RRibhugItA 50 || sudarshanasya muktilAbha varNanaM cha ||

skandaH -

• viShNustavAnte vipro.asau sudarshanasamAhvayaH |
• snAtvA.atha maNikarNyAM sa bhasmarudrAkShabhUShaNaH || 1||
• sa~njapan shatarudrIyaM pa~nchAkSharaparAyaNaH |
• saMpAdya bilvapatrANi kamalAnyamalAnyapi || 2||
• gandhAkShatairdhUpadIpairnaivedyairvividhairapi |
• viShNUpadiShTamArgeNa nityamantargRRihasya hi || 3||
• pradakShiNaM chakArAsau li~NgAnyabhyarchayaMstathA |
• vishveshvarAvimukteshau vIreshaM cha trilochanam || 4||
• kRRittivAsaM vRRiddhakAle kedAraM shUlaTa~Nkakam |
• ratneshaM bhArabhUteshaM chandreshaM siddhakeshvaram || 5||
• ghaNTAkarNeshvaraM chaiva nAradeshaM yameshvaram |
• pulastipulaheshaM cha vikarNeshaM phaleshvaram || 6||
• kadrudreshamakhaNDeshaM ketumAliM gabhastikam |
• yamuneshaM varNakeshaM bhadreshaM jyeShThasha~Nkaram || 7||
• nandikeshaM cha rAmeshaM karamardeshvaraM tathA |
• AvardeshaM mata~NgeshaM vAsukIshaM drutIshvaram || 8||
• sUryeshamaryameshaM cha tUNIshaM gAlaveshvaram |
• kaNvakAtyAyaneshaM cha chandrachUDeshvaraM tathA || 9||
• udAvarteshvaraM chaiva tRRiNajyotIshvaraM sadA |
• ka~NkaNeshaM ta~NkaNeshaM skandeshaM tArakeshvaram || 10||
• jambukeshaM cha j~nAneshaM nandIshaM gaNapeshvaram |
• etAnyantargRRihe vipraH pUjayan parayA mudA || 11||
• DhuNDhyAdigaNapAMshchaiva bhairavaM chApi nityashaH |
• annapUrNAmannadAtrIM sAkShAllokaikamAtaram || 12||
• daNDapANiM kShetrapAlaM samyagabhyarchya tasthivAn |
• tIrthAnyanyAnyapi munirmaNikarNyAdi sattama || 13||
• j~nAnodaM siddhakUpaM cha vRRiddhakUpaM pishAchakam |
• RRiNamochanatIrthaM cha gargatIrthaM mahattaram || 14||
• snAtvA saniyamaM vipro nityaM pa~nchanade hRRide |
• kiraNAM dhUtapApAM cha pa~nchaga~NgAmapi dvijaH || 15||
• ga~NgAM manoramAM tu~NgAM sarvapApapraNAshinIm |
• muktimaNTapamAsthAya sa japan shatarudriyam || 16||
• aShTottarasahasraM vai japan pa~nchAkSharaM dvijaH |
• pakShe pakShe tathA kurvan pa~nchakroshapradakShiNam || 17||
• antargRRihAdbahirdeshe chakArAvasathaM tadA |
• evaM saMvasatastasya kAlo bhUyAnavartata || 18||
• tatra dRRiShTvA taponiShThaM sudarshanasamAhvayam |
• viShNustadA vai taM vipraM samAhUya shivArchakam || 19||
• punaH prAha prasannena chetasA munisattamam |

viShNuH -

• bhoH sudarshanaviprendra shivArchanaparAyaNa |
• j~nAnapAtraM bhavAneva vishveshakRRipayA.adhunA || 20||
• tvayA tapAMsi taptAni iShTA yaj~nAstvayaiva hi |
• adhItAshcha tvayA vedAH kAshyAM vAso yatastava || 21||
• bahubhirjanmabhiryena kRRitaM kShetre mahattapaH |
• tasyaiva siddhyatyamalA kAshIyaM muktikAshikA || 22||
• tava bhAgyasya nAnto.asti mune tvaM bhAgyavAnasi |
• ki~nchaikaM tava vakShyAmi hitamAtyantikaM shRRiNu || 23||
• vishveshakRRipayA te.adya muktirante bhaviShyati |
• rudrAkShanAmapuNyaM yat nAmnAM sAhasramuttamam || 24||
• upadekShyAmi te vipra nAmasAhasramIshituH |
• tenArchayeshaM vishveshaM bilvapatrairmanoharaiH || 25||
• varShamekaM nirAhAro vishveshaM pUjayan sadA |
• saMvatsarAnte muktastvaM bhaviShyati na saMshayaH || 26||
• tvaddehApagame mantraM pa~nchAkSharamanuttamam |
• dadAti devo vishveshastena mukto bhaviShyati || 27||
• shaivebhyaH sannajIvebhyo dadAtImaM mahAmanum |

