ఋభుగీతా ౪౩ ॥ నిదాధానుభవ వర్ణన ప్రకరణమ్ ॥
నిదాఘః -
- న పశ్యామి శరీరం వా లిఙ్గం కరణమేవ వా ।
- న పశ్యామి మనో వాపి న పశ్యామి జడం తతః ॥ ౧॥
- న పశ్యామి చిదాకాశం న పశ్యామి జగత్ క్వచిత్ ।
- న పశ్యామి హరిం వాపి న పశ్యామి శివం చ వా ॥ ౨॥
- ఆనన్దస్యాన్తరే లగ్నం తన్మయత్వాన్న చోత్థితః ।
- న పశ్యామి సదా భేదం న జడం న జగత్ క్వచిత్ ॥ ౩॥
- న ద్వైతం న సుఖం దుఃఖం న గురుర్న పరాపరమ్ ।
- న గుణం వా న తుర్యం వా న బుద్ధిర్న చ సంశయః ॥ ౪॥
- న చ కాలం న చ భయం న చ శోకం శుభాశుభమ్ ।
- న పశ్యామి సన్దీనం న బన్ధం న చ సంభవమ్ ॥ ౫॥
- న దేహేన్ద్రియసద్భావో న చ సద్వస్తు సన్మనః ।
- న పశ్యామి సదా స్థూలం న కృశం న చ కుబ్జకమ్ ॥ ౬॥
- న భూమిర్న జలం నాగ్నిర్న మోహో న చ మన్త్రకమ్ ।
- న గురుర్న చ వాక్యం వా న దృఢం న చ సర్వకమ్ ॥ ౭॥
- న జగచ్ఛ్రవణం చైవ నిదిధ్యాసం న చాపరః ।
- ఆనన్దసాగరే మగ్నస్తన్మయత్వాన్న చోత్థితః ॥ ౮॥
- ఆనన్దోఽహమశేషోఽహమజోఽహమమృతోస్మ్యహమ్ ।
- నిత్యోఽహమితి నిశ్చిత్య సదా పూర్ణోఽస్మి నిత్యధీః ॥ ౯॥
- పూర్ణోఽహం పూర్ణచిత్తోఽహం పుణ్యోఽహం జ్ఞానవానహమ్ ।
- శుద్ధోఽహం సర్వముక్తోఽహం సర్వాకారోఽహమవ్యయః ॥ ౧౦॥
- చిన్మాత్రోఽహం స్వయం సోఽహం తత్త్వరూపోఽహమీశ్వరః ।
- పరాపరోఽహం తుర్యోఽహం ప్రసన్నోఽహం రసోఽస్మ్యహమ్ ॥ ౧౧॥
- బ్రహ్మాఽహం సర్వలక్ష్యోఽహం సదా పూర్ణోఽహమక్షరః ।
- మమానుభవరూపం యత్ సర్వముక్తం చ సద్గురో ॥ ౧౨॥
- నమస్కరోమి తే నాహం సర్వం చ గురుదక్షిణా ।
- మద్దేహం త్వత్పదే దత్తం త్వయా భస్మీకృతం క్షణాత్ ॥ ౧౩॥
- మమాత్మా చ మయా దత్తః స్వయమాత్మని పూరితః ।
- త్వమేవాహమహం చ త్వమహమేవ త్వమేవ హి ॥ ౧౪॥
- ఐక్యార్ణవనిమగ్నోఽస్మి ఐక్యజ్ఞానం త్వమేవ హి ।
- ఏకం చైతన్యమేవాహం త్వయా గన్తుం న శక్యతే ॥ ౧౫॥
- గన్తవ్యదేశో నాస్త్యేవ ఏకాకారం న చాన్యతః ।
- త్వయా గన్తవ్యదేశో న మయా గన్తవ్యమస్తి న ॥ ౧౬॥
- ఏకం కారణమేకం చ ఏకమేవ ద్వయం న హి ।
- త్వయా వక్తవ్యకం నాస్తి మయా శ్రోతవ్యమప్యలమ్ ॥ ౧౭॥
- త్వమేవ సద్గురుర్నాసి అహం నాస్మి సశిష్యకః ।
- బ్రహ్మమాత్రమిదం సర్వమస్మిన్మానోఽస్మి తన్మయః ॥ ౧౮॥
- భేదాభేదం న పశ్యామి కార్యాకార్యం న కిఞ్చన ।
- మమైవ చేన్నమస్కారో నిష్ప్రయోజన ఏవ హి ॥ ౧౯॥
- తవైవ చేన్నమస్కారో భిన్నత్వాన్న ఫలం భవేత్ ।
- తవ చేన్మమ చేద్భేదః ఫలాభావో న సంశయః ॥ ౨౦॥
- నమస్కృతోఽహం యుష్మాకం భవానజ్ఞీతి వక్ష్యతి ।
- మమైవాపకరిష్యామి పరిచ్ఛిన్నో భవామ్యహమ్ ॥ ౨౧॥
- మమైవ చేన్నమస్కారః ఫలం నాస్తి స్వతః స్థితే ।
- కస్యాపి చ నమస్కారః కదాచిదపి నాస్తి హి ॥ ౨౨॥
- సదా చైతన్యమాత్రత్వాత్ నాహం న త్వం న హి ద్వయమ్ ।
- న బన్ధం న పరో నాన్యే నాహం నేదం న కిఞ్చన ॥ ౨౩॥
- న ద్వయం నైకమద్వైతం నిశ్చితం న మనో న తత్ ।
