RRibhugItA 43 || nidAdhAnubhava varNana prakaraNam ||

nidAghaH -

• na pashyAmi sharIraM vA li~NgaM karaNameva vA |
• na pashyAmi mano vApi na pashyAmi jaDaM tataH || 1||
• na pashyAmi chidAkAshaM na pashyAmi jagat kvachit |
• na pashyAmi hariM vApi na pashyAmi shivaM cha vA || 2||
• AnandasyAntare lagnaM tanmayatvAnna chotthitaH |
• na pashyAmi sadA bhedaM na jaDaM na jagat kvachit || 3||
• na dvaitaM na sukhaM duHkhaM na gururna parAparam |
• na guNaM vA na turyaM vA na buddhirna cha saMshayaH || 4||
• na cha kAlaM na cha bhayaM na cha shokaM shubhAshubham |
• na pashyAmi sandInaM na bandhaM na cha saMbhavam || 5||
• na dehendriyasadbhAvo na cha sadvastu sanmanaH |
• na pashyAmi sadA sthUlaM na kRRishaM na cha kubjakam || 6||
• na bhUmirna jalaM nAgnirna moho na cha mantrakam |
• na gururna cha vAkyaM vA na dRRiDhaM na cha sarvakam || 7||
• na jagachChravaNaM chaiva nididhyAsaM na chAparaH |
• AnandasAgare magnastanmayatvAnna chotthitaH || 8||
• Anando.ahamasheSho.ahamajo.ahamamRRitosmyaham |
• nityo.ahamiti nishchitya sadA pUrNo.asmi nityadhIH || 9||
• pUrNo.ahaM pUrNachitto.ahaM puNyo.ahaM j~nAnavAnaham |
• shuddho.ahaM sarvamukto.ahaM sarvAkAro.ahamavyayaH || 10||
• chinmAtro.ahaM svayaM so.ahaM tattvarUpo.ahamIshvaraH |
• parAparo.ahaM turyo.ahaM prasanno.ahaM raso.asmyaham || 11||
• brahmA.ahaM sarvalakShyo.ahaM sadA pUrNo.ahamakSharaH |
• mamAnubhavarUpaM yat sarvamuktaM cha sadguro || 12||
• namaskaromi te nAhaM sarvaM cha gurudakShiNA |
• maddehaM tvatpade dattaM tvayA bhasmIkRRitaM kShaNAt || 13||
• mamAtmA cha mayA dattaH svayamAtmani pUritaH |
• tvamevAhamahaM cha tvamahameva tvameva hi || 14||
• aikyArNavanimagno.asmi aikyaj~nAnaM tvameva hi |
• ekaM chaitanyamevAhaM tvayA gantuM na shakyate || 15||
• gantavyadesho nAstyeva ekAkAraM na chAnyataH |
• tvayA gantavyadesho na mayA gantavyamasti na || 16||
• ekaM kAraNamekaM cha ekameva dvayaM na hi |
• tvayA vaktavyakaM nAsti mayA shrotavyamapyalam || 17||
• tvameva sadgururnAsi ahaM nAsmi sashiShyakaH |
• brahmamAtramidaM sarvamasminmAno.asmi tanmayaH || 18||
• bhedAbhedaM na pashyAmi kAryAkAryaM na ki~nchana |
• mamaiva chennamaskAro niShprayojana eva hi || 19||
• tavaiva chennamaskAro bhinnatvAnna phalaM bhavet |
• tava chenmama chedbhedaH phalAbhAvo na saMshayaH || 20||
• namaskRRito.ahaM yuShmAkaM bhavAnaj~nIti vakShyati |
• mamaivApakariShyAmi parichChinno bhavAmyaham || 21||
• mamaiva chennamaskAraH phalaM nAsti svataH sthite |
• kasyApi cha namaskAraH kadAchidapi nAsti hi || 22||
• sadA chaitanyamAtratvAt nAhaM na tvaM na hi dvayam |
• na bandhaM na paro nAnye nAhaM nedaM na ki~nchana || 23||
