ఋభుగీతా ౩౭ ॥ సర్వ-సిద్ధాన్త ప్రకరణమ్ ॥

ఋభుః -

• నిదాఘ శృణు వక్ష్యామి రహస్యం పరమద్భుతమ్ ।
• శ్లోకైకశ్రవణేనైవ సద్యో మోక్షమవాప్నుయాత్ ॥ ౧॥
• ఇదం దృష్టం పరం బ్రహ్మ దృశ్యవద్భాతి చిత్తతః ।
• సర్వం చైతన్యమాత్రత్వాత్ నాన్యత్ కిఞ్చిన్న విద్యతే ॥ ౨॥
• ఇదమేవ హి నాస్త్యేవ అయమిత్యపి నాస్తి హి ।
• ఏక ఏవాప్యణుర్వాపి నాస్తి నాస్తి న సంశయః ॥ ౩॥
• వ్యవహారమిదం క్వాపి వార్తామాత్రమపి క్వ వా ।
• బన్ధరూపం బన్ధవార్తా బన్ధకార్యం పరం చ వా ॥ ౪॥
• సన్మాత్రకార్యం సన్మాత్రమహం బ్రహ్మేతి నిశ్చయమ్ ।
• దుఃఖం సుఖం వా బోధో వా సాధకం సాధ్యనిర్ణయః ॥ ౫॥
• ఆత్మేతి పరమాత్మేతి జీవాత్మేతి పృథఙ్ న హి ।
• దేహోఽహమితి మూర్తోఽహం జ్ఞానవిజ్ఞానవానహమ్ ॥ ౬॥
• కార్యకారణరూపోఽహమన్తఃకరణకార్యకమ్ ।
• ఏకమిత్యేకమాత్రం వా నాస్తి నాస్తీతి భావయ ॥ ౭॥
• సర్వసఙ్కల్పమాత్రేతి సర్వం బ్రహ్మేతి వా జగత్ ।
• తత్త్వజ్ఞానం పరం బ్రహ్మ ఓఙ్కారార్థం సుఖం జపమ్ ॥ ౮॥
• ద్వైతాద్వైతం సదాద్వైతం తథా మానావమానకమ్ ।
• సర్వం చైతన్యమాత్రత్వాత్ నాన్యత్ కిఞ్చిన్న విద్యతే ॥ ౯॥
• ఆత్మానన్దమహం బ్రహ్మ ప్రజ్ఞానం బ్రహ్మ ఏవ హి ।
• ఇదం రూపమహం రూపం ప్రియాప్రియవిచారణమ్ ॥ ౧౦॥
• యద్యత్ సంభావ్యతే లోకే యద్యత్ సాధనకల్పనమ్ ।
• యద్యన్తరహితం బ్రహ్మభావనం చిత్తనిర్మితమ్ ॥ ౧౧॥
• స్థూలదేహోఽహమేవాత్ర సూక్ష్మదేహోఽహమేవ హి ।
• బుద్ధేర్భేదం మనోభేదం అహంకారం జడం చ తత్ ॥ ౧౨॥
• సర్వం చైతన్యమాత్రత్వాత్ నాన్యత్ కిఞ్చిన్న విద్యతే ।
• శ్రవణం మననం చైవ సాక్షాత్కారవిచారణమ్ ॥ ౧౩॥
• ఆత్మైవాహం పరం చైవ నాహం మోహమయం స్వయమ్ ।
• బ్రహ్మైవ సర్వమేవేదం బ్రహ్మైవ పరమం పదమ్ ॥ ౧౪॥
• బ్రహ్మైవ కారణం కార్యం బ్రహ్మైవ జగతాం జయః ।
• బ్రహ్మైవ సర్వం చైతన్యం బ్రహ్మైవ మనసాయతే ॥ ౧౫॥
• బ్రహ్మైవ జీవవద్భాతి బ్రహ్మైవ చ హరీయతే ।
• బ్రహ్మైవ శివవద్భాతి బ్రహ్మైవ ప్రియమాత్మనః ॥ ౧౬॥
• బ్రహ్మైవ శాన్తివద్భాతి బ్రహ్మణోఽన్యన్న కిఞ్చన ।
• నాహం న చాయం నైవాన్యన్నోత్పన్నం న పరాత్ పరమ్ ॥ ౧౭॥
• న చేదం న చ శాస్త్రార్థం న మీమాంసం న చోద్భవమ్ ।
• న లక్షణం న వేదాది నాపి చిత్తం న మే మనః ॥ ౧౮॥
• న మే నాయం నేదమిదం న బుద్ధినిశ్చయం సదా ।
• కదాచిదపి నాస్త్యేవ సత్యం సత్యం న కిఞ్చన ॥ ౧౯॥
• నైకమాత్రం న చాయం వా నాన్తరం న బహిర్న హి ।
