RRibhugItA 23 || rahasyopadesha prakaraNam ||

RRibhuH -

• nidAgha shRRiNu vakShyAmi sarvalokeShu durlabham |
• idaM brahma paraM brahma sachchidAnanda eva hi || 1||
• nAnAvidhajanaM lokaM nAnA kAraNakAryakam |
• brahmaivAnyadasat sarvaM sachchidAnanda eva hi || 2||
• ahaM brahma sadA brahma asmi brahmAhameva hi |
• kAlo brahma kShaNo brahma ahaM brahma na saMshayaH || 3||
• vedo brahma paraM brahma satyaM brahma parAt paraH |
• haMso brahma harirbrahma shivo brahma chidavyayaH || 4||
• sarvopaniShado brahma sAmyaM brahma samo.asmyaham |
• ajo brahma raso brahma viyadbrahma parAtparaH || 5||
• truTirbrahma mano brahma vyaShTirbrahma sadAmudaH |
• idaM brahma paraM brahma tattvaM brahma sadA japaH || 6||
• akAro brahma evAhamukAro.ahaM na saMshayaH |
• makArabrahmamAtro.ahaM mantrabrahmamanuH param || 7||
• shikArabrahmamAtro.ahaM vAkAraM brahma kevalam |
• yakAraM brahma nityaM cha pa~nchAkSharamahaM param || 8||
• rechakaM brahma sadbrahma pUrakaM brahma sarvataH |
• kuMbhakaM brahma sarvo.ahaM dhAraNaM brahma sarvataH || 9||
• brahmaiva nAnyat tatsarvaM sachchidAnanda eva hi |
• evaM cha nishchito muktaH sadya eva na saMshayaH || 10||
• kechideva mahAmUDhAH dvaitamevaM vadanti hi |
• na saMbhAShyAH sadAnarhA namaskAre na yogyatA || 11||
• mUDhA mUDhatarAstuchChAstathA mUDhatamAH pare |
• ete na santi me nityaM ahaMvij~nAnamAtrataH || 12||
• sarvaM chinmAtrarUpatvAdAnandatvAnna me bhayam |
• ahamityapi nAstyeva paramityapi na kvachit || 13||
• brahmaiva nAnyat tatsarvaM sachchidAnanda eva hi |
• kAlAtItaM sukhAtItaM sarvAtItamatItakam || 14||
• nityAtItamanityAnAmamitaM brahma kevalam |
• brahmaiva nAnyadyatsarvaM sachchidAnandamAtrakam || 15||
• dvaitasatyatvabuddhishcha dvaitabuddhyA na tat smara |
• sarvaM brahmaiva nAnyo.asti sarvaM brahmaiva kevalam || 16||
• buddhyAtItaM mano.atItaM vedAtItamataH param |
• AtmAtItaM janAtItaM jIvAtItaM cha nirguNam || 17||
• kAShThAtItaM kalAtItaM nATyAtItaM paraM sukham |
• brahmamAtreNa saMpashyan brahmamAtraparo bhava || 18||
• brahmamAtraparo nityaM chinmAtro.ahaM na saMshayaH |
• jyotirAnandamAtro.ahaM nijAnandAtmamAtrakaH || 19||
• shUnyAnandAtmamAtro.ahaM chinmAtro.ahamiti smara |
• sattAmAtro.ahamevAtra sadA kAlaguNAntaraH || 20||
• nityasanmAtrarUpo.ahaM shuddhAnandAtmamAtrakam |
• prapa~nchahInarUpo.ahaM sachchidAnandamAtrakaH || 21||
• nishchayAnandamAtro.ahaM kevalAnandamAtrakaH |
• paramAnandamAtro.ahaM pUrNAnando.ahameva hi || 22||
• dvaitasyamAtrasiddho.ahaM sAmrAjyapadalakShaNam |
• ityevaM nishchayaM kurvan sadA triShu yathAsukham || 23||
• dRRiDhanishchayarUpAtmA dRRiDhanishchayasanmayaH |
• dRRiDhanishchayashAntAtmA dRRiDhanishchayamAnasaH || 24||
• dRRiDhanishchayapUrNAtmA dRRiDhanishchayanirmalaH |
• dRRiDhanishchayajIvAtmA dRRiDhanishchayama~NgalaH || 25||
• dRRiDhanishchayajIvAtmA saMshayaM nAshameShyati |
• dRRiDhanishchayamevAtra brahmaj~nAnasya lakShaNam || 26||
• dRRiDhanishchayamevAtra vAkyaj~nAnasya lakShaNam |
• dRRiDhanishchayamevAtra kAraNaM mokShasaMpadaH || 27||
• evameva sadA kAryaM brahmaivAhamiti sthiram |
• brahmaivAhaM na sandehaH sachchidAnanda eva hi || 28||
• AtmAnandasvarUpo.ahaM nAnyadastIti bhAvaya |
• tatastadapi santyajya eka eva sthiro bhava || 29||
• tatastadapi santyajya nirguNo bhava sarvadA |
