ఋభుగీతా ౪౮ ॥ స్కన్ద-కృత శివవ్రతోపదేశ వర్ణనమ్ ॥
స్కన్దః -
- జ్ఞానాఙ్గసాధనం వక్ష్యే శృణు వక్ష్యామి తే హితమ్ ।
- యత్ కృత్వా జ్ఞానమాప్నోతి తత్ ప్రాదాత్ పరమేష్ఠినః ॥ ౧॥
- జైగీషవ్య శృణుష్వైతత్ సావధానేన చేతసా ।
- ప్రథమం వేదసంప్రోక్తం కర్మాచరణమిష్యతే ॥ ౨॥
- ఉపనీతో ద్విజో వాపి వైశ్యః క్షత్రియ ఏవ వా ।
- అగ్నిరిత్యాదిభిర్మన్త్రైర్భస్మధృక్ పూయతే త్వఘైః ॥ ౩॥
- త్రియాయుషైస్త్ర్యమ్బకైశ్చ త్రిపుణ్డ్రం భస్మనాఽఽచరేత్ ।
- లిఙ్గార్చనపరో నిత్యం రుద్రాక్షాన్ ధారయన్ క్రమైః ॥ ౪॥
- కణ్ఠే బాహ్వోర్వక్షసీ చ మాలాభిః శిరసా తథా ।
- త్రిపుణ్డ్రవద్ధారయేత రుద్రాక్షాన్ క్రమశో మునే ॥ ౫॥
- ఏకాననం ద్వివక్త్రం వా త్రివక్త్రం చతురాస్యకమ్ ।
- పఞ్చవక్త్రం చ షట్ సప్త తథాష్టదశకం నవ ॥ ౬॥
- ఏకాదశం ద్వాదశం వా తథోర్ధ్వం ధారయేత్ క్రమాత్ ।
- భస్మధారణమాత్రేణ ప్రసీదతి మహేశ్వరః ॥ ౭॥
- రుద్రాక్షధారణాదేవ నరో రుద్రత్వమాప్నుయాత్ ।
- భస్మరుద్రాక్షధృఙ్మర్త్యో జ్ఞానాఙ్గీ భవతి ప్రియః ॥ ౮॥
- రుద్రాధ్యాయీ భస్మనిష్ఠః పఞ్చాక్షరజపాధరః ।
- భస్మోద్ధూలితదేహోఽయం శ్రీరుద్రం ప్రజపన్ ద్విజః ॥ ౯॥
- సర్వపాపైర్విముక్తశ్చ జ్ఞాననిష్ఠో భవేన్మునే ।
- భస్మసంఛన్నసర్వాఙ్గో భస్మఫాలత్రిపుణ్డ్రకః ॥ ౧౦॥
- వేదమౌలిజవాక్యేషు విచారాధికృతో భవేత్ ।
- నాన్యపుణ్డ్రధరో విప్రో యతిర్వా విప్రసత్తమ ॥ ౧౧॥
- శమాదినియమోపేతః క్షమాయుక్తోఽప్యసంస్కృతః ।
- శిరోవ్రతమిదం ప్రోక్తం భస్మధారణమేవ హి ॥ ౧౨॥
- శిరోవ్రతం చ విధివద్యైశ్చీర్ణం మునిసత్తమ ।
- తేషామేవ బ్రహ్మవిద్యాం వదేత గురురాస్తికః ॥ ౧౩॥
- శాంభవా ఏవ వేదేషు నిష్ఠా నష్టాశుభాః పరమ్ ।
- శివప్రసాదసంపన్నో భస్మరుద్రాక్షధారకః ॥ ౧౪॥
- రుద్రాధ్యాయజపాసక్తః పఞ్చాక్షరపరాయణః ।
- స ఏవ వేదవేదాన్తశ్రవణేఽధికృతో భవేత్ ॥ ౧౫॥
- నాన్యపుణ్డ్రధరో విప్రః కృత్వాపి శ్రవణం బహు ।
- నైవ లభ్యేత తద్జ్ఞానం ప్రసాదేన వినేశితుః ॥ ౧౬॥
- ప్రసాదజనకం శమ్భోర్భస్మధారణమేవ హి ।
- శివప్రసాదహీనానాం జ్ఞానం నైవోపజాయతే ॥ ౧౭॥
