RRibhugItA 26 || j~nAnAmRRita-manomaya-prakaraNa varNanam ||

RRibhuH -

• vakShye sachchitparAnandaM svabhAvaM sarvadA sukham |
• sarvavedapurANAnAM sArAt sArataraM svayam || 1||
• na bhedaM cha dvayaM dvandvaM na bhedaM bhedavarjitam |
• idameva paraM brahma j~nAnAshrayamanAmayam || 2||
• na kvachinnAta evAhaM nAkSharaM na parAtparam |
• idameva paraM brahma j~nAnAshrayamanAmayam || 3||
• na bahirnAntaraM nAhaM na sa~Nkalpo na vigrahaH |
• idameva paraM brahma j~nAnAshrayamanAmayam || 4||
• na satyaM cha parityajya na vArtA nArthadUShaNam |
• idameva paraM brahma j~nAnAshrayamanAmayam || 5||
• na guNo guNivAkyaM vA na manovRRittinishchayaH |
• na japaM na parichChinnaM na vyApakamasat phalam || 6||
• na gururna cha shiShyo vA na sthiraM na shubhAshubham |
• naikarUpaM nAnyarUpaM na mokSho na cha bandhakam || 7||
• ahaM padArthastatpadaM vA nendriyaM viShayAdikam |
• na saMshayaM na tuchChaM vA na nishchayaM na vA kRRitam || 8||
• na shAntirUpamadvaitaM na chordhvaM na cha nIchakam |
• na lakShaNaM na duHkhA~NgaM na sukhaM na cha cha~nchalam || 9||
• na sharIraM na li~NgaM vA na kAraNamakAraNam |
• na duHkhaM nAntikaM nAhaM na gUDhaM na paraM padam || 10||
• na sa~nchitaM cha nAgAmi na satyaM cha tvamAhakam |
• nAj~nAnaM na cha vij~nAnaM na mUDho na cha vij~navAn || 11||
• na nIchaM narakaM nAntaM na muktirna cha pAvanam |
• na tRRiShNA na cha vidyAtvaM nAhaM tattvaM na devatA || 12||
• na shubhAshubhasa~Nketo na mRRityurna cha jIvanam |
• na tRRiptirna cha bhojyaM vA na khaNDaikaraso.advayam || 13||
• na sa~NkalpaM na prapa~nchaM na jAgaraNarAjakam |
• na ki~nchitsamatAdoSho na turyagaNanA bhramaH || 14||
• na sarvaM samalaM neShTaM na nItirna cha pUjanam |
• na prapa~nchaM na bahunA nAnyabhAShaNasa~NgamaH || 15||
• na satsa~Ngamasatsa~NgaH na brahma na vichAraNam |
• nAbhyAsaM na cha vaktA cha na snAnaM na cha tIrthakam || 16||
• na puNyaM na cha vA pApaM na kriyA doShakAraNam |
• na chAdhyAtmaM nAdhibhUtaM na daivatamasambhavam || 17||
• na janmamaraNe kvApi jAgratsvapnasuShuptikam |
• na bhUlokaM na pAtAlaM na jayApajayAjayau || 18||
• na hInaM na cha vA bhItirna ratirna mRRitistvarA |
• achintyaM nAparAdhyAtmA nigamAgamavibhramaH || 19||
• na sAttvikaM rAjasaM cha na tAmasaguNAdhikam |
• na shaivaM na cha vedAntaM na svAdyaM tanna mAnasam || 20||
• na bandho na cha mokSho vA na vAkyaM aikyalakShaNam |
• na strIrUpaM na puMbhAvaH na ShaNDo na sthiraH padam || 21||
• na bhUShaNaM na dUShaNaM na stotraM na stutirna hi |
• na laukikaM vaidikaM na shAstraM na cha shAsanam || 22||
• na pAnaM na kRRishaM nedaM na modaM na madAmadam |
• na bhAvanamabhAvo vA na kulaM nAmarUpakam || 23||
• notkRRiShTaM cha nikRRiShTaM cha na shreyo.ashreya eva hi |
• nirmalatvaM malotsargo na jIvo na manodamaH || 24||
• na shAntikalanA nAgaM na shAntirna shamo damaH |
• na krIDA na cha bhAvA~NgaM na vikAraM na doShakam || 25||
• na yatki~nchinna yatrAhaM na mAyAkhyA na mAyikA |
• yatki~nchinna cha dharmAdi na dharmaparipIDanam || 26||
• na yauvanaM na bAlyaM vA na jarAmaraNAdikam |
• na bandhurna cha vA.abandhurna mitraM na cha sodaraH || 27||
