ఋభుగీతా ౧౦ ॥ బ్రహ్మ-తర్పణ ఆత్మ-హోమాఖ్య-ప్రకరణ-ద్వయ-వర్ణనమ్ ॥

ఋభుః -

• నిత్యతర్పణమాచక్ష్యే నిదాఘ శృణు మే వచః ।
• వేదశాస్త్రేషు సర్వేషు అత్యన్తం దుర్లభం నృణామ్ ॥ ౧॥
• సదా ప్రపఞ్చం నాస్త్యేవ ఇదమిత్యపి నాస్తి హి ।
• బ్రహ్మమాత్రం సదాపూర్ణం ఇత్యేవం బ్రహ్మతర్పణమ్ ॥ ౨॥
• సరూపమాత్రం బ్రహ్మైవ సచ్చిదానన్దమప్యహమ్ ।
• ఆనన్దఘన ఏవాహం ఇత్యేవం బ్రహ్మతర్పణమ్ ॥ ౩॥
• సర్వదా సర్వశూన్యోఽహం సదాత్మానన్దవానహమ్ ।
• నిత్యానిత్యస్వరూపోఽహం ఇత్యేవం బ్రహ్మతర్పణమ్ ॥ ౪॥
• అహమేవ చిదాకాశ ఆత్మాకాశోఽస్మి నిత్యదా ।
• ఆత్మనాఽఽత్మని తృప్తోఽహం ఇత్యేవం బ్రహ్మతర్పణమ్ ॥ ౫॥
• ఏకత్వసంఖ్యాహీనోఽస్మి అరూపోఽస్మ్యహమద్వయః ।
• నిత్యశుద్ధస్వరూపోఽహం ఇత్యేవం బ్రహ్మతర్పణమ్ ॥ ౬॥
• ఆకాశాదపి సూక్ష్మోఽహం అత్యన్తాభావకోఽస్మ్యహమ్ ।
• సర్వప్రకాశరూపోఽహం ఇత్యేవం బ్రహ్మతర్పణమ్ ॥ ౭॥
• పరబ్రహ్మస్వరూపోఽహం పరావరసుఖోఽస్మ్యహమ్ ।
• సత్రామాత్రస్వరూపోఽహం దృగ్దృశ్యాదివివర్జితః ॥ ౮॥
• యత్ కిఞ్చిదప్యహం నాస్తి తూష్ణీం తూష్ణీమిహాస్మ్యహమ్ ।
• శుద్ధమోక్షస్వరూపోఽహమ్ ఇత్యేవం బ్రహ్మతర్పణమ్ ॥ ౯॥
• సర్వానన్దస్వరూపోఽహం జ్ఞానానన్దమహం సదా ।
• విజ్ఞానమాత్రరూపోఽహమ్ ఇత్యేవం బ్రహ్మతర్పణమ్ ॥ ౧౦॥
• బ్రహ్మమాత్రమిదం సర్వం నాస్తి నాన్యత్ర తే శపే ।
• తదేవాహం న సన్దేహః ఇత్యేవం బ్రహ్మతర్పణమ్ ॥ ౧౧॥
• త్వమిత్యేతత్ తదిత్యేతన్నాస్తి నాస్తీహ కిఞ్చన ।
• శుద్ధచైతన్యమాత్రోఽహం ఇత్యేవం బ్రహ్మతర్పణమ్ ॥ ౧౨॥
• అత్యన్తాభావరూపోఽహమహమేవ పరాత్పరః ।
• అహమేవ సుఖం నాన్యత్ ఇత్యేవం బ్రహ్మతర్పణమ్ ॥ ౧౩॥
• ఇదం హేమమయం కిఞ్చిన్నాస్తి నాస్త్యేవ తే శపే ।
• నిర్గుణానన్దరూపోఽహం ఇత్యేవం బ్రహ్మతర్పణమ్ ॥ ౧౪॥
• సాక్షివస్తువిహీనత్వాత్ సాక్షిత్వం నాస్తి మే సదా ।
• కేవలం బ్రహ్మభావత్వాత్ ఇత్యేవం బ్రహ్మతర్పణమ్ ॥ ౧౫॥
• అహమేవావిశేషోఽహమహమేవ హి నామకమ్ ।
• అహమేవ విమోహం వై ఇత్యేవం బ్రహ్మతర్పణమ్ ॥ ౧౬॥
• ఇన్ద్రియాభావరూపోఽహం సర్వాభావస్వరూపకమ్ ।
• బన్ధముక్తివిహీనోఽస్మి ఇత్యేవం బ్రహ్మతర్పణమ్ ॥ ౧౭॥
• సర్వానన్దస్వరూపోఽహం సర్వానన్దఘనోఽస్మ్యహమ్ ।
• నిత్యచైతన్యమాత్రోఽహం ఇత్యేవం బ్రహ్మతర్పణమ్ ॥ ౧౮॥
• వాచామగోచరశ్చాహం వాఙ్మనో నాస్తి కిఞ్చన ।
• చిదానన్దమయశ్చాహం ఇత్యేవం బ్రహ్మతర్పణమ్ ॥ ౧౯॥
• సర్వత్ర పూర్ణరూపోఽహం సర్వత్ర సుఖమస్మ్యహమ్ ।
• సర్వత్రాచిన్త్యరూపోఽహమ్ ఇత్యేవం బ్రహ్మతర్పణమ్ ॥ ౨౦॥
• సర్వత్ర తృప్తిరూపోఽహం సర్వానన్దమయోఽస్మ్యహమ్ ।
• సర్వశూన్యస్వరూపోఽహమ్ ఇత్యేవం బ్రహ్మతర్పణమ్ ॥ ౨౧॥
• సర్వదా మత్స్వరూపోఽహం పరమానన్దవానహమ్ ।
• ఏక ఏవాహమేవాహం ఇత్యేవం బ్రహ్మతర్పణమ్ ॥ ౨౨॥
• ముక్తోఽహం మోక్షరూపోఽహం సర్వమౌనపరోఽస్మ్యహమ్ ।
• సర్వనిర్వాణరూపోఽహం ఇత్యేవం బ్రహ్మతర్పణమ్ ॥ ౨౩॥
• సర్వదా సత్స్వరూపోఽహం సర్వదా తుర్యవానహమ్ ।
• తుర్యాతీతస్వరూపోఽహం ఇత్యేవం బ్రహ్మతర్పణమ్ ॥ ౨౪॥
• సత్యవిజ్ఞానమాత్రోఽహం సన్మాత్రానన్దవానహమ్ ।
• నిర్వికల్పస్వరూపోఽహమ్ ఇత్యేవం బ్రహ్మతర్పణమ్ ॥ ౨౫॥
• సర్వదా హ్యజరూపోఽహం నిరీహోఽహం నిరఞ్జనః ।
• బ్రహ్మవిజ్ఞానరూపోఽహం ఇత్యేవం బ్రహ్మతర్పణమ్ ॥ ౨౬॥
• బ్రహ్మతర్పణమేవోక్తం ఏతత్ప్రకరణం మయా ।
• యః శృణోతి సకృద్వాపి బ్రహ్మైవ భవతి స్వయమ్ ॥ ౨౭॥
• నిత్యహోమం ప్రవక్ష్యామి సర్వవేదేషు దుర్లభమ్ ।
• సర్వశాస్త్రార్థమద్వైతం సావధానమనాః శృణు ॥ ౨౮॥
• అహం బ్రహ్మాస్మి శుద్ధోఽస్మి నిత్యోఽస్మి ప్రభురస్మ్యహమ్ ।
• ఓంకారార్థస్వరూపోఽస్మి ఏవం హోమం సుదుర్లభమ్ ॥ ౨౯॥
• పరమాత్మస్వరూపోఽస్మి పరానన్దపరోఽస్మ్యహమ్ ।
• చిదానన్దస్వరూపోఽస్మి ఏవం హోమం సుదుర్లభమ్ ॥ ౩౦॥
• నిత్యానన్దస్వరూపోఽస్మి నిష్కలఙ్కమయో హ్యహమ్ ।
• చిదాకారస్వరూపోఽహం ఏవం హోమం సుదుర్లభమ్ ॥ ౩౧॥
• న హి కిఞ్చిత్ స్వరూపోఽస్మి నాహమస్మి న సోఽస్మ్యహమ్ ।
• నిర్వ్యాపారస్వరూపోఽస్మి ఏవం హోమం సుదుర్లభమ్ ॥ ౩౨॥
• నిరంశోఽస్మి నిరాభాసో న మనో నేన్ద్రియోఽస్మ్యహమ్ ।
• న బుద్ధిర్న వికల్పోఽహం ఏవం హోమం సుదుర్లభమ్ ॥ ౩౩॥
• న దేహాదిస్వారూపోఽస్మి త్రయాదిపరివర్జితః ।
• న జాగ్రత్స్వప్నరూపోఽస్మి ఏవం హోమం సుదుర్లభమ్ ॥ ౩౪॥
• శ్రవణం మననం నాస్తి నిదిధ్యాసనమేవ హి ।
• స్వగతం చ న మే కిఞ్చిద్ ఏవం హోమం సుదుర్లభమ్ ॥ ౩౫॥
• అసత్యం హి మనఃసత్తా అసత్యం బుద్ధిరూపకమ్ ।
• అహఙ్కారమసద్విద్ధి కాలత్రయమసత్ సదా ॥ ౩౬॥
• గుణత్రయమసద్విద్ధి ఏవం హోమం సుదుర్లభమ్ ॥ ౩౭॥
• శ్రుతం సర్వమసద్విద్ధి వేదం సర్వమసత్ సదా ।
• సర్వతత్త్వమసద్విద్ధి ఏవం హోమం సుదుర్లభమ్ ॥ ౩౮॥
• నానారూపమసద్విద్ధి నానావర్ణమసత్ సదా ।
• నానాజాతిమసద్విద్ధి ఏవం హోమం సుదుర్లభమ్ ॥ ౩౯॥
• శాస్త్రజ్ఞానమసద్విద్ధి వేదజ్ఞానం తపోఽప్యసత్ ।
• సర్వతీర్థమసద్విద్ధి ఏవం హోమం సుదుర్లభమ్ ॥ ౪౦॥
• గురుశిష్యమసద్విద్ధి గురోర్మన్త్రమసత్ తతః ।
• యద్ దృశ్యం తదసద్విద్ధి ఏవం హోమం సుదుర్లభమ్ ॥ ౪౧॥
• సర్వాన్ భోగానసద్విద్ధి యచ్చిన్త్యం తదసత్ సదా ।
• యద్ దృశ్యం తదసద్విద్ధి ఏవం హోమం సుదుర్లభమ్ ॥ ౪౨॥
• సర్వేన్ద్రియమసద్విద్ధి సర్వమన్త్రమసత్ త్వితి ।
• సర్వప్రాణానసద్విద్ధి ఏవం హోమం సుదుర్లభమ్ ॥ ౪౩॥
• జీవం దేహమసద్విద్ధి పరే బ్రహ్మణి నైవ హి ।
• మయి సర్వమసద్విద్ధి ఏవం హోమం సుదుర్లభమ్ ॥ ౪౪॥
• దృష్టం శ్రుతమసద్విద్ధి ఓతం ప్రోతమసన్మయి ।
• కార్యాకార్యమసద్విద్ధి ఏవం హోమం సుదుర్లభమ్ ॥ ౪౫॥
• దృష్టప్రాప్తిమసద్విద్ధి సన్తోషమసదేవ హి ।
• సర్వకర్మాణ్యసద్విద్ధి ఏవం హోమం సుదుర్లభమ్ ॥ ౪౬॥
• సర్వాసర్వమసద్విద్ధి పూర్ణాపూర్ణమసత్ పరే ।
• సుఖం దుఃఖమసద్విద్ధి ఏవం హోమం సుదుర్లభమ్ ॥ ౪౭॥
• యథాధర్మమసద్విద్ధి పుణ్యాపుణ్యమసత్ సదా ।
• లాభాలాభమసద్విద్ధి సదా దేహమసత్ సదా ॥ ౪౮॥
• సదా జయమసద్విద్ధి సదా గర్వమసత్ సదా ।
• మనోమయమసద్విద్ధి సంశయం నిశ్చయం తథా ॥ ౪౯॥
• శబ్దం సర్వమసద్విద్ధి స్పర్శం సర్వమసత్ సదా ।
• రూపం సర్వమసద్విద్ధి రసం సర్వమసత్ సదా ॥ ౫౦॥
• గన్ధం సర్వమసద్విద్ధి జ్ఞానం సర్వమసత్ సదా ।
• భూతం భవ్యమసద్విద్ధి అసత్ ప్రకృతిరుచ్యతే ॥ ౫౧॥
• అసదేవ సదా సర్వమసదేవ భవోద్భవమ్ ।
• అసదేవ గుణం సర్వం ఏవం హోమం సుదుర్లభమ్ ॥ ౫౨॥
• శశశృఙ్గవదేవ త్వం శశశృఙ్గవదస్మ్యహమ్ ।
• శశశృఙ్గవదేవేదం శశశృఙ్గవదన్తరమ్ ॥ ౫౩॥
• ఇత్యేవమాత్మహోమాఖ్యముక్తం ప్రకరణం మయా ।
• యః శృణోతి సకృద్వాపి బ్రహ్మైవ భవతి స్వయమ్ ॥ ౫౪॥

స్కన్దః -

• యస్మిన్ సంచ విచైతి విశ్వమఖిలం ద్యోతన్తి సూర్యేన్దవో
• విద్యుద్వహ్నిమరుద్గణాః సవరుణా భీతా భజన్తీశ్వరమ్ ।
• భూతం చాపి భవత్యదృశ్యమఖిలం శమ్భోః సుఖాంశం జగత్
• జాతం చాపి జనిష్యతి ప్రతిభవం దేవాసురైర్నిర్యపి ।
• తన్నేహాస్తి న కిఞ్చిదత్ర భగవద్ధ్యానాన్న కిఞ్చిత్ ప్రియమ్ ॥ ౫౫॥
• యః ప్రాణాపానభేదైర్మననధియా ధారణాపఞ్చకాద్యైః
• మధ్యే విశ్వజనస్య సన్నపి శివో నో దృశ్యతే సూక్ష్మయా ।
• బుద్ధయాదధ్యాతయాపి శ్రుతివచనశతైర్దేశికోక్త్యైకసూక్త్యా
• యోగైర్భక్తిసమన్వితైః శివతరో దృశ్యో న చాన్యత్ తథా ॥ ౫౬॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే బ్రహ్మతర్పణాత్మహోమాఖ్య ప్రకరణద్వయవర్ణనం నామ దశమోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com