ఋభుగీతా ౬ ॥ ప్రపఞ్చస్య సచ్చిన్మయత్వ కథనమ్ ॥

ఈశ్వరః -

• వ్రతాని మిథ్యా భువనాని మిథ్యా
• భావాది మిథ్యా భవనాని మిథ్యా ।
• భయం చ మిథ్యా భరణాది మిథ్యా
• భుక్తం చ మిథ్యా బహుబన్ధమిథ్యా ॥ ౧॥
• వేదాశ్చ మిథ్యా వచనాని మిథ్యా
• వాక్యాని మిథ్యా వివిధాని మిథ్యా ।
• విత్తాని మిథ్యా వియదాది మిథ్యా
• విధుశ్చ మిథ్యా విషయాది మిథ్యా ॥ ౨॥
• గురుశ్చ మిథ్యా గుణదోషమిథ్యా
• గుహ్యం చ మిథ్యా గణనా చ మిథ్యా ।
• గతిశ్చ మిథ్యా గమనం చ మిథ్యా
• సర్వం చ మిథ్యా గదితం చ మిథ్యా ॥ ౩॥
• వేదశాస్త్రపురాణం చ కార్యం కారణమీశ్వరః ।
• లోకో భూతం జనం చైవ సర్వం మిథ్యా న సంశయః ॥ ౪॥
• బన్ధో మోక్షః సుఖం దుఃఖం ధ్యానం చిత్తం సురాసురాః ।
• గౌణం ముఖ్యం పరం చాన్యత్ సర్వం మిథ్యా న సంశయః ॥ ౫॥
• వాచా వదతి యత్కిఞ్చిత్ సర్వం మిథ్యా న సంశయః ।
• సఙ్కల్పాత్ కల్ప్యతే యద్యత్ మనసా చిన్త్యతే చ యత్ ॥ ౬॥
• బుద్ధ్యా నిశ్చీయతే కిఞ్చిత్ చిత్తేన నీయతే క్వచిత్ ।
• ప్రపఞ్చే పఞ్చతే యద్యత్ సర్వం మిథ్యేతి నిశ్చయః ॥ ౭॥
• శ్రోత్రేణ శ్రూయతే యద్యన్నేత్రేణ చ నిరీక్ష్యతే ।
• నేత్రం శ్రోత్రం గాత్రమేవ సర్వం మిథ్యా న సంశయః ॥ ౮॥
• ఇదమిత్యేవ నిర్దిష్టమిదమిత్యేవ కల్పితమ్ ।
• యద్యద్వస్తు పరిజ్ఞాతం సర్వం మిథ్యా న సంశయః ॥ ౯॥
• కోఽహం కిన్తదిదం సోఽహం అన్యో వాచయతే నహి ।
• యద్యత్ సంభావ్యతే లోకే సర్వం మిథ్యేతి నిశ్చయః ॥ ౧౦॥
• సర్వాభ్యాస్యం సర్వగోప్యం సర్వకారణవిభ్రమః ।
• సర్వభూతేతి వార్తా చ మిథ్యేతి చ వినిశ్చయః ॥ ౧౧॥
• సర్వభేదప్రభేదో వా సర్వసంకల్పవిభ్రమః ।
• సర్వదోషప్రభేదశ్చ సర్వం మిథ్యా న సంశయః ॥ ౧౨॥
• రక్షకో విష్ణురిత్యాది బ్రహ్మసృష్టేస్తు కారణమ్ ।
• సంహారే శివ ఇత్యేవం సర్వం మిథ్యా న సంశయః ॥ ౧౩॥
• స్నానం జపస్తపో హోమః స్వాధ్యాయో దేవపూజనమ్ ।
• మన్త్రో గోత్రం చ సత్సఙ్గః సర్వం మిథ్యా న సంశయః ॥ ౧౪॥
• సర్వం మిథ్యా జగన్మిథ్యా భూతం భవ్యం భవత్తథా ।
• నాస్తి నాస్తి విభావేన సర్వం మిథ్యా న సంశయః ॥ ౧౫॥
• చిత్తభేదో జగద్భేదః అవిద్యాయాశ్చ సంభవః ।
• అనేకకోటిబ్రహ్మాణ్డాః సర్వం బ్రహ్మేతి నిశ్చిను ॥ ౧౬॥
• లోకత్రయేషు సద్భావో గుణదోషాదిజృంభణమ్ ।
• సర్వదేశికవార్తోక్తిః సర్వం బ్రహ్మేతి నిశ్చిను ॥ ౧౭॥
• ఉత్కృష్టం చ నికృష్టం చ ఉత్తమం మధ్యమం చ తత్ ।
• ఓంకారం చాప్యకారం చ సర్వం బ్రహ్మేతి నిశ్చిను ॥ ౧౮॥
• యద్యజ్జగతి దృశ్యేత యద్యజ్జగతి వీక్ష్యతే ।
• యద్యజ్జగతి వర్తేత సర్వం బ్రహ్మేతి నిశ్చిను ॥ ౧౯॥
• యేన కేనాక్షరేణోక్తం యేన కేనాపి సఙ్గతమ్ ।
• యేన కేనాపి నీతం తత్ సర్వం బ్రహ్మేతి నిశ్చిను ॥ ౨౦॥
• యేన కేనాపి గదితం యేన కేనాపి మోదితమ్ ।
• యేన కేనాపి చ ప్రోక్తం సర్వం బ్రహ్మేతి నిశ్చిను ॥ ౨౧॥
• యేన కేనాపి యద్దత్తం యేన కేనాపి యత్ కృతమ్ ।
• యత్ర కుత్ర జలస్నానం సర్వం బ్రహ్మేతి నిశ్చిను ॥ ౨౨॥
• యత్ర యత్ర శుభం కర్మ యత్ర యత్ర చ దుష్కృతమ్ ।
• యద్యత్ కరోషి సత్యేన సర్వం మిథ్యేతి నిశ్చిను ॥ ౨౩॥
• ఇదం సర్వమహం సర్వం సర్వం బ్రహ్మేతి నిశ్చిను ।
• యత్ కిఞ్చిత్ ప్రతిభాతం చ సర్వం మిథ్యేతి నిశ్చిను ॥ ౨౪॥