• nApi sarvaM na chAki~nchinna viri~ncho na keshavaH |
• na shivo nAShTadikpAlo na vishvo na cha taijasaH || 28||
• na prAj~no hi na turyo vA na brahmakShatraviDvaraH |
• idameva paraM brahma j~nAnAmRRitamanAmayam || 29||
• na punarbhAvi pashchAdvA na punarbhavasaMbhavaH |
• na kAlakalanA nAhaM na saMbhAShaNakAraNam || 30||
• na chordhvamantaHkaraNaM na cha chinmAtrabhAShaNam |
• na brahmAhamiti dvaitaM na chinmAtramiti dvayam || 31||
• nAnnakoshaM na cha prANamanomayamakoshakam |
• na vij~nAnamayaH koshaH na chAnandamayaH pRRithak || 32||
• na bodharUpaM bodhyaM vA bodhakaM nAtra yadbhramaH |
• na bAdhyaM bAdhakaM mithyA tripuTIj~nAnanirNayaH || 33||
• na pramAtA pramANaM vA na prameyaM phalodayam |
• idameva paraM brahma j~nAnAmRRitamanomayam || 34||
• na guhyaM na prakAshaM vA na mahatvaM na chANutA |
• na prapa~ncho vidyamAnaM na prapa~nchaH kadAchana || 35||
• nAntaHkaraNasaMsAro na mano jagatAM bhramaH |
• na chittarUpasaMsAro buddhipUrvaM prapa~nchakam || 36||
• na jIvarUpasaMsAro vAsanArUpasaMsRRitiH |
• na li~NgabhedasaMsAro nAj~nAnamayasaMsmRRitiH || 37||var was saMsRRitiH
• na vedarUpasaMsAro na shAstrAgamasaMsRRitiH |
• nAnyadastIti saMsAramanyadastIti bhedakam || 38||
• na bhedAbhedakalanaM na doShAdoShakalpanam |
• na shAntAshAntasaMsAraM na guNAguNasaMsRRitiH || 39||
• na strIli~NgaM na puMli~NgaM na napuMsakasaMsRRitiH |
• na sthAvaraM na ja~NgamaM cha na duHkhaM na sukhaM kvachit || 40||
• na shiShTAshiShTarUpaM vA na yogyAyogyanishchayaH |
• na dvaitavRRittirUpaM vA sAkShivRRittitvalakShaNam || 41||
• akhaNDAkAravRRittitvamakhaNDaikarasaM sukham |
• deho.ahamiti yA vRRittirbrahmAhamiti shabdakam || 42||
• akhaNDanishchayA vRRittirnAkhaNDaikarasaM mahat |
• na sarvavRRittibhavanaM sarvavRRittivinAshakam || 43||
• sarvavRRittyanusandhAnaM sarvavRRittivimochanam |
• sarvavRRittivinAshAntaM sarvavRRittivishUnyakam || 44||
• na sarvavRRittisAhasraM kShaNakShaNavinAshanam |
• na sarvavRRittisAkShitvaM na cha brahmAtmabhAvanam || 45||
• na jaganna mano nAnto na kAryakalanaM kvachit |
• na dUShaNaM bhUShaNaM vA na nira~NkushalakShaNam || 46||
• na cha dharmAtmano li~NgaM guNashAlitvalakShaNam |
• na samAdhikali~NgaM vA na prArabdhaM prabandhakam || 47||
• brahmavittaM Atmasatyo na paraH svapnalakShaNam |
• na cha varyaparo rodho variShTho nArthatatparaH || 48||
• Atmaj~nAnavihIno yo mahApAtakireva saH |
• etAvad j~nAnahIno yo mahArogI sa eva hi || 49||
• ahaM brahma na sandeha akhaNDaikarasAtmakaH |
• brahmaiva sarvameveti nishchayAnubhavAtmakaH || 50||
• sadyo mukto na sandehaH sadyaH praj~nAnavigrahaH |
• sa eva j~nAnavAn loke sa eva parameshvaraH || 51||
• idameva paraM brahma j~nAnAmRRitamanomayam |
• etatprakaraNaM yastu shRRiNute brahma eva saH || 52||
• ekatvaM na bahutvamapyaNumahat kAryaM na vai kAraNaM
• vishvaM vishvapatitvamapyarasakaM no gandharUpaM sadA |
• baddhaM muktamanuttamottamamahAnandaikamodaM sadA
• bhUmAnandasadAshivaM janijarArogAdyasa~NgaM mahaH || 53||

• || iti shrIshivarahasye sha~NkarAkhye ShaShThAMshe RRibhunidAghasaMvAde j~nAnAmRRitamanomayaprakaraNavarNanaM nAma ShaDviMsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com