RRibhugItA 24 || ahaMbrahma prakaraNa nirUpaNam ||

RRibhuH -

• punaH punaH paraM vakShye Atmano.anyadasat svataH |
• asato vachanaM nAsti sato nAsti sadA sthite || 1||
• brahmAbhyAsa parasyAhaM vakShye nirNayamAtmanaH |
• tasyApi sakRRidevAhaM vakShye ma~NgalapUrvakam || 2||
• sarvaM brahmAhamevAsmi chinmAtro nAsti ki~nchana |
• ahameva paraM brahma ahameva chidAtmakam || 3||
• ahaM mameti nAstyeva ahaM j~nAnIti nAsti cha |
• shuddho.ahaM brahmarUpo.ahamAnando.ahamajo naraH || 4||var was najaH
• devo.ahaM divyabhAno.ahaM turyo.ahaM bhavabhAvyaham |
• aNDajo.ahamasheSho.ahamantarAdantaro.asmyaham || 5||
• amaro.ahamajasro.ahamatyantaparamo.asmyaham |
• parAparasvarUpo.ahaM nityAnityaraso.asmyaham || 6||
• guNAguNavihIno.ahaM turyAturyaraso.asmyaham |
• shAntAshAntavihIno.ahaM j~nAnAj~nAnaraso.asmyaham || 7||
• kAlAkAlavihIno.ahamAtmAnAtmavivarjitaH |
• labdhAlabdhAdihIno.ahaM sarvashUnyo.ahamavyayaH || 8||
• ahamevAhamevAhamanantaranirantaram |
• shAshvato.ahamalakShyo.ahamAtmA na paripUrNataH || 9||
• ityAdishabdamukto.ahaM ityAdyaM cha na chAsmyaham |
• ityAdivAkyamukto.ahaM sarvavarjitadurjayaH || 10||
• nirantaro.ahaM bhUto.ahaM bhavyo.ahaM bhavavarjitaH |
• lakShyalakShaNahIno.ahaM kAryahIno.ahamAshugaH || 11||
• vyomAdirUpahIno.ahaM vyomarUpo.ahamachyutaH |
• antarAntarabhAvo.ahamantarAntaravarjitaH || 12||
• sarvasiddhAntarUpo.ahaM sarvadoShavivarjitaH |
• na kadAchana mukto.ahaM na baddho.ahaM kadAchana || 13||
• evameva sadA kRRitvA brahmaivAhamiti smara |
• etAvadeva mAtraM tu mukto bhavatu nishchayaH || 14||
• chinmAtro.ahaM shivo.ahaM vai shubhamAtramahaM sadA |
• sadAkAro.ahaM mukto.ahaM sadA vAchAmagocharaH || 15||
• sarvadA paripUrNo.ahaM vedopAdhivivarjitaH |
• chittakAryavihIno.ahaM chittamastIti me na hi || 16||
• yat ki~nchidapi nAstyeva nAstyeva priyabhAShaNam |
• AtmapriyamanAtmA hi idaM me vastuto na hi || 17||
• idaM duHkhamidaM saukhyamidaM bhAti ahaM na hi |
• sarvavarjitarUpo.ahaM sarvavarjitachetanaH || 18||
• anirvAchyamanirvAchyaM paraM brahma raso.asmyaham |
• ahaM brahma na sandeha ahameva parAt paraH || 19||
• ahaM chaitanyabhUtAtmA deho nAsti kadAchana |
• li~NgadehaM cha nAstyeva kAraNaM dehameva na || 20||
• ahaM tyaktvA paraM chAhaM ahaM brahmasvarUpataH |
• kAmAdivarjito.atItaH kAlabhedaparAtparaH || 21||
• brahmaivedaM na saMvedyaM nAhaM bhAvaM na vA nahi |
• sarvasaMshayasaMshAnto brahmaivAhamiti sthitiH || 22||
• nishchayaM cha na me ki~nchit chintAbhAvAt sadA.akSharaH |
• chidahaM chidahaM brahma chidahaM chidahaM sadA || 23||
• evaM bhAvanayA yuktastyaktasha~NkaH sukhIbhava |
• sarvasa~NgaM parityajya AtmaikyaivaM bhavAnvaham || 24||
• sa~NgaM nAma pravakShye.ahaM brahmAhamiti nishchayaH |
• satyo.ahaM paramAtmA.ahaM svayameva svayaM svayam || 25||
• nAhaM deho na cha prANo na dvandvo na cha nirmalaH |
• eSha eva hi satsa~NgaH eSha eva hi nirmalaH || 26||
• mahatsa~Nge mahadbrahmabhAvanaM paramaM padam |
• ahaM shAntaprabhAvo.ahaM ahaM brahma na saMshayaH || 27||
• ahaM tyaktasvarUpo.ahaM ahaM chintAdivarjitaH |
• eSha eva hi satsa~NgaH eSha nityaM bhavAnaham || 28||
