RRibhugItA 29 || tanmaya-bhAvopadesha prakaraNam ||

RRibhuH -

• atyantaM tanmayaM vakShye durlabhaM yoginAmapi |
• vedashAstreShu deveShu rahasyamatidurlabham || 1||
• yaH paraM brahma sarvAtmA sachchidAnandavigrahaH |
• sarvAtmA paramAtmA hi tanmayo bhava sarvadA || 2||
• AtmarUpamidaM sarvamAdyantarahito.ajayaH |
• kAryAkAryamidaM nAsti tanmayo bhava sarvadA || 3||
• yatra dvaitabhayaM nAsti yatrAdvaitaprabodhanam |
• shAntAshAntadvayaM nAsti tanmayo bhava sarvadA || 4||
• yatra sa~NkalpakaM nAsti yatra bhrAntirna vidyate |
• tadeva hi matirnAsti tanmayo bhava sarvadA || 5||
• yatra brahmaNi nAstyeva yatra bhAvi vikalpanam |
• yatra sarvaM jagannAsti tanmayo bhava sarvadA || 6||
• yatra bhAvamabhAvaM vA manobhrAnti vikalpanam |
• yatra bhrAnterna vArtA vA tanmayo bhava sarvadA || 7||
• yatra nAsti sukhaM nAsti deho.ahamiti rUpakam |
• sarvasa~NkalpanirmuktaM tanmayo bhava sarvadA || 8||
• yatra brahma vinA bhAvo yatra doSho na vidyate |
• yatra dvandvabhayaM nAsti tanmayo bhava sarvadA || 9||
• yatra vAkkAyakAryaM vA yatra kalpo layaM gataH |
• yatra prapa~nchaM notpannaM tanmayo bhava sarvadA || 10||
• yatra mAyA prakAsho na mAyA kAryaM na ki~nchana |
• yatra dRRishyamadRRishyaM vA tanmayo bhava sarvadA || 11||
• vidvAn vidyApi nAstyeva yatra pakShavipakShakau |
• na yatra doShAdoShau vA tanmayo bhava sarvadA || 12||
• yatra viShNutvabhedo na yatra brahmA na vidyate |
• yatra sha~Nkarabhedo na tanmayo bhava sarvadA || 13||
• na yatra sadasadbhedo na yatra kalanApadam |
• na yatra jIvakalanA tanmayo bhava sarvadA || 14||
• na yatra sha~NkaradhyAnaM na yatra paramaM padam |
• na yatra kalanAkAraM tanmayo bhava sarvadA || 15||
• na yatrANurmahattvaM cha yatra santoShakalpanam |
• yatra prapa~nchamAbhAsaM tanmayo bhava sarvadA || 16||
• na yatra dehakalanaM na yatra hi kutUhalam |
• na yatra chittakalanaM tanmayo bhava sarvadA || 17||
• na yatra buddhivij~nAnaM na yatrAtmA manomayaH |
• na yatra kAmakalanaM tanmayo bhava sarvadA || 18||
• na yatra mokShavishrAntiryatra bandhatvavigrahaH |
• na yatra shAshvataM j~nAnaM tanmayo bhava sarvadA || 19||
• na yatra kAlakalanaM yatra duHkhatvabhAvanam |
• na yatra dehakalanaM tanmayo bhava sarvadA || 20||
• na yatra jIvavairAgyaM yatra shAstravikalpanam |
• yatrAhamahamAtmatvaM tanmayo bhava sarvadA || 21||
• na yatra jIvanmuktirvA yatra dehavimochanam |
• yatra sa~NkalpitaM kAryaM tanmayo bhava sarvadA || 22||
• na yatra bhUtakalanaM yatrAnyatvaprabhAvanam |
• na yatra jIvabhedo vA tanmayo bhava sarvadA || 23||
• yatrAnandapadaM brahma yatrAnandapadaM sukham |
• yatrAnandaguNaM nityaM tanmayo bhava sarvadA || 24||