skandaH -

• iti viShNuvachaH shrutvA praNamyAha hariM tadA |
• sudarshano yayAchetthaM nAmnAM sAhasramuttamam || 28||
• bhagavan daityavRRindaghna viShNo jiShNo namo.astu te |
• sahasranAmnAM yaddivyaM vishveshasyAshu tadvada || 29||
• yena japtena deveshaH pUjito bilvapatrakaiH |
• dadAti mokShasAmrAjyaM dehAnte tadvadAshu me || 30||
• tadA vipravachaH shrutvA tasmai chopAdishat svayam |
• sahasranAmnAM devasya hiraNyasyetyAdi sattama || 31||
• tena saMpUjya vishveshaM varShamekamatandritaH |
• komalAraktabilvaishcha stotreNAnena tuShTuve || 32||

sudarshanaH -

• AshIviShA~NgaparimaNDalakaNThabhAga-
• rAjatsusAgarabhavograviShorushobha |
• phAlasphurajjvalanadIptividIpitAshA-
• shokAvakAsha tapanAkSha mRRigA~Nkamaule || 33||
• kruddhoDujAyApatidhRRitArdhasharIrashobha
• pAhyAshu shAsitamakhAndhakadakShashatro |
• sutrAmavajrakaradaNDavikhaNDitoru-
• pakShAdyaghakShitidharordhvashayAva shaMbho || 34||
• utphullahallakalasatkaravIramAlA-
• bhrAjatsukandharasharIra pinAkapANe |
• cha~nchatsuchandrakalikottamachArumauliM
• li~Nge kulu~nchapatimambikayA sametam || 35||
• ChAyAdhavAnujalasachChadanaiH paripUjya bhaktyA
• muktena svasya cha virAjitavaMshakoTyA |
• sAyaM sa~Ngavapu~NgavoruvahanaM shrItu~Ngali~NgArchakaH
• shA~NgaH pAtakasa~Ngabha~NgachaturashchAsa~NganityAntaraH || 36||
• phAlAkShasphuradakShijasphuradurusphUli~NgadagdhA~NgakA-
• na~Ngottu~Ngamata~NgakRRittivasanaM li~NgaM bhaje shA~Nkaram |
• achChAchChAgavahAM suratAmIkShAshinAnte vibho
• vRRiShyaM shA~NkaravAhanAmaniratAH somaM tathA vAjinam || 37||
• tyaktvA janmavinAshanaM tviti muhuste jihvayA sattamAH
• ye shaMbhoH sakRRideva nAmaniratAH shA~NgAH svataH pAvanAH || 38||
• mRRigA~Nka maulimIshvaraM mRRigendrashatrujatvacham |
• vasAnamindusaprabhaM mRRigAdyabAlasatkaram |
• bhaje mRRigendrasaprabhaM ..??... || 39||

skandaH -

• evaM stuvantaM vishveshaM sudarshanamatandritam |
• prAhetthaM shaurimAbhAShya shaMbhorbhaktivivardhanam || 40||

