ఋభుగీతా ౪౨ ॥ నిదాధానుభవ వర్ణన ప్రకరణమ్ ॥
ఋభుః -
- శ్రుతం కిఞ్చిన్మయా ప్రోక్తం బ్రహ్మజ్ఞానం సుదుర్లభమ్ ।
- మనసా ధారితం బ్రహ్మ చిత్తం కీదృక్ స్థితం వద ॥ ౧॥
నిదాఘః -
- శృణు త్వం సుగురో బ్రహ్మంస్త్వత్ప్రసాదాద్వదామ్యహమ్ ।
- మమాజ్ఞానం మహాదోషం మహాజ్ఞాననిరోధకమ్ ॥ ౨॥
- సదా కర్మణి విశ్వాసం ప్రపఞ్చే సత్యభావనమ్ ।
- నష్టం సర్వం క్షణాదేవ త్వత్ప్రసాదాన్మహద్భయమ్ ॥ ౩॥
- ఏతావన్తమిమం కాలమజ్ఞానరిపుణా హృతమ్ ।
- మహద్భయం చ నష్టం మే కర్మతత్త్వం చ నాశితమ్ ॥ ౪॥
- అజ్ఞానం మనసా పూర్వమిదానీం బ్రహ్మతాం గతమ్ ।
- పురాహం చిత్తవద్భూతః ఇదానీం సన్మయోఽభవమ్ ॥ ౫॥
- పూర్వమజ్ఞానవద్భావం ఇదానీం సన్మయం గతమ్ ।
- అజ్ఞానవత్ స్థితోఽహం వై బ్రహ్మైవాహం పరం గతః ॥ ౬॥
- పురాఽహం చిత్తవద్భ్రాన్తో బ్రహ్మైవాహం పరం గతః ।
- సర్వో విగలితో దోషః సర్వో భేదో లయం గతః ॥ ౭॥
- సర్వః ప్రపఞ్చో గలితశ్చిత్తమేవ హి సర్వగమ్ ।
- సర్వాన్తఃకరణం లీనం బ్రహ్మసద్భావభావనాత్ ॥ ౮॥
- అహమేవ చిదాకాశ అహమేవ హి చిన్మయః ।
- అహమేవ హి పూర్ణాత్మా అహమేవ హి నిర్మలః ॥ ౯॥
- అహమేవాహమేవేతి భావనాపి వినిర్గతా ।
- అహమేవ చిదాకాశో బ్రాహ్మణత్వం న కిఞ్చన ॥ ౧౦॥
- శూద్రోఽహం శ్వపచోఽహం వై వర్ణీ చాపి గృహస్థకః ।
- వానప్రస్థో యతిరహమిత్యయం చిత్తవిభ్రమః ॥ ౧౧॥
- తత్తదాశ్రమకర్మాణి చిత్తేన పరికల్పితమ్ ।
- అహమేవ హి లక్ష్యాత్మా అహమేవ హి పూర్ణకః ॥ ౧౨॥
- అహమేవాన్తరాత్మా హి అహమేవ పరాయణమ్ ।
- అహమేవ సదాధార అహమేవ సుఖాత్మకః ॥ ౧౩॥
- త్వత్ప్రసాదాదహం బ్రహ్మా త్వత్ప్రసాదాజ్జనార్దనః ।
- త్వత్ప్రసాదాచ్చిదాకాశః శివోఽహం నాత్ర సంశయః ॥ ౧౪॥
- త్వత్ప్రసాదాదహం చిద్వై త్వత్ప్రసాదాన్న మే జగత్ ।
- త్వత్ప్రసాదాద్విముక్తోఽస్మి త్వత్ప్రసాదాత్ పరం గతః ॥ ౧౫॥
- త్వత్ప్రసాదాద్వ్యాపకోఽహం త్వత్ప్రసాదాన్నిరఙ్కుశః ।
- త్వత్ప్రసాదేన తీర్ణోఽహం త్వత్ప్రసాదాన్మహత్సుఖమ్ ॥ ౧౬॥
- త్వత్ప్రసాదాదహం బ్రహ్మ త్వత్ప్రసాదాత్ త్వమేవ న ।
- త్వత్ప్రసాదాదిదం నాస్తి త్వత్ప్రసాదాన్న కిఞ్చన ॥ ౧౭॥
- త్వత్ప్రసాదాన్న మే కిఞ్చిత్ త్వత్ప్రసాదాన్న మే విపత్ ।
- త్వత్ప్రసాదాన్న మే భేదస్త్వత్ప్రసాదాన్న మే భయమ్ ॥ ౧౮॥
- త్వత్ప్రసాదాన్నమే రోగస్త్వత్ప్రసాదాన్న మే క్షతిః ।
- యత్పాదామ్బుజపూజయా హరిరభూదర్చ్యో యదంఘ్ర్యర్చనా-
- దర్చ్యాఽభూత్ కమలా విధిప్రభృతయో హ్యర్చ్యా యదాజ్ఞావశాత్ ।
- తం కాలాన్తకమన్తకాన్తకముమాకాన్తం ముహుః సన్తతం
- సన్తః స్వాన్తసరోజరాజచరణామ్భోజం భజన్త్యాదరాత్ ॥ ౧౯॥
- కిం వా ధర్మశతాయుతార్జితమహాసౌఖ్యైకసీమాయుతం
- నాకం పాతమహోగ్రదుఃఖనికరం దేవేషు తుష్టిప్రదమ్ ।
- తస్మాచ్ఛఙ్కరలిఙ్గపూజనముమాకాన్తప్రియం ముక్తిదం
- భూమానన్దఘనైకముక్తిపరమానన్దైకమోదం మహః ॥ ౨౦॥
- యే శాంభవాః శివరతాః శివనామమాత్ర-
- శబ్దాక్షరజ్ఞహృదయా భసితత్రిపుణ్డ్రాః ।
- యాం ప్రాప్నువన్తి గతిమీశపదాంబుజోద్యద్-
- ధ్యానానురక్తహృదయా న హి యోగసాంఖ్యైః ॥ ౨౧॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే నిదాఘానుభవవర్ణనప్రకరణం నామ ద్విచత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com