• na yatra vastuprabhavaM na yatrApajayojayaH |
• na yatra vAkyakathanaM tanmayo bhava sarvadA || 25||
• na yatrAtmavichArA~NgaM na yatra shravaNAkulam |
• na yatra cha mahAnandaM tanmayo bhava sarvadA || 26||
• na yatra hi sajAtIyaM vijAtIyaM na yatra hi |
• na yatra svagataM bhedaM tanmayo bhava sarvadA || 27||
• na yatra narako ghoro na yatra svargasaMpadaH |
• na yatra brahmaloko vA tanmayo bhava sarvadA || 28||
• na yatra viShNusAyujyaM yatra kailAsaparvataH |
• brahmANDamaNDalaM yatra tanmayo bhava sarvadA || 29||
• na yatra bhUShaNaM yatra dUShaNaM vA na vidyate |
• na yatra samatA doShaM tanmayo bhava sarvadA || 30||
• na yatra manasA bhAvo na yatra savikalpanam |
• na yatrAnubhavaM duHkhaM tanmayo bhava sarvadA || 31||
• yatra pApabhayaM nAsti pa~nchapApAdapi kvachit |
• na yatra sa~NgadoShaM vA tanmayo bhava sarvadA || 32||
• yatra tApatrayaM nAsti yatra jIvatrayaM kvachit |
• yatra vishvavikalpAkhyaM tanmayo bhava sarvadA || 33||
• na yatra bodhamutpannaM na yatra jagatAM bhramaH |
• na yatra karaNAkAraM tanmayo bhava sarvadA || 34||
• na yatra hi mano rAjyaM yatraiva paramaM sukham |
• yatra vai shAshvataM sthAnaM tanmayo bhava sarvadA || 35||
• yatra vai kAraNaM shAntaM yatraiva sakalaM sukham |
• yadgatvA na nivartante tanmayo bhava sarvadA || 36||
• yad j~nAtvA muchyate sarvaM yad j~nAtvA.anyanna vidyate |
• yad j~nAtvA nAnyavij~nAnaM tanmayo bhava sarvadA || 37||
• yatraiva doShaM notpannaM yatraiva sthAnanishchalaH |
• yatraiva jIvasa~NghAtaH tanmayo bhava sarvadA || 38||
• yatraiva nityatRRiptAtmA yatraivAnandanishchalam |
• yatraiva nishchalaM shAntaM tanmayo bhava sarvadA || 39||
• yatraiva sarvasaukhyaM vA yatraiva sannirUpaNam |
• yatraiva nishchayAkAraM tanmayo bhava sarvadA || 40||
• na yatrAhaM na yatra tvaM na yatra tvaM svayaM svayam |
• yatraiva nishchayaM shAntaM tanmayo bhava sarvadA || 41||
• yatraiva modate nityaM yatraiva sukhamedhate |
• yatra duHkhabhayaM nAsti tanmayo bhava sarvadA || 42||
• yatraiva chinmayAkAraM yatraivAnandasAgaraH |
• yatraiva paramaM sAkShAt tanmayo bhava sarvadA || 43||
• yatraiva svayamevAtra svayameva tadeva hi |
• svasvAtmanoktabhedo.asti tanmayo bhava sarvadA || 44||
• yatraiva paramAnandaM svayameva sukhaM param |
• yatraivAbhedakalanaM tanmayo bhava sarvadA || 45||
• na yatra chANumAtraM vA na yatra manaso malam |
• na yatra cha dadAmyeva tanmayo bhava sarvadA || 46||
• yatra chittaM mRRitaM dehaM mano maraNamAtmanaH |
• yatra smRRitirlayaM yAti tanmayo bhava sarvadA || 47||
• yatraivAhaM mRRito nUnaM yatra kAmo layaM gataH |
• yatraiva paramAnandaM tanmayo bhava sarvadA || 48||
