RRibhugItA 22 || nAma-rUpa niShedha prakaraNam ||

RRibhuH -

• vakShye brahmamayaM sarvaM nAsti sarvaM jaganmRRiShA |
• ahaM brahma na me chintA ahaM brahma na me jaDam || 1||
• ahaM brahma na me doShaH ahaM brahma na me phalam |
• ahaM brahma na me vArtA ahaM brahma na me dvayam || 2||
• ahaM brahma na me nityamahaM brahma na me gatiH |
• ahaM brahma na me mAtA ahaM brahma na me pitA || 3||
• ahaM brahma na me so.ayamahaM vaishvAnaro na hi |
• ahaM brahma chidAkAshamahaM brahma na saMshayaH || 4||
• sarvAntaro.ahaM pUrNAtmA sarvAntaramano.antaraH |
• ahameva sharIrAntarahameva sthiraH sadA || 5||
• evaM vij~nAnavAn mukta evaM j~nAnaM sudurlabham |
• anekashatasAhastreShveka eva vivekavAn || 6||
• tasya darshanamAtreNa pitarastRRiptimAgatAH |
• j~nAnino darshanaM puNyaM sarvatIrthAvagAhanam || 7||
• j~nAninaH chArchanenaiva jIvanmukto bhavennaraH |
• j~nAnino bhojane dAne sadyo mukto bhavennaraH || 8||
• ahaM brahma na sandehaH ahameva guruH paraH |
• ahaM shAnto.asmi shuddho.asmi ahameva guNAntaraH || 9||
• guNAtIto janAtItaH parAtIto manaH paraH |
• parataH parato.atIto buddhyAtIto rasAt paraH || 10||
• bhAvAtIto manAtIto vedAtIto vidaH paraH |
• sharIrAdeshcha parato jAgratsvapnasuShuptitaH || 11||
• avyaktAt parato.atIta ityevaM j~nAnanishchayaH |
• kvachidetatparityajya sarvaM saMtyajya mUkavat || 12||
• tUShNIM brahma paraM brahma shAshvatabrahmavAn svayam |
• j~nAnino mahimA ki~nchidaNumAtramapi sphuTam || 13||
• hariNApi hareNApi brahmaNApi surairapi |
• na shakyate varNayituM kalpakoTishatairapi || 14||
• ahaM brahmeti vij~nAnaM triShu lokeShu durlabham |
• vivekinaM mahAtmAnaM brahmamAtreNAvasthitam || 15||
• draShTuM cha bhAShituM vApi durlabhaM pAdasevanam |
• kadAchit pAdatIrthena snAtashchet brahma eva saH || 16||
• sarvaM mithyA na sandehaH sarvaM brahmaiva kevalam |
• etat prakaraNaM proktaM sarvasiddhAntasaMgrahaH || 17||
• durlabhaM yaH paThedbhaktyA brahma saMpadyate naraH |
• vakShye brahmamayaM sarvaM nAnyat sarvaM jaganmRRiShA || 18||
• brahmaiva jagadAkAraM brahmaiva paramaM padam |
• ahameva paraM brahma ahamityapi varjitaH || 19||
• sarvavarjitachinmAtraM sarvavarjitachetanaH |
• sarvavarjitashAntAtmA sarvama~NgalavigrahaH || 20||
• ahaM brahma paraM brahma asannedaM na me na me |
• na me bhUtaM bhaviShyachcha na me varNaM na saMshayaH || 21||
• brahmaivAhaM na me tuchChaM ahaM brahma paraM tapaH |
• brahmarUpamidaM sarvaM brahmarUpamanAmayam || 22||
• brahmaiva bhAti bhedena brahmaiva na paraH paraH |
• Atmaiva dvaitavadbhAti Atmaiva paramaM padam || 23||
• brahmaivaM bhedarahitaM bhedameva mahadbhayam |
• AtmaivAhaM nirmalo.ahamAtmaiva bhuvanatrayam || 24||
• Atmaiva nAnyat sarvatra sarvaM brahmaiva nAnyakaH |
• ahameva sadA bhAmi brahmaivAsmi paro.asmyaham || 25||
• nirmalo.asmi paraM brahma kAryAkAryavivarjitaH |
• sadA shuddhaikarUpo.asmi sadA chaitanyamAtrakaH || 26||
• nishchayo.asmi paraM brahma satyo.asmi sakalo.asmyaham |
• akSharo.asmi paraM brahma shivo.asmi shikharo.asmyaham || 27||
• samarUpo.asmi shAnto.asmi tatparo.asmi chidavyayaH |
• sadA brahma hi nityo.asmi sadA chinmAtralakShaNaH || 28||
• sadA.akhaNDaikarUpo.asmi sadAmAnavivarjitaH |
• sadA shuddhaikarUpo.asmi sadA chaitanyamAtrakaH || 29||
• sadA sanmAnarUpo.asmi sadA sattAprakAshakaH |
• sadA siddhAntarUpo.asmi sadA pAvanama~NgalaH || 30||
• evaM nishchitavAn muktaH evaM nityaparo varaH |
