ఋభుగీతా ౧౭ ॥ సర్వ సిద్ధాన్త సంగ్రహ ప్రకరణమ్ ॥
ఋభుః -
- నిదాఘ శృణు గుహ్యం మే సర్వసిద్ధాన్తసఙ్గ్రహమ్ ।
- ద్వైతాద్వైతమిదం శూన్యం శాన్తం బ్రహ్మైవ సర్వదా ॥ ౧॥
- అహమేవ పరం బ్రహ్మ అహమేవ పరాత్ పరమ్ ।
- ద్వైతాద్వైతమిదం శూన్యం శాన్తం బ్రహ్మైవ కేవలమ్ ॥ ౨॥
- అహమేవ హి శాన్తాత్మా అహమేవ హి సర్వగః ।
- అహమేవ హి శుద్ధాత్మా అహమేవ హి నిత్యశః ॥ ౩॥
- అహమేవ హి నానాత్మా అహమేవ హి నిర్గుణః ।
- అహమేవ హి నిత్యాత్మా అహమేవ హి కారణమ్ ॥ ౪॥
- అహమేవ హి జగత్ సర్వం ఇదం చైవాహమేవ హి ।
- అహమేవ హి మోదాత్మా అహమేవ హి ముక్తిదః ॥ ౫॥
- అహమేవ హి చైతన్యం అహమేవ హి చిన్మయః ।
- అహమేవ హి చైతన్యమహం సర్వాన్తరః సదా ॥ ౬॥
- అహమేవ హి భూతాత్మా భౌతికం త్వహమేవ హి ।
- అహమేవ త్వమేవాహమహమేవాహమేవ హి ॥ ౭॥
- జీవాత్మా త్వహమేవాహమహమేవ పరేశ్వరః ।
- అహమేవ విభుర్నిత్యమహమేవ స్వయం సదా ॥ ౮॥
- అహమేవాక్షరం సాక్షాత్ అహమేవ హి మే ప్రియమ్ ।
- అహమేవ సదా బ్రహ్మ అహమేవ సదాఽవ్యయః ॥ ౯॥
- అహమేవాహమేవాగ్రే అహమేవాన్తరాన్తరః ।
- అహమేవ చిదాకాశమహమేవావభాసకః ॥ ౧౦॥
- అహమేవ సదా స్రష్టా అహమేవ హి రక్షకః ।
- అహమేవ హి లీలాత్మా అహమేవ హి నిశ్చయః ॥ ౧౧॥
- అహమేవ సదా సాక్షీ త్వమేవ త్వం పురాతనః ।
- త్వమేవ హి పరం బ్రహ్మ త్వమేవ హి నిరన్తరమ్ ॥ ౧౨॥
- అహమేవాహమేవాహమహమేవ త్వమేవ హి ।
- అహమేవాద్వయాకారః అహమేవ విదేహకః ॥ ౧౩॥
- అహమేవ మమాధారః అహమేవ సదాత్మకః ।
- అహమేవోపశాన్తాత్మా అహమేవ తితిక్షకః ॥ ౧౪॥
- అహమేవ సమాధానం శ్రద్ధా చాప్యహమేవ హి ।
- అహమేవ మహావ్యోమ అహమేవ కలాత్మకః ॥ ౧౫॥
- అహమేవ హి కామాన్తః అహమేవ సదాన్తరః ।
- అహమేవ పురస్తాచ్చ అహం పశ్చాదహం సదా ॥ ౧౬॥
- అహమేవ హి విశ్వాత్మా అహమేవ హి కేవలమ్ ।
- అహమేవ పరం బ్రహ్మ అహమేవ పరాత్పరః ॥ ౧౭॥
- అహమేవ చిదానన్దః అహమేవ సుఖాసుఖమ్ ।
- అహమేవ గురుత్వం చ అహమేవాచ్యుతః సదా ॥ ౧౮॥
- అహమేవ హి వేదాన్తః అహమేవ హి చిన్తనః ।
- దేహోఽహం శుద్ధచైతన్యః అహం సంశయవర్జితః ॥ ౧౯॥
- అహమేవ పరం జ్యోతిరహమేవ పరం పదమ్ ।
- అహమేవావినాశ్యాత్మా అహమేవ పురాతనః ॥ ౨౦॥
- అహం బ్రహ్మ న సన్దేహః అహమేవ హి నిష్కలః ।
- అహం తుర్యో న సన్దేహః అహమాత్మా న సంశయః ॥ ౨౧॥
- అహమిత్యపి హీనోఽహమహం భావనవర్జితః ।
- అహమేవ హి భావాన్తా అహమేవ హి శోభనమ్ ॥ ౨౨॥
- అహమేవ క్షణాతీతః అహమేవ హి మఙ్గలమ్ ।
- అహమేవాచ్యుతానన్దః అహమేవ నిరన్తరమ్ ॥ ౨౩॥
- అహమేవాప్రమేయాత్మా అహం సంకల్పవర్జితః ।
- అహం బుద్ధః పరంధామ అహం బుద్ధివివర్జితః ॥ ౨౪॥
- అహమేవ సదా సత్యం అహమేవ సదాసుఖమ్ ।
- అహమేవ సదా లభ్యం అహం సులభకారణమ్ ॥ ౨౫॥
- అహం సులభవిజ్ఞానం దుర్లభో జ్ఞానినాం సదా ।
