ఋభుగీతా ౧౩ ॥ సర్వమ్-ఆత్మ-ప్రకరణమ్ ॥

ఋభుః -

• శృణుష్వ దుర్లభం లోకే సారాత్ సారతరం పరమ్ ।
• ఆత్మరూపమిదం సర్వమాత్మనోఽన్యన్న కిఞ్చన ॥ ౧॥
• సర్వమాత్మాస్తి పరమా పరమాత్మా పరాత్మకః ।
• నిత్యానన్దస్వరూపాత్మా హ్యాత్మనోఽన్యన్న కిఞ్చన ॥ ౨॥
• పూర్ణరూపో మహానాత్మా పూతాత్మా శాశ్వతాత్మకః ।
• నిర్వికారస్వరూపాత్మా నిర్మలాత్మా నిరాత్మకః ॥ ౩॥
• శాన్తాశాన్తస్వరూపాత్మా హ్యాత్మనోఽన్యన్న కిఞ్చన ।
• జీవాత్మా పరమాత్మా హి చిత్తాచిత్తాత్మచిన్మయః ।
• ఏకాత్మా ఏకరూపాత్మా నైకాత్మాత్మవివర్జితః ॥ ౪॥
• ముక్తాముక్తస్వరూపాత్మా ముక్తాముక్తవివర్జితః ।
• మోక్షరూపస్వరూపాత్మా హ్యాత్మనోఽన్యన్న కిఞ్చన ॥ ౫॥
• ద్వైతాద్వైతస్వరూపాత్మా ద్వైతాద్వైతవివర్జితః ।
• సర్వవర్జితసర్వాత్మా హ్యాత్మనోఽన్యన్న కిఞ్చన ॥ ౬॥
• ముదాముదస్వరూపాత్మా మోక్షాత్మా దేవతాత్మకః ।
• సఙ్కల్పహీనసారాత్మా హ్యాత్మనోఽన్యన్న కిఞ్చన ॥ ౭॥
• నిష్కలాత్మా నిర్మలాత్మా బుద్ధ్యాత్మా పురుషాత్మకః ।
• ఆనన్దాత్మా హ్యజాత్మా చ హ్యాత్మనోఽన్యన్న కిఞ్చన ॥ ౮॥
• అగణ్యాత్మా గణాత్మా చ అమృతాత్మామృతాన్తరః ।
• భూతభవ్యభవిష్యాత్మా హ్యాత్మనోఽన్యన్న కిఞ్చన ॥ ౯॥
• అఖిలాత్మాఽనుమన్యాత్మా మానాత్మా భావభావనః ।
• తుర్యరూపప్రసన్నాత్మా ఆత్మనోఽన్యన్న కిఞ్చన ॥ ౧౦॥
• నిత్యం ప్రత్యక్షరూపాత్మా నిత్యప్రత్యక్షనిర్ణయః ।
• అన్యహీనస్వభావాత్మా ఆత్మనోఽన్యన్న కిఞ్చన ॥ ౧౧॥
• అసద్ధీనస్వభావాత్మా అన్యహీనః స్వయం ప్రభుః ।
• విద్యావిద్యాన్యశుద్ధాత్మా మానామానవిహీనకః ॥ ౧౨॥
• నిత్యానిత్యవిహీనాత్మా ఇహాముత్రఫలాన్తరః ।
• శమాదిషట్కశూన్యాత్మా హ్యాత్మనోఽన్యన్న కిఞ్చన ॥ ౧౩॥
• ముముక్షుత్వం చ హీనాత్మా శబ్దాత్మా దమనాత్మకః ।
• నిత్యోపరతరూపాత్మా హ్యాత్మనోఽన్యన్న కిఞ్చన ॥ ౧౪॥
• సర్వకాలతితిక్షాత్మా సమాధానాత్మని స్థితః ।
• శుద్ధాత్మా స్వాత్మని స్వాత్మా హ్యాత్మనోఽన్యన్న కిఞ్చన ॥ ౧౫॥
• అన్నకోశవిహీనాత్మా ప్రాణకోశవివర్జితః ।
• మనఃకోశవిహీనాత్మా హ్యాత్మనోఽన్యన్న కిఞ్చన ॥ ౧౬॥
• విజ్ఞానకోశహీనాత్మా ఆనన్దాదివివర్జితః ।
• పఞ్చకోశవిహీనాత్మా హ్యాత్మనోఽన్యన్న కిఞ్చన ॥ ౧౭॥
• నిర్వికల్పస్వరూపాత్మా సవికల్పవివర్జితః ।
• శబ్దానువిద్ధహీనాత్మా హ్యాత్మనోఽన్యన్న కిఞ్చన ॥ ౧౮॥var was శబ్దానువిధ్యహీనాత్మా
• స్థూలదేహవిహీనాత్మా సూక్ష్మదేహవివర్జితః ।
• కారణాదివిహీనాత్మా హ్యాత్మనోఽన్యన్న కిఞ్చన ॥ ౧౯॥
• దృశ్యానువిద్ధశూన్యాత్మా హ్యాదిమధ్యాన్తవర్జితః ।
• శాన్తా సమాధిశూన్యాత్మా హ్యాత్మనోఽన్యన్న కిఞ్చన ॥ ౨౦॥
• ప్రజ్ఞానవాక్యహీనాత్మా అహం బ్రహ్మాస్మివర్జితః ।
• తత్త్వమస్యాదివాక్యాత్మా హ్యాత్మనోఽన్యన్న కిఞ్చన ॥ ౨౧॥
• అయమాత్మేత్యభావాత్మా సర్వాత్మా వాక్యవర్జితః ।
• ఓంకారాత్మా గుణాత్మా చ హ్యాత్మనోఽన్యన్న కిఞ్చన ॥ ౨౨॥
• జాగ్రద్ధీనస్వరూపాత్మా స్వప్నావస్థావివర్జితః ।
• ఆనన్దరూపపూర్ణాత్మా హ్యాత్మనోఽన్యన్న కిఞ్చన ॥ ౨౩॥
• భూతాత్మా చ భవిష్యాత్మా హ్యక్షరాత్మా చిదాత్మకః ।
• అనాదిమధ్యరూపాత్మా హ్యాత్మనోఽన్యన్న కిఞ్చన ॥ ౨౪॥
• సర్వసఙ్కల్పహీనాత్మా స్వచ్ఛచిన్మాత్రమక్షయః ।
• జ్ఞాతృజ్ఞేయాదిహీనాత్మా హ్యాత్మనోఽన్యన్న కిఞ్చన ॥ ౨౫॥
• ఏకాత్మా ఏకహీనాత్మా ద్వైతాద్వైతవివర్జితః ।
• స్వయమాత్మా స్వభావాత్మా హ్యాత్మనోఽన్యన్న కిఞ్చన ॥ ౨౬॥
• తుర్యాత్మా నిత్యమాత్మా చ యత్కిఞ్చిదిదమాత్మకః ।
• భానాత్మా మానహీనాత్మా హ్యాత్మనోఽన్యన్న కిఞ్చన ॥ ౨౭॥var was మానాత్మా
• వాచావధిరనేకాత్మా వాచ్యానన్దాత్మనన్దకః ।
• సర్వహీనాత్మసర్వాత్మా హ్యాత్మనోఽన్యన్న కిఞ్చన ॥ ౨౮॥
• ఆత్మానమేవ వీక్షస్వ ఆత్మానం భావయ స్వకమ్ ।
• స్వస్వాత్మానం స్వయం భుంక్ష్వ హ్యాత్మనోఽన్యన్న కిఞ్చన ॥ ౨౯॥
• స్వాత్మానమేవ సన్తుష్య ఆత్మానం స్వయమేవ హి ।
• స్వస్వాత్మానం స్వయం పశ్యేత్ స్వమాత్మానం స్వయం శ్రుతమ్ ॥ ౩౦॥
• స్వమాత్మని స్వయం తృప్తః స్వమాత్మానం స్వయంభరః ।
• స్వమాత్మానం స్వయం భస్మ హ్యాత్మనోఽన్యన్న కిఞ్చన ॥ ౩౧॥
• స్వమాత్మానం స్వయం మోదం స్వమాత్మానం స్వయం ప్రియమ్ ।
• స్వమాత్మానమేవ మన్తవ్యం హ్యాత్మనోఽన్యన్న కిఞ్చన ॥ ౩౨॥
• ఆత్మానమేవ శ్రోతవ్యం ఆత్మానం శ్రవణం భవ ।
• ఆత్మానం కామయేన్నిత్యమ్ ఆత్మానం నిత్యమర్చయ ॥ ౩౩॥
• ఆత్మానం శ్లాఘయేన్నిత్యమాత్మానం పరిపాలయ ।
• ఆత్మానం కామయేన్నిత్యమ్ ఆత్మనోఽన్యన్న కిఞ్చన ॥ ౩౪॥
• ఆత్మైవేయమియం భూమిః ఆత్మైవేదమిదం జలమ్ ।
• ఆత్మైవేదమిదం జ్యోతిరాత్మనోఽన్యన్న కిఞ్చన ॥ ౩౫॥
• ఆత్మైవాయమయం వాయురాత్మైవేదమిదమ్ వియత్ ।
• ఆత్మైవాయమహఙ్కారః ఆత్మనోఽన్యన్న కిఞ్చన ॥ ౩౬॥
• ఆత్మైవేదమిదం చిత్తం ఆత్మైవేదమిదం మనః ।
• ఆత్మైవేయమియం బుద్ధిరాత్మనోఽన్యన్న కిఞ్చన ॥ ౩౭॥
• ఆత్మైవాయమయం దేహః ఆత్మైవాయమయం గుణః ।
• ఆత్మైవేదమిదం తత్త్వమ్ ఆత్మనోఽన్యన్న కిఞ్చన ॥ ౩౮॥
• ఆత్మైవాయమయం మన్త్రః ఆత్మైవాయమయం జపః ।
• ఆత్మైవాయమయం లోకః ఆత్మనోఽన్యన్న కిఞ్చన ॥ ౩౯॥
• ఆత్మైవాయమయం శబ్దః ఆత్మైవాయమయం రసః ।
• ఆత్మైవాయమయం స్పర్శః ఆత్మనోఽన్యన్న కిఞ్చన ॥ ౪౦॥
• ఆత్మైవాయమయం గన్ధః ఆత్మైవాయమయం శమః ।
• ఆత్మైవేదమిదం దుఃఖం ఆత్మైవేదమిదం సుఖమ్ ॥ ౪౧॥
• ఆత్మీయమేవేదం జగత్ ఆత్మీయః స్వప్న ఏవ హి ।
• సుషుప్తం చాప్యథాత్మీయం ఆత్మనోఽన్యన్న కిఞ్చన ॥ ౪౨॥
• ఆత్మైవ కార్యమాత్మైవ ప్రాయో హ్యాత్మైవమద్వయమ్ ।
• ఆత్మీయమేవమద్వైతం ఆత్మనోఽన్యన్న కిఞ్చన ॥ ౪౩॥
• ఆత్మీయమేవాయం కోఽపి ఆత్మైవేదమిదం క్వచిత్ ।
• ఆత్మైవాయమయం లోకః ఆత్మనోఽన్యన్న కిఞ్చన ॥ ౪౪॥
• ఆత్మైవేదమిదం దృశ్యం ఆత్మైవాయమయం జనః ।
• ఆత్మైవేదమిదం సర్వం ఆత్మనోఽన్యన్న కిఞ్చన ॥ ౪౫॥
• ఆత్మైవాయమయం శంభుః ఆత్మైవేదమిదం జగత్ ।
• ఆత్మైవాయమయం బ్రహ్మా ఆత్మనోఽన్యన్న కిఞ్చన ॥ ౪౬॥
• ఆత్మైవాయమయం సూర్య ఆత్మైవేదమిదం జడమ్ ।
• ఆత్మైవేదమిదం ధ్యానమ్ ఆత్మైవేదమిదమ్ ఫలమ్ ॥ ౪౭॥
• ఆత్మైవాయమయం యోగః సర్వమాత్మమయం జగత్ ।
• సర్వమాత్మమయం భూతం ఆత్మనోఽన్యన్న కిఞ్చన ॥ ౪౮॥
• సర్వమాత్మమయం భావి సర్వమాత్మమయం గురుః ।
• సర్వమాత్మమయం శిష్య ఆత్మనోఽన్యన్న కిఞ్చన ॥ ౪౯॥
• సర్వమాత్మమయం దేవః సర్వమాత్మమయం ఫలమ్ ।
• సర్వమాత్మమయం లక్ష్యం ఆత్మనోఽన్యన్న కిఞ్చన ॥ ౫౦॥
• సర్వమాత్మమయం తీర్థం సర్వమాత్మమయం స్వయమ్ ।
• సర్వమాత్మమయం మోక్షం ఆత్మనోఽన్యన్న కిఞ్చన ॥ ౫౧॥
• సర్వమాత్మమయం కామం సర్వమాత్మమయం క్రియా ।
• సర్వమాత్మమయం క్రోధః ఆత్మనోఽన్యన్న కిఞ్చన ॥ ౫౨॥
• సర్వమాత్మమయం విద్యా సర్వమాత్మమయం దిశః ।
• సర్వమాత్మమయం లోభః ఆత్మనోఽన్యన్న కిఞ్చన ॥ ౫౩॥
• సర్వమాత్మమయం మోహః సర్వమాత్మమయం భయమ్ ।
• సర్వమాత్మమయం చిన్తా ఆత్మనోఽన్యన్న కిఞ్చన ॥ ౫౪॥
• సర్వమాత్మమయం ధైర్యం సర్వమాత్మమయం ధ్రువమ్ ।
• సర్వమాత్మమయం సత్యం ఆత్మనోఽన్యన్న కిఞ్చన ॥ ౫౫॥
• సర్వమాత్మమయం బోధం సర్వమాత్మమయం దృఢమ్ ।
• సర్వమాత్మమయం మేయం ఆత్మనోఽన్యన్న కిఞ్చన ॥ ౫౬॥
• సర్వమాత్మమయం గుహ్యం సర్వమాత్మమయం శుభమ్ ।
• సర్వమాత్మమయం శుద్ధం ఆత్మనోఽన్యన్న కిఞ్చన ॥ ౫౭॥
• సర్వమాత్మమయం సర్వం సత్యమాత్మా సదాత్మకః ।
• పూర్ణమాత్మా క్షయం చాత్మా పరమాత్మా పరాత్పరః ॥ ౫౮॥
• ఇతోఽప్యాత్మా తతోఽప్యాత్మా హ్యాత్మైవాత్మా తతస్తతః ।
• సర్వమాత్మమయం సత్యం ఆత్మనోఽన్యన్న కిఞ్చన ॥ ౫౯॥
• సర్వమాత్మస్వరూపం హి దృశ్యాదృశ్యం చరాచరమ్ ।
• సర్వమాత్మమయం శ్రుత్వా ముక్తిమాప్నోతి మానవః ॥ ౬౦॥
• స్వతన్త్రశక్తిర్భగవానుమాధవో
• విచిత్రకాయాత్మకజాగ్రతస్య ।
• సుకారణం కార్యపరంపరాభిః
• స ఏవ మాయావితతోఽవ్యయాత్మా ॥ ౬౧॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే సర్వమాత్మప్రకరణం నామ త్రయోదశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com