• evaM bhAvanayA yuktaH paraM brahmaiva sarvadA || 31||
• evaM brahmAtmavAn j~nAnI brahmAhamiti nishchayaH |
• sa eva puruSho loke brahmAhamiti nishchitaH || 32||
• sa eva puruSho j~nAnI jIvanmuktaH sa AtmavAn |
• brahmaivAhaM mahAnAtmA sachchidAnandavigrahaH || 33||
• nAhaM jIvo na me bhedo nAhaM chintA na me manaH |
• nAhaM mAMsaM na me.asthIni nAhaMkArakalevaraH || 34||
• na pramAtA na meyaM vA nAhaM sarvaM paro.asmyaham |
• sarvavij~nAnarUpo.asmi nAhaM sarvaM kadAchana || 35||
• nAhaM mRRito janmanAnyo na chinmAtro.asmi nAsmyaham |
• na vAchyo.ahaM na mukto.ahaM na buddho.ahaM kadAchana || 36||
• na shUnyo.ahaM na mUDho.ahaM na sarvo.ahaM paro.asmyaham |
• sarvadA brahmamAtro.ahaM na raso.ahaM sadAshivaH || 37||
• na ghrANo.ahaM na gandho.ahaM na chihno.ayaM na me priyaH |
• nAhaM jIvo raso nAhaM varuNo na cha golakaH || 38||
• brahmaivAhaM na sandeho nAmarUpaM na ki~nchana |
• na shrotro.ahaM na shabdo.ahaM na disho.ahaM na sAkShikaH || 39||
• nAhaM na tvaM na cha svargo nAhaM vAyurna sAkShikaH |
• pAyurnAhaM visargo na na mRRityurna cha sAkShikaH || 40||
• guhyaM nAhaM na chAnando na prajApatidevatA |
• sarvaM brahma na sandehaH sarvaM brahmaiva kevalam || 41||
• nAhaM mano na sa~Nkalpo na chandro na cha sAkShikaH |
• nAhaM buddhIndriyo brahmA nAhaM nishchayarUpavAn || 42||
• nAhaMkAramahaM rudro nAbhimAno na sAkShikaH |
• chittaM nAhaM vAsudevo dhAraNA nAyamIshvaraH || 43||
• nAhaM vishvo na jAgradvA sthUladeho na me kvachit |
• na prAtibhAsiko jIvo na chAhaM vyAvahArikaH || 44||
• na pAramArthiko devo nAhamannamayo jaDaH |
• na prANamayakosho.ahaM na manomayakoshavAn || 45||
• na vij~nAnamayaH kosho nAnandamayakoshavAn |
• brahmaivAhaM na sandeho nAmarUpe na ki~nchana || 46||
• etAvaduktvA sakalaM nAmarUpadvayAtmakam |
• sarvaM kShaNena vismRRitya kAShThaloShTAdivat tyajet || 47||
• etatsarvamasannityaM sadA vandhyAkumAravat |
• shashashRRi~NgavadevedaM narashRRi~Ngavadeva tat || 48||
• AkAshapuShpasadRRishaM yathA marumarIchikA |
• gandharvanagaraM yadvadindrajAlavadeva hi || 49||
• asatyameva satataM pa~ncharUpakamiShyate |
• shiShyopadeshakAlo hi dvaitaM na paramArthataH || 50||
• mAtA mRRite rodanAya dravyaM datvA.a.ahvayejjanAn |
• teShAM rodanamAtraM yat kevalaM dravyapa~nchakam || 51||
• tadadvaitaM mayA proktaM sarvaM vismRRitya kuDyavat |
• ahaM brahmeti nishchitya ahameveti bhAvaya || 52||
• ahameva sukhaM cheti ahameva na chAparaH |
• ahaM chinmAtrameveti brahmaiveti vinishchinu || 53||
• ahaM nirmalashuddheti ahaM jIvavilakShaNaH |
• ahaM brahmaiva sarvAtmA ahamityavabhAsakaH || 54||
• ahameva hi chinmAtramahameva hi nirguNaH |
• sarvAntaryAmyahaM brahma chinmAtro.ahaM sadAshivaH || 55||
• nityama~NgalarUpAtmA nityamokShamayaH pumAn |
• evaM nishchitya satataM svAtmAnaM svayamAsthitaH || 56||
• brahmaivAhaM na sandeho nAmarUpe na ki~nchana |
• etadrUpaprakaraNaM sarvavedeShu durlabham |
• yaH shRRiNoti sakRRidvApi brahmaiva bhavati svayam || 57||
• taM vedAdivachobhirIDitamahAyAgaishcha bhogairvratai-
• rdAnaishchAnashanairyamAdiniyamaistaM vidviShante dvijAH |
• tasyAna~NgariporatIva sumahAhRRidyaM hi li~NgArchanaM
• tenaivAshu vinAshya mohamakhilaM j~nAnaM dadAtIshvaraH || 58||

• || iti shrIshivarahasye sha~NkarAkhye ShaShThAMshe RRibhunidAghasaMvAde nAmarUpaniShedhaprakaraNaM nAma dvAviMsho.adhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com