viShNuH -

• atraivAmaraNaM vipra vasa tvaM niyatAshanaH |
• nAmnAM sahasraM prajapan shatarudrIyameva cha || 41||
• antargRRihAt bahiH sthitvA pUjayAshu maheshvaram |
• tavAnte bhUrikaruNo mokShaM dAsyatyasaMshayam || 42||
• sa praNamyAha vishveshaM dRRiShTvA prAha sudarshanam |
• dhanyastvaM li~Nge.apyanudinagalitasvAntara~NgAghasa~NghaH
• puMsAM varyAdyabhaktyA yamaniyamavarairvishvavandyaM prabhAte |
• datvA bilvavaraM sadaMbujadalaM ki~nchijjalaM vA muhuH
• prApnotIshvarapAdapa~NkajamumAnAthAdya muktipradam || 43||
• ko vA tvatsadRRisho bhavedagapatipremaikali~NgArchako
• muktAnAM pravarordhvakeshavilasachChrIbhaktibIjA~NkuraiH |
• devA vApyasurAH surA munivarA bhArA bhuvaH kevalaM
• vIrA vA karavIrapuShpavilasanmAlAprade no samaH || 44||
• vane vA rAjye vApyagapatisutAnAyakamaho
• sphuralli~NgArchAyAM niyamamatabhAvena manasA |
• haraM bhaktyA sAdhya tribhuvanatRRiNADambaravara-
• prarUDhairbhAgyairvA na hi khalu sa sajjeta bhuvane || 45||
• na dAnairyogairvA vidhivihitavarNAshramabharaiH
• apArairvedAntaprativachanavAkyAnusaraNaiH |
• na manye.ahaM svAnte bhavabhajanabhAvena manasA
• muhurli~NgaM shA~NgaM bhajati paramAnandakuharaH || 46||
• sharvaM paravatanandinIpatimahAnandAmbudheH pAragA
• rAgatyAgahRRidA virAgaparamA bhasmA~NgarAgAdarAH |
• mArApArasharAbhighAtarahitA dhIrorudhArArasaiH
• pArAvAramahAghasaMsRRitibharaM tIrNAH shivAbhyarchanAt || 47||
• mArkaNDeyasutaM purA.antakabhayAdyo.arakShadIsho haraH
• tatpAdAmbujarAgara~njitamanA nApnoti kiM vA phalam |
• taM mRRityu~njayama~njasA praNamatAmojojimadhye jayaM
• jetArotaparAjayo janijarArogairvimuktiM labhet || 48||
• bhUtAyAM bhUtanAthaM tvaghamatitilakAkArabhillotthashalyaiH
• dhAvan bhallUkapRRiShThe nishi kila sumahadvyAghrabhItyA.aruroha |
• bilvaM nalvaprabhaM tachChadaghanamasakRRit pAtayAmAsa mUle
• nidrAtandrojjhito.asau mRRigagaNakalane mUlali~Nge.atha shA~Nge || 49||
• tenAbhUdbhagavAn gaNottamavaro muktAghasa~NghastadA
• chaNDAMshostanayena pUjitapadaH sArUpyamApeshituH |
• ga~NgAchandrakalAkapardavilasatphAlasphuli~Ngojjvalad
• vAlanya~NkukarAgrasaMgatamahAshUlAhi TaMkodyataH || 50||
• chaitre chitraiH pAtakairvipramukto vaishAkhe vai duHkhashAkhAvimuktaH |
• jyeShThe shreShTho bhavateShADhamAsi putraprAptiH shrAvaNe shrAntinAshaH || 51||
• bhAdre bhadro bhavate chAshvine vai ashvaprAptiH kArtike kIrtilAbhaH |
• mArge muktermArgametallabheta puShye puNyaM mAghake chAghanAshaH || 52||
• phalgu tvaMho phAlgune mAsi
• nashyedIshArchAto bilvapatraishchali~Nge |
• evaM tattanmAsi pUjyeshali~NgaM
• chitraiH pApairvipramukto dvijendraH || 53||
• dUrvA~NkurairabhinavaiH shashidhAmachUDa-
• li~NgArchanena parisheShayada~NkurANi |
• saMsAraghoratararUpakarANi sadyaH
• muktya~NkurANi parivardhayatIha dhanyaH || 54||
• gokShIrekShukShaudrakhaNDAjyadadhnA
• sannArelaiH pAnasAmrAdisAraiH |
• vishveshAnaM satsitAratnatoyaiH
• gandhodairvA si~nchya doShairvimuktaH || 55||
• li~NgaM chandanalepasa~NgatamumAkAntasya pashyanti ye
• te saMsArabhuja~Ngabha~NgapatanAna~NgA~Ngasa~NgojjhitAH |
• vya~NgaM sarvasamarchanaM bhagavataH sA~NgaM bhavechChA~NkaraM
• sha~NgApA~NgakRRipAkaTAkShalaharI tasmiMshchiraM tiShThati || 56||
• muralisaralirAgairmardalaistAlasha~NkhaiH
• paTupaTahaninAdadhvAntasandhAnaghoShaiH |
• dundubhyAghAtavAdairvarayuvatimahAnRRittasaMraMbhara~NgaiH
• darsheShvAdarshadarsho bhagavati girijAnAyake muktihetuH || 57||
• svachChachChatraChavInAM vividhajitamahAchChAyayA ChannamaishaM
• shIrShaM vichChinnapApo bhavati bhavaharaH pUjakaH shambhubhaktyA |
• cha~nchachchandrAbhakANDapravilasadamalasvarNaratnAgrabhAbhi-
• rdIpyachchAmarakoTibhiH sphuTapaTaghaTitaishchAkachakyaiH patAkaiH || 58||
• saMpashyAruNabhUruhottamashikhAsaMleDhitArAgaNaM
• tArAnAthakalAdharorusumahAli~NgaughasaMsevitam |
• bilvAnAM kulametadatra sumahApApaughasaMhArakRRit
• vArANAM nikhilapramodajanakaM shambhoH priyaM kevalam || 59||
• annaM potrimalAyate dhanarasaM kauleyamUtrAyate
• saMvesho nigalAyate mama sadAnando kandAyate |
• shambho te smaraNAntarAyabharita prANaH kRRipANAyate || 60||
• kaH kalpadrumupekShya chittaphaladaM tUlAdidAnakShayaM
• babbUlaM parisevate kShudadhiko vAtUladAnakShamam |
• tadvachCha~Nkaraki~Nkaro vidhiharibrahmendrachandrAnalAn
• sevedyo vidhiva~nchitaH kalibalaprAchuryato mUDhadhIH || 61||
• suvarNANDodbhUtastutigatisamarchyANDajavara-
• prapAdaM tvAM kashchid bhajati bhuvane bhaktiparamaH |
• mahAchaNDoddaNDaprakaTitabhuvaM tANDavaparaM
• vibhuM santaM nityaM bhaja bhagaNanAthAmalajaTam || 62||
• ajagavakara viShNubANa shambho
• duritaharAntakanAsha pAhi mAmanAtham |
• bhavadabhayapadAbjavaryameta
• mama chittasarastaTAnnayAtu chAdya || 63||
• itthaM viShNushcha kAshyAM pramathapatimagAt pUjya vishveshvaraM taM
• kShitisuravaravaryaM chAnushAsyetthamiShTam |
• sa cha munigaNamadhye prApya muktiM tathAnte
• pramathapatipadAb{}je lInahInA~Ngasa~NgaH || 64||

