ఋభుగీతా ౩౬ ॥ బ్రహ్మ-భావనోపదేశ ప్రకరణమ్ ॥
ఋభుః -
- శృణు వక్ష్యామి విప్రేన్ద్ర సర్వం బ్రహ్మైవ నిర్ణయమ్ ।
- యస్య శ్రవణమాత్రేణ సద్యో ముక్తిమవాప్నుయాత్ ॥ ౧॥
- ఇదమేవ సదా నాస్తి హ్యహమేవ హి కేవలమ్ ।
- ఆత్మైవ సర్వదా నాస్తి ఆత్మైవ సుఖలక్షణమ్ ॥ ౨॥
- ఆత్మైవ పరమం తత్త్వమాత్మైవ జగతాం గణః ।
- ఆత్మైవ గగనాకారమాత్మైవ చ నిరన్తరమ్ ॥ ౩॥
- ఆత్మైవ సత్యం బ్రహ్మైవ ఆత్మైవ గురులక్షణమ్ ।
- ఆత్మైవ చిన్మయం నిత్యమాత్మైవాక్షరమవ్యయమ్ ॥ ౪॥
- ఆత్మైవ సిద్ధరూపం వా ఆత్మైవాత్మా న సంశయః ।
- ఆత్మైవజగదాకారం ఆత్మైవాత్మా స్వయం స్వయమ్ ॥ ౫॥
- ఆత్మైవ శాన్తికలనమాత్మైవ మనసా వియత్ ।
- ఆత్మైవ సర్వం యత్ కిఞ్చిదాత్మైవ పరమం పదమ్ ॥ ౬॥
- ఆత్మైవ భువనాకారమాత్మైవ ప్రియమవ్యయమ్ ।
- ఆత్మైవాన్యన్న చ క్వాపి ఆత్మైవాన్యం మనోమయమ్ ॥ ౭॥
- ఆత్మైవ సర్వవిజ్ఞానమాత్మైవ పరమం ధనమ్ ।
- ఆత్మైవ భూతరూపం వా ఆత్మైవ భ్రమణం మహత్ ॥ ౮॥
- ఆత్మైవ నిత్యశుద్ధం వా ఆత్మైవ గురురాత్మనః ।
- ఆత్మైవ హ్యాత్మనః శిష్య ఆత్మైవ లయమాత్మని ॥ ౯॥
- ఆత్మైవ హ్యాత్మనో ధ్యానమాత్మైవ గతిరాత్మనః ।
- ఆత్మైవ హ్యాత్మనో హోమ ఆత్మైవ హ్యాత్మనో జపః ॥ ౧౦॥
- ఆత్మైవ తృప్తిరాత్మైవ ఆత్మనోఽన్యన్న కిఞ్చన ।
- ఆత్మైవ హ్యాత్మనో మూలమాత్మైవ హ్యాత్మనో వ్రతమ్ ॥ ౧౧॥
- ఆత్మజ్ఞానం వ్రతం నిత్యమాత్మజ్ఞానం పరం సుఖమ్ ।
- ఆత్మజ్ఞానం పరానన్దమాత్మజ్ఞానం పరాయణమ్ ॥ ౧౨॥
- ఆత్మజ్ఞానం పరం బ్రహ్మ ఆత్మజ్ఞానం మహావ్రతమ్ ।
- ఆత్మజ్ఞానం స్వయం వేద్యమాత్మజ్ఞానం మహాధనమ్ ॥ ౧౩॥
- ఆత్మజ్ఞానం పరం బ్రహ్మ ఆత్మజ్ఞానం మహత్ సుఖమ్ ।
- ఆత్మజ్ఞానం మహానాత్మా ఆత్మజ్ఞానం జనాస్పదమ్ ॥ ౧౪॥
- ఆత్మజ్ఞానం మహాతీర్థమాత్మజ్ఞానం జయప్రదమ్ ।
- ఆత్మజ్ఞానం పరం బ్రహ్మ ఆత్మజ్ఞానం చరాచరమ్ ॥ ౧౫॥
- ఆత్మజ్ఞానం పరం శాస్త్రమాత్మజ్ఞానమనూపమమ్ ।
- ఆత్మజ్ఞానం పరో యోగ ఆత్మజ్ఞానం పరా గతిః ॥ ౧౬॥
- ఆత్మజ్ఞానం పరం బ్రహ్మ ఇత్యేవం దృఢనిశ్చయః ।
- ఆత్మజ్ఞానం మనోనాశః ఆత్మజ్ఞానం పరో గురుః ॥ ౧౭॥
- ఆత్మజ్ఞానం చిత్తనాశః ఆత్మజ్ఞానం విముక్తిదమ్ ।
- ఆత్మజ్ఞానం భయనాశమాత్మజ్ఞానం సుఖావహమ్ ॥ ౧౮॥
- ఆత్మజ్ఞానం మహాతేజ ఆత్మజ్ఞానం మహాశుభమ్ ।
- ఆత్మజ్ఞానం సతాం రూపమాత్మజ్ఞానం సతాం ప్రియమ్ ॥ ౧౯॥
- ఆత్మజ్ఞానం సతాం మోక్షమాత్మజ్ఞానం వివేకజమ్ ।
- ఆత్మజ్ఞానం పరో ధర్మ ఆత్మజ్ఞానం సదా జపః ॥ ౨౦॥
- ఆత్మజ్ఞానస్య సదృశమాత్మవిజ్ఞానమేవ హి ।
- ఆత్మజ్ఞానేన సదృశం న భూతం న భవిష్యతి ॥ ౨౧॥
