ఋభుగీతా ౨౩ ॥ రహస్యోపదేశ ప్రకరణమ్ ॥

ఋభుః -

• నిదాఘ శృణు వక్ష్యామి సర్వలోకేషు దుర్లభమ్ ।
• ఇదం బ్రహ్మ పరం బ్రహ్మ సచ్చిదానన్ద ఏవ హి ॥ ౧॥
• నానావిధజనం లోకం నానా కారణకార్యకమ్ ।
• బ్రహ్మైవాన్యదసత్ సర్వం సచ్చిదానన్ద ఏవ హి ॥ ౨॥
• అహం బ్రహ్మ సదా బ్రహ్మ అస్మి బ్రహ్మాహమేవ హి ।
• కాలో బ్రహ్మ క్షణో బ్రహ్మ అహం బ్రహ్మ న సంశయః ॥ ౩॥
• వేదో బ్రహ్మ పరం బ్రహ్మ సత్యం బ్రహ్మ పరాత్ పరః ।
• హంసో బ్రహ్మ హరిర్బ్రహ్మ శివో బ్రహ్మ చిదవ్యయః ॥ ౪॥
• సర్వోపనిషదో బ్రహ్మ సామ్యం బ్రహ్మ సమోఽస్మ్యహమ్ ।
• అజో బ్రహ్మ రసో బ్రహ్మ వియద్బ్రహ్మ పరాత్పరః ॥ ౫॥
• త్రుటిర్బ్రహ్మ మనో బ్రహ్మ వ్యష్టిర్బ్రహ్మ సదాముదః ।
• ఇదం బ్రహ్మ పరం బ్రహ్మ తత్త్వం బ్రహ్మ సదా జపః ॥ ౬॥
• అకారో బ్రహ్మ ఏవాహముకారోఽహం న సంశయః ।
• మకారబ్రహ్మమాత్రోఽహం మన్త్రబ్రహ్మమనుః పరమ్ ॥ ౭॥
• శికారబ్రహ్మమాత్రోఽహం వాకారం బ్రహ్మ కేవలమ్ ।
• యకారం బ్రహ్మ నిత్యం చ పఞ్చాక్షరమహం పరమ్ ॥ ౮॥
• రేచకం బ్రహ్మ సద్బ్రహ్మ పూరకం బ్రహ్మ సర్వతః ।
• కుంభకం బ్రహ్మ సర్వోఽహం ధారణం బ్రహ్మ సర్వతః ॥ ౯॥
• బ్రహ్మైవ నాన్యత్ తత్సర్వం సచ్చిదానన్ద ఏవ హి ।
• ఏవం చ నిశ్చితో ముక్తః సద్య ఏవ న సంశయః ॥ ౧౦॥
• కేచిదేవ మహామూఢాః ద్వైతమేవం వదన్తి హి ।
• న సంభాష్యాః సదానర్హా నమస్కారే న యోగ్యతా ॥ ౧౧॥
• మూఢా మూఢతరాస్తుచ్ఛాస్తథా మూఢతమాః పరే ।
• ఏతే న సన్తి మే నిత్యం అహంవిజ్ఞానమాత్రతః ॥ ౧౨॥
• సర్వం చిన్మాత్రరూపత్వాదానన్దత్వాన్న మే భయమ్ ।
• అహమిత్యపి నాస్త్యేవ పరమిత్యపి న క్వచిత్ ॥ ౧౩॥
• బ్రహ్మైవ నాన్యత్ తత్సర్వం సచ్చిదానన్ద ఏవ హి ।
• కాలాతీతం సుఖాతీతం సర్వాతీతమతీతకమ్ ॥ ౧౪॥
• నిత్యాతీతమనిత్యానామమితం బ్రహ్మ కేవలమ్ ।
• బ్రహ్మైవ నాన్యద్యత్సర్వం సచ్చిదానన్దమాత్రకమ్ ॥ ౧౫॥
• ద్వైతసత్యత్వబుద్ధిశ్చ ద్వైతబుద్ధ్యా న తత్ స్మర ।
• సర్వం బ్రహ్మైవ నాన్యోఽస్తి సర్వం బ్రహ్మైవ కేవలమ్ ॥ ౧౬॥
• బుద్ధ్యాతీతం మనోఽతీతం వేదాతీతమతః పరమ్ ।
• ఆత్మాతీతం జనాతీతం జీవాతీతం చ నిర్గుణమ్ ॥ ౧౭॥
• కాష్ఠాతీతం కలాతీతం నాట్యాతీతం పరం సుఖమ్ ।
• బ్రహ్మమాత్రేణ సంపశ్యన్ బ్రహ్మమాత్రపరో భవ ॥ ౧౮॥
• బ్రహ్మమాత్రపరో నిత్యం చిన్మాత్రోఽహం న సంశయః ।
• జ్యోతిరానన్దమాత్రోఽహం నిజానన్దాత్మమాత్రకః ॥ ౧౯॥
