSho.asi svasvarUpo mato hyasi |
• svAnandasindhumagno.asi tvaM brahmAsi na saMshayaH || 22||
• svAtmarAjye tvamevAsi svayamAtmAnamo hyasi |
• svayaM pUrNasvarUpo.asi tvaM brahmAsi na saMshayaH || 23||
• svasmin sukhe svayaM chAsi svasmAt ki~nchinna pashyasi |
• svAtmanyAkAshavadbhAsi tvaM brahmAsi na saMshayaH || 24||
• svasvarUpAnna chalasi svasvarUpAnna pashyasi |
• svasvarUpAmRRito.asi tvaM tvaM brahmAsi na saMshayaH || 25||
• svasvarUpeNa bhAsi tvaM svasvarUpeNa jRRiMbhasi |
• svasvarUpAdananyo.asi tvaM brahmAsi na saMshayaH || 26||
• svayaM svayaM sadA.asi tvaM svayaM sarvatra pashyasi |
• svasmin svayaM svayaM bhu~NkShe tvaM brahmAsi na saMshayaH || 27||

sUtaH -

• tadA nidhAghavachasA tuShTo RRibhuruvAcha tam |
• shivapremarase pAtraM taM vIkShyAbjajanandanaH || 28||

RRibhuH -

• kailAse sha~NkaraH putraM kadAchidupadiShTavAn |
• tadeva te pravakShyAmi sAvadhAnamanAH shRRiNu || 29||
• ayaM prapa~ncho nAstyeva notpanno na svataH kvachit |
• chitraprapa~ncha ityAhurnAsti nAstyeva sarvadA || 30||
• na prapa~ncho na chittAdi nAhaMkAro na jIvakaH |
• kevalaM brahmamAtratvAt nAsti nAstyeva sarvadA || 31||
• mAyakAryAdikaM nAsti mAyAkAryabhayaM nahi |
• kevalaM brahmamAtratvAt nAsti nAstyeva sarvadA || 32||
• kartA nAsti kriyA nAsti karaNaM nAsti putraka |
• kevalaM brahmamAtratvAt nAsti nAstyeva sarvadA || 33||
• ekaM nAsti dvayaM nAsti mantratantrAdikaM cha na |
• kevalaM brahmamAtratvAt nAsti nAstyeva sarvadA || 34||
• shravaNaM mananaM nAsti nididhyAsanavibhramaH |
• kevalaM brahmamAtratvAt nAsti nAstyeva sarvadA || 35||
• samAdhidvividhaM nAsti mAtRRimAnAdi nAsti hi |
• kevalaM brahmamAtratvAt nAsti nAstyeva sarvadA || 36||
• aj~nAnaM chApi nAstyeva avivekakathA na cha |
• kevalaM brahmamAtratvAt nAsti nAstyeva sarvadA || 37||
• anubandhachatuShkaM cha saMbandhatrayameva na |
• kevalaM brahmamAtratvAt nAsti nAstyeva sarvadA || 38||
• bhUtaM bhaviShyanna kvApi vartamAnaM na vai kvachit |
• kevalaM brahmamAtratvAt nAsti nAstyeva sarvadA || 39||
• ga~NgA gayA tathA setuvrataM vA nAnyadasti hi |
• kevalaM brahmamAtratvAt nAsti nAstyeva sarvadA || 40||
• na bhUmirna jalaM vahnirna vAyurna cha khaM kvachit |
• kevalaM brahmamAtratvAt nAsti nAstyeva sarvadA || 41||
• naiva devA na dikpAlA na pitA na guruH kvachit |
• kevalaM brahmamAtratvAt nAsti nAstyeva sarvadA || 42||
• na dUraM nAntikaM nAntaM na madhyaM na kvachit sthitiH |
• nAdvaitadvaitasatyatvamasatyaM vA idaM na cha || 43||
• na mokSho.asti na bandho.asti na vArtAvasaro.asti hi |
• kvachidvA ki~nchidevaM vA sadasadvA sukhAni cha || 44||
• dvandvaM vA tIrthadharmAdi AtmAnAtmeti na kvachit |
• na vRRiddhirnodayo mRRinyurna gamAgamavibhramaH || 45||
• iha nAsti paraM nAsti na gururna cha shiShyakaH |
• sadasannAsti bhUrnAsti kAryaM nAsti kRRitaM cha na || 46||
• jAtirnAsti gatirnAsti varNo nAsti na laukikam |
• shamAdiShaTkaM nAstyeva niyamo vA yamo.api vA || 47||
• sarvaM mithyeti nAstyeva brahma ityeva nAsti hi |
• chidityeva hi nAstyeva chidahaM bhAShaNaM na hi || 48||
• ahamityeva nAstyeva nityo.asmIti cha na kvachit |
• kevalaM brahmamAtratvAt nAsti nAstyeva sarvathA || 49||
• vAchA yaduchyate ki~nchinmanasA manute cha yat |
• buddhyA nishchIyate yachcha chittena j~nAyate hi yat || 50||
• yogena yujyate yachcha indriyAdyaishcha yat kRRitam |
• jAgratsvapnasuShuptiM cha svapnaM vA na turIyakam || 51||
• sarvaM nAstIti vij~neyaM yadupAdhivinishchitam |
• snAnAchChuddhirna hi kvApi dhyAnAt shuddhirna hi kvachit || 52||
• guNatrayaM nAsti ki~nchidguNatrayamathApi vA |
• ekadvitvapadaM nAsti na bahubhramavibhramaH || 53||
• bhrAntyabhrAnti cha nAstyeva ki~nchinnAstIti nishchinu |
• kevalaM brahmamAtratvAt na ki~nchidavashiShyate || 54||
• idaM shRRiNoti yaH samyak sa brahma bhavati svayam || 55||

IshvaraH -

• vArAshyambuni budbudA iva ghanAnandAmbudhAvapyumA-
• kAnte.anantajagadgataM suranaraM jAtaM cha tirya~N muhuH |
• bhUtaM chApi bhaviShyati pratibhavaM mAyAmayaM chormijaM
• samya~N mAmanupashyatAmanubhavairnAstyeva teShAM bhavaH || 56||
• haraM vij~nAtAraM nikhilatanukAryeShu karaNaM
• na jAnante mohAdyamitakaraNA apyatitarAm |
• umAnAthAkAraM hRRidayadaharAntargatasarA
• payojAte bhAsvadbhavabhujaganAshANDajavaram || 57||

• ||iti shrIshivarahasye sha~NkarAkhye ShaShThAMshe RRibhunidAghasaMvAde shivena kumAropadeshavarNanaM nAma pa~nchamo.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com