ఋభుగీతా ౩౫ ॥ బ్రహ్మ-భావనోపదేశ ప్రకరణమ్ ॥
ఋభుః -
- నిదాఘ శృణు గుహ్యం మే సద్యో ముక్తిప్రదం నృణామ్ ।
- ఆత్మైవ నాన్యదేవేదం పరమాత్మాహమక్షతః ॥ ౧॥
- అహమేవ పరం బ్రహ్మ సచ్చిదానన్దవిగ్రహః ।
- అహమస్మి మహానస్మి శివోఽస్మి పరమోఽస్మ్యహమ్ ॥ ౨॥
- అదృశ్యం పరమం బ్రహ్మ నాన్యదస్తి స్వభావతః ।
- సర్వం నాస్త్యేవ నాస్త్యేవ అహం బ్రహ్మైవ కేవలమ్ ॥ ౩॥
- శాన్తం బ్రహ్మ పరం చాస్మి సర్వదా నిత్యనిర్మలః ।
- సర్వం నాస్త్యేవ నాస్త్యేవ అహం బ్రహ్మైవ కేవలమ్ ॥ ౪॥
- సర్వసఙ్కల్పముక్తోఽస్మి సర్వసన్తోషవర్జితః ।
- కాలకర్మజగద్ద్వైతద్రష్టృదర్శనవిగ్రహః ॥ ౫॥
- ఆనన్దోఽస్మి సదానన్దకేవలో జగతాం ప్రియమ్ ।
- సమరూపోఽస్మి నిత్యోఽస్మి భూతభవ్యమజో జయః ॥ ౬॥
- చిన్మాత్రోఽస్మి సదా భుక్తో జీవో బన్ధో న విద్యతే ।var was ముక్తః
- శ్రవణం షడ్విధం లిఙ్గం నైవాస్తి జగదీదృశమ్ ॥ ౭॥
- చిత్తసంసారహీనోఽస్మి చిన్మాత్రత్వం జగత్ సదా ।
- చిత్తమేవ హితం దేహ అవిచారః పరో రిపుః ॥ ౮॥
- అవిచారో జగద్దుఃఖమవిచారో మహద్భయమ్ ।
- సద్యోఽస్మి సర్వదా తృప్తః పరిపూర్ణః పరో మహాన్ ॥ ౯॥
- నిత్యశుద్ధోఽస్మి బుద్ధోఽస్మి చిదాకాశోఽస్మి చేతనః ।
- ఆత్మైవ నాన్యదేవేదం పరమాత్మాఽహమక్షతః ॥ ౧౦॥
- సర్వదోషవిహీనోఽస్మి సర్వత్ర వితతోఽస్మ్యహమ్ ।
- వాచాతీతస్వరూపోఽస్మి పరమాత్మాఽహమక్షతః ॥ ౧౧॥
- చిత్రాతీతం పరం ద్వన్ద్వం సన్తోషః సమభావనమ్ ।
- అన్తర్బహిరనాద్యన్తం సర్వభేదవినిర్ణయమ్ ॥ ౧౨॥
- అహంకారం బలం సర్వం కామం క్రోధం పరిగ్రహమ్ ।
- బ్రహ్మేన్ద్రోవిష్ణుర్వరుణో భావాభావవినిశ్చయః ॥ ౧౩॥
- జీవసత్తా జగత్సత్తా మాయాసత్తా న కిఞ్చన ।
- గురుశిష్యాదిభేదం చ కార్యాకార్యవినిశ్చయః ॥ ౧౪॥
- త్వం బ్రహ్మాసీతి వక్తా చ అహం బ్రహ్మాస్మి సంభవః ।
- సర్వవేదాన్తవిజ్ఞానం సర్వామ్నాయవిచారణమ్ ॥ ౧౫॥
- ఇదం పదార్థసద్భావమహం రూపేణ సంభవమ్ ।
- వేదవేదాన్తసిద్ధాన్తజగద్భేదం న విద్యతే ॥ ౧౬॥
- సర్వం బ్రహ్మ న సన్దేహః సర్వమిత్యేవ నాస్తి హి ।
- కేవలం బ్రహ్మశాన్తాత్మా అహమేవ నిరన్తరమ్ ॥ ౧౭॥
- శుభాశుభవిభేదం చ దోషాదోషం చ మే న హి ।
- చిత్తసత్తా జగత్సత్తా బుద్ధివృత్తివిజృమ్భణమ్ ॥ ౧౮॥
- బ్రహ్మైవ సర్వదా నాన్యత్ సత్యం సత్యం నిజం పదమ్ ।
- ఆత్మాకారమిదం ద్వైతం మిథ్యైవ న పరః పుమాన్ ॥ ౧౯॥
- సచ్చిదానన్దమాత్రోఽహం సర్వం కేవలమవ్యయమ్ ।
- బ్రహ్మా విష్ణుశ్చ రుద్రశ్చ ఈశ్వరశ్చ సదాశివః ॥ ౨౦॥
