Ribhu Gita - Siva Rahasya Purana Amsha 6

ఋభుగీతా ౧౬ ॥ చిదేవ-త్వం ప్రకరణ నిరూపణమ్ ॥

ఋభుః -

అత్యన్తం దుర్లభం వక్ష్యే వేదశాస్త్రాగమాదిషు ।
శృణ్వన్తు సావధానేన అసదేవ హి కేవలమ్ ॥ ౧॥
యత్కిఞ్చిద్ దృశ్యతే లోకే యత్కిఞ్చిద్భాషతే సదా ।
యత్కిఞ్చిద్ భుజ్యతే క్వాపి తత్సర్వమసదేవ హి ॥ ౨॥
యద్యత్ కిఞ్చిజ్జపం వాపి స్నానం వా జలమేవ వా ।
ఆత్మనోఽన్యత్ పరం యద్యత్ అసత్ సర్వం న సంశయః ॥ ౩॥
చిత్తకార్యం బుద్ధికార్యం మాయాకార్యం తథైవ హి ।
ఆత్మనోఽన్యత్ పరం కిఞ్చిత్ తత్సర్వమసదేవ హి ॥ ౪॥
అహన్తాయాః పరం రూపం ఇదంత్వం సత్యమిత్యపి ।
ఆత్మనోఽన్యత్ పరం కిఞ్చిత్ తత్సర్వమసదేవ హి ॥ ౫॥
నానాత్వమేవ రూపత్వం వ్యవహారః క్వచిత్ క్వచిత్ ।
ఆత్మీయ ఏవ సర్వత్ర తత్సర్వమసదేవ హి ॥ ౬॥
తత్త్వభేదం జగద్భేదం సర్వభేదమసత్యకమ్ ।
ఇచ్ఛాభేదం జగద్భేదం తత్సర్వమసదేవ హి ॥ ౭॥
ద్వైతభేదం చిత్రభేదం జాగ్రద్భేదం మనోమయమ్ ।
అహంభేదమిదంభేదమసదేవ హి కేవలమ్ ॥ ౮॥
స్వప్నభేదం సుప్తిభేదం తుర్యభేదమభేదకమ్ ।
కర్తృభేదం కార్యభేదం గుణభేదం రసాత్మకమ్ ।
లిఙ్గభేదమిదంభేదమసదేవ హి కేవలమ్ ॥ ౯॥
ఆత్మభేదమసద్భేదం సద్భేదమసదణ్వపి ।
అత్యన్తాభావసద్భేదమ్ అసదేవ హి కేవలమ్ ॥ ౧౦॥
అస్తిభేదం నాస్తిభేదమభేదం భేదవిభ్రమః ।
భ్రాన్తిభేదం భూతిభేదమసదేవ హి కేవలమ్ ॥ ౧౧॥
పునరన్యత్ర సద్భేదమిదమన్యత్ర వా భయమ్ ।
పుణ్యభేదం పాపభేదం అసదేవ హి కేవలమ్ ॥ ౧౨॥
సఙ్కల్పభేదం తద్భేదం సదా సర్వత్ర భేదకమ్ ।
జ్ఞానాజ్ఞానమయం సర్వం అసదేవ హి కేవలమ్ ॥ ౧౩॥
బ్రహ్మభేదం క్షత్రభేదం భూతభౌతికభేదకమ్ ।
ఇదంభేదమహంభేదం అసదేవ హి కేవలమ్ ॥ ౧౪॥
వేదభేదం దేవభేదం లోకానాం భేదమీదృశమ్ ।
పఞ్చాక్షరమసన్నిత్యమ్ అసదేవ హి కేవలమ్ ॥ ౧౫॥
జ్ఞానేన్ద్రియమసన్నిత్యం కర్మేన్ద్రియమసత్సదా ।
అసదేవ చ శబ్దాఖ్యం అసత్యం తత్ఫలం తథా ॥ ౧౬॥
అసత్యం పఞ్చభూతాఖ్యమసత్యం పఞ్చదేవతాః ।
అసత్యం పఞ్చకోశాఖ్యమ్ అసదేవ హి కేవలమ్ ॥ ౧౭॥
అసత్యం షడ్వికారాది అసత్యం షట్కమూర్మిణామ్ ।
అసత్యమరిషడ్వర్గమసత్యం షడృతుస్తదా ॥ ౧౮॥var was తథా
అసత్యం ద్వాదశమాసాః అసత్యం వత్సరస్తథా ।
అసత్యం షడవస్థాఖ్యం షట్కాలమసదేవ హి ॥ ౧౯॥
అసత్యమేవ షట్శాస్త్రం అసదేవ హి కేవలమ్ ।
అసదేవ సదా జ్ఞానం అసదేవ హి కేవలమ్ ॥ ౨౦॥
అనుక్తముక్తం నోక్తం చ అసదేవ హి కేవలమ్ ।
అసత్ప్రకరణం ప్రోక్తం సర్వవేదేషు దుర్లభమ్ ॥ ౨౧॥
భూయః శృణు త్వం యోగీన్ద్ర సాక్షాన్మోక్షం బ్రవీమ్యహమ్ ।
సన్మాత్రమహమేవాత్మా సచ్చిదానన్ద కేవలమ్ ॥ ౨౨॥
