ఋభుగీతా ౧ ॥ ఋభు స్తుతి ॥

• హేమాద్రిం కిల మాతులుఙ్గఫలమిత్యాదాయ మోదాధికో
• మౌఢ్యాన్నాకనివాసినాం భయపరైర్వాక్యైరివ ప్రార్థితః ।
• నీలీశామ్బరనీలమమ్బరతలం జమ్బూఫలం భావయన్
• తం ముఞ్చన్ గిరిమమ్బరం పరిమృశన్ లమ్బోదరః పాతు మామ్ ॥ ౧॥
• వామం యస్య వపుః సమస్తజగతాం మాతా పితా చేతరత్
• యత్పాదామ్బుజనూపురోద్భవరవః శబ్దార్థవాక్యాస్పదమ్ ।
• యన్నేత్రత్రితయం సమస్తజగతామాలోకహేతుః సదా
• పాయాద్దైవతసార్వభౌమగిరిజాలఙ్కారమూర్తిః శివః ॥ ౨॥

సూతః -

• జైగీషవ్యః పునర్నత్వా షణ్ముఖం శివసంభవమ్ ।
• పప్రచ్ఛ హృష్టస్తం తత్ర మునిభిర్గణపుఙ్గవైః ॥ ౩॥

జైగీషవ్యః -

• కరుణాకర సర్వజ్ఞ శరణాగతపాలక ।
• అరుణాధిపనేత్రాబ్జ చరణస్మరణోన్ముఖ ॥ ౪॥
• కరుణావరుణామ్భోధే తరణిద్యుతిభాస్కర ।
• దివ్యద్వాదశలిఙ్గానాం మహిమా సంశ్రుతో మయా ॥ ౫॥
• త్వత్తోఽన్యత్ శ్రోతుమిచ్ఛామి శివాఖ్యానమనుత్తమమ్ ।
• త్వద్వాక్యకఞ్జపీయూషధారాభిః పావయాశు మామ్ ॥ ౬॥

సూతః -

• ఇతి తస్య గిరా తుష్టః షణ్ముఖః ప్రాహ తం మునిమ్ ॥ ౭॥

శ్రీషణ్ముఖః -

• శృణు త్వమగజాకాన్తేనోక్తం జ్ఞానమహార్ణవమ్ ।
• ఋభవే యత్పురా ప్రాహ కైలాసే శఙ్కరః స్వయమ్ ॥ ౮॥
• బ్రహ్మసూనుః పురా విప్రో గత్వా నత్వా మహేశ్వరమ్ ।
• ఋభుర్విభుం తదా శంభుం తుష్టావ ప్రణతో ముదా ॥ ౯॥