- మనో జగదహం భేదం చిత్తవృత్తిజగద్భయమ్ ।
- సర్వానన్దమహానన్దమాత్మానన్దమనన్తకమ్ ॥ ౨౧॥
- అత్యన్తస్వల్పమల్పం వా ప్రపఞ్చం నాస్తి కిఞ్చన ।
- ప్రపఞ్చమితి శబ్దో వా స్మరణం వా న విద్యతే ॥ ౨౨॥
- అన్తరస్థప్రపఞ్చం వా క్వచిన్నాస్తి క్వచిద్బహిః ।
- యత్ కిఞ్చిదేవం తూష్ణీం వా యచ్చ కిఞ్చిత్ సదా క్వ వా ॥ ౨౩॥
- యేన కేన యదా కిఞ్చిద్యస్య కస్య న కిఞ్చన ।
- శుద్ధం మలినరూపం వా బ్రహ్మవాక్యమబోధకమ్ ॥ ౨౪॥
- ఈదృషం తాదృషం వేతి న కిఞ్చిత్ వక్తుమర్హతి ।
- బ్రహ్మైవ సర్వం సతతం బ్రహ్మైవ సకలం మనః ॥ ౨౫॥
- ఆనన్దం పరమానదం నిత్యానన్దం సదాఽద్వయమ్ ।
- చిన్మాత్రమేవ సతతం నాస్తి నాస్తి పరోఽస్మ్యహమ్ ॥ ౨౬॥
- ప్రపఞ్చం సర్వదా నాస్తి ప్రపఞ్చం చిత్రమేవ చ ।
- చిత్తమేవ హి సంసారం నాన్యత్ సంసారమేవ హి ॥ ౨౭॥
- మన ఏవ హి సంసారో దేహోఽహమితి రూపకమ్ ।
- సఙ్కల్పమేవ సంసారం తన్నాశేఽసౌ వినశ్యతి ॥ ౨౮॥
- సఙ్కల్పమేవ జననం తన్నాశేఽసౌ వినశ్యతి ।
- సఙ్కల్పమేవ దారిద్ర్యం తన్నాశేఽసౌ వినశ్యతి ॥ ౨౯॥
- సఙ్కల్పమేవ మననం తన్నాశేఽసౌ వినశ్యతి ।
- ఆత్మైవ నాన్యదేవేదం పరమాత్మాఽహమక్షతః ॥ ౩౦॥
- నిత్యమాత్మమయం బోధమహమేవ సదా మహాన్ ।
- ఆత్మైవ నాన్యదేవేదం పరమాత్మాఽహమక్షతః ॥ ౩౧॥
- ఇత్యేవం భావయేన్నిత్యం క్షిప్రం ముక్తో భవిష్యతి ।
- త్వమేవ బ్రహ్మరూపోఽసి త్వమేవ బ్రహ్మవిగ్రహః ॥ ౩౨॥
- ఏవం చ పరమానన్దం ధ్యాత్వా ధ్యాత్వా సుఖీభవ ।
- సుఖమాత్రం జగత్ సర్వం ప్రియమాత్రం ప్రపఞ్చకమ్ ॥ ౩౩॥
- జడమాత్రమయం లోకం బ్రహ్మమాత్రమయం సదా ।
- బ్రహ్మైవ నాన్యదేవేదం పరమాత్మాఽహమవ్యయః ॥ ౩౪॥
- ఏక ఏవ సదా ఏష ఏక ఏవ నిరన్తరమ్ ।
- ఏక ఏవ పరం బ్రహ్మ ఏక ఏవ చిదవ్యయః ॥ ౩౫॥
- ఏక ఏవ గుణాతీత ఏక ఏవ సుఖావహః ।
- ఏక ఏవ మహానాత్మా ఏక ఏవ నిరన్తరమ్ ॥ ౩౬॥
- ఏక ఏవ చిదాకార ఏక ఏవాత్మనిర్ణయః ।
- బ్రహ్మైవ నాన్యదేవేదం పరమాత్మాఽహమక్షతః ॥ ౩౭॥
- పరమాత్మాహమన్యన్న పరమానన్దమన్దిరమ్ ।
- ఇత్యేవం భావయన్నిత్యం సదా చిన్మయ ఏవ హి ॥ ౩౮॥
సూతః -
- విరిఞ్చివఞ్చనాతతప్రపఞ్చపఞ్చబాణభిత్
- సుకాఞ్చనాద్రిధారిణం కులుఞ్చనాం పతిం భజే ।
- అకిఞ్చనేఽపి సిఞ్చకే జలేన లిఙ్గమస్తకే
- విముఞ్చతి క్షణాదఘం న కిఞ్చిదత్ర శిష్యతే ॥ ౩౯॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే బ్రహ్మభావనోపదేశప్రకరణం నామ పఞ్చత్రింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com