సన్మయానన్దభూతాత్మా చిన్మయానన్దసద్ఘనః ।
చిన్మయానన్దసన్దోహచిదానన్దో హి కేవలమ్ ॥ ౨౩॥
చిన్మాత్రజ్యోతిరాన్దశ్చిన్మాత్రజ్యోతివిగ్రహః ।
చిన్మాత్రజ్యోతిరీశానః సర్వదానన్దకేవలమ్ ॥ ౨౪॥
చిన్మాత్రజ్యోతిరఖిలం చిన్మాత్రజ్యోతిరస్మ్యహమ్ ।
చిన్మాత్రం సర్వమేవాహం సర్వం చిన్మాత్రమేవ హి ॥ ౨౫॥
చిన్మాత్రమేవ చిత్తం చ చిన్మాత్రం మోక్ష ఏవ చ ।
చిన్మాత్రమేవ మననం చిన్మాత్రం శ్రవణం తథా ॥ ౨౬॥
చిన్మాత్రమహమేవాస్మి సర్వం చిన్మాత్రమేవ హి ।
చిన్మాత్రం నిర్గుణం బ్రహ్మ చిన్మాత్రం సగుణం పరమ్ ॥ ౨౭॥
చిన్మాత్రమహమేవ త్వం సర్వం చిన్మాత్రమేవ హి ।
చిన్మాత్రమేవ హృదయం చిన్మాత్రం చిన్మయం సదా ॥ ౨౮॥
చిదేవ త్వం చిదేవాహం సర్వం చిన్మాత్రమేవ హి ।
చిన్మాత్రమేవ శాన్తత్వం చిన్మాత్రం శాన్తిలక్షణమ్ ॥ ౨౯॥
చిన్మాత్రమేవ విజ్ఞానం చిన్మాత్రం బ్రహ్మ కేవలమ్ ।
చిన్మాత్రమేవ సంకల్పం చిన్మాత్రం భువనత్రయమ్ ॥ ౩౦॥
చిన్మాత్రమేవ సర్వత్ర చిన్మాత్రం వ్యాపకో గురుః ।
చిన్మాత్రమేవ శుద్ధత్వం చిన్మాత్రం బ్రహ్మ కేవలమ్ ॥ ౩౧॥
చిన్మాత్రమేవ చైతన్యం చిన్మాత్రం భాస్కరాదికమ్ ।
చిన్మాత్రమేవ సన్మాత్రం చిన్మాత్రం జగదేవ హి ॥ ౩౨॥
చిన్మాత్రమేవ సత్కర్మ చిన్మాత్రం నిత్యమఙ్గలమ్ ।
చిన్మాత్రమేవ హి బ్రహ్మ చిన్మాత్రం హరిరేవ హి ॥ ౩౩॥
చిన్మాత్రమేవ మౌనాత్మా చిన్మాత్రం సిద్ధిరేవ హి ।
చిన్మాత్రమేవ జనితం చిన్మాత్రం సుఖమేవ హి ॥ ౩౪॥
చిన్మాత్రమేవ గగనం చిన్మాత్రం పర్వతం జలమ్ ।
చిన్మాత్రమేవ నక్షత్రం చిన్మాత్రం మేఘమేవ హి ॥ ౩౫॥
చిదేవ దేవతాకారం చిదేవ శివపూజనమ్ ।
చిన్మాత్రమేవ కాఠిన్యం చిన్మాత్రం శీతలం జలమ్ ॥ ౩౬॥
చిన్మాత్రమేవ మన్తవ్యం చిన్మాత్రం దృశ్యభావనమ్ ।
చిన్మాత్రమేవ సకలం చిన్మాత్రం భువనం పితా ॥ ౩౭॥
చిన్మాత్రమేవ జననీ చిన్మాత్రాన్నాస్తి కిఞ్చన ।
చిన్మాత్రమేవ నయనం చిన్మాత్రం శ్రవణం సుఖమ్ ॥ ౩౮॥
చిన్మాత్రమేవ కరణం చిన్మాత్రం కార్యమీశ్వరమ్ ।
చిన్మాత్రం చిన్మయం సత్యం చిన్మాత్రం నాస్తి నాస్తి హి ॥ ౩౯॥
చిన్మాత్రమేవ వేదాన్తం చిన్మాత్రం బ్రహ్మ నిశ్చయమ్ ।
చిన్మాత్రమేవ సద్భావి చిన్మాత్రం భాతి నిత్యశః ॥ ౪౦॥
చిదేవ జగదాకారం చిదేవ పరమం పదమ్ ।
చిదేవ హి చిదాకారం చిదేవ హి చిదవ్యయః ॥ ౪౧॥
చిదేవ హి శివాకారం చిదేవ హి శివవిగ్రహః ।
చిదాకారమిదం సర్వం చిదాకారం సుఖాసుఖమ్ ॥ ౪౨॥
చిదేవ హి జడాకారం చిదేవ హి నిరన్తరమ్ ।
చిదేవకలనాకారం జీవాకారం చిదేవ హి ॥ ౪౩॥
చిదేవ దేవతాకారం చిదేవ శివపూజనమ్ ।
చిదేవ త్వం చిదేవాహం సర్వం చిన్మాత్రమేవ హి ॥ ౪౪॥