- ప్రసాదే సతి దేవస్య విజ్ఞానస్ఫురణం భవేత్ ।
- రుద్రాధ్యాయజాపినాం తు భస్మధారణపూర్వకమ్ ॥ ౧౮॥
- ప్రసాదో జాయతే శమ్భోః పునరావృత్తివర్జితః ।
- ప్రసాదే సతి దేవస్య వేదాన్తస్ఫురణం భవేత్ ॥ ౧౯॥
- తస్యైవాకథితా హ్యర్థాః ప్రకాశన్తే మహాత్మనః ।
- పఞ్చాక్షరజపాదేవ పఞ్చాస్యధ్యానపూర్వకమ్ ॥ ౨౦॥
- తస్యైవ భవతి జ్ఞానం శివప్రోక్తమిదం ధ్రువమ్ ।
- సర్వం శివాత్మకం భాతి జగదేతత్ చరాచరమ్ ॥ ౨౧॥
- స ప్రసాదో మహేశస్య విజ్ఞేయః శాంభవోత్తమైః ।
- శివలిఙ్గార్చనాదేవ ప్రసాదః శాంభవోత్తమే ॥ ౨౨॥
- నియమాద్బిల్వపత్రైశ్చ భస్మధారణపూర్వకమ్ ।
- ప్రసాదో జాయతే శమ్భోః సాక్షాద్జ్ఞానప్రకాశకః ॥ ౨౩॥
- శివక్షేత్రనివాసేన జ్ఞానం సమ్యక్ దృఢం భవేత్ ।
- శివక్షేత్రనివాసే తు భస్మధార్యధికారవాన్ ॥ ౨౪॥
- నక్తాశనార్చనాదేవ ప్రీయేత భగవాన్ భవః ।
- ప్రదోషపూజనం శంభోః ప్రసాదజనకం పరమ్ ॥ ౨౫॥
- సోమవారే నిశీథేషు పూజనం ప్రియమీశితుః ।
- భూతాయాం భూతనాథస్య పూజనం పరమం ప్రియమ్ ॥ ౨౬॥
- శివశబ్దోచ్చారణం చ ప్రసాదజనకం మహత్ ।
- జ్ఞానాఙ్గసాధనేష్వేవం శివభక్తార్చనం మహత్ ॥ ౨౭॥
- భక్తానామర్చనాదేవ శివః ప్రీతో భవిష్యతి ।
- ఇత్యేతత్తం సమాసేన జ్ఞానాఙ్గం కథితం మయా ।
- అకైతవేన భావేన శ్రవణీయో మహేశ్వరః ॥ ౨౮॥
సూతః -
- యః కోఽపి ప్రసభం ప్రదోషసమయే బిల్వీదలాలఙ్కృతం
- లిఙ్గం తుఙ్గమపారపుణ్యవిభవైః పశ్యేదథార్చేత వా ।
- ప్రాప్తం రాజ్యమవాప్య కామహృదయస్తుష్యేదకామో యది
- ముక్తిద్వారమపావృతం స తు లభేత్ శమ్భోః కటాక్షాఙ్కురైః ॥ ౨౯॥
- అచలాతులరాజకన్యకాకుచలీలామలబాహుజాలమీశమ్ ।
- భజతామనలాక్షిపాదపద్మం భవలీలం న భవేత చిత్తబాలమ్ ॥ ౩౦॥
- భస్మత్రిపుణ్డ్రరచితాఙ్గకబాహుఫాల-
- రుద్రాక్షజాలకవచాః శ్రుతిసూక్తిమాలాః ।
- వేదోరురత్నపదకాఙ్కితశమ్భునామ-
- లోలా హి శాంభవవరాః పరిశీలయన్తి ॥ ౩౧॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే స్కన్దకృతశివవ్రతోపదేశవర్ణనం నామ అష్టచత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com