• శూన్యానన్దాత్మమాత్రోఽహం చిన్మాత్రోఽహమితి స్మర ।
• సత్తామాత్రోఽహమేవాత్ర సదా కాలగుణాన్తరః ॥ ౨౦॥
• నిత్యసన్మాత్రరూపోఽహం శుద్ధానన్దాత్మమాత్రకమ్ ।
• ప్రపఞ్చహీనరూపోఽహం సచ్చిదానన్దమాత్రకః ॥ ౨౧॥
• నిశ్చయానన్దమాత్రోఽహం కేవలానన్దమాత్రకః ।
• పరమానన్దమాత్రోఽహం పూర్ణానన్దోఽహమేవ హి ॥ ౨౨॥
• ద్వైతస్యమాత్రసిద్ధోఽహం సామ్రాజ్యపదలక్షణమ్ ।
• ఇత్యేవం నిశ్చయం కుర్వన్ సదా త్రిషు యథాసుఖమ్ ॥ ౨౩॥
• దృఢనిశ్చయరూపాత్మా దృఢనిశ్చయసన్మయః ।
• దృఢనిశ్చయశాన్తాత్మా దృఢనిశ్చయమానసః ॥ ౨౪॥
• దృఢనిశ్చయపూర్ణాత్మా దృఢనిశ్చయనిర్మలః ।
• దృఢనిశ్చయజీవాత్మా దృఢనిశ్చయమఙ్గలః ॥ ౨౫॥
• దృఢనిశ్చయజీవాత్మా సంశయం నాశమేష్యతి ।
• దృఢనిశ్చయమేవాత్ర బ్రహ్మజ్ఞానస్య లక్షణమ్ ॥ ౨౬॥
• దృఢనిశ్చయమేవాత్ర వాక్యజ్ఞానస్య లక్షణమ్ ।
• దృఢనిశ్చయమేవాత్ర కారణం మోక్షసంపదః ॥ ౨౭॥
• ఏవమేవ సదా కార్యం బ్రహ్మైవాహమితి స్థిరమ్ ।
• బ్రహ్మైవాహం న సన్దేహః సచ్చిదానన్ద ఏవ హి ॥ ౨౮॥
• ఆత్మానన్దస్వరూపోఽహం నాన్యదస్తీతి భావయ ।
• తతస్తదపి సన్త్యజ్య ఏక ఏవ స్థిరో భవ ॥ ౨౯॥
• తతస్తదపి సన్త్యజ్య నిర్గుణో భవ సర్వదా ।
• నిర్గుణత్వం చ సన్త్యజ్య వాచాతీతో భవేత్ తతః ॥ ౩౦॥
• వాచాతీతం చ సన్త్యజ్య చిన్మాత్రత్వపరో భవ ।
• ఆత్మాతీతం చ సన్త్యజ్య బ్రహ్మమాత్రపరో భవ ॥ ౩౧॥
• చిన్మాత్రత్వం చ సన్త్యజ్య సర్వతూష్ణీంపరో భవ ।
• సర్వతూష్ణీం చ సన్త్యజ్య మహాతూష్ణీంపరో భవ ॥ ౩౨॥
• మహాతూష్ణీం చ సన్త్యజ్య చిత్తతూష్ణీం సమాశ్రయ ।
• చిత్తతూష్ణీం చ సన్త్యజ్య జీవతూష్ణీం సమాహర ॥ ౩౩॥
• జీవతూష్ణీం పరిత్యజ్య జీవశూన్యపరో భవ ।
• శూన్యత్యాగం పరిత్యజ్య యథా తిష్ఠ తథాసి భో ॥ ౩౪॥
• తిష్ఠత్వమపి సన్త్యజ్య అవాఙ్మానసగోచరః ।
• తతః పరం న వక్తవ్యం తతః పశ్యేన్న కిఞ్చన ॥ ౩౫॥
• నో చేత్ సర్వపరిత్యాగో బ్రహ్మైవాహమితీరయ ।
• సదా స్మరన్ సదా చిన్త్యం సదా భావయ నిర్గుణమ్ ॥ ౩౬॥
• సదా తిష్ఠస్వ తత్త్వజ్ఞ సదా జ్ఞానీ సదా పరః ।
• సదానన్దః సదాతీతః సదాదోషవివర్జితః ॥ ౩౭॥
• సదా శాన్తః సదా తృప్తః సదా జ్యోతిః సదా రసః ।
• సదా నిత్యః సదా శుద్ధః సదా బుద్ధః సదా లయః ॥ ౩౮॥
• సదా బ్రహ్మ సదా మోదః సదానన్దః సదా పరః ।
• సదా స్వయం సదా శూన్యః సదా మౌనీ సదా శివః ॥ ౩౯॥