• yatra devAstrayo lInaM yatra dehAdayo mRRitAH |
• na yatra vyavahAro.asti tanmayo bhava sarvadA || 49||
• yatra magno nirAyAso yatra magno na pashyati |
• yatra magno na janmAdistanmayo bhava sarvadA || 50||
• yatra magno na chAbhAti yatra jAgranna vidyate |
• yatraiva mohamaraNaM tanmayo bhava sarvadA || 51||
• yatraiva kAlamaraNaM yatra yogo layaM gataH |
• yatra satsa~NgatirnaShTA tanmayo bhava sarvadA || 52||
• yatraiva brahmaNo rUpaM yatraivAnandamAtrakam |
• yatraiva paramAnandaM tanmayo bhava sarvadA || 53||
• yatra vishvaM kvachinnAsti yatra nAsti tato jagat |
• yatrAntaHkaraNaM nAsti tanmayo bhava sarvadA || 54||
• yatraiva sukhamAtraM cha yatraivAnandamAtrakam |
• yatraiva paramAnandaM tanmayo bhava sarvadA || 55||
• yatra sanmAtrachaitanyaM yatra chinmAtramAtrakam |
• yatrAnandamayaM bhAti tanmayo bhava sarvadA || 56||
• yatra sAkShAt paraM brahma yatra sAkShAt svayaM param |
• yatra shAntaM paraM lakShyaM tanmayo bhava sarvadA || 57||
• yatra sAkShAdakhaNDArthaM yatra sAkShAt parAyaNam |
• yatra nAshAdikaM nAsti tanmayo bhava sarvadA || 58||
• yatra sAkShAt svayaM mAtraM yatra sAkShAtsvayaM jayam |
• yatra sAkShAnmahAnAtmA tanmayo bhava sarvadA || 59||
• yatra sAkShAt paraM tattvaM yatra sAkShAt svayaM mahat |
• yatra sAkShAttu vij~nAnaM tanmayo bhava sarvadA || 60||
• yatra sAkShAdguNAtItaM yatra sAkShAddhi nirmalam |
• yatra sAkShAt sadAshuddhaM tanmayo bhava sarvadA || 61||
• yatra sAkShAnmahAnAtmA yatra sAkShAt sukhAt sukham |
• yatraiva j~nAnavij~nAnaM tanmayo bhava sarvadA || 62||
• yatraiva hi svayaM jyotiryatraiva svayamadvayam |
• yatraiva paramAnandaM tanmayo bhava sarvadA || 63||
• evaM tanmayabhAvoktaM evaM nityashanityashaH |
• brahmAhaM sachchidAnandaM akhaNDo.ahaM sadA sukham || 64||
• vij~nAnaM brahmamAtro.ahaM sa shAntaM paramo.asmyaham |
• chidahaM chittahIno.ahaM nAhaM so.ahaM bhavAmyaham || 65||
• tadahaM chidahaM so.ahaM nirmalo.ahamahaM param |
• paro.ahaM paramo.ahaM vai sarvaM tyajya sukhIbhava || 66||
• idaM sarvaM chittasheShaM shuddhatvakamalIkRRitam |
• evaM sarvaM parityajya vismRRitvA shuddhakAShThavat || 67||
• pretavaddehaM saMtyajya kAShThavalloShThavat sadA |
• smaraNaM cha parityajya brahmamAtraparo bhava || 68||
• etat prakaraNaM yastu shRRiNoti sakRRidasti vA |
• mahApAtakayukto.api sarvaM tyaktvA paraM gataH || 69||
• a~NgAvabaddhAbhirupAsanAbhi-
• rvadanti vedAH kila tvAmasa~Ngam |
• samastahRRitkoshavisheShasa~NgaM
• bhUmAnamAtmAnamakhaNDarUpam || 70||

• || iti shrIshivarahasye sha~NkarAkhye ShaShThAMshe RRibhunidAghasaMvAde tanmayabhAvopadeshaprakaraNaM nAma ekonatriMsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com