• na dvayaM naikamadvaitaM nishchitaM na mano na tat |
• na bIjaM na sukhaM duHkhaM nAshaM niShThA na satsadA || 24||
• nAsti nAsti na sandehaH kevalAt paramAtmani |
• na jIvo neshvaro naiko na chandro nAgnilakShaNaH || 25||
• na vArtA nendriyo nAhaM na mahattvaM guNAntaram |
• na kAlo na jagannAnyo na vA kAraNamadvayam || 26||
• nonnato.atyantahIno.ahaM na muktastvatprasAdataH |
• sarvaM nAstyeva nAstyeva sarvaM brahmaiva kevalam || 27||
• ahaM brahma idaM brahma Atma brahmAhameva hi |
• sarvaM brahma na sandehastvatprasAdAnmaheshvaraH || 28||
• tvameva sadgururbrahma na hi sadgururanyataH |
• Atmaiva sadgururbrahma shiShyo hyAtmaiva sadguruH || 29||
• guruH prakalpate shiShyo guruhIno na shiShyakaH |
• shiShye sati guruH kalpyaH shiShyAbhAve gururna hi || 30||
• gurushiShyavihInAtmA sarvatra svayameva hi |
• chinmAtrAtmani kalpyo.ahaM chinmAtrAtmA na chAparaH || 31||
• chinmAtrAtmAhamevaiko nAnyat ki~nchinna vidyate |
• sarvasthito.ahaM satataM nAnyaM pashyAmi sadguroH || 32||
• nAnyat pashyAmi chittena nAnyat pashyAmi ki~nchana |
• sarvAbhAvAnna pashyAmi sarvaM ched dRRishyatAM pRRithak || 33||
• evaM brahma prapashyAmi nAnyadastIti sarvadA |
• aho bhedaM prakupitaM aho mAyA na vidyate || 34||
• aho sadgurumAhAtmyamaho brahmasukhaM mahat |
• aho vij~nAnamAhAtmyamaho sajjanavaibhavaH || 35||
• aho mohavinAshashcha aho pashyAmi satsukham |
• aho chittaM na pashyAmi aho sarvaM na ki~nchana || 36||
• ahameva hi nAnyatra ahamAnanda eva hi |
• mamAntaHkaraNe yadyannishchitaM bhavadIritam || 37||
• sarvaM brahma paraM brahma na ki~nchidanyadaivatam |
• evaM pashyAmi satataM nAnyat pashyAmi sadguro || 38||
• evaM nishchitya tiShThAmi svasvarUpe mamAtmani || 39||
• agAdhavedavAkyato na chAdhibheShajaM bhave-
• dumAdhavA~Nghripa~NkajasmRRitiH prabodhamokShadA |
• prabuddhabhedavAsanAniruddhahRRittamobhide
• mahArujAghavaidyamIshvaraM hRRidambuje bhaje || 40||
• dyatatpradagdhakAmadeha dugdhasannibhaM pramugdhasAmi |
• somadhAriNaM shrutIDyagadyasaMstutaM tvabhedyamekasha~Nkaram || 41||
• varaH ka~NkaH kAko bhavadubhayajAteShu niyataM
• mahAsha~NkAta~NkairvidhivihitashAntena manasA |
• yadi svairaM dhyAyannagapatisutAnAyakapadaM
• sa evAyaM dhuryo bhavati munijAteShu niyatam || 42||
• kaH kAlAntakapAdapadmabhajanAdanyaddhRRidA kaShTadAM
• dharmAbhAsaparaMparAM prathayate mUrkho kharIM tauragIm |
• kartuM yatnashatairashakyakaraNairvindeta duHkhAdikaMvar was duHkhAdhikam
• tadvat sAMbapadAMbujArchanaratiM tyaktvA vRRithA duHkhabhAk || 43||

• || iti shrIshivarahasye sha~NkarAkhye ShaShThAMshe RRibhunidAghasaMvAde nidAghAnubhavavarNanaprakaraNaM nAma trichatvAriMsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com