ఋభుగీతా ౨౨ ॥ నామ-రూప నిషేధ ప్రకరణమ్ ॥

ఋభుః -

• వక్ష్యే బ్రహ్మమయం సర్వం నాస్తి సర్వం జగన్మృషా ।
• అహం బ్రహ్మ న మే చిన్తా అహం బ్రహ్మ న మే జడమ్ ॥ ౧॥
• అహం బ్రహ్మ న మే దోషః అహం బ్రహ్మ న మే ఫలమ్ ।
• అహం బ్రహ్మ న మే వార్తా అహం బ్రహ్మ న మే ద్వయమ్ ॥ ౨॥
• అహం బ్రహ్మ న మే నిత్యమహం బ్రహ్మ న మే గతిః ।
• అహం బ్రహ్మ న మే మాతా అహం బ్రహ్మ న మే పితా ॥ ౩॥
• అహం బ్రహ్మ న మే సోఽయమహం వైశ్వానరో న హి ।
• అహం బ్రహ్మ చిదాకాశమహం బ్రహ్మ న సంశయః ॥ ౪॥
• సర్వాన్తరోఽహం పూర్ణాత్మా సర్వాన్తరమనోఽన్తరః ।
• అహమేవ శరీరాన్తరహమేవ స్థిరః సదా ॥ ౫॥
• ఏవం విజ్ఞానవాన్ ముక్త ఏవం జ్ఞానం సుదుర్లభమ్ ।
• అనేకశతసాహస్త్రేష్వేక ఏవ వివేకవాన్ ॥ ౬॥
• తస్య దర్శనమాత్రేణ పితరస్తృప్తిమాగతాః ।
• జ్ఞానినో దర్శనం పుణ్యం సర్వతీర్థావగాహనమ్ ॥ ౭॥
• జ్ఞానినః చార్చనేనైవ జీవన్ముక్తో భవేన్నరః ।
• జ్ఞానినో భోజనే దానే సద్యో ముక్తో భవేన్నరః ॥ ౮॥
• అహం బ్రహ్మ న సన్దేహః అహమేవ గురుః పరః ।
• అహం శాన్తోఽస్మి శుద్ధోఽస్మి అహమేవ గుణాన్తరః ॥ ౯॥
• గుణాతీతో జనాతీతః పరాతీతో మనః పరః ।
• పరతః పరతోఽతీతో బుద్ధ్యాతీతో రసాత్ పరః ॥ ౧౦॥
• భావాతీతో మనాతీతో వేదాతీతో విదః పరః ।
• శరీరాదేశ్చ పరతో జాగ్రత్స్వప్నసుషుప్తితః ॥ ౧౧॥
• అవ్యక్తాత్ పరతోఽతీత ఇత్యేవం జ్ఞాననిశ్చయః ।
• క్వచిదేతత్పరిత్యజ్య సర్వం సంత్యజ్య మూకవత్ ॥ ౧౨॥
• తూష్ణీం బ్రహ్మ పరం బ్రహ్మ శాశ్వతబ్రహ్మవాన్ స్వయమ్ ।
• జ్ఞానినో మహిమా కిఞ్చిదణుమాత్రమపి స్ఫుటమ్ ॥ ౧౩॥
• హరిణాపి హరేణాపి బ్రహ్మణాపి సురైరపి ।
• న శక్యతే వర్ణయితుం కల్పకోటిశతైరపి ॥ ౧౪॥
• అహం బ్రహ్మేతి విజ్ఞానం త్రిషు లోకేషు దుర్లభమ్ ।
• వివేకినం మహాత్మానం బ్రహ్మమాత్రేణావస్థితమ్ ॥ ౧౫॥
• ద్రష్టుం చ భాషితుం వాపి దుర్లభం పాదసేవనమ్ ।
• కదాచిత్ పాదతీర్థేన స్నాతశ్చేత్ బ్రహ్మ ఏవ సః ॥ ౧౬॥
• సర్వం మిథ్యా న సన్దేహః సర్వం బ్రహ్మైవ కేవలమ్ ।
• ఏతత్ ప్రకరణం ప్రోక్తం సర్వసిద్ధాన్తసంగ్రహః ॥ ౧౭॥
• దుర్లభం యః పఠేద్భక్త్యా బ్రహ్మ సంపద్యతే నరః ।
• వక్ష్యే బ్రహ్మమయం సర్వం నాన్యత్ సర్వం జగన్మృషా ॥ ౧౮॥
• బ్రహ్మైవ జగదాకారం బ్రహ్మైవ పరమం పదమ్ ।
• అహమేవ పరం బ్రహ్మ అహమిత్యపి వర్జితః ॥ ౧౯॥
• సర్వవర్జితచిన్మాత్రం సర్వవర్జితచేతనః ।
• సర్వవర్జితశాన్తాత్మా సర్వమఙ్గలవిగ్రహః ॥ ౨౦॥
