RRibhugItA 30 || brahmaika-rUpatva nirUpaNa prakaraNam ||

RRibhuH -

• vakShye paraM brahmamAtraM jagatsantyAgapUrvakam |
• sakRRichChravaNamAtreNa brahmabhAvaM paraM labhet || 1||
• brahma brahmaparaM mAtraM nirguNaM nityanirmalam |
• shAshvataM samamatyantaM brahmaNo.anyanna vidyate || 2||
• ahaM satyaH parAnandaH shuddho nityo nira~njanaH |
• sarvaM brahma na sandehastadbrahmAhaM na saMshayaH || 3||
• akhaNDaikarasaivAsmi paripUrNo.asmi sarvadA |
• brahmaiva sarvaM nAnyo.asti sarvaM brahma na saMshayaH || 4||
• sarvadA kevalAtmAhaM sarvaM brahmeti nityashaH |
• AnandarUpamevAhaM nAnyat ki~nchinna shAshvatam || 5||
• shuddhAnandasvarUpo.ahaM shuddhavij~nAnamAtmanaH |
• ekAkArasvarUpo.ahaM naikasattAvivarjitaH || 6||
• antaraj~nAnashuddho.ahamahameva parAyaNam |
• sarvaM brahma na sandehastadbrahmAhaM na saMshayaH || 7||
• anekatattvahIno.ahaM ekatvaM cha na vidyate |
• sarvaM brahma na sandehastadbrahmAhaM na saMshayaH || 8||
• sarvaprakArarUpo.asmi sarvaM ityapi varjitaH |
• sarvaM brahma na sandehastadbrahmAhaM na saMshayaH || 9||
• nirmalaj~nAnarUpo.ahamahameva na vidyate |
• shuddhabrahmasvarUpo.ahaM vishuddhapadavarjitaH || 10||
• nityAnandasvarUpo.ahaM j~nAnAnandamahaM sadA |
• sUkShmAt sUkShmataro.ahaM vai sUkShma ityAdivarjitaH || 11||
• akhaNDAnandamAtro.ahaM akhaNDAnandavigrahaH |
• sadA.amRRitasvarUpo.ahaM sadA kaivalyavigrahaH || 12||
• brahmAnandamidaM sarvaM nAsti nAsti kadAchana |
• jIvatvadharmahIno.ahamIshvaratvavivarjitaH || 13||
• vedashAstrasvarUpo.ahaM shAstrasmaraNakAraNam |
• jagatkAraNakAryaM cha brahmaviShNumaheshvarAH || 14||
• vAchyavAchakabhedaM cha sthUlasUkShmasharIrakam |
• jAgratsvapnasuShuptAdyaprAj~nataijasavishvakAH || 15||
• sarvashAstrasvarUpo.ahaM sarvAnandamahaM sadA |
• atItanAmarUpArtha atItaH sarvakalpanAt || 16||
• dvaitAdvaitaM sukhaM duHkhaM lAbhAlAbhau jayAjayau |
• sarvaM brahma na sandehastadbrahmAhaM na saMshayaH || 17||
• sAttvikaM rAjasaM bhedaM saMshayaM hRRidayaM phalam |
• dRRik dRRiShTaM sarvadraShTA cha bhUtabhautikadaivatam || 18||
• sarvaM brahma na sandehastadbrahmAhaM na saMshayaH |
• turyarUpamahaM sAkShAt j~nAnarUpamahaM sadA || 19||
• aj~nAnaM chaiva nAstyeva tatkAryaM kutra vidyate |
• sarvaM brahma na sandehastadbrahmAhaM na saMshayaH || 20||
• chittavRRittivilAsaM cha buddhInAmapi nAsti hi |
• dehasa~NkalpahIno.ahaM buddhisa~NkalpakalpanA || 21||
• sarvaM brahma na sandehastadbrahmAhaM na saMshayaH |
• buddhinishchayarUpo.ahaM nishchayaM cha galatyaho || 22||
• ahaMkAraM bahuvidhaM deho.ahamiti bhAvanam |
• sarvaM brahma na sandehastadbrahmAhaM na saMshayaH || 23||
• brahmAhamapi kANo.ahaM badhiro.ahaM paro.asmyaham |
• sarvaM brahma na sandehastadbrahmAhaM na saMshayaH || 24||
• deho.ahamiti tAdAtmyaM dehasya paramAtmanaH |
• sarvaM brahma na sandehastadbrahmAhaM na saMshayaH || 25||
• sarvo.ahamiti tAdAtmyaM sarvasya paramAtmanaH |
• iti bhAvaya yatnena brahmaivAhamiti prabho || 26||
• dRRiDhanishchayamevedaM satyaM satyamahaM param |
• dRRiDhanishchayamevAtra sadgurorvAkyanishchayam || 27||
• dRRiDhanishchayasAmrAjye tiShTha tiShTha sadA paraH |
• ahameva paraM brahma AtmAnandaprakAshakaH || 28||
• shivapUjA shivashchAhaM viShNurviShNuprapUjanam |
• yadyat saMvedyate ki~nchit yadyannishchIyate kvachit || 29||