sUtaH -

• itthaM shrutvA munIndro.asau jaigIShavyo.avadadvibhum |
• praNipatya prahRRiShTAtmA ShaShThAMshaM vai ShaDAsyataH || 65||

jaigIShavyaH -

• mAramArakajAnandavasatermahimA katham |
• nAmnAM sahasrametachcha vada me karuNAnidhe || 66||
• kShetrANAM chApyathAnyAnAM mahimAM vada sadguro |
• shUratArakasaMhartastvatto nAnyo gururmama || 67||
• tachChrutvA tu munervAkyaM skandaH prAhAtha taM munim |

skandaH -

• AgAminyaMshake.asmiMstava hRRidayamahAnandasindhau vidhUttha-
• prAchuryaprakaTaiH karopamamahAsaptamAMshe visheShe |
• nAmnAM chApi sahasrakaM bhagavataH shambhoH priyaM kevalaM
• asyAnandavanasya chaiva mahimA tvaM vai shRRiNuShvAdarAt || 68||
• ugroM.ashaH shashishekhareNa kathito vedAntasArAtmakaH
• ShaShThaH ShaNmukhasattamAya sa dadau tadbrahmaNe so.apyadAt |
• putrAyAtmabhavAya tadbhavaharaM shrutvA bhaved j~nAnavit
• choktvA janmashatAyutArjitamahApApairvimukto bhavet || 69||
• shrutvAMshametad bhavatApapApahaM shivAspadaj~nAnadamuttamaM mahat |
• dhyAnena vij~nAnadamAtmadarshanaM dadAti shambhoH padabhaktibhAvataH || 70||

sUtaH -

• adhyAyapAdAdhyayane.api vidyA buddhyA hRRidi dhyAyati bandhamuktyai |
• svAdhyAyatAntAya shamAnvitAya dadyAdyadadyAnna vibhedyametat || 71||
• itthaM sUtavachodyatamahAnandaikamodaprabhA
• bhAsvadbhAskarasaprabhA munivarAH saMtuShTuvustaM tadA |
• vedodyadvachanAshiShA prahRRiShitAH sUtaM jayetyuchcharan
• pyAho jagmuratIva harShitahRRidA vishveshvaraM vIkShitum || 72||
• || sha~NkarAkhyaH ShaShThAMshaH samAptaH||
• || sarvaM shrIramaNArpaNamastu ||

• || iti shrIshivarahasye sha~NkarAkhye ShaShThAMshe sudarshanasya muktilAbhavarNanaM aMshashravaNaphalanirUpaNaM cha nAma pa~nchAsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com