ఋభుగీతా ౪౪ ॥ నిదాధానుభవ వర్ణన ప్రకరణమ్ ॥
నిదాఘః -
- శృణుశ్వ సద్గురో బ్రహ్మన్ త్వత్ప్రసాదాన్వినిశ్చితమ్ ।
- అహమేవ హి తద్బ్రహ్మ అహమేవ హి కేవలమ్ ॥ ౧॥
- అహమేవ హి నిత్యాత్మా అహమేవ సదాఽజరః ।
- అహమేవ హి శాన్తాత్మా అహమేవ హి నిష్కలః ॥ ౨॥
- అహమేవ హి నిశ్చిన్తః అహమేవ సుఖాత్మకః ।
- అహమేవ గురుస్త్వం హి అహం శిష్యోఽస్మి కేవలమ్ ॥ ౩॥
- అహమానన్ద ఏవాత్మా అహమేవ నిరఞ్జనః ।
- అహం తుర్యాతిగో హ్యాత్మా అహమేవ గుణోజ్ఝితః ॥ ౪॥
- అహం విదేహ ఏవాత్మా అహమేవ హి శఙ్కరః ।
- అహం వై పరిపూర్ణాత్మా అహమేవేశ్వరః పరః ॥ ౫॥
- అహమేవ హి లక్ష్యాత్మా అహమేవ మనోమయః ।
- అహమేవ హి సర్వాత్మా అహమేవ సదాశివః ॥ ౬॥
- అహం విష్ణురహం బ్రహ్మా అహమిన్ద్రస్త్వహం సురాః ।
- అహం వై యక్షరక్షాంసి పిశాచా గుహ్యకాస్తథా ॥ ౭॥
- అహం సముద్రాః సరిత అహమేవ హి పర్వతాః ।
- అహం వనాని భువనం అహమేవేదమేవ హి ॥ ౮॥
- నిత్యతృప్తో హ్యహం శుద్ధబుద్ధోఽహం ప్రకృతేః పరః ।
- అహమేవ హి సర్వత్ర అహమేవ హి సర్వగః ॥ ౯॥
- అహమేవ మహానాత్మా సర్వమఙ్గలవిగ్రహః ।
- అహమేవ హి ముక్తోఽస్మి శుద్ధోఽస్మి పరమః శివః ॥ ౧౦॥
- అహం భూమిరహం వాయురహం తేజో హ్యహం నభః ।
- అహం జలమహం సూర్యశ్చన్ద్రమా భగణా హ్యహమ్ ॥ ౧౧॥
- అహం లోకా అలోకాశ్చ అహం లోక్యా అహం సదా ।
- అహమాత్మా పారదృశ్య అహం ప్రజ్ఞానవిగ్రహః ॥ ౧౨॥
- అహం శూన్యో అశూన్యోఽహం సర్వానన్దమయోఽస్మ్యహమ్ ।
- శుభాశుభఫలాతీతో హ్యహమేవ హి కేవలమ్ ॥ ౧౩॥
- అహమేవ ఋతం సత్యమహం సచ్చిత్సుఖాత్మకః ।
- అహమానన్ద ఏవాత్మా బహుధా చైకధా స్థితః ॥ ౧౪॥
- అహం భూతభవిష్యం చ వర్తమానమహం సదా ।
- అహమేకో ద్విధాహం చ బహుధా చాహమేవ హి ॥ ౧౫॥
- అహమేవ పరం బ్రహ్మ అహమేవ ప్రజాపతిః ।
- స్వరాట్ సమ్రాడ్ జగద్యోనిరహమేవ హి సర్వదా ॥ ౧౬॥
- అహం విశ్వస్తైజసశ్చ ప్రాజ్ఞోఽహం తుర్య ఏవ హి ।
- అహం ప్రాణో మనశ్చాహమహమిద్రియవర్గకః ॥ ౧౭॥
- అహం విశ్వం హి భువనం గగనాత్మాహమేవ హి ।
- అనుపాధి ఉపాధ్యం యత్తత్సర్వమహమేవ హి ॥ ౧౮॥
- ఉపాధిరహితశ్చాహం నిత్యానన్దోఽహమేవ హి ।
- ఏవం నిశ్చయవానన్తః సర్వదా సుఖమశ్నుతే ।
- ఏవం యః శృణుయాన్నిత్యం సర్వపాపైః ప్రముచ్యతే ॥ ౧౯॥
- నిత్యోఽహం నిర్వికల్పో జనవనభువనే పావనోఽహం మనీషీ
- విశ్వో విశ్వాతిగోఽహం ప్రకృతివినికృతో ఏకధా సంస్థితోఽహమ్ ।
- నానాకారవినాశజన్మరహితస్వజ్ఞానకార్యోజ్ఝితైః
- భూమానన్దఘనోఽస్మ్యహం పరశివః సత్యస్వరూపోఽస్మ్యహమ్ ॥ ౨౦॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే నిదాఘానుభవవర్ణనం నామ చతుశ్చత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com