• అహం బ్రహ్మ పరం బ్రహ్మ అసన్నేదం న మే న మే ।
• న మే భూతం భవిష్యచ్చ న మే వర్ణం న సంశయః ॥ ౨౧॥
• బ్రహ్మైవాహం న మే తుచ్ఛం అహం బ్రహ్మ పరం తపః ।
• బ్రహ్మరూపమిదం సర్వం బ్రహ్మరూపమనామయమ్ ॥ ౨౨॥
• బ్రహ్మైవ భాతి భేదేన బ్రహ్మైవ న పరః పరః ।
• ఆత్మైవ ద్వైతవద్భాతి ఆత్మైవ పరమం పదమ్ ॥ ౨౩॥
• బ్రహ్మైవం భేదరహితం భేదమేవ మహద్భయమ్ ।
• ఆత్మైవాహం నిర్మలోఽహమాత్మైవ భువనత్రయమ్ ॥ ౨౪॥
• ఆత్మైవ నాన్యత్ సర్వత్ర సర్వం బ్రహ్మైవ నాన్యకః ।
• అహమేవ సదా భామి బ్రహ్మైవాస్మి పరోఽస్మ్యహమ్ ॥ ౨౫॥
• నిర్మలోఽస్మి పరం బ్రహ్మ కార్యాకార్యవివర్జితః ।
• సదా శుద్ధైకరూపోఽస్మి సదా చైతన్యమాత్రకః ॥ ౨౬॥
• నిశ్చయోఽస్మి పరం బ్రహ్మ సత్యోఽస్మి సకలోఽస్మ్యహమ్ ।
• అక్షరోఽస్మి పరం బ్రహ్మ శివోఽస్మి శిఖరోఽస్మ్యహమ్ ॥ ౨౭॥
• సమరూపోఽస్మి శాన్తోఽస్మి తత్పరోఽస్మి చిదవ్యయః ।
• సదా బ్రహ్మ హి నిత్యోఽస్మి సదా చిన్మాత్రలక్షణః ॥ ౨౮॥
• సదాఽఖణ్డైకరూపోఽస్మి సదామానవివర్జితః ।
• సదా శుద్ధైకరూపోఽస్మి సదా చైతన్యమాత్రకః ॥ ౨౯॥
• సదా సన్మానరూపోఽస్మి సదా సత్తాప్రకాశకః ।
• సదా సిద్ధాన్తరూపోఽస్మి సదా పావనమఙ్గలః ॥ ౩౦॥
• ఏవం నిశ్చితవాన్ ముక్తః ఏవం నిత్యపరో వరః ।
• ఏవం భావనయా యుక్తః పరం బ్రహ్మైవ సర్వదా ॥ ౩౧॥
• ఏవం బ్రహ్మాత్మవాన్ జ్ఞానీ బ్రహ్మాహమితి నిశ్చయః ।
• స ఏవ పురుషో లోకే బ్రహ్మాహమితి నిశ్చితః ॥ ౩౨॥
• స ఏవ పురుషో జ్ఞానీ జీవన్ముక్తః స ఆత్మవాన్ ।
• బ్రహ్మైవాహం మహానాత్మా సచ్చిదానన్దవిగ్రహః ॥ ౩౩॥
• నాహం జీవో న మే భేదో నాహం చిన్తా న మే మనః ।
• నాహం మాంసం న మేఽస్థీని నాహంకారకలేవరః ॥ ౩౪॥
• న ప్రమాతా న మేయం వా నాహం సర్వం పరోఽస్మ్యహమ్ ।
• సర్వవిజ్ఞానరూపోఽస్మి నాహం సర్వం కదాచన ॥ ౩౫॥
• నాహం మృతో జన్మనాన్యో న చిన్మాత్రోఽస్మి నాస్మ్యహమ్ ।
• న వాచ్యోఽహం న ముక్తోఽహం న బుద్ధోఽహం కదాచన ॥ ౩౬॥
• న శూన్యోఽహం న మూఢోఽహం న సర్వోఽహం పరోఽస్మ్యహమ్ ।
• సర్వదా బ్రహ్మమాత్రోఽహం న రసోఽహం సదాశివః ॥ ౩౭॥
• న ఘ్రాణోఽహం న గన్ధోఽహం న చిహ్నోఽయం న మే ప్రియః ।
• నాహం జీవో రసో నాహం వరుణో న చ గోలకః ॥ ౩౮॥
• బ్రహ్మైవాహం న సన్దేహో నామరూపం న కిఞ్చన ।
• న శ్రోత్రోఽహం న శబ్దోఽహం న దిశోఽహం న సాక్షికః ॥ ౩౯॥
• నాహం న త్వం న చ స్వర్గో నాహం వాయుర్న సాక్షికః ।
• పాయుర్నాహం విసర్గో న న మృత్యుర్న చ సాక్షికః ॥ ౪౦॥