- న బీజం న సుఖం దుఃఖం నాశం నిష్ఠా న సత్సదా ॥ ౨౪॥
- నాస్తి నాస్తి న సన్దేహః కేవలాత్ పరమాత్మని ।
- న జీవో నేశ్వరో నైకో న చన్ద్రో నాగ్నిలక్షణః ॥ ౨౫॥
- న వార్తా నేన్ద్రియో నాహం న మహత్త్వం గుణాన్తరమ్ ।
- న కాలో న జగన్నాన్యో న వా కారణమద్వయమ్ ॥ ౨౬॥
- నోన్నతోఽత్యన్తహీనోఽహం న ముక్తస్త్వత్ప్రసాదతః ।
- సర్వం నాస్త్యేవ నాస్త్యేవ సర్వం బ్రహ్మైవ కేవలమ్ ॥ ౨౭॥
- అహం బ్రహ్మ ఇదం బ్రహ్మ ఆత్మ బ్రహ్మాహమేవ హి ।
- సర్వం బ్రహ్మ న సన్దేహస్త్వత్ప్రసాదాన్మహేశ్వరః ॥ ౨౮॥
- త్వమేవ సద్గురుర్బ్రహ్మ న హి సద్గురురన్యతః ।
- ఆత్మైవ సద్గురుర్బ్రహ్మ శిష్యో హ్యాత్మైవ సద్గురుః ॥ ౨౯॥
- గురుః ప్రకల్పతే శిష్యో గురుహీనో న శిష్యకః ।
- శిష్యే సతి గురుః కల్ప్యః శిష్యాభావే గురుర్న హి ॥ ౩౦॥
- గురుశిష్యవిహీనాత్మా సర్వత్ర స్వయమేవ హి ।
- చిన్మాత్రాత్మని కల్ప్యోఽహం చిన్మాత్రాత్మా న చాపరః ॥ ౩౧॥
- చిన్మాత్రాత్మాహమేవైకో నాన్యత్ కిఞ్చిన్న విద్యతే ।
- సర్వస్థితోఽహం సతతం నాన్యం పశ్యామి సద్గురోః ॥ ౩౨॥
- నాన్యత్ పశ్యామి చిత్తేన నాన్యత్ పశ్యామి కిఞ్చన ।
- సర్వాభావాన్న పశ్యామి సర్వం చేద్ దృశ్యతాం పృథక్ ॥ ౩౩॥
- ఏవం బ్రహ్మ ప్రపశ్యామి నాన్యదస్తీతి సర్వదా ।
- అహో భేదం ప్రకుపితం అహో మాయా న విద్యతే ॥ ౩౪॥
- అహో సద్గురుమాహాత్మ్యమహో బ్రహ్మసుఖం మహత్ ।
- అహో విజ్ఞానమాహాత్మ్యమహో సజ్జనవైభవః ॥ ౩౫॥
- అహో మోహవినాశశ్చ అహో పశ్యామి సత్సుఖమ్ ।
- అహో చిత్తం న పశ్యామి అహో సర్వం న కిఞ్చన ॥ ౩౬॥
- అహమేవ హి నాన్యత్ర అహమానన్ద ఏవ హి ।
- మమాన్తఃకరణే యద్యన్నిశ్చితం భవదీరితమ్ ॥ ౩౭॥
- సర్వం బ్రహ్మ పరం బ్రహ్మ న కిఞ్చిదన్యదైవతమ్ ।
- ఏవం పశ్యామి సతతం నాన్యత్ పశ్యామి సద్గురో ॥ ౩౮॥
- ఏవం నిశ్చిత్య తిష్ఠామి స్వస్వరూపే మమాత్మని ॥ ౩౯॥
- అగాధవేదవాక్యతో న చాధిభేషజం భవే-
- దుమాధవాఙ్ఘ్రిపఙ్కజస్మృతిః ప్రబోధమోక్షదా ।
- ప్రబుద్ధభేదవాసనానిరుద్ధహృత్తమోభిదే
- మహారుజాఘవైద్యమీశ్వరం హృదమ్బుజే భజే ॥ ౪౦॥
- ద్యతత్ప్రదగ్ధకామదేహ దుగ్ధసన్నిభం ప్రముగ్ధసామి ।
- సోమధారిణం శ్రుతీడ్యగద్యసంస్తుతం త్వభేద్యమేకశఙ్కరమ్ ॥ ౪౧॥
- వరః కఙ్కః కాకో భవదుభయజాతేషు నియతం
- మహాశఙ్కాతఙ్కైర్విధివిహితశాన్తేన మనసా ।
- యది స్వైరం ధ్యాయన్నగపతిసుతానాయకపదం
- స ఏవాయం ధుర్యో భవతి మునిజాతేషు నియతమ్ ॥ ౪౨॥
- కః కాలాన్తకపాదపద్మభజనాదన్యద్ధృదా కష్టదాం
- ధర్మాభాసపరంపరాం ప్రథయతే మూర్ఖో ఖరీం తౌరగీమ్ ।
- కర్తుం యత్నశతైరశక్యకరణైర్విన్దేత దుఃఖాదికంvar was దుఃఖాధికమ్
- తద్వత్ సాంబపదాంబుజార్చనరతిం త్యక్త్వా వృథా దుఃఖభాక్ ॥ ౪౩॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే నిదాఘానుభవవర్ణనప్రకరణం నామ త్రిచత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com