ఋభుగీతా ౪౫ ॥ నిదాధ-కృత-గురు-స్తుతి వర్ణనమ్ ॥
నిదాఘః -
- పుణ్యే శివరహస్యేఽస్మిన్నితిహాసే శివోదితే ।
- దేవ్యై శివేన కథితే దేవ్యా స్కన్దాయ మోదతః ॥ ౧॥
- తదేతస్మిన్ హి షష్ఠాంశే షడాస్యకమలోదితే ।
- పారమేశ్వరవిజ్ఞానం శ్రుతమేతన్మహాఘభిత్ ॥ ౨॥
- మహామాయాతమస్తోమవినివారణభాస్కరమ్ ।
- అస్యాధ్యాయైకకథనాద్ విజ్ఞానం మహదశ్నుతే ॥ ౩॥
- శ్లోకస్య శ్రవణేనాపి జీవన్ముక్తో న సంశయః ।
- ఏతద్గ్రన్థప్రవక్తా హి షణ్ముఖః శివ ఏవ హి ॥ ౪॥
- జైగీషవ్యో మహాయోగీ స ఏవ శ్రవణేఽర్హతి ।
- భస్మరుద్రాక్షధృఙ్ నిత్యం సదా హ్యత్యాశ్రమీ మునిః ॥ ౫॥
- ఏతద్గ్రన్థప్రవక్తా హి స గురుర్నాత్ర సంశయః ।
- ఏతద్గ్రన్థప్రవక్తా హి పరం బ్రహ్మ న సంశయః ॥ ౬॥
- ఏతద్గ్రన్థప్రవక్తా హి శివ ఏవ న చాపరః ।
- ఏతద్గ్రన్థప్రవక్తా హి సాక్షాద్దేవీ న సంశయః ॥ ౭॥
- ఏతద్గ్రన్థప్రవక్తా హి గణేశో నాత్ర సంశయః ।
- ఏతద్గ్రన్థప్రవక్తా హి స్కన్దః స్కన్దితతారకః ॥ ౮॥
- ఏతద్గ్రన్థప్రవక్తా హి నన్దికేశో న సంశయః ।
- ఏతద్గ్రన్థప్రవక్తా హి దత్తాత్రేయో మునిః స్వయమ్ ॥ ౯॥
- ఏతద్గ్రన్థప్రవక్తా హి దక్షిణామూర్తిరేవ హి ।
- ఏతద్గ్రన్థార్థకథనే భావనే మునయః సురాః ॥ ౧౦॥
- న శక్తా మునిశార్దూల త్వదృతేఽహం శివం శపే ।
- ఏతద్గ్రన్థార్థవక్తారం గురుం సర్వాత్మనా యజేత్ ॥ ౧౧॥
- ఏతద్గ్రన్థప్రవక్తా తు శివో విఘ్నేశ్వరః స్వయమ్ ।
- పితా హి జన్మదో దాతా గురుర్జన్మవినాశకః ॥ ౧౨॥
- ఏతద్గ్రన్థం సమభ్యస్య గురోర్వాక్యాద్విశేషతః ।
- న దుహ్యేత గురుం శిష్యో మనసా కిఞ్చ కాయతః ॥ ౧౩॥
- గురురేవ శివః సాక్షాత్ గురురేవ శివః స్వయమ్ ।
- శివే రుష్టే గురుస్త్రాతా గురౌ రుష్టే న కశ్చన ॥ ౧౪॥
- ఏతద్గ్రన్థపదాభ్యాసే శ్రద్ధా వై కారణం పరమ్ ।
- అశ్రద్ధధానః పురుషో నైతల్లేశమిహార్హతి ॥ ౧౫॥
- శ్రద్ధైవ పరమం శ్రేయో జీవబ్రహ్మైక్యకారణమ్ ।
- అస్తి బ్రహ్మేతి చ శ్రుత్వా భావయన్ సన్త ఏవ హి ॥ ౧౬॥
- శివప్రసాదహీనో యో నైతద్గ్రన్థార్థవిద్భవేత్ ।
- భావగ్రాహ్యోఽయమాత్మాయం పర ఏకః శివో ధ్రువః ॥ ౧౭॥
- సర్వమన్యత్ పరిత్యజ్య ధ్యాయీతేశానమవ్యయమ్ ।
- శివజ్ఞానమిదం శుద్ధం ద్వైతాద్వైతవినాశనమ్ ॥ ౧౮॥
- అన్యేషు చ పురాణేషు ఇతిహాసేషు న క్వచిత్ ।
- ఏతాదృశం శివజ్ఞానం శ్రుతిసారమహోదయమ్ ॥ ౧౯॥
- ఉక్తం సాక్షాచ్ఛివేనైతద్ యోగసాంఖ్యవివర్జితమ్ ।
- భావనామాత్రసులభం భక్తిగమ్యమనామయమ్ ॥ ౨౦॥
- మహానన్దప్రదం సాక్షాత్ ప్రసాదేనైవ లభ్యతే ।
- తస్యైతే కథితా హ్యర్థాః ప్రకాశన్తే మహాత్మనః ॥ ౨౧॥
- ఏతద్గ్రన్థం గురోః శ్రుత్వా న పూజాం కురుతే యది ।
- శ్వానయోనిశతం ప్రాప్య చణ్డాలః కోటిజన్మసు ॥ ౨౨॥
- ఏతద్గ్రన్థస్య మాహాత్మ్యం న యజన్తీశ్వరం హృదా ।
- స సూకరో భవత్యేవ సహస్రపరివత్సరాన్ ॥ ౨౩॥
- ఏతద్గ్రన్థార్థవక్తారమభ్యసూయేత యో ద్విజః ।
- అనేకబ్రహ్మకల్పం చ విష్ఠాయాం జాయతే క్రిమిః ॥ ౨౪॥
- ఏతద్గ్రన్థార్థవిద్బ్రహ్మా స బ్రహ్మ భవతి స్వయమ్ ।
- కిం పునర్బహునోక్తేన జ్ఞానమేతద్విముక్తిదమ్ ॥ ౨౫॥
- యస్త్వేతచ్ఛృణుయాచ్ఛివోదిమహావేదాన్తాంబుధి (?)
- వీచిజాతపుణ్యం నాపేక్షత్యనిశం న చాబ్దకల్పైః ।
- శబ్దానాం నిఖిలో రసో హి స శివః కిం వా తుషాద్రి
- పరిఖండనతో భవేత్ స్యాత్ తణ్డులోఽపి స మృషా భవమోహజాలమ్ ॥ ౨౬॥
- తద్వత్ సర్వమశాస్త్రమిత్యేవ హి సత్యం
- ద్వైతోత్థం పరిహాయ వాక్యజాలమ్ ।
- ఏవం త్వం త్వనిశం భజస్వ నిత్యం
- శాన్తోద్యఖిలవాక్ సమూహభావనా ॥ ౨౭॥
- సత్యత్వాభావభావితోఽనురూపశీలః ।
- సంపశ్యన్ జగదిదమాసమఞ్జసం సదా హి ॥ ౨౮॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే నిదాఘకృతగురుస్తుతివర్ణనం నామ పఞ్చచత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com