• tadeva tvaM tvamevAhaM ityevaM nAsti ki~nchana |
• idaM chittamidaM dRRishyaM ityevamiti nAsti hi || 30||
• sadasadbhAvasheSho.api tattadbhedaM na vidyate |
• sukharUpamidaM sarvaM sukharUpamidaM na cha || 31||
• lakShabhedaM sakRRidbhedaM sarvabhedaM na vidyate |
• brahmAnando na sandehastadbrahmAhaM na saMshayaH || 32||
• brahmabhedaM turyabhedaM jIvabhedamabhedakam |
• idameva hi notpannaM sarvadA nAsti ki~nchana || 33||
• sa devamiti nirdesho nAsti nAstyeva sarvadA |
• asti chet kila vaktavyaM nAsti chet kathamuchyate || 34||
• paraM visheShameveti nAsti ki~nchit sadA mayi |
• cha~nchalaM manashchaiva nAsti nAsti na saMshayaH || 35||
• evameva sadA pUrNo nirIhastiShTha shAntadhIH |
• sarvaM brahmAsmi pUrNo.asmi evaM cha na kadAchana || 36||
• Anando.ahaM variShTho.ahaM brahmAsmItyapi nAsti hi |
• brahmAnandamahAnandamAtmAnandamakhaNDitam || 37||
• idaM paramahantA cha sarvadA nAsti ki~nchana |
• idaM sarvamiti khyAti AnandaM neti no bhramaH || 38||
• sarvaM brahma na sandehastadbrahmAhaM na saMshayaH |
• lakShyalakShaNabhAvaM cha dRRishyadarshanadRRishyatA || 39||
• atyantAbhAvameveti sarvadAnubhavaM mahat |
• sarvaM brahma na sandehastadbrahmAhaM na saMshayaH || 40||
• guhyaM mantraM guNaM shAstraM satyaM shrotraM kalevaram |
• maraNaM jananaM kAryaM kAraNaM pAvanaM shubham || 41||
• kAmakrodhau lobhamohau mado mAtsaryameva hi |
• dvaitadoShaM bhayaM shokaM sarvaM nAstyeva sarvadA || 42||
• idaM nAstyeva nAstyeva nAstyeva sakalaM sukham |
• idaM brahmeti mananamahaM brahmeti chintanam || 43||
• ahaM brahmeti mananaM tvaM brahmatvavinAshanam |
• satyatvaM brahmavij~nAnaM asatyatvaM na bAdhyate || 44||
• eka eva paro hyAtmA ekatvashrAntivarjitaH |
• sarvaM brahma sadA brahma tadbrahmAhaM na saMshayaH || 45||
• jIvarUpA jIvabhAvA jIvashabdatrayaM na hi |
• IsharUpaM cheshabhAvaM IshashabdaM cha kalpitam || 46||
• nAkSharaM na cha sarvaM vA na padaM vAchyavAchakam |
• hRRidayaM mantratantraM cha chittaM buddhirna ki~nchana || 47||
• mUDho j~nAnI vivekI vA shuddha ityapi nAsti hi |
• nishchayaM praNavaM tAraM AtmAyaM gurushiShyakam || 48||
• tUShNIM tUShNIM mahAtUShNIM maunaM vA maunabhAvanam |
• prakAshanaM prakAshaM cha AtmAnAtmavivechanam || 49||
• dhyAnayogaM rAjayogaM bhogamaShTA~NgalakShaNam |
• sarvaM brahma na sandehastadbrahmAhaM na saMshayaH || 50||
• astitvabhAShaNaM chApi nAstitvasya cha bhAShaNam |
• pa~nchAshadvarNarUpo.ahaM chatuHShaShTikalAtmakaH || 51||
• sarvaM brahma na sandehastadbrahmAhaM na saMshayaH |
• brahmaivAhaM prasannAtmA brahmaivAhaM chidavyayaH || 52||
• shAstraj~nAnavidUro.ahaM vedaj~nAnavidUrakaH |
• uktaM sarvaM paraM brahma nAsti sandehaleshataH || 53||
• sarvaM brahma na sandehastadbrahmAhaM na saMshayaH |
• brahmaivAhaM prasannAtmA brahmaivAhaM chidavyayaH || 54||
• ityevaM brahmatanmAtraM tatra tubhyaM priyaM tataH |
• yastu buddhyeta satataM sarvaM brahma na saMshayaH |
• nityaM shRRiNvanti ye martyAste chinmAtramayAmalAH || 55||
• sandehasandehakaro.aryakAsvakaiH
• karAdisandohajagadvikAribhiH |
• yo vItamohaM na karoti durhRRidaM
• videhamuktiM shivadRRikprabhAvataH || 56||

• || iti shrIshivarahasye sha~NkarAkhye ShaShThAMshe RRibhunidAghasaMvAde brahmaikarUpatvanirUpaNaprakaraNaM nAma triMsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com