• sarvasa~NkalpahIno.ahaM sarvavRRittivivarjitaH |
• amRRito.ahamajo nityaM mRRitibhItiratItikaH || 29||
• sarvakalyANarUpo.ahaM sarvadA priyarUpavAn |
• samalA~Ngo malAtItaH sarvadAhaM sadAnugaH || 30||
• aparichChinnasanmAtraM satyaj~nAnasvarUpavAn |
• nAdAntaro.ahaM nAdo.ahaM nAmarUpavivarjitaH || 31||
• atyantAbhinnahIno.ahamAdimadhyAntavarjitaH |
• evaM nityaM dRRiDhAbhyAsa evaM svAnubhavena cha || 32||
• evameva hi nityAtmabhAvanena sukhI bhava |
• evamAtmA sukhaM prAptaH punarjanma na saMbhavet || 33||
• sadyo mukto bhavedbrahmAkAreNa paritiShThati |
• AtmAkAramidaM vishvamAtmAkAramahaM mahat || 34||
• Atmaiva nAnyadbhUtaM vA Atmaiva mana eva hi |
• Atmaiva chittavadbhAti Atmaiva smRRitivat kvachit || 35||
• Atmaiva vRRittivadbhAti Atmaiva krodhavat sadA |var was vRRittimadbhAti
• Atmaiva shravaNaM tadvadAtmaiva mananaM cha tat || 36||
• AtmaivopakramaM nityamupasaMhAramAtmavat |
• AtmaivAbhyAM samaM nityamAtmaivApUrvatAphalam || 37||
• arthavAdavadAtmA hi paramAtmopapatti hi |
• ichChA prArabhyavadbrahma ichChAmArabhyavat paraH || 38||var was prArabdhavad
• parechChArabdhavadbrahmA ichChAshaktishchideva hi |
• anichChAshaktirAtmaiva parechChAshaktiravyayaH || 39||
• paramAtmaivAdhikAro viShayaM paramAtmanaH |
• saMbandhaM paramAtmaiva prayojanaM parAtmakam || 40||
• brahmaiva paramaM sa~NgaM karmajaM brahma sa~Ngamam |
• brahmaiva bhrAntijaM bhAti dvandvaM brahmaiva nAnyataH || 41||
• sarvaM brahmeti nishchitya sadya eva vimokShadam |
• savikalpasamAdhisthaM nirvikalpasamAdhi hi || 42||
• shabdAnuviddhaM brahmaiva brahma dRRishyAnuviddhakam |
• brahmaivAdisamAdhishcha tanmadhyamasamAdhikam || 43||
• brahmaiva nishchayaM shUnyaM taduktamasamAdhikam |
• dehAbhimAnarahitaM tadvairAgyasamAdhikam || 44||
• etadbhAvanayA shAntaM jIvanmuktasamAdhikaH |
• atyantaM sarvashAntatvaM deho muktasamAdhikam || 45||
• etadabhyAsinAM proktaM sarvaM chaitatsamanvitam |
• sarvaM vismRRitya vismRRitya tyaktvA tyaktvA punaH punaH || 46||
• sarvavRRittiM cha shUnyena sthAsyAmIti vimuchya hi |
• na sthAsyAmIti vismRRitya bhAsyAmIti cha vismara || 47||
• chaitanyo.ahamiti tyaktvA sanmAtro.ahamiti tyaja |
• tyajanaM cha parityajya bhAvanaM cha parityaja || 48||
• sarvaM tyaktvA manaH kShipraM smaraNaM cha parityaja |
• smaraNaM ki~nchidevAtra mahAsaMsArasAgaram || 49||
• smaraNaM ki~nchidevAtra mahAduHkhaM bhavet tadA |
• mahAdoShaM bhavaM bandhaM chittajanma shataM manaH || 50||
• prArabdhaM hRRidayagranthi brahmahatyAdi pAtakam |
• smaraNaM chaivameveha bandhamokShasya kAraNam || 51||
• ahaM brahmaprakaraNaM sarvaduHkhavinAshakam |
• sarvaprapa~nchashamanaM sadyo mokShapradaM sadA |
• etachChravaNamAtreNa brahmaiva bhavati svayam || 52||
• bhaktyA padmadalAkShapUjitapadadhyAnAnuvRRittyA manaH
• svAntAnantapathaprachAravidhuraM muktyai bhavenmAnasam |
• sa~NkalpojjhitametadalpasumahAshIlo dayAmbhonidhau
• kashchit syAchChivabhaktadhuryasumahAshAntaH shivapremataH || 53||

• || iti shrIshivarahasye sha~NkarAkhye ShaShThAMshe RRibhunidAghasaMvAde ahaM brahmaprakaraNanirUpaNaM nAma chaturviMsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com