ఋభుగీతా ౪౦ ॥ చిత్త-వృత్తి-నిరోధ ప్రకరణమ్ ॥
ఋభుః -
- సర్వసారాత్ సారతరం తతః సారతరాన్తరమ్ ।
- ఇదమన్తిమత్యన్తం శృణు ప్రకరణం ముదా ॥ ౧॥
- బ్రహ్మైవ సర్వమేవేదం బ్రహ్మైవాన్యన్న కిఞ్చన ।
- నిశ్చయం దృఢమాశ్రిత్య సర్వత్ర సుఖమాస్వ హ ॥ ౨॥
- బ్రహ్మైవ సర్వభువనం భువనం నామ సన్త్యజ ।
- అహం బ్రహ్మేతి నిశ్చిత్య అహం భావం పరిత్యజ ॥ ౩॥
- సర్వమేవం లయం యాతి స్వయమేవ పతత్రివత్ ।
- స్వయమేవ లయం యాతి సుప్తహస్తస్థపద్మవత్ ॥ ౪॥
- న త్వం నాహం న ప్రపఞ్చః సర్వం బ్రహ్మైవ కేవలమ్ ।
- న భూతం న చ కార్యం చ సర్వం బ్రహ్మైవ కేవలమ్ ॥ ౫॥
- న దైవం న చ కార్యాణి న దేహం నేన్ద్రియాణి చ ।
- న జాగ్రన్న చ వా స్వప్నో న సుషుప్తిర్న తుర్యకమ్ ॥ ౬॥
- ఇదం ప్రపఞ్చం నాస్త్యేవ సర్వం బ్రహ్మేతి నిశ్చిను ।
- సర్వం మిథ్యా సదా మిథ్యా సర్వం బ్రహ్మేతి నిశ్చిను ॥ ౭॥
- సదా బ్రహ్మ విచారం చ సర్వం బ్రహ్మేతి నిశ్చిను ।
- తథా ద్వైతప్రతీతిశ్చ సర్వం బ్రహ్మేతి నిశ్చిను ॥ ౮॥
- సదాహం భావరూపం చ సర్వం బ్రహ్మేతి నిశ్చిను ।
- నిత్యానిత్యవివేకం చ సర్వం బ్రహ్మేతి నిశ్చిను ॥ ౯॥
- భావాభావప్రతీతిం చ సర్వం బ్రహ్మేతి నిశ్చిను ।
- గుణదోషవిభాగం చ సర్వం బ్రహ్మేతి నిశ్చిను ॥ ౧౦॥
- కాలాకాలవిభాగం చ సర్వం బ్రహ్మేతి నిశ్చిను ।
- అహం జీవేత్యనుభవం సర్వం బ్రహ్మేతి నిశ్చిను ॥ ౧౧॥
- అహం ముక్తోఽస్మ్యనుభవం సర్వం బ్రహ్మేతి నిశ్చిను ।
- సర్వం బ్రహ్మేతి కలనం సర్వం బ్రహ్మేతి నిశ్చిను ॥ ౧౨॥
- సర్వం నాస్తీతి వార్తా చ సర్వం బ్రహ్మేతి నిశ్చిను ।
- దేవతాన్తరసత్తాకం సర్వం బ్రహ్మేతి నిశ్చిను ॥ ౧౩॥
- దేవతాన్తరపూజా చ సర్వం బ్రహ్మేతి నిశ్చిను ।
- దేహోఽహమితి సఙ్కల్పం సర్వం బ్రహ్మేతి నిశ్చిను ॥ ౧౪॥
- బ్రహ్మాహమితి సఙ్కల్పం సర్వం బ్రహ్మేతి నిశ్చిను ।
- గురుశిష్యాది సఙ్కల్పం సర్వం బ్రహ్మేతి నిశ్చిను ॥ ౧౫॥
- తుల్యాతుల్యాది సఙ్కల్పం సర్వం బ్రహ్మేతి నిశ్చిను ।
- వేదశాస్త్రాది సఙ్కల్పం సర్వం బ్రహ్మేతి నిశ్చిను ॥ ౧౬॥
- చిత్తసత్తాది సఙ్కల్పం సర్వం బ్రహ్మేతి నిశ్చిను ।
- బుద్ధినిశ్చయసఙ్కల్పం సర్వం బ్రహ్మేతి నిశ్చిను ॥ ౧౭॥
- మనోవికల్పసఙ్కల్పం సర్వం బ్రహ్మేతి నిశ్చిను ।
- అహంకారాది సఙ్కల్పం సర్వం బ్రహ్మేతి నిశ్చిను ॥ ౧౮॥
- పఞ్చభూతాదిసఙ్కల్పం సర్వం బ్రహ్మేతి నిశ్చిను ।
- శబ్దాదిసత్తాసఙ్కల్పం సర్వం బ్రహ్మేతి నిశ్చిను ॥ ౧౯॥
- దృగ్వార్తాదికసఙ్కల్పం సర్వం బ్రహ్మేతి నిశ్చిను ।
- కర్మేన్ద్రియాదిసఙ్కల్పం సర్వం బ్రహ్మేతి నిశ్చిను ॥ ౨౦॥
- వచనాదానసఙ్కల్పం సర్వం బ్రహ్మేతి నిశ్చిను ।
- మునీన్ద్రోపేన్ద్రసఙ్కల్పం సర్వం బ్రహ్మేతి నిశ్చిను ॥ ౨౧॥
- మనోబుద్ధ్యాదిసఙ్కల్పం సర్వం బ్రహ్మేతి నిశ్చిను ।
- సఙ్కల్పాధ్యాస ఇత్యాది సర్వం బ్రహ్మేతి నిశ్చిను ॥ ౨౨॥
- రుద్రక్షేత్రాది సఙ్కల్పం సర్వం బ్రహ్మేతి నిశ్చిను ।
- ప్రాణాదిదశసఙ్కల్పం సర్వం బ్రహ్మేతి నిశ్చిను ॥ ౨౩॥
- మాయా విద్యా దేహజీవాః సర్వం బ్రహ్మేతి నిశ్చిను ।
- స్థూలవ్యష్టాదిసఙ్కల్పం సర్వం బ్రహ్మేతి నిశ్చిను ॥ ౨౪॥
- సూక్ష్మవ్యష్టిసమష్ట్యాది సర్వం బ్రహ్మేతి నిశ్చిను ।
- వ్యష్ట్యజ్ఞానాది సఙ్కల్పం సర్వం బ్రహ్మేతి నిశ్చిను ॥ ౨౫॥
- విశ్వవైశ్వానరత్వం చ సర్వం బ్రహ్మేతి నిశ్చిను ।
- తైజసప్రాజ్ఞభేదం చ సర్వం బ్రహ్మేతి నిశ్చిను ॥ ౨౬॥
- వాచ్యార్థం చాపి లక్ష్యార్థం సర్వం బ్రహ్మేతి నిశ్చిను ।
- జహల్లక్షణయానైక్యం అజహల్లక్షణా ధ్రువమ్ ॥ ౨౭॥
- భాగత్యాగేన నిత్యైక్యం సర్వం బ్రహ్మ ఉపాధికమ్ ।
- లక్ష్యం చ నిరుపాధ్యైక్యం సర్వం బ్రహ్మేతి నిశ్చిను ॥ ౨౮॥
- ఏవమాహుర్మహాత్మానః సర్వం బ్రహ్మేతి కేవలమ్ ।
- సర్వమన్తః పరిత్యజ్య అహం బ్రహ్మేతి భావయ ॥ ౨౯॥
- అసఙ్కలితకాపిలైర్మధుహరాక్షిపూజ్యామ్బుజ-
- ప్రభాఙ్ఘ్రిజనిమోత్తమో పరిషిచేద్యదిన్దుప్రభమ్ ।
- తం డిణ్డీరనిభోత్తమోత్తమ మహాఖణ్డాజ్యదధ్నా పరం
- క్షీరాద్యైరభిషిచ్య ముక్తిపరమానన్దం లభే శామ్భవమ్ ॥ ౩౦॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే చిత్తవృత్తినిరోధప్రకరణం నామ చత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com