ఋభుః -

• పునర్వక్ష్యే రహస్యానాం రహస్యం పరమాద్భుతమ్ ।
• శఙ్కరేణ కుమారాయ ప్రోక్తం కైలాస పర్వతే ॥ ౨౫॥
• తన్మాత్రం సర్వచిన్మాత్రమఖణ్డైకరసం సదా ।
• ఏకవర్జితచిన్మాత్రం సర్వం చిన్మయమేవ హి ॥ ౨౬॥
• ఇదం చ సర్వం చిన్మాత్రం సర్వం చిన్మయమేవ హి ।
• ఆత్మాభాసం చ చిన్మాత్రం సర్వం చిన్మయమేవ హి ॥ ౨౭॥
• సర్వలోకం చ చిన్మాత్రం సర్వం చిన్మయమేవ హి ।
• త్వత్తా మత్తా చ చిన్మాత్రం చిన్మాత్రాన్నాస్తి కిఞ్చన ॥ ౨౮॥
• ఆకాశో భూర్జలం వాయురగ్నిర్బ్రహ్మా హరిః శివః ।
• యత్కిఞ్చిదన్యత్ కిఞ్చిచ్చ సర్వం చిన్మయమేవ హి ॥ ౨౯॥
• అఖణ్డైకరసం సర్వం యద్యచ్చిన్మాత్రమేవ హి ।
• భూతం భవ్యం చ చిన్మాత్రం సర్వం చిన్మయమేవ హి ॥ ౩౦॥
• ద్రవ్యం కాలశ్చ చిన్మాత్రం జ్ఞానం చిన్మయమేవ చ ।
• జ్ఞేయం జ్ఞానం చ చిన్మాత్రం సర్వం చిన్మయమేవ హి ॥ ౩౧॥
• సంభాషణం చ చిన్మాత్రం వాక్ చ చిన్మాత్రమేవ హి ।
• అసచ్చ సచ్చ చిన్మాత్రం సర్వం చిన్మయమేవ హి ॥ ౩౨॥
• ఆదిరన్తం చ చిన్మాత్రం అస్తి చేచ్చిన్మయం సదా ।
• బ్రహ్మా యద్యపి చిన్మాత్రం విష్ణుశ్చిన్మాత్రమేవ హి ॥ ౩౩॥
• రుద్రోఽపి దేవాశ్చిన్మాత్రం అస్తి నరతిర్యక్సురాసురమ్ ।
• గురుశిష్యాది సన్మాత్రం జ్ఞానం చిన్మాత్రమేవ హి ॥ ౩౪॥
• దృగ్దృశ్యం చాపి చిన్మాత్రం జ్ఞాతా జ్ఞేయం ధ్రువాధ్రువమ్ ।
• సర్వాశ్చర్యం చ చిన్మాత్రం దేహం చిన్మాత్రమేవ హి ॥ ౩౫॥
• లిఙ్గం చాపి చ చిన్మాత్రం కారణం కార్యమేవ చ ।
• మూర్తామూర్తం చ చిన్మాత్రం పాపపుణ్యమథాపి చ ॥ ౩౬॥
• ద్వైతాద్వైతం చ చిన్మాత్రం వేదవేదాన్తమేవ చ ।
• దిశోఽపి విదిశశ్చైవ చిన్మాత్రం తస్య పాలకాః ॥ ౩౭॥
• చిన్మాత్రం వ్యవహారాది భూతం భవ్యం భవత్తథా ।
• చిన్మాత్రం నామరూపం చ భూతాని భువనాని చ ॥ ౩౮॥
• చిన్మాత్రం ప్రాణ ఏవేహ చిన్మాత్రం సర్వమిన్ద్రియమ్ ।
• చిన్మాత్రం పఞ్చకోశాది చిన్మాత్రానన్దముచ్యతే ॥ ౩౯॥
• నిత్యానిత్యం చ చిన్మాత్రం సర్వం చిన్మాత్రమేవ హి ।
• చిన్మాత్రం నాస్తి నిత్యం చ చిన్మాత్రం నాస్తి సత్యకమ్ ॥ ౪౦॥
• చిన్మాత్రమపి వైరాగ్యం చిన్మాత్రకమిదం కిల ।
• ఆధారాది హి చిన్మాత్రం ఆధేయం చ మునీశ్వర ॥ ౪౧॥
• యచ్చ యావచ్చ చిన్మాత్రం యచ్చ యావచ్చ దృశ్యతే ।
• యచ్చ యావచ్చ దూరస్థం సర్వం చిన్మాత్రమేవ హి ॥ ౪౨॥
• యచ్చ యావచ్చ భూతాని యచ్చ యావచ్చ వక్ష్యతే ।
• యచ్చ యావచ్చ వేదోక్తం సర్వం చిన్మాత్రమేవ హి ॥ ౪౩॥
• చిన్మాత్రం నాస్తి బన్ధం చ చిన్మాత్రం నాస్తి మోక్షకమ్ ।
• చిన్మాత్రమేవ సన్మాత్రం సత్యం సత్యం శివం స్పృశే ॥ ౪౪॥
• సర్వం వేదత్రయప్రోక్తం సర్వం చిన్మాత్రమేవ హి ।
• శివప్రోక్తం కుమారాయ తదేతత్ కథితం త్వయి ।
• యః శృణోతి సకృద్వాపి బ్రహ్మైవ భవతి స్వయమ్ ॥ ౪౫॥

సూతః -

• ఈశావాస్యాదిమన్త్రైర్వరగగనతనోః క్షేత్రవాసార్థవాదైః
• తల్లిఙ్గాగారమధ్యస్థితసుమహదీశాన లిఙ్గేషు పూజా ।
• అక్లేద్యే చాభిషేకో ... ... ... దిగ్వాససే వాసదానం
• నో గన్ధఘ్రాణహీనే రూపదృశ్యాద్విహీనే గన్ధపుష్పార్పణాని ॥ ౪౬॥
• స్వభాసే దీపదానం ... సర్వభక్షే మహేశే
• నైవేద్యం నిత్యతృప్తే సకలభువనగే ప్రక్రమో వా నమస్యా ।
• కుర్యాం కేనాపి భావైర్మమ నిగమశిరోభావ ఏవ ప్రమాణమ్ ॥ ౪౭॥
• అవిచ్ఛిన్నైశ్ఛిన్నైః పరికరవరైః పూజనధియా
• భజన్త్యజ్ఞాస్తద్జ్ఞాః విధివిహితబుద్ధ్యాగతధియః ।var was తదజ్ఞాః
• తథాపీశం భావైర్భజతి భజతామాత్మపదవీం
• దదాతీశో విశ్వం భ్రమయతి గతజ్ఞాంశ్చ కురుతే ॥ ౪౮॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే ప్రపఞ్చస్య సచ్చిన్మయత్వకథనం నామ షష్ఠోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com