• గుహ్యం నాహం న చానన్దో న ప్రజాపతిదేవతా ।
• సర్వం బ్రహ్మ న సన్దేహః సర్వం బ్రహ్మైవ కేవలమ్ ॥ ౪౧॥
• నాహం మనో న సఙ్కల్పో న చన్ద్రో న చ సాక్షికః ।
• నాహం బుద్ధీన్ద్రియో బ్రహ్మా నాహం నిశ్చయరూపవాన్ ॥ ౪౨॥
• నాహంకారమహం రుద్రో నాభిమానో న సాక్షికః ।
• చిత్తం నాహం వాసుదేవో ధారణా నాయమీశ్వరః ॥ ౪౩॥
• నాహం విశ్వో న జాగ్రద్వా స్థూలదేహో న మే క్వచిత్ ।
• న ప్రాతిభాసికో జీవో న చాహం వ్యావహారికః ॥ ౪౪॥
• న పారమార్థికో దేవో నాహమన్నమయో జడః ।
• న ప్రాణమయకోశోఽహం న మనోమయకోశవాన్ ॥ ౪౫॥
• న విజ్ఞానమయః కోశో నానన్దమయకోశవాన్ ।
• బ్రహ్మైవాహం న సన్దేహో నామరూపే న కిఞ్చన ॥ ౪౬॥
• ఏతావదుక్త్వా సకలం నామరూపద్వయాత్మకమ్ ।
• సర్వం క్షణేన విస్మృత్య కాష్ఠలోష్టాదివత్ త్యజేత్ ॥ ౪౭॥
• ఏతత్సర్వమసన్నిత్యం సదా వన్ధ్యాకుమారవత్ ।
• శశశృఙ్గవదేవేదం నరశృఙ్గవదేవ తత్ ॥ ౪౮॥
• ఆకాశపుష్పసదృశం యథా మరుమరీచికా ।
• గన్ధర్వనగరం యద్వదిన్ద్రజాలవదేవ హి ॥ ౪౯॥
• అసత్యమేవ సతతం పఞ్చరూపకమిష్యతే ।
• శిష్యోపదేశకాలో హి ద్వైతం న పరమార్థతః ॥ ౫౦॥
• మాతా మృతే రోదనాయ ద్రవ్యం దత్వాఽఽహ్వయేజ్జనాన్ ।
• తేషాం రోదనమాత్రం యత్ కేవలం ద్రవ్యపఞ్చకమ్ ॥ ౫౧॥
• తదద్వైతం మయా ప్రోక్తం సర్వం విస్మృత్య కుడ్యవత్ ।
• అహం బ్రహ్మేతి నిశ్చిత్య అహమేవేతి భావయ ॥ ౫౨॥
• అహమేవ సుఖం చేతి అహమేవ న చాపరః ।
• అహం చిన్మాత్రమేవేతి బ్రహ్మైవేతి వినిశ్చిను ॥ ౫౩॥
• అహం నిర్మలశుద్ధేతి అహం జీవవిలక్షణః ।
• అహం బ్రహ్మైవ సర్వాత్మా అహమిత్యవభాసకః ॥ ౫౪॥
• అహమేవ హి చిన్మాత్రమహమేవ హి నిర్గుణః ।
• సర్వాన్తర్యామ్యహం బ్రహ్మ చిన్మాత్రోఽహం సదాశివః ॥ ౫౫॥
• నిత్యమఙ్గలరూపాత్మా నిత్యమోక్షమయః పుమాన్ ।
• ఏవం నిశ్చిత్య సతతం స్వాత్మానం స్వయమాస్థితః ॥ ౫౬॥
• బ్రహ్మైవాహం న సన్దేహో నామరూపే న కిఞ్చన ।
• ఏతద్రూపప్రకరణం సర్వవేదేషు దుర్లభమ్ ।
• యః శృణోతి సకృద్వాపి బ్రహ్మైవ భవతి స్వయమ్ ॥ ౫౭॥
• తం వేదాదివచోభిరీడితమహాయాగైశ్చ భోగైర్వ్రతై-
• ర్దానైశ్చానశనైర్యమాదినియమైస్తం విద్విషన్తే ద్విజాః ।
• తస్యానఙ్గరిపోరతీవ సుమహాహృద్యం హి లిఙ్గార్చనం
• తేనైవాశు వినాశ్య మోహమఖిలం జ్ఞానం దదాతీశ్వరః ॥ ౫౮॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే నామరూపనిషేధప్రకరణం నామ ద్వావింశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com