చిదేవ పరమాకారం చిదేవ హి నిరామయమ్ ।
చిన్మాత్రమేవ సతతం చిన్మాత్రం హి పరాయణమ్ ॥ ౪౫॥
చిన్మాత్రమేవ వైరాగ్యం చిన్మాత్రం నిర్గుణం సదా ।
చిన్మాత్రమేవ సఞ్చారం చిన్మాత్రం మన్త్రతన్త్రకమ్ ॥ ౪౬॥
చిదాకారమిదం విశ్వం చిదాకారం జగత్త్రయమ్ ।
చిదాకారమహఙ్కారం చిదాకారం పరాత్ పరమ్ ॥ ౪౭॥
చిదాకారమిదం భేదం చిదాకారం తృణాదికమ్ ।
చిదాకారం చిదాకాశం చిదాకారమరూపకమ్ ॥ ౪౮॥
చిదాకారం మహానన్దం చిదాకారం సుఖాత్ సుఖమ్ ।
చిదాకారం సుఖం భోజ్యం చిదాకారం పరం గురుమ్ ॥ ౪౯॥
చిదాకారమిదం విశ్వం చిదాకారమిదం పుమాన్ ।
చిదాకారమజం శాన్తం చిదాకారమనామయమ్ ॥ ౫౦॥
చిదాకారం పరాతీతం చిదాకారం చిదేవ హి ।
చిదాకారం చిదాకాశం చిదాకాశం శివాయతే ॥ ౫౧॥
చిదాకారం సదా చిత్తం చిదాకారం సదాఽమృతమ్ ।
చిదాకారం చిదాకాశం తదా సర్వాన్తరాన్తరమ్ ॥ ౫౨॥
చిదాకారమిదం పూర్ణం చిదాకారమిదం ప్రియమ్ ।
చిదాకారమిదం సర్వం చిదాకారమహం సదా ॥ ౫౩॥
చిదాకారమిదం స్థానం చిదాకారం హృదమ్బరమ్ ।
చిదాబోధం చిదాకారం చిదాకాశం తతం సదా ॥ ౫౪॥
చిదాకారం సదా పూర్ణం చిదాకారం మహత్ఫలమ్ ।
చిదాకారం పరం తత్త్వం చిదాకారం పరం భవాన్ ॥ ౫౫॥
చిదాకారం సదామోదం చిదాకారం సదా మృతమ్ ।
చిదాకారం పరం బ్రహ్మ చిదహం చిదహం సదా ॥ ౫౬॥
చిదహం చిదహం చిత్తం చిత్తం స్వస్య న సంశయః ।
చిదేవ జగదాకారం చిదేవ శివశఙ్కరః ॥ ౫౭॥
చిదేవ గగనాకారం చిదేవ గణనాయకమ్ ।
చిదేవ భువనాకారం చిదేవ భవభావనమ్ ॥ ౫౮॥
చిదేవ హృదయాకారం చిదేవ హృదయేశ్వరః ।
చిదేవ అమృతాకారం చిదేవ చలనాస్పదమ్ ॥ ౫౯॥
చిదేవాహం చిదేవాహం చిన్మయం చిన్మయం సదా ।
చిదేవ సత్యవిశ్వాసం చిదేవ బ్రహ్మభావనమ్ ॥ ౬౦॥
చిదేవ పరమం దేవం చిదేవ హృదయాలయమ్ ।
చిదేవ సకలాకారం చిదేవ జనమణ్డలమ్ ॥ ౬౧॥
చిదేవ సర్వమానన్దం చిదేవ ప్రియభాషణమ్ ।
చిదేవ త్వం చిదేవాహం సర్వం చిన్మాత్రమేవ హి ॥ ౬౨॥
చిదేవ పరమం ధ్యానం చిదేవ పరమర్హణమ్ ।
చిదేవ త్వం చిదేవాహం సర్వం చిన్మయమేవ హి ॥ ౬౩॥
చిదేవ త్వం ప్రకరణం సర్వవేదేషు దుర్లభమ్ ।
సకృచ్ఛ్రవణమాత్రేణ బ్రహ్మైవ భవతి ధ్రువమ్ ॥ ౬౪॥
యస్యాభిధ్యానయోగాజ్జనిమృతివివశాః శాశ్వతం వృత్తిభిర్యే
మాయామోహైర్విహీనా హృదుదరభయజం ఛిద్యతే గ్రన్థిజాతమ్ ।
విశ్వం విశ్వాధికరసం భవతి భవతో దర్శనాదాప్తకామః
సో నిత్యో నిర్వికల్పో భవతి భువి సదా బ్రహ్మభూతోఽన్తరాత్మా ॥ ౬౫॥

॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే చిదేవత్వంప్రకరణవర్ణనం నామ షోడశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com