• ఈషణ్మాత్రం చ న ద్వైతం న జన్యం న చ దృశ్యకమ్ ॥ ౨౦॥
• న భావనం న స్మరణం న విస్మరణమణ్వపి ।
• న కాలదేశకలనం న సఙ్కల్పం న వేదనమ్ ॥ ౨౧॥
• న విజ్ఞానం న దేహాన్యం న వేదోఽహం న సంసృతిః ।
• న మే దుఃఖం న మే మోక్షం న గతిర్న చ దుర్గతిః ॥ ౨౨॥
• నాత్మా నాహం న జీవోఽహం న కూటస్థో న జాయతే ।
• న దేహోఽహం న చ శ్రోత్రం న త్వగిన్ద్రియదేవతా ॥ ౨౩॥
• సర్వం చైతన్యమాత్రత్వాత్ సర్వం నాస్త్యేవ సర్వదా ।
• అఖణ్డాకారరూపత్వాత్ సర్వం నాస్త్యేవ సర్వదా ॥ ౨౪॥
• హుంకారస్యావకాశో వా హుంకారజననం చ వా ।
• నాస్త్యేవ నాస్తి నాస్త్యేవ నాస్తి నాస్తి కదాచన ॥ ౨౫॥
• అన్యత్ పదార్థమల్పం వా అన్యదేవాన్యభాషణమ్ ।
• ఆత్మనోఽన్యదసత్యం వా సత్యం వా భ్రాన్తిరేవ చ ॥ ౨౬॥
• నాస్త్యేవ నాస్తి నాస్త్యేవ నాస్తి శబ్దోఽపి నాస్తి హి ।
• సర్వం చైతన్యమాత్రత్వాత్ సర్వం నాస్త్యేవ సర్వదా ॥ ౨౭॥
• సర్వం బ్రహ్మ న సన్దేహో బ్రహ్మైవాహం న సంశయః ।
• వాక్యం చ వాచకం సర్వం వక్తా చ త్రిపుటీద్వయమ్ ॥ ౨౮॥
• జ్ఞాతా జ్ఞానం జ్ఞేయభేదం మాతృమానమితి ప్రియమ్ ।
• యద్యచ్ఛాస్త్రేషు నిర్ణీతం యద్యద్వేదేషు నిశ్చితమ్ ॥ ౨౯॥
• పరాపరమతీతం చ అతీతోఽహమవేదనమ్ ।
• గురుర్గురూపదేశశ్చ గురుం వక్ష్యే న కస్యచిత్ ॥ ౩౦॥
• గురురూపా గురుశ్రద్ధా సదా నాస్తి గురుః స్వయమ్ ।
• ఆత్మైవ గురురాత్మైవ అన్యాభావాన్న సంశయః ॥ ౩౧॥
• ఆత్మనః శుభమాత్మైవ అన్యాభావాన్న సంశయః ।
• ఆత్మనో మోహమాత్మైవ ఆత్మనోఽస్తి న కిఞ్చన ॥ ౩౨॥
• ఆత్మనః సుఖమాత్మైవ అన్యన్నాస్తి న సంశయః ।
• ఆత్మన్యేవాత్మనః శక్తిః ఆత్మన్యేవాత్మనః ప్రియమ్ ॥ ౩౩॥
• ఆత్మన్యేవాత్మనః స్నానం ఆత్మన్యేవాత్మనో రతిః ।
• ఆత్మజ్ఞానం పరం శ్రేయః ఆత్మజ్ఞానం సుదుర్లభమ్ ॥ ౩౪॥
• ఆత్మజ్ఞానం పరం బ్రహ్మ ఆత్మజ్ఞానం సుఖాత్ సుఖమ్ ।
• ఆత్మజ్ఞానాత్ పరం నాస్తి ఆత్మజ్ఞానాత్ స్మృతిర్న హి ॥ ౩౫॥
• బ్రహ్మైవాత్మా న సన్దేహ ఆత్మైవ బ్రహ్మణః స్వయమ్ ।
• స్వయమేవ హి సర్వత్ర స్వయమేవ హి చిన్మయః ॥ ౩౬॥
• స్వయమేవ చిదాకాశః స్వయమేవ నిరన్తరమ్ ।
• స్వయమేవ చ నానాత్మా స్వయమేవ చ నాపరః ॥ ౩౭॥
• స్వయమేవ గుణాతీతః స్వయమేవ మహత్ సుఖమ్ ।
• స్వయమేవ హి శాన్తాత్మా స్వయమేవ హి నిష్కలః ॥ ౩౮॥
• స్వయమేవ చిదానన్దః స్వయమేవ మహత్ప్రభుః ।
• స్వయమేవ సదా సాక్షీ స్వయమేవ సదాశివః ॥ ౩౯॥
• స్వయమేవ హరిః సాక్షాత్ స్వయమేవ ప్రజాపతిః ।
