RRibhugItA 27 || Ananda-rUpatva nirUpaNa prakaraNam ||
RRibhuH -
- vakShye prakaraNaM satyaM brahmAnandamanomayam |
- kAryakAraNanirmuktaM nityAnandamayaM tvidam || 1||
- akShayAnanda evAhamAtmAnandaprakAshakam |
- j~nAnAnandasvarUpo.ahaM lakShyAnandamayaM sadA || 2||
- viShayAnandashUnyo.ahaM mithyAnandaprakAshakaH |
- vRRittishUnyasukhAtmAhaM vRRittishUnyasukhAtparam || 3||
- jaDAnandaprakAshAtmA AtmAnandaraso.asmyaham |
- AtmAnandavihIno.ahaM nAstyAnandAtmavigrahaH || 4||
- kAryAnandavihIno.ahaM kAryAnandakalAtmakaH |
- guNAnandavihIno.ahaM guhyAnandasvarUpavAn || 5||
- guptAnandasvarUpo.ahaM kRRityAnandamahAnaham |
- j~neyAnandavihIno.ahaM gopyAnandavivarjitaH || 6||
- sadAnandasvarUpo.ahaM mudAnandanijAtmakaH |
- lokAnando mahAnando lokAtItamahAnayam || 7||
- bhedAnandashchidAnandaH sukhAnando.ahamadvayaH |
- kriyAnando.akShayAnando vRRittyAnandavivarjitaH || 8||
- sarvAnando.akShayAnandashchidAnando.ahamavyayaH |
- satyAnandaH parAnandaH sadyonandaH parAtparaH || 9||
- vAkyAnandamahAnandaH shivAnando.ahamadvayaH |
- shivAnandottarAnanda AdyAnandavivarjitaH || 10||
- amalAtmA parAnandashchidAnando.ahamadvayaH |
- vRRittyAnandaparAnando vidyAtIto hi nirmalaH || 11||
- kAraNAtIta AnandashchidAnando.ahamadvayaH |
- sarvAnandaH parAnando brahmAnandAtmabhAvanaH || 12||
- jIvAnando layAnandashchidAnandasvarUpavAn |
- shuddhAnandasvarUpAtmA buddhyAnando manomayaH || 13||
- shabdAnando mahAnandashchidAnando.ahamadvayaH |
- AnandAnandashUnyAtmA bhedAnandavishUnyakaH || 14||
- dvaitAnandaprabhAvAtmA chidAnando.ahamadvayaH |
- evamAdimahAnanda ahameveti bhAvaya || 15||
- shAntAnando.ahameveti chidAnandaprabhAsvaraH |
- ekAnandaparAnanda eka eva chidavyayaH || 16||
- eka eva mahAnAtmA ekasaMkhyAvivarjitaH |
- ekatattvamahAnandastattvabhedavivarjitaH || 17||
- vijitAnandahIno.ahaM nirjitAnandahInakaH |
- hInAnandaprashAnto.ahaM shAnto.ahamiti shAntakaH || 18||
- mamatAnandashAnto.ahamahamAdiprakAshakam |
- sarvadA dehashAnto.ahaM shAnto.ahamiti varjitaH || 19||
- brahmaivAhaM na saMsArI ityevamiti shAntakaH |
- antarAdantaro.ahaM vai antarAdantarAntaraH || 20||
- eka eva mahAnanda eka evAhamakSharaH |
- eka evAkSharaM brahma eka evAkSharo.akSharaH || 21||
- eka eva mahAnAtmA eka eva manoharaH |
- eka evAdvayo.ahaM vai eka eva na chAparaH || 22||
- eka eva na bhUrAdi eka eva na buddhayaH |
- eka eva prashAnto.ahaM eka eva sukhAtmakaH || 23||
- eka eva na kAmAtmA eka eva na kopakam |
- eka eva na lobhAtmA eka eva na mohakaH || 24||
- eka eva mado nAhaM eka eva na me rasaH |
- eka eva na chittAtmA eka eva na chAnyakaH || 25||
- eka eva na sattAtmA eka eva jarAmaraH |
- eka eva hi pUrNAtmA eka eva hi nishchalaH || 26||
- eka eva mahAnanda eka evAhamekavAn |
- deho.ahamiti hIno.ahaM shAnto.ahamiti shAshvataH || 27||
- shivo.ahamiti shAnto.ahaM AtmaivAhamiti kramaH |
- jIvo.ahamiti shAnto.ahaM nityashuddhahRRidantaraH || 28||
- evaM bhAvaya niHsha~NkaM sadyo muktastvamadvaye |
- evamAdi sushabdaM vA nityaM paThatu nishchalaH || 29||
- kAlasvabhAvo niyataishcha bhUtaiH
- jagadvijAyeta iti shrutIritam |
- tadvai mRRiShA syAjjagato jaDatvataH
- ichChAbhavaM chaitadathesvarasya || 30||
- || iti shrIshivarahasye sha~NkarAkhye ShaShThAMshe RRibhunidAghasaMvAde AnandarUpatvanirUpaNaprakaraNaM nAma saptaviMsho.adhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com