• nirguNatvaM cha santyajya vAchAtIto bhavet tataH || 30||
• vAchAtItaM cha santyajya chinmAtratvaparo bhava |
• AtmAtItaM cha santyajya brahmamAtraparo bhava || 31||
• chinmAtratvaM cha santyajya sarvatUShNIMparo bhava |
• sarvatUShNIM cha santyajya mahAtUShNIMparo bhava || 32||
• mahAtUShNIM cha santyajya chittatUShNIM samAshraya |
• chittatUShNIM cha santyajya jIvatUShNIM samAhara || 33||
• jIvatUShNIM parityajya jIvashUnyaparo bhava |
• shUnyatyAgaM parityajya yathA tiShTha tathAsi bho || 34||
• tiShThatvamapi santyajya avA~NmAnasagocharaH |
• tataH paraM na vaktavyaM tataH pashyenna ki~nchana || 35||
• no chet sarvaparityAgo brahmaivAhamitIraya |
• sadA smaran sadA chintyaM sadA bhAvaya nirguNam || 36||
• sadA tiShThasva tattvaj~na sadA j~nAnI sadA paraH |
• sadAnandaH sadAtItaH sadAdoShavivarjitaH || 37||
• sadA shAntaH sadA tRRiptaH sadA jyotiH sadA rasaH |
• sadA nityaH sadA shuddhaH sadA buddhaH sadA layaH || 38||
• sadA brahma sadA modaH sadAnandaH sadA paraH |
• sadA svayaM sadA shUnyaH sadA maunI sadA shivaH || 39||
• sadA sarvaM sadA mitraH sadA snAnaM sadA japaH |
• sadA sarvaM cha vismRRitya sadA maunaM parityaja || 40||
• dehAbhimAnaM santyajya chittasattAM parityaja |
• AtmaivAhaM svayaM chAhaM ityevaM sarvadA bhava || 41||
• evaM sthite tvaM mukto.asi na tu kAryA vichAraNA |
• brahmaiva sarvaM yatki~nchit sachchidAnanda eva hi || 42||
• ahaM brahma idaM brahma tvaM brahmAsi nirantaraH |
• praj~nAnaM brahma evAsi tvaM brahmAsi na saMshayaH || 43||
• dRRiDhanishchayameva tvaM kuru kalyANamAtmanaH |
• manaso bhUShaNaM brahma manaso bhUShaNaM paraH || 44||
• manaso bhUShaNaM kartA brahmaivAhamavekShataH |
• brahmaiva sachchidAnadaH sachchidAnandavigrahaH || 45||
• sachchidAnandamakhilaM sachchidAnanda eva hi |
• sachchidAnandajIvAtmA sachchidAnandavigrahaH || 46||
• sachchidAnandamadvaitaM sachchidAnandasha~NkaraH |
• sachchidAnandavij~nAnaM sachchidAnandabhojanaH || 47||
• sachchidAnandapUrNAtmA sachchidAnandakAraNaH |
• sachchidAnandalIlAtmA sachchidAnandashevadhiH || 48||
• sachchidAnandasarvA~NgaH sachchidAnandachandanaH |
• sachchidAnandasiddhAntaH sachchidAnandavedakaH || 49||
• sachchidAnandashAstrArthaH sachchidAnandavAchakaH |
• sachchidAnandahomashcha sachchidAnandarAjyakaH || 50||
• sachchidAnandapUrNAtmA sachchidAnandapUrNakaH |
• sachchidAnandasanmAtraM mUDheShu paThitaM cha yat || 51||
• shuddhaM mUDheShu yaddattaM subaddhaM mArgachAriNA |
• viShayAsaktachitteShu na saMbhAShyaM vivekinA || 52||
• sakRRichChravaNamAtreNa brahmaiva bhavati svayam |
• ichChA chedyadi nArINAM mukhaM brAhmaNa eva hi || 53||
• sarvaM chaitanyamAtratvAt strIbhedaM cha na vidyate |
• vedashAstreNa yukto.api j~nAnAbhAvAd dvijo.advijaH || 54||
• brahmaiva tantunA tena baddhAste muktichintakAH |
• sarvamuktaM bhagavatA rahasyaM sha~NkareNa hi || 55||
• somApIDapadAMbujArchanaphalairbhuktyai bhavAn mAnasaM
• nAnyadyogapathA shrutishravaNataH kiM karmabhirbhUyate |
• yuktyA shikShitamAnasAnubhavato.apyashmApyasa~Ngo vachAM
• kiM grAhyaM bhavatIndriyArtharahitAnandaikasAndraH shivaH || 56||

• || iti shrIshivarahasye sha~NkarAkhye ShaShThAMshe RRibhunidAghasaMvAde rahasyopadeshaprakaraNaM nAma trayoviMsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com