RRibhugItA 35 || brahma-bhAvanopadesha prakaraNam ||
RRibhuH -
- nidAgha shRRiNu guhyaM me sadyo muktipradaM nRRiNAm |
- Atmaiva nAnyadevedaM paramAtmAhamakShataH || 1||
- ahameva paraM brahma sachchidAnandavigrahaH |
- ahamasmi mahAnasmi shivo.asmi paramo.asmyaham || 2||
- adRRishyaM paramaM brahma nAnyadasti svabhAvataH |
- sarvaM nAstyeva nAstyeva ahaM brahmaiva kevalam || 3||
- shAntaM brahma paraM chAsmi sarvadA nityanirmalaH |
- sarvaM nAstyeva nAstyeva ahaM brahmaiva kevalam || 4||
- sarvasa~Nkalpamukto.asmi sarvasantoShavarjitaH |
- kAlakarmajagaddvaitadraShTRRidarshanavigrahaH || 5||
- Anando.asmi sadAnandakevalo jagatAM priyam |
- samarUpo.asmi nityo.asmi bhUtabhavyamajo jayaH || 6||
- chinmAtro.asmi sadA bhukto jIvo bandho na vidyate |var was muktaH
- shravaNaM ShaDvidhaM li~NgaM naivAsti jagadIdRRisham || 7||
- chittasaMsArahIno.asmi chinmAtratvaM jagat sadA |
- chittameva hitaM deha avichAraH paro ripuH || 8||
- avichAro jagadduHkhamavichAro mahadbhayam |
- sadyo.asmi sarvadA tRRiptaH paripUrNaH paro mahAn || 9||
- nityashuddho.asmi buddho.asmi chidAkAsho.asmi chetanaH |
- Atmaiva nAnyadevedaM paramAtmA.ahamakShataH || 10||
- sarvadoShavihIno.asmi sarvatra vitato.asmyaham |
- vAchAtItasvarUpo.asmi paramAtmA.ahamakShataH || 11||
- chitrAtItaM paraM dvandvaM santoShaH samabhAvanam |
- antarbahiranAdyantaM sarvabhedavinirNayam || 12||
- ahaMkAraM balaM sarvaM kAmaM krodhaM parigraham |
- brahmendroviShNurvaruNo bhAvAbhAvavinishchayaH || 13||
- jIvasattA jagatsattA mAyAsattA na ki~nchana |
- gurushiShyAdibhedaM cha kAryAkAryavinishchayaH || 14||
- tvaM brahmAsIti vaktA cha ahaM brahmAsmi saMbhavaH |
- sarvavedAntavij~nAnaM sarvAmnAyavichAraNam || 15||
- idaM padArthasadbhAvamahaM rUpeNa saMbhavam |
- vedavedAntasiddhAntajagadbhedaM na vidyate || 16||
- sarvaM brahma na sandehaH sarvamityeva nAsti hi |
- kevalaM brahmashAntAtmA ahameva nirantaram || 17||
- shubhAshubhavibhedaM cha doShAdoShaM cha me na hi |
- chittasattA jagatsattA buddhivRRittivijRRimbhaNam || 18||
- brahmaiva sarvadA nAnyat satyaM satyaM nijaM padam |
- AtmAkAramidaM dvaitaM mithyaiva na paraH pumAn || 19||
- sachchidAnandamAtro.ahaM sarvaM kevalamavyayam |
- brahmA viShNushcha rudrashcha Ishvarashcha sadAshivaH || 20||
- mano jagadahaM bhedaM chittavRRittijagadbhayam |
- sarvAnandamahAnandamAtmAnandamanantakam || 21||
- atyantasvalpamalpaM vA prapa~nchaM nAsti ki~nchana |
- prapa~nchamiti shabdo vA smaraNaM vA na vidyate || 22||
- antarasthaprapa~nchaM vA kvachinnAsti kvachidbahiH |
- yat ki~nchidevaM tUShNIM vA yachcha ki~nchit sadA kva vA || 23||
- yena kena yadA ki~nchidyasya kasya na ki~nchana |
- shuddhaM malinarUpaM vA brahmavAkyamabodhakam || 24||
- IdRRiShaM tAdRRiShaM veti na ki~nchit vaktumarhati |
- brahmaiva sarvaM satataM brahmaiva sakalaM manaH || 25||
- AnandaM paramAnadaM nityAnandaM sadA.advayam |
- chinmAtrameva satataM nAsti nAsti paro.asmyaham || 26||
- prapa~nchaM sarvadA nAsti prapa~nchaM chitrameva cha |
- chittameva hi saMsAraM nAnyat saMsArameva hi || 27||
- mana eva hi saMsAro deho.ahamiti rUpakam |
- sa~Nkalpameva saMsAraM tannAshe.asau vinashyati || 28||
- sa~Nkalpameva jananaM tannAshe.asau vinashyati |
- sa~Nkalpameva dAridryaM tannAshe.asau vinashyati || 29||
- sa~Nkalpameva mananaM tannAshe.asau vinashyati |
- Atmaiva nAnyadevedaM paramAtmA.ahamakShataH || 30||
- nityamAtmamayaM bodhamahameva sadA mahAn |
- Atmaiva nAnyadevedaM paramAtmA.ahamakShataH || 31||
- ityevaM bhAvayennityaM kShipraM mukto bhaviShyati |
- tvameva brahmarUpo.asi tvameva brahmavigrahaH || 32||
- evaM cha paramAnandaM dhyAtvA dhyAtvA sukhIbhava |
- sukhamAtraM jagat sarvaM priyamAtraM prapa~nchakam || 33||
- jaDamAtramayaM lokaM brahmamAtramayaM sadA |
- brahmaiva nAnyadevedaM paramAtmA.ahamavyayaH || 34||
- eka eva sadA eSha eka eva nirantaram |
- eka eva paraM brahma eka eva chidavyayaH || 35||
- eka eva guNAtIta eka eva sukhAvahaH |
- eka eva mahAnAtmA eka eva nirantaram || 36||
- eka eva chidAkAra eka evAtmanirNayaH |
- brahmaiva nAnyadevedaM paramAtmA.ahamakShataH || 37||
- paramAtmAhamanyanna paramAnandamandiram |
- ityevaM bhAvayannityaM sadA chinmaya eva hi || 38||
sUtaH -
- viri~nchiva~nchanAtataprapa~nchapa~nchabANabhit
- sukA~nchanAdridhAriNaM kulu~nchanAM patiM bhaje |
- aki~nchane.api si~nchake jalena li~Ngamastake
- vimu~nchati kShaNAdaghaM na ki~nchidatra shiShyate || 39||
- || iti shrIshivarahasye sha~NkarAkhye ShaShThAMshe RRibhunidAghasaMvAde brahmabhAvanopadeshaprakaraNaM nAma pa~nchatriMsho.adhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com