- అహం చిన్మాత్ర ఏవాత్మా అహమేవ హి చిద్ఘనః ॥ ౨౬॥
- అహమేవ త్వమేవాహం బ్రహ్మైవాహం న సంశయః ।
- అహమాత్మా న సన్దేహః సర్వవ్యాపీ న సంశయః ॥ ౨౭॥
- అహమాత్మా ప్రియం సత్యం సత్యం సత్యం పునః పునః ।
- అహమాత్మాఽజరో వ్యాపీ అహమేవాత్మనో గురుః ॥ ౨౮॥
- అహమేవామృతో మోక్షో అహమేవ హి నిశ్చలః ।
- అహమేవ హి నిత్యాత్మా అహం ముక్తో న సంశయః ॥ ౨౯॥
- అహమేవ సదా శుద్ధః అహమేవ హి నిర్గుణః ।
- అహం ప్రపఞ్చహీనోఽహం అహం దేహవివర్జితః ॥ ౩౦॥
- అహం కామవిహీనాత్మా అహం మాయావివర్జితః ।
- అహం దోషప్రవృత్తాత్మా అహం సంసారవర్జితః ॥ ౩౧॥
- అహం సఙ్కల్పరహితో వికల్పరహితః శివః ।
- అహమేవ హి తుర్యాత్మా అహమేవ హి నిర్మలః ॥ ౩౨॥
- అహమేవ సదా జ్యోతిరహమేవ సదా ప్రభుః ।
- అహమేవ సదా బ్రహ్మ అహమేవ సదా పరః ॥ ౩౩॥
- అహమేవ సదా జ్ఞానమహమేవ సదా మృదుః ।
- అహమేవ హి చిత్తం చ అహం మానవివర్జితః ॥ ౩౪॥
- అహంకారశ్చ సంసారమహఙ్కారమసత్సదా ।
- అహమేవ హి చిన్మాత్రం మత్తోఽన్యన్నాస్తి నాస్తి హి ॥ ౩౫॥
- అహమేవ హి మే సత్యం మత్తోఽన్యన్నాస్తి కిఞ్చన ।
- మత్తోఽన్యత్తత్పదం నాస్తి మత్తోఽన్యత్ త్వత్పదం నహి ॥ ౩౬॥
- పుణ్యమిత్యపి న క్వాపి పాపమిత్యపి నాస్తి హి ।
- ఇదం భేదమయం భేదం సదసద్భేదమిత్యపి ॥ ౩౭॥
- నాస్తి నాస్తి త్వయా సత్యం సత్యం సత్యం పునః పునః ।
- నాస్తి నాస్తి సదా నాస్తి సర్వం నాస్తీతి నిశ్చయః ॥ ౩౮॥
- ఇదమేవ పరం బ్రహ్మ అహం బ్రహ్మ త్వమేవ హి ।
- కాలో బ్రహ్మ కలా బ్రహ్మ కార్యం బ్రహ్మ క్షణం తదా ॥ ౩౯॥
- సర్వం బ్రహ్మాప్యహం బ్రహ్మ బ్రహ్మాస్మీతి న సంశయః ।
- చిత్తం బ్రహ్మ మనో బ్రహ్మ సత్యం బ్రహ్మ సదాఽస్మ్యహమ్ ॥ ౪౦॥
- నిర్గుణం బ్రహ్మ నిత్యం చ నిరన్తరమహం పరః ।
- ఆద్యన్తం బ్రహ్మ ఏవాహం ఆద్యన్తం చ నహి క్వచిత్ ॥ ౪౧॥
- అహమిత్యపి వార్తాఽపి స్మరణం భాషణం న చ ।
- సర్వం బ్రహ్మైవ సన్దేహస్త్వమిత్యపి న హి క్వచిత్ ॥ ౪౨॥
- వక్తా నాస్తి న సన్దేహః ఏషా గీతా సుదుర్లభః ।
- సద్యో మోక్షప్రదం హ్యేతత్ సద్యో ముక్తిం ప్రయచ్ఛతి ॥ ౪౩॥
- సద్య ఏవ పరం బ్రహ్మ పదం ప్రాప్నోతి నిశ్చయః ।
- సకృచ్ఛ్రవణమాత్రేణ సద్యో ముక్తిం ప్రయచ్ఛతి ॥ ౪౪॥
- ఏతత్తు దుర్లభం లోకే త్రైలోక్యేఽపి చ దుర్లభమ్ ।
- అహం బ్రహ్మ న సన్దేహ ఇత్యేవం భావయేత్ దృఢమ్ ।
- తతః సర్వం పరిత్యజ్య తూష్ణీం తిష్ఠ యథా సుఖమ్ ॥ ౪౫॥
సూతః -
- భువనగగనమధ్యధ్యానయోగాఙ్గసఙ్గే
- యమనియమవిశేషైర్భస్మరాగాఙ్గసఙ్గైః ।
- సుఖముఖభరితాశాః కోశపాశాద్విహీనా
- హృది ముదితపరాశాః శాంభవాః శంభువచ్చ ॥ ౪౬॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే సర్వసిద్ధాన్తసంగ్రహప్రకరణం నామ సప్తదశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com