ఋభుః -

• దివామణినిశాపతిస్ఫుటకృపీటయోనిస్ఫుర-
• ల్లలాటభసితోల్లసద్వరత్రిపుణ్డ్రభాగోజ్వలమ్ ।var was త్రిపుణ్ట్ర
• భజామి భుజగాఙ్గదం విధృతసామిసోమప్రభా-
• విరాజితకపర్దకం కరటికృత్తిభూష్యత్కటిమ్ ॥ ౧౦॥
• ఫాలాక్షాధ్వరదక్షశిక్షకవలక్షోక్షేశవాహోత్తమ-
• త్ర్యక్షాక్షయ్య ఫలప్రదావభసితాలఙ్కారరుద్రాక్షధృక్ ।
• చక్షుఃశ్రోత్రవరాఙ్గహారసుమహావక్షఃస్థలాధ్యక్ష మాం
• భక్ష్యీభూతగరప్రభక్ష భగవన్ భిక్ష్వర్చ్యపాదామ్బుజ ॥ ౧౧॥
• గఙ్గాచన్ద్రకలాలలామ భగవన్ భూభృత్కుమారీసఖ
• స్వామింస్తే పదపద్మభావమతులం కష్టాపహం దేహి మే ।
• తుష్టోఽహం శిపివిష్టహృష్టమనసా భ్రష్టాన్న మన్యే హరి-
• బ్రహ్మేన్ద్రానమరాన్ త్రివిష్టపగతాన్ నిష్ఠా హి మే తాదృశీ ॥ ౧౨॥
• నృత్తాడంబరసజ్జటాపటలికాభ్రామ్యన్మహోడుచ్ఛటా
• త్రుట్యత్సోమకలాలలామకలికా శమ్యాకమౌలీనతమ్ ।
• ఉగ్రానుగ్రభవోగ్రదుర్గజగదుద్ధారాగ్రపాదామ్బుజం
• రక్షోవక్షకుఠారభూతముమయా వీక్షే సుకామప్రదమ్ ॥ ౧౩॥
• ఫాలం మే భసితత్రిపుణ్డ్రరచితం త్వత్పాదపద్మానతం ??
• పాహీశాన దయానిధాన భగవన్ ఫాలానలాక్ష ప్రభో ।
• కణ్ఠో మే శితికణ్ఠనామ భవతో రుద్రాక్షధృక్ పాహి మాం
• కర్ణౌ మే భుజగాధిపోరుసుమహాకర్ణ ప్రభో పాహి మామ్ ॥ ౧౪॥
• నిత్యం శఙ్కరనామబోధితకథాసారాదరం శఙ్కరం
• వాచం రుద్రజపాదరాం సుమహతీం పఞ్చాక్షరీమిన్దుధృక్ ।
• బాహూ మే శశిభూషణోత్తమ మహాలిఙ్గార్చనాయోద్యతౌ
• పాహి ప్రేమరసార్ద్రయాఽద్య సుదృశా శమ్భో హిరణ్యప్రభ ॥ ౧౫॥
• భాస్వద్బాహుచతుష్టయోజ్జ్వల సదా నేత్రే త్రినేత్రే ప్రభో
• త్వల్లిఙ్గోత్తమదర్శనేన సుతరాం తృప్తైః సదా పాహి మే ।
• పాదౌ మే హరినేత్రపూజితపదద్వన్ద్వావ నిత్యం ప్రభో
• త్వల్లిఙ్గాలయప్రక్రమప్రణతిభిర్మాన్యౌ చ ధన్యౌ విభో ॥ ౧౬॥
• ధన్యస్త్వల్లిఙ్గసఙ్గేప్యనుదినగలితానఙ్గసఙ్గాన్తరఙ్గః
• పుంసామర్థైకశక్త్యా యమనియమవరైర్విశ్వవన్ద్య ప్రభో యః ।
• దత్వా బిల్వదలం సదమ్బుజవరం కిఞ్చిజ్జలం వా ముహుః
• ప్రాప్నోతీశ్వరపాదపఙ్కజముమానాథాద్య ముక్తిప్రదమ్ ॥ ౧౭॥
• ఉమారమణ శఙ్కర త్రిదశవన్ద్య వేదేడ్య హృత్
• త్వదీయపరభావతో మమ సదైవ నిర్వాణకృత్ ।
• భవార్ణవనివాసినాం కిము భవత్పదామ్భోరుహ-
• ప్రభావభజనాదరం భవతి మానసం ముక్తిదమ్ ॥ ౧౮॥
• సంసారార్గలపాదబద్ధజనతాసంమోచనం భర్గ తే
• పాదద్వన్ద్వముమాసనాథ భజతాం సంసారసంభర్జకమ్ ।
• త్వన్నామోత్తమగర్జనాదఘకులం సన్తర్జితం వై భవేద్
• దుఃఖానాం పరిమార్జకం తవకృపావీక్షావతాం జాయతే ॥ ౧౯॥
• విధిముణ్డకరోత్తమోరుమేరుకోదణ్డఖణ్డితపురాణ్డజవాహబాణ
• పాహి క్షమారథవికర్షసువేదవాజిహేషాన్తహర్షితపదామ్బుజ విశ్వనాథ ॥ ౨౦॥
• విభూతీనామన్తో న హి ఖలు భవానీరమణ తే
• భవే భావం కశ్చిత్ త్వయి భవహ భాగ్యేన లభతే ।
• అభావం చాజ్ఞానం భవతి జననాద్యైశ్చ రహితః
• ఉమాకాన్త స్వాన్తే భవదభయపాదం కలయతః ॥ ౨౧॥
• వరం శంభో భావైర్భవభజనభావేన నితరాం
• భవామ్భోధిర్నిత్యం భవతి వితతః పాంసుబహులః ।
• విముక్తిం భుక్తిం చ శ్రుతికథితభస్మాక్షవరధృక్
• భవే భర్తుః సర్వో భవతి చ సదానన్దమధురః ॥ ౨౨॥
• సోమసామజసుకృత్తిమౌలిధృక్ సామసీమశిరసి స్తుతపాద ।
• సామికాయగిరిజేశ్వర శమ్భో పాహి మామఖిలదుఃఖసమూహాత్ ॥ ౨౩॥
• భస్మాఙ్గరాగ భుజగాఙ్గ మహోక్షసఙ్గ
• గఙ్గామ్బుసఙ్గ సుజటా నిటిల స్ఫులిఙ్గ ।
• లిఙ్గాఙ్గ భఙ్గితమనఙ్గ విహఙ్గవాహ-
• సమ్పూజ్యపాద సదసఙ్గ జనాన్తరఙ్గ ॥ ౨౪॥
• వాత్సల్యం మయి తాదృశం తవనచేచ్చన్ద్రార్ధ చూడామణే
• ధిక్కృత్యాపి విముచ్య వా త్వయి యతో ధన్యో ధరణ్యామహమ్ ।
• సక్షారం లవణార్ణవస్య సలిలం ధారా ధరేణ క్షణాత్
• ఆదాయోజ్ఝితమాక్షితౌ హి జగతాం ఆస్వాదనీయాం దృశామ్ ॥ ౨౫॥
• త్వత్ కైలాసవరే విశోకహృదయాః క్రోధోజ్ఝితాచ్చాణ్డజాః
• తస్మాన్మామపి భేదబుద్ధిరహితం కుర్వీశ తేఽనుగ్రహాత్ ।
• త్వద్వక్త్రామల నిర్జరోజ్ఝిత మహాసంసార సంతాపహం
• విజ్ఞానం కరుణాఽదిశాద్య భగవన్ లోకావనాయ ప్రభో ॥ ౨౬॥
• సారఙ్గీ సింహశాబం స్పృశతి సుతధియా నన్దినీ వ్యాఘ్రపోతం
• మార్జారీ హంసబాలం ప్రణయపరవశా కేకికాన్తా భుజఙ్గమ్ ।
• వైరాణ్యాజన్మజాతాన్యపి గలితమదా జన్తవోఽన్యే త్యజన్తి
• భక్తాస్త్వత్పాదపద్మే కిము భజనవతః సర్వసిద్ధిం లభన్తే ॥ ౨౭॥

స్కన్దః -

• ఇత్థం ఋభుస్తుతిముమావరజానిరీశః
• శ్రుత్వా తమాహ గణనాథవరో మహేశః ।
• జ్ఞానం భవామయవినాశకరం తదేవ
• తస్మై తదేవ కథయే శృణు పాశముక్త్యై ॥ ౨౮॥

• ॥ ఇతి శ్రీశివరహస్యే శంకరాఖ్యే షష్ఠాంశే ఋభుస్తుతిర్నామ ప్రథమోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com