• స్వయమేవ పరం బ్రహ్మ బ్రహ్మ ఏవ స్వయం సదా ॥ ౪౦॥
• సర్వం బ్రహ్మ స్వయం బ్రహ్మ స్వయం బ్రహ్మ న సంశయః ।
• దృఢనిశ్చయమేవ త్వం సర్వథా కురు సర్వదా ॥ ౪౧॥
• విచారయన్ స్వయం బ్రహ్మ బ్రహ్మమాత్రం స్వయం భవేత్ ।
• ఏతదేవ పరం బ్రహ్మ అహం బ్రహ్మేతి నిశ్చయః ॥ ౪౨॥
• ఏష ఏవ పరో మోక్ష అహం బ్రహ్మేతి నిశ్చయః ।
• ఏష ఏవ కృతార్థో హి ఏష ఏవ సుఖం సదా ॥ ౪౩॥
• ఏతదేవ సదా జ్ఞానం స్వయం బ్రహ్మ స్వయం మహత్ ।
• అహం బ్రహ్మ ఏతదేవ సదా జ్ఞానం స్వయం మహత్ ॥ ౪౪॥
• అహం బ్రహ్మ ఏతదేవ స్వభావం సతతం నిజమ్ ।
• అహం బ్రహ్మ ఏతదేవ సదా నిత్యం స్వయం సదా ॥ ౪౫॥
• అహం బ్రహ్మ ఏతదేవ బన్ధనాశం న సంశయః ।
• అహం బ్రహ్మ ఏతదేవ సర్వసిద్ధాన్తనిశ్చయమ్ ॥ ౪౬॥
• ఏష వేదాన్తసిద్ధాన్త అహం బ్రహ్మ న సంశయః ।
• సర్వోపనిషదామర్థః సర్వానన్దమయం జగత్ ॥ ౪౭॥
• మహావాక్యస్య సిద్ధాన్త అహం బ్రహ్మేతి నిశ్చయః ।
• సాక్షాచ్ఛివస్య సిద్ధాన్త అహం బ్రహ్మేతి నిశ్చయః ॥ ౪౮॥
• నారాయణస్య సిద్ధాన్త అహం బ్రహ్మేతి నిశ్చయః ।
• చతుర్ముఖస్య సిద్ధాన్త అహం బ్రహ్మేతి నిశ్చయః ॥ ౪౯॥
• ఋషీణాం హృదయం హ్యేతత్ దేవానాముపదేశకమ్ ।
• సర్వదేశికసిద్ధాన్త అహం బ్రహ్మేతి నిశ్చయః ॥ ౫౦॥
• యచ్చ యావచ్చ భూతానాం మహోపదేశ ఏవ తత్ ।
• అహం బ్రహ్మ మహామోక్షం పరం చైతదహం స్వయమ్ ॥ ౫౧॥
• అహం చానుభవం చైతన్మహాగోప్యమిదం చ తత్ ।
• అహం బ్రహ్మ ఏతదేవ సదా జ్ఞానం స్వయం మహత్ ॥ ౫౨॥
• మహాప్రకాశమేవైతత్ అహం బ్రహ్మ ఏవ తత్ ।
• ఏతదేవ మహామన్త్రం ఏతదేవ మహాజపః ॥ ౫౩॥
• ఏతదేవ మహాస్నానమహం బ్రహ్మేతి నిశ్చయః ।
• ఏతదేవ మహాతీర్థమహం బ్రహ్మేతి నిశ్చయః ॥ ౫౪॥
• ఏతదేవ మహాగఙ్గా అహం బ్రహ్మేతి నిశ్చయః ।
• ఏష ఏవ పరో ధర్మ అహం బ్రహ్మేతి నిశ్చయః ॥ ౫౫॥
• ఏష ఏవ మహాకాశ అహం బ్రహ్మేతి నిశ్చయః ।
• ఏతదేవ హి విజ్ఞానమహం బ్రహ్మాస్మి కేవలమ్ ।
• సర్వసిద్ధాన్తమేవైతదహం బ్రహ్మేతి నిశ్చయః ॥ ౫౬॥
• సవ్యాసవ్యతయాద్యవజ్ఞహృదయా గోపోదహార్యః స్రియః
• పశ్యన్త్యమ్బుజమిత్రమణ్డలగతం శంభుం హిరణ్యాత్మకమ్ ।
• సర్వత్ర ప్రసృతైః కరైర్జగదిదం పుష్ణాతి ముష్ణన్ ధనైః
• ఘృష్టం చౌషధిజాలమమ్బునికరైర్విశ్వోత్థధూతం హరః ॥ ౫౭॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే సర్వసిద్ధాన్తప్రకరణం నామ సప్తత్రింశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com