• సదా సర్వం సదా మిత్రః సదా స్నానం సదా జపః ।
• సదా సర్వం చ విస్మృత్య సదా మౌనం పరిత్యజ ॥ ౪౦॥
• దేహాభిమానం సన్త్యజ్య చిత్తసత్తాం పరిత్యజ ।
• ఆత్మైవాహం స్వయం చాహం ఇత్యేవం సర్వదా భవ ॥ ౪౧॥
• ఏవం స్థితే త్వం ముక్తోఽసి న తు కార్యా విచారణా ।
• బ్రహ్మైవ సర్వం యత్కిఞ్చిత్ సచ్చిదానన్ద ఏవ హి ॥ ౪౨॥
• అహం బ్రహ్మ ఇదం బ్రహ్మ త్వం బ్రహ్మాసి నిరన్తరః ।
• ప్రజ్ఞానం బ్రహ్మ ఏవాసి త్వం బ్రహ్మాసి న సంశయః ॥ ౪౩॥
• దృఢనిశ్చయమేవ త్వం కురు కల్యాణమాత్మనః ।
• మనసో భూషణం బ్రహ్మ మనసో భూషణం పరః ॥ ౪౪॥
• మనసో భూషణం కర్తా బ్రహ్మైవాహమవేక్షతః ।
• బ్రహ్మైవ సచ్చిదానదః సచ్చిదానన్దవిగ్రహః ॥ ౪౫॥
• సచ్చిదానన్దమఖిలం సచ్చిదానన్ద ఏవ హి ।
• సచ్చిదానన్దజీవాత్మా సచ్చిదానన్దవిగ్రహః ॥ ౪౬॥
• సచ్చిదానన్దమద్వైతం సచ్చిదానన్దశఙ్కరః ।
• సచ్చిదానన్దవిజ్ఞానం సచ్చిదానన్దభోజనః ॥ ౪౭॥
• సచ్చిదానన్దపూర్ణాత్మా సచ్చిదానన్దకారణః ।
• సచ్చిదానన్దలీలాత్మా సచ్చిదానన్దశేవధిః ॥ ౪౮॥
• సచ్చిదానన్దసర్వాఙ్గః సచ్చిదానన్దచన్దనః ।
• సచ్చిదానన్దసిద్ధాన్తః సచ్చిదానన్దవేదకః ॥ ౪౯॥
• సచ్చిదానన్దశాస్త్రార్థః సచ్చిదానన్దవాచకః ।
• సచ్చిదానన్దహోమశ్చ సచ్చిదానన్దరాజ్యకః ॥ ౫౦॥
• సచ్చిదానన్దపూర్ణాత్మా సచ్చిదానన్దపూర్ణకః ।
• సచ్చిదానన్దసన్మాత్రం మూఢేషు పఠితం చ యత్ ॥ ౫౧॥
• శుద్ధం మూఢేషు యద్దత్తం సుబద్ధం మార్గచారిణా ।
• విషయాసక్తచిత్తేషు న సంభాష్యం వివేకినా ॥ ౫౨॥
• సకృచ్ఛ్రవణమాత్రేణ బ్రహ్మైవ భవతి స్వయమ్ ।
• ఇచ్ఛా చేద్యది నారీణాం ముఖం బ్రాహ్మణ ఏవ హి ॥ ౫౩॥
• సర్వం చైతన్యమాత్రత్వాత్ స్త్రీభేదం చ న విద్యతే ।
• వేదశాస్త్రేణ యుక్తోఽపి జ్ఞానాభావాద్ ద్విజోఽద్విజః ॥ ౫౪॥
• బ్రహ్మైవ తన్తునా తేన బద్ధాస్తే ముక్తిచిన్తకాః ।
• సర్వముక్తం భగవతా రహస్యం శఙ్కరేణ హి ॥ ౫౫॥
• సోమాపీడపదాంబుజార్చనఫలైర్భుక్త్యై భవాన్ మానసం
• నాన్యద్యోగపథా శ్రుతిశ్రవణతః కిం కర్మభిర్భూయతే ।
• యుక్త్యా శిక్షితమానసానుభవతోఽప్యశ్మాప్యసఙ్గో వచాం
• కిం గ్రాహ్యం భవతీన్ద్రియార్థరహితానన్దైకసాన్ద్రః శివః ॥ ౫౬॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే రహస్యోపదేశప్రకరణం నామ త్రయోవింశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com