RRibhugItA 49 || shivasya j~nAnadAtRRitva nirUpaNam ||

skandaH -

• purA magadhadeshIyo brAhmaNo vedapAragaH |
• uchathyatanayo vAgmI vedArthapravaNe dhRRitaH || 1||
• nAmnA sudarshano viprAn pAThayan shAstramuttamam |
• vedAntaparayA bhaktyA varNAshramarataH sadA || 2||
• mokShamichChedapi sadA vipro.api cha janArdanAt |
• viShNupUjAparo nityaM viShNukShetreShu saMvasan || 3||
• gopIchandanaphAlosau tulasyaivArchayaddharim |
• uvAsa niyataM vipro viShNudhyAnaparAyaNaH || 4||
• dashavarShamidaM tasya kRRityaM dRRiShTvA janArdanaH |
• mokShechChorAjuhAvainaM puratodbhUya taM dvijam || 5||

viShNuH -

• auchathya munishArdUla tapasyabhirataH sadA |
• vRRiNu kAmaM dadAmyeva vinA j~nAnaM dvijottama || 6||

sUtaH -

• iti viShNorgiraM shrutvA vipraH ki~nchidbhayAnvitaH |
• praNipatyAha taM viShNuM stuvannArAyaNeti tam || 7||

sudarshanaH -

• viShNo jiShNo namaste.astu sha~NkhachakragadAdhara |
• tvatpAdanalinaM prApto j~nAnAyAnarhaNaH kimu || 8||
• kimanyairdharmakAmArthairnashvarairiha sha~NkhabhRRit |
• ityuktaM tadvachaH shrutvA viShNu prAha sudarshanam || 9||

viShNuH -

• sudarshana shRRiNuShvaitanmatto nAnyamanA dvija |
• vadAmi te hitaM satyaM mayA prAptaM yathA tava || 10||
• madarchanena dhyAnena mokShechChA jAyate nRRiNAm |
• mokShadAtA mahAdevo j~nAnavij~nAnadAyakaH || 11||
• tadarchanena saMprAptaM mayA pUrvaM sudarshanam |
• sahasrAraM daityahantRRi sAkShAt tryakShaprapUjayA || 12||
• tamArAdhaya yatnena bhasmadhAraNapUrvakam |
• agnirityAdibhirmantraistriyAyuShatripuNDrakaiH || 13||
• rudrAkShadhArako nityaM rudrapa~nchAkSharAdaraH |
• shivali~NgaM bilvapatraiH pUjayan j~nAnavAn bhava || 14||
• vasan kShetre maheshasya snAhi tIrthe cha shA~Nkare |
• ahaM brahmAdayo devAH pUjayaiva pinAkinaH || 15||
• balinaH shivali~Ngasya pUjayA viprasattama |
• yasya phAlatalaM me.adya tripuNDraparichinhitam || 16||
• brahmendradevamunibhistripuNDraM bhasmanA dhRRitam |
• pashya vakShasi bAhvorme rudrAkShANAM srajaM shubhAm || 17||
• pa~nchAkSharajapAsakto rudrAdhyAyaparAyaNaH |
• trikAlamarchayAmIshaM bilvapatrairahaM shivam || 18||
• kamalA vimalA nityaM komalairbilvapallavaiH |
• pUjayatyanishaM li~Nge tathA brahmAdayaH surAH || 19||
• munayo manavo.apyevaM tathAnye dvijasattamAH |
• nRRipAsurAstathA daityA balinaH shivapUjayA || 20||
• j~nAnaM mokShastathA bhAgyaM labhyate sha~NkarArchanAt |
• tasmAt tvamapi bhaktyaiva samArAdhaya sha~Nkaram || 21||
• pashavo viShNuvidhayastathAnye munayaH surAH |
• sarveShAM patirIshAnastatprasAdAdvimuktibhAk || 22||
• prasAdajanakaM tasya bhasmadhAraNameva hi |
• prasAdajanakaM tasya mune rudrAkShadhAraNam || 23||
• prasAdajanakastasya rudrAdhyAyajapaH sadA |
• prasAdajanakastasya pa~nchAkSharajapo dvija || 24||
• prasAdajanakaM tasya shivali~NgaikapUjanam |
• prasAde shAMbhave jAte bhuktimuktI kare sthite || 25||
• tasya bhaktyaiva sarveShAM mochanaM bhavapAshataH |
• tasya prItikaraM sAkShAdbilvairli~Ngasya pUjanam || 26||
• tasya prItikaraM sAkShAchChivakShetreShu vartanam |
• tasya prItikaraM sAkShAt shivatIrthaniShevaNam || 27||
• tasya prItikaraM sAkShAt bhasmarudrAkShadhAraNam |
• tasya prItikaraM sAkShAt pradoShe shivapUjanam || 28||
• tasya prItikaraM sAkShAd rudrapa~nchAkSharAvRRitiH |
• tasya prItikaraM sAkShAchChivabhaktajanArchanam || 29||
• tasya prItikaraM sAkShAt some sAyantanArchanam |
• tasya prItikaraM sAkShAt tannirmAlyaikabhojanam || 30||
• tasya prItikaraM sAkShAd aShTamIShvarchanaM nishi |
• tasya prItikaraM sAkShAt chaturdashyarchanaM nishi || 31||
• tasya prItikaraM sAkShAt tannAmnAM smRRitireva hi |
• etAvAnena dharmo hi shambhoH priyakaro mahAn || 32||
• anyadabhyudayaM vipra shrutismRRitiShu kIrtitam |
• dharmo varNAshramaprokto munibhiH kathito mune || 33||
• avimukte visheSheNa shivo nityaM prakAshate |
• tasmAt kAshIti tat proktaM yato hIshaH prakAshate || 34||
• tatraivAmaraNaM tiShThediti jAbAlikI shrutiH |
• tatra vishveshvare li~Nge nityaM brahma prakAshate || 35||
• tatrAnnapUrNA sarveShAM bhuktyannaM saMprayachChati |
• tatrAsti maNikarNAkhyaM maNikuNDaM vinirmitam || 36||
• j~nAnodayo.api tatrAsti sarveShAM j~nAnadAyakaH |
• tatra yAhi mayA sArdhaM tatraiva vasa vai mune || 37||
• tatrAnte mokShadaM j~nAnaM dadAtIshvara eva hi |
• ityuktvA tena vipreNa yayau kAshIM hariH svayam || 38||
• snAtvA tIrthe chakrasaMj~ne j~nAnavApyAM haridvijaH |
• taM dvijaM snApayAmAsa bhasmanApAdamastakam || 39||
• dhRRitatripuNDrarudrAkShaM kRRitvA taM cha sudarshanam |
• pUjayachchAtha vishveshaM pUjayAmAsa cha dvijAn || 40||
• bilvairgandhAkShatairdIpairnaivedyaishcha manoharaiH |
• tuShTAva praNipatyaivaM sa dvijo madhusUdanaH || 41||

sudarshanaviShNU -

• bhaja bhaja bhasitAnalojvalAkShaM
• bhujagAbhogabhuja~Ngasa~Ngahastam |
• bhavabhImamahograrudramIDyaM
• bhavabharjakatarjakaM mahainasAm || 42||
• vedaghoShabhaTakATakAvadhRRik dehadAhadahanAmala kAla |
• jUTakoTisujaTAtaTidudyadrAgara~njitaTinIshashimaule || 43||
• shaMbarA~NkavarabhUSha pAhi mAmambarAntaracharasphuTavAha |
• vArijAdyaghanaghoSha sha~Nkara trAhi vArijabhaveDya mahesha || 44||
• madagajavarakRRittivAsa shaMbho
• madhumadanAkShisaroruhArchyapAda |
• yamamadadamanAndhashikSha shaMbho
• purahara pAhi dayAkaTAkShasAraiH || 45||
• apAM puShpaM maulau himabhayaharaH phAlanayanaH
• jaTAjUTe ga~NgA.ambujavikasanaH savyanayanaH |
• garaM kaNThe yasya tribhuvanaguroH shaMbarahara
• mata~NgodyatkRRitterbhavaharaNapAdAbjabhajanam || 46||
• shrIbilvamUlashitikaNThamaheshali~NgaM
• bilvAmbujottamavaraiH paripUjya bhaktyA |
• stamberamA~Ngavadanottamasa~Ngabha~Nga
• rAjadviShA~Ngaparisa~NgamaheshashA~Ngam || 47||
• yo gaurIramaNArchanodyatamatirbhUyo bhavechChAMbhavo
• bhakto janmaparaMparAsu tu bhavenmukto.atha muktya~NganA-
• kAntasvAntanitAntashAntahRRidaye kArtAntavArtojjhitaH |
• viShNubrahmasurendrara~njitamumAkAntAMghripa~Nkeruha-
• dhyAnAnandanimagnasarvahRRidayaH ki~nchinna jAnAtyapi || 48||
• kAmArAtipadAmbujArchanarataH pApAnutApAdhika-
• vyApArapravaNaprakIrNamanasA puNyairagaNyairapi |
• no dUyeta visheShasantatimahAsArAnukArAdarA-
• dArAgrAhakumAramArasusharAdyAghAtabhItairapi || 49||

• || iti shrIshivarahasye sha~NkarAkhye ShaShThAMshe viShNUchathyasaMvAde shivasya j~nAnadAtRRitvanirUpaNaM nAma ekonapa~nchAsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com