ఋభుగీతా ౪౭ ॥ ఋభు-కృత సంగ్రహోపదేశ వర్ణనమ్ ॥
ఋభుః -
- నిదాఘ శృణు వక్ష్యామి దృఢీకరణమస్తు తే ।
- శివప్రసాదపర్యన్తమేవం భావయ నిత్యశః ॥ ౧॥
- అహమేవ పరం బ్రహ్మ అహమేవ సదాశివః ।
- అహమేవ హి చిన్మాత్రమహమేవ హి నిర్గుణః ॥ ౨॥
- అహమేవ హి చైతన్యమహమేవ హి నిష్కలః ।
- అహమేవ హి శూన్యాత్మా అహమేవ హి శాశ్వతః ॥ ౩॥
- అహమేవ హి సర్వాత్మా అహమేవ హి చిన్మయః ।
- అహమేవ పరం బ్రహ్మ అహమేవ మహేశ్వరః ॥ ౪॥
- అహమేవ జగత్సాక్షీ అహమేవ హి సద్గురుః ।
- అహమేవ హి ముక్తాత్మా అహమేవ హి నిర్మలః ॥ ౫॥
- అహమేవాహమేవోక్తః అహమేవ హి శఙ్కరః ।
- అహమేవ హి మహావిష్ణురహమేవ చతుర్ముఖః ॥ ౬॥
- అహమేవ హి శుద్ధాత్మా హ్యహమేవ హ్యహం సదా ।
- అహమేవ హి నిత్యాత్మా అహమేవ హి మత్పరః ॥ ౭॥
- అహమేవ మనోరూపం అహమేవ హి శీతలః ।
- అహమేవాన్తర్యామీ చ అహమేవ పరేశ్వరః ॥ ౮॥
- ఏవముక్తప్రకారేణ భావయిత్వా సదా స్వయమ్ ।
- ద్రవ్యోఽస్తి చేన్న కుర్యాత్తు వంచకేన గురుం పరమ్ ॥ ౯॥
- కుమ్భీపాకే సుఘోరే తు తిష్ఠత్యేవ హి కల్పకాన్ ।
- శ్రుత్వా నిదాఘశ్చోథాయ పుత్రదారాన్ ప్రదత్తవాన్ ॥ ౧౦॥
- స్వశరీరం చ పుత్రత్వే దత్వా సాదరపూర్వకమ్ ।
- ధనధాన్యం చ వస్త్రాదీన్ దత్వాఽతిష్ఠత్ సమీపతః ॥ ౧౧॥
- గురోస్తు దక్షిణాం దత్వా నిదాఘస్తుష్టవానృభుమ్ ।
- సన్తుష్టోఽస్మి మహాభాగ తవ శుశ్రూషయా సదా ॥ ౧౨॥
- బ్రహ్మవిజ్ఞానమాప్తోఽసి సుకృతార్థో న సంశయః ।
- బ్రహ్మరూపమిదం చేతి నిశ్చయం కురు సర్వదా ॥ ౧౩॥
- నిశ్చయాదపరో మోక్షో నాస్తి నాస్తీతి నిశ్చిను ।
- నిశ్చయం కారణం మోక్షో నాన్యత్ కారణమస్తి వై ॥ ౧౪॥
- సకలభువనసారం సర్వవేదాన్తసారం
- సమరసగురుసారం సర్వవేదార్థసారమ్ ।
- సకలభువనసారం సచ్చిదానన్దసారం
- సమరసజయసారం సర్వదా మోక్షసారమ్ ॥ ౧౫॥
- సకలజననమోక్షం సర్వదా తుర్యమోక్షం
- సకలసులభమోక్షం సర్వసామ్రాజ్యమోక్షమ్ ।
- విషయరహితమోక్షం విత్తసంశోషమోక్షం
- శ్రవణమననమాత్రాదేతదత్యన్తమోక్షమ్ ॥ ౧౬॥
- తచ్ఛుశ్రూషా చ భవతః తచ్ఛ్రుత్వా చ ప్రపేదిరే ।
- ఏవం సర్వవచః శ్రుత్వా నిదాఘఋషిదర్శితమ్ ।
- శుకాదయో మహాన్తస్తే పరం బ్రహ్మమవాప్నువన్ ॥ ౧౭॥
- శ్రుత్వా శివజ్ఞానమిదం ఋభుస్తదా
- నిదాఘమాహేత్థం మునీన్ద్రమధ్యే ।
- ముదా హి తేఽపి శ్రుతిశబ్దసారం
- శ్రుత్వా ప్రణమ్యాహురతీవ హర్షాత్ ॥ ౧౮॥
మునయః -
- పితా మాతా భ్రాతా గురురసి వయస్యోఽథ హితకృత్
- అవిద్యాబ్ధేః పారం గమయసి భవానేవ శరణమ్ ।
- బలేనాస్మాన్ నీత్వా మమ వచనబలేనైవ సుగమం
- పథం ప్రాప్త్యైవార్థైః శివవచనతోఽస్మాన్ సుఖయసి ॥ ౧౯॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే ఋభుకృతసంగ్రహోపదేశవర్ణనం నామ సప్తచత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com