- ఆత్మజ్ఞానం పరో మన్త్ర ఆత్మజ్ఞానం పరం తపః ।
- ఆత్మజ్ఞానం హరిః సాక్షాదాత్మజ్ఞానం శివః పరః ॥ ౨౨॥
- ఆత్మజ్ఞానం పరో ధాతా ఆత్మజ్ఞానం స్వసంమతమ్ ।
- ఆత్మజ్ఞానం స్వయం పుణ్యమాత్మజ్ఞానం విశోధనమ్ ॥ ౨౩॥
- ఆత్మజ్ఞానం మహాతీర్థమాత్మజ్ఞానం శమాదికమ్ ।
- ఆత్మజ్ఞానం ప్రియం మన్త్రమాత్మజ్ఞానం స్వపావనమ్ ॥ ౨౪॥
- ఆత్మజ్ఞానం చ కిన్నామ అహం బ్రహ్మేతి నిశ్చయః ।
- అహం బ్రహ్మేతి విశ్వాసమాత్మజ్ఞానం మహోదయమ్ ॥ ౨౫॥
- అహం బ్రహ్మాస్మి నిత్యోఽస్మి సిద్ధోఽస్మీతి విభావనమ్ ।
- ఆనన్దోఽహం పరానన్దం శుద్ధోఽహం నిత్యమవ్యయః ॥ ౨౬॥
- చిదాకాశస్వరూపోఽస్మి సచ్చిదానన్దశాశ్వతమ్ ।
- నిర్వికారోఽస్మి శాన్తోఽహం సర్వతోఽహం నిరన్తరః ॥ ౨౭॥
- సర్వదా సుఖరూపోఽస్మి సర్వదోషవివర్జితః ।
- సర్వసఙ్కల్పహీనోఽస్మి సర్వదా స్వయమస్మ్యహమ్ ॥ ౨౮॥
- సర్వం బ్రహ్మేత్యనుభవం వినా శబ్దం పఠ స్వయమ్ ।
- కోట్యశ్వమేధే యత్ పుణ్యం క్షణాత్ తత్పుణ్యమాప్నుయాత్ ॥ ౨౯॥
- అహం బ్రహ్మేతి నిశ్చిత్య మేరుదానఫలం లభేత్ ।
- బ్రహ్మైవాహమితి స్థిత్వా సర్వభూదానమప్యణు ॥ ౩౦॥
- బ్రహ్మైవాహమితి స్థిత్వా కోటిశో దానమప్యణు ।
- బ్రహ్మైవాహమితి స్థిత్వా సర్వానన్దం తృణాయతే ॥ ౩౧॥
- బ్రహ్మైవ సర్వమిత్యేవ భావితస్య ఫలం స్వయమ్ ।
- బ్రహ్మైవాహమితి స్థిత్వా సమానం బ్రహ్మ ఏవ హి ॥ ౩౨॥
- తస్మాత్ స్వప్నేఽపి నిత్యం చ సర్వం సన్త్యజ్య యత్నతః ।
- అహం బ్రహ్మ న సన్దేహః అహమేవ గతిర్మమ ॥ ౩౩॥
- అహమేవ సదా నాన్యదహమేవ సదా గురుః ।
- అహమేవ పరో హ్యాత్మా అహమేవ న చాపరః ॥ ౩౪॥
- అహమేవ గురుః శిష్యః అహమేవేతి నిశ్చిను ।
- ఇదమిత్యేవ నిర్దేశః పరిచ్ఛిన్నో జగన్న హి ॥ ౩౫॥
- న భూమిర్న జలం నాగ్నిర్న వాయుర్న చ ఖం తథా ।
- సర్వం చైతన్యమాత్రత్వాత్ నాన్యత్ కిఞ్చన విద్యతే ॥ ౩౬॥
- ఇత్యేవం భావనపరో దేహముక్తః సుఖీభవ ।
- అహమాత్మా ఇదం నాస్తి సర్వం చైతన్యమాత్రతః ॥ ౩౭॥
- అహమేవ హి పూర్ణాత్మా ఆనన్దాబ్ధిరనామయః ।
- ఇదమేవ సదా నాస్తి జడత్వాదసదేవ హి ।
- ఇదం బ్రహ్మ సదా బ్రహ్మ ఇదం నేతి సుఖీ భవ ॥ ౩౮॥
- తురఙ్గశృఙ్గసన్నిభా శ్రుతిపరోచనా ...
- విశేషకామవాసనా వినిశ్చితాత్మవృత్తితః ।
- నరాః సురా మునీశ్వరా అసఙ్గసఙ్గమప్యుమా-
- పతిం ... న తే భజన్తి కేచన ... ॥ ౩౯॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే బ్రహ్మభావనోపదేశప్